ဢိင်ၼိူဝ် ပၢင်တိုၵ်း ဝူင်ႈၵၢင်သိုၵ်း RCSS/SSA တင်းသိုၵ်း PSLF/TNLA ပဵၼ်ပၢင်တိုၵ်းၵၼ် ၊ သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်းသိုၵ်းတဢၢင်း PSLF/TNLA  လႄႈၵူၼ်းမိူင်း ၸိူဝ်းပၢႆႈၽေးသိုၵ်း ႁွတ်ႈယူႇတီႈ ဝဵင်းၵျႂၵ်ႉမႄးၼၼ်ႉ ၵမ်ႈၼမ်ဢွၼ်ၵၼ်ပွၵ်ႈယူႇဝၢၼ်ႈၽႂ် ႁိူၼ်းမၼ်းသေတႃႉ တႃႇၵူၼ်း 100 ပၢႆယၢပ်ႇ ၽိုတ်ႇတႃႇ ပွၵ်ႇယူႇၶိုၼ်း တီႈဝၢၼ်ႈႁိူၼ်းၸဝ်ႈၵဝ်ႇ ။

ၵူၼ်းဝၢၼ်ႈၸိူဝ်းပၢႆႈၽေးသိုၵ်း မႃးမီးတီႈ ဝတ်ႉႁူဝ်ဝဵင်း (ဢေးမႅတ်ႉတႃႇ) ဝၢၼ်ႈပၢင်မွင် ၸႄႈဝဵင်း ၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ မီးၵူၼ်းလူင် ၊ၵူၼ်းထဝ်ႈလုၵ်ႈဢွၼ်ယူႇၸွမ်းၵၼ် ဝႆႉ ။ ၼႂ်းၼၼ်ႉမီးလုၵ်ႈဢွၼ်ႇ ဢၼ်ႁဵၼ်းလိၵ်ႈယူႇ 15 ၵေႃႉ ၊ ၸၢႆး 2ၵေႃႉ၊ ယိင်း 13 ၵေႃႉ၊ လိူဝ်ၼၼ်ႉ ပဵၼ်ၵူၼ်းဢႃယု သႅၼ်းၶၢဝ်ႉ / ၵႄႇ / ထဝ်ႈ ။


ၸဝ်ႈၺၢၼ်ႇၸွမ် ၼႃႇယၵ ဝတ်ႉႁူဝ်ဝဵင်း လၢတ်ႈဝႃႈ -“ မိူဝ်ႈလဵဝ်ၼႆႉ ၵူၼ်းပၢႆႈၽေးတိုၵ်ႉလူဝ်ႇတၢင်းၸွႆႈ ထႅမ်ၼမ်ယူႇ တုၵ်းယွၼ်းႁႂ်ႈၽူႈမီးပုၼ်ႈၽွၼ်း ၽူႈမီးၼမ်ႉၸႂ် ၊ ၽူႈမီးပၺ်ႇၺႃႇ ၶဝ်ႁႃလၢႆးတၢင်းၸွႆႈ ၵႄႈလိတ်ႈပၼ်ႁႃ ဢၼ်ပဵၼ်ယူႇယၢမ်းလဵဝ် ႁႂ်ႈၵူၼ်းမိူင်းလႆႈယူႇလီ ၵတ်းယဵၼ်သေၵမ်း ။


လိူဝ်ၼၼ်ၵေႃႈတုၵ်းယွၼ်းႁႂ်ႈၾၢႆႇတပ်ႉသိုၵ်းၶဝ် ႁၼ်ထိုင် ၵူၼ်းမိူင်းသေ လွင်ႈဢၼ်တေႁဵတ်းႁႂ်ႈ ၵူၼ်းမိူင်းယၢပ်ႇၸႂ်တုၵ်ႉၶၼၼ်ႉႁႂ်ႈၵိုတ်းယင်ႉသေၵမ်း ” ဝႃႈၼႆ ။
ၵူၼ်းပၢႆႈၽေးသိုၵ်း ၸိူဝ်းႁွတ်ႈတီႈ ဝတ်ႉႁူဝ်ဝဵင်းၼႆႉ မၢင်ၸိူဝ်းဢွၼ်ၵၼ်ၵႂႃႇႁဵတ်းၵၢၼ်ႁႃငိုၼ်းလၢႆးဝၼ်း သေတႃႉ ၵမ်ၼမ်ဢမ်ႇၸၢင်ႈၵႂႃႇႁႃႁဵတ်းၵိၼ်ၵၢၼ်သင် ၵူၺ်းလႆႈပိုင်ႈဢိင်ဢၼ် ၸဝ်ႈၽူႈ မီးၼမ်ႉၸႂ် မိူၼ်ၼင်ႇၾၢႆႇဢုပ်ႉပိူင်ႇ၊ ပႃႊတီႊၵၢၼ်မိူင်း ၊ ၸုမ်းၵူၼ်းၼုမ်ႇလႄႈၽူႈမီးၼမ်ႉၸႂ်လီ မႃးၸွႆႈထႅမ်လွင်ႈၶဝ်ႈ ၼမ်ႉတၢင်းၵိၼ် ၊ ၽႃႈႁူမ်ႇၶူဝ်းၼွၼ်း ၸဵမ်ၸိူဝ်းၼႆႉ ။


ၵူၼ်းပၢႆႈၽေးၵေႃႉၼိုင်ႈလၢတ်ႈဝႃႈ - “ ဝၢၼ်ႈႁဝ်း ၊ ႁိူၼ်းႁဝ်း ႁဝ်းၶႃႈၶႂ်ႈပွၵ်ႈၶႃႈဢေႃႈ ၸႂ်ထိုင်ၶႃႈဢေႃႈ ၵူၺ်းၵႃႈ ၶၢဝ်ႇငၢဝ်းငဝ်းလၢႆးမၼ်းဢမ်ႇပေႃးလီလႄႈ ႁဝ်းၶႃႈမႆႈၸႂ်လွင်ႈႁူမ်ႇလူမ်ႈ ပႆႇႁတ်း ပွၵ်ႈမိူဝ်းၶႃႈ ။ ပွၵ်ႈမိူဝ်းၵေႃႈဢမ်ႇႁူႉတေႁႃၵိၼ်သင် လူဝ်ႇဢိုပ်းၵူၺ်းယဝ်ႈၶႃႈ ” ဝႃႈၼႆ ။


မိူဝ်ႈဝၼ်းတီႈ 14/06/2016 ၼၼ်ႉယူႇတီႈၸဝ်ႈသင်ၶလႄႈၵူၼ်းမိူင်းလႆႈၵႂႃႇႁူပ်ႉထူပ်း ၸဝ်ႈပၢင်ႇၾႃႉ ႁူဝ်ပဝ်ႈလူင်ပႃႊတီႊမႂ်ႇသုင်ၸိုင်ႈတႆး SSPP/SSA သေလႆႈႁပ်ႉငိုၼ်းၵမ်ႉၸွႆႈမႃးတႃႇ 150 သႅၼ်ၵျၢတ်ႉ ။ ဢဝ်ငိုၼ်းၵွၼ်ႈၼႆႉသေသင်ၶၸဝ်ႈလႄႈၵူၼ်းမိူင်းၵျွၵ်ႉမႄးႁူမ်ႈၵၼ်သၢင်ႈ ႁူင်းသဝ်းၵူၼ်းပၢႆႈၽေး တႄႇၵေႃႇသၢင်ႈ မိူဝ်းလိူၼ်ၵျူၼ်ႊသေ တေဢၢၼ်းႁႂ်ႈယဝ်ႉၼႂ်းလိူၼ်ဢေႃႊၵတ်ႉသ် 2016 ၼႆႉဝႃႈၼႆ ။


ယွၼ်ႉပၢင်တိုၵ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA တင်းၶွင်ႊသီႊဢဝ်ၶိုၼ်းၸိုင်ႈတႆး RCSS/SSA လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်းမိူဝ်ႈႁူဝ်လိူၼ်မေႊၼၼ်ႉလႄႈ ႁဵတ်းႁႂ်ႈၵူၼ်းမိူင်း ၼပ်ႉႁူဝ်ႁဵင် လႆႈပၢႆႈယၢၼ် ႁိူၼ်းယေးတီႈယူႇ ။