ၵေႃလိၵ်ႈလၢႆးဝဵင်းၵႃလိ၊ ၸုမ်းၶႅၵ်ႇလီပၢင်ၸႃႉၼမ်ႉၶူင်းလႄႈ ပီႈၼွင်ႉၵူၼ်းမိူင်းၵႃလိ တေႁူမ်ႈၵၼ် ၸတ်းႁဵတ်းပၢင်တၢၼ်ႈၶႆႈ ပိုၼ်ႉႁူႉပၢႆးႁၼ် ၼႂ်းႁူဝ်လိူၼ် ထူၼ်ႈ 8 ၼႆႉ ။

ပေႃးထိုင်မႃးဝၼ်းတီႈ 06/08/2016 ၵေႃလိၵ်ႈလၢႆးလႄႈ ၾိင်ႈငႄႈတႆးဝဵင်းၵႃလိ ၊ ၸုမ်းၶႅၵ်ႇလီပၢင် ၸႃႉၼမ်ႉၶူင်းလႄႈ ပေႃႈမႄႈပီႈၼွင်ႉၵူၼ်းမိူင်းၵႃလိ တေႁူမ်ႈၵၼ်ၸတ်းႁဵတ်း ပၢင်တၢၼ်ႈၶႆႈ “ပိုၼ်ႉႁူႉပၢႆးႁၼ်” ပိူဝ်ႈပူၵ်းပွင်ၼမ်ႉၵတ်ႉၵူၼ်းၼုမ်ႇၼႂ်းပိုၼ်ႉတီႈ ။


ၽူႈတေမႃးပၼ်ပိုၼ်ႉႁူႉတၢင်းႁၼ် မွၵ်ႇလၢတ်ႈၶေႃႈၵႂၢမ်း တီႈပၢင်တၢၼ်ႈၶႆႈမီး 3 ၵေႃႉ၊ ႁိုၼ်း ၵႃယၢင်း၊ ၶုၼ်ယုင်းၶဵဝ်၊ ၶူးသွၼ်လူင်ၸၢႆးၾႃႈ ။


ယိူင်းဢၢၼ်းဢၼ်လႆႈၸတ်းႁဵတ်း ပၢင်တၢၼ်ႈၶႆႈၼႆႉ ပိူဝ်ႈယုၵ်ႉယွင်ႈၼမ်ႉၵတ်ႉၵူၼ်းၼုမ်ႇ၊ ၶႂ်ႈႁႂ်ႈၵူၼ်းၼုမ်ႇပိုၼ်ႉတီႈႁူႉၶိုတ်းတၼ်းၶၢဝ်ႇငၢဝ်း၊ ႁူႉငဝ်းလၢႆးၵၢၼ်မိူင်း၊ ပၢႆးႁူႉႁၼ်လွင်ႈတႆး၊ ပဵၼ်ၵူၼ်းလၵ်းလႅမ်သႅမ်းၵႃႈ ၶိုတ်းၸၼ်ႉပဵင်းပိူၼ်ႈၼႆယဝ်ႉ ။


ၸၢႆးႁၢၼ် ၵူၼ်းၼုမ်ႇ ၽူႈတေၶဝ်ႈႁူမ်ႈပၢင်တၢၼ်ႈၶႆႈလၢတ်ႈဝႃႈ - “ၵူၼ်းၼုမ်ႇႁဝ်းဢမ်ႇမီးၶၢဝ်းယၢမ်း ဢၢၼ်ႇလိၵ်ႈ၊ မၢင်ၸိူဝ်းၵေႃႈဢမ်ႇလႆႈၸႂ်ဢၢၼ်ႇလိၵ်ႈ။ ၵွပ်ႈၼၼ်လႄႈ ထုၵ်ႇလီမီးပၢင်တၢၼ်ႈၶႆႈ ၼမ်ၼမ် ပၢင်တၢၼ်ႈၶႆႈၼႆႉမီးၼမ်ႉတွၼ်းၽွၼ်းလီ တွၼ်ႈတႃႇၵူၼ်းၼုမ်ႇႁဝ်းတႄႉတႄႉၶႃႈဢေႃႈ ” ဝႃႈၼႆ ။


ၵဵဝ်ႇၵပ်းလူၺ်ႈပၢင်တၢၼ်ႈၶႆႈၼႆႉသေ မိူဝ်ႈဝၼ်းတီႈ 26/07/2016 ယူႇတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတႃႈၶီႈလဵၵ်း ဢွၼ်ႁူဝ်ၼမ်းၼႃႈ တင်း ၸုမ်းတူင်ႉၼိုင်တူင်ႇဝူင်းၵူၼ်းတႆး ႁူမ်ႈၵၼ် ၸတ်းႁဵတ်း ပၢင်တၢၼ်ႈၶႆႈလိၵ်ႈလၢႆးပၢႆးႁၼ် တီႈဝတ်ႉ ဝၢၼ်ႈႁွင်ႇ ႁွင်ႈလိုၵ်ႉ (ဝတ်ႉၽိူဝ်ၶမ်း) ၸႄႈ ဝဵင်း တႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ၽူႈမႃးပၼ်ပိုၼ်ႉႁူႉတၢင်းႁၼ် မွၵ်ႈလၢတ်ႈ ၶေႃႈၵႂၢမ်း တီႈပၢင် တၢၼ်ႈၶႆႈမီး 3 ၵေႃႉ၊ ႁိုၼ်း ၵႃယၢင်း၊ ၶုၼ်ယုင်းၶဵဝ်၊ ၶူးသွၼ်လူင်ၸၢႆးၾႃႈ။ မီးပေႃႈမႄႈၵူၼ်း မိူင်းၼႂ်းပိုၼ်ႉတီႈတႃႈၶီႈလဵၵ်း လႄႈႁိမ်းႁွမ်း ၶဝ်ႈႁူမ်ႈထွမ်ႇငိၼ်း မွၵ်ႈ 500 ပၢႆ ။