ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) တင်း ၸုမ်းလွတ်ႈလႅဝ်းၶၢင် (KIO/KIA) ႁူပ်ႉထူပ်းဢုပ်ႇၵၼ် ၊ ႁၢင်ႈႁႅၼ်းပိူဝ်ႈတႃႇ ပၢင်ၵုမ်လူင်ႁူဝ်ပၢၵ်ႇပီ 21 လႄႈ ၵႄႈလိတ်ႈပၼ်ႁႃ ဝူင်ႈၵၢင် တႆးတင်းတဢၢင်း ။

မိူဝ်ႈဝၼ်းထီႉ 7-8/06/2016 ၼႆႉၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) တင်း ၸုမ်းလွတ်ႈလႅဝ်းၶၢင် (KIO/KIA) ႁူပ်ႉထူပ်းဢုပ်ႇၵၼ် ၼႂ်းၵဵင်းမႆႇ ၸိုင်ႈထႆး။ ၾၢႆႇ RCSS ၸွမ်သိုၵ်းယွတ်ႈသိုၵ်း ႁူဝ်ပဝ်ႈ RCSS/SSA ဢွၼ်ႁူဝ်ၼမ်းၼႃႈ ။ ၾၢႆႇ KIO ၵႅမ်ႁူဝ်ပဝ်ႈ KIO/KIA ဢႅၼ်ႇပၢၼ်းလႃႉ ဢွၼ်ႁူဝ်ၼမ်းၼႃႈ ။ ၵၢၼ်ႁူပ်ႉထူပ်းၵၼ်ပွၵ်ႈၼႆႉ ဢုပ်ႇဢူဝ်းတူၵ်ႇၶိူဝ်း လိၵ်ႈႁူမ်ႈမၢႆပၢင်လူင် 1947 ၊ ၼမ်ႉၸႂ်ပၢင်လူင် ၸိူဝ်းၼႆႉ - ၼႆယဝ်ႉ ။


ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ - သွင်ၾၢႆႇဢုပ်ႇဢူဝ်းၵၼ် လွင်ႈဢၼ်တေ ၶဝ်ႈပႃးၼႂ်း ပၢင်ၵုမ်လွင်ႈငမ်းယဵၼ် မိူင်းႁူမ်ႈတုမ် ပီႁူဝ်ပၢၵ်ႇ 21 ဢၼ်လူင်ပွင်ၸိုင်ႈမႂ်ႇ ႁွင်ႉမွၵ်ႇ (ၽိတ်ႈမွၵ်ႇ) မႃးထိုင် ၸုမ်းၸိူဝ်းပႆႇလူင်းလၢႆးမိုဝ်းလႄႈ ၸုမ်းၸိူဝ်းလူင်းလၢႆးမိုဝ်းယဝ်ႉ ႁႂ်ႈၶဝ်ႈႁူမ်ႈၸိူဝ်းၼၼ်ႉ ။ တင်း 2 ၸဝ်ႈ ႁၼ်ထိုင်ဝႃႈ ပေႃးၵဵဝ်ႇၵပ်းပၢင်လူင်ၼႆတႄႉ ၸႄႈမိူင်းဢၼ်ၶဝ်ႈပႃး ပဵၼ်ၸဝ်ႈၶွင်လိၵ်ႈႁူမ်ႈမၢႆပၢင်လူင် မိူၼ်ၼင်ႇၸႄႈမိူင်းတႆး ၊ ၸႄႈမိူင်းၶၢင် ၊ ၸႄႈမိူင်းၶျၢင်း ၸိူဝ်းၼႆႉ ၊ ၵွၼ်ႇၼႃႈပၢင်ၵုမ် ပီႁူဝ်ပၢၵ်ႇ 21 ၼၼ်ႉ ႁဝ်းထုၵ်ႇလီမႃးၵုမ်ၵၼ်သေဢုပ်ႇဢူဝ်း ႁႃၶေႃႈၸုၵ်းမၼ်ႈႁဝ်း ၊ ပိူဝ်ႈတႃႇလွင်ႈသၢင်ႈလွင်ႈငမ်းယဵၼ် ၸိုင်ႈမိူင်းလႄႈ သၢင်ႈၶိုၼ်းမိူင်းၾႅတ်ႊၻရႄႊလ် ဢၼ်ႁဝ်းၶဝ်ႈပႃးႁူမ်ႈဝႆႉယူႇ ၊ သိုပ်ႇၵႂႃႇတၢင်းၼႃႈၼၼ်ႉ မၼ်းလမ်ႇလွင်ႈပိူဝ်ႈတႃႇႁဝ်း ၼႆလႄႈၸင်ႇလႆႈမႃးႁူပ်ႉထူပ်းၵၼ် - ဝႃႈၼႆ ။


မၼ်းၸဝ်ႈသိုပ်ႇလၢတ်ႈဝႃႈ - ဢွၼ်တၢင်းသုတ်း တူၵ်ႇၶႆႈၶိူဝ်း လိၵ်ႈႁူမ်ႈမၢႆပၢင်လူင် ၊ ၶေႃႈပၼ်ၵႂၢမ်း မၼ်ႈၵႅၼ်ႇၵၼ် တီႈပၢင်လူင်လႄႈ ဢၼ်ၵိူတ်ႇမီးမႃးၼမ်ႉၸႂ်ပၢင်လူင်သေ  တႅၵ်ႈၼိူင်းထတ်းသၢင်တူၺ်းၶိုၼ်း ၊ ႁၢင်ႈႁႅၼ်းဝႆႉတႃႇပၢင်ၵုမ်ပၢင်လူင် ပိူဝ်ႈတႃႇၵႄႈၶႆၵၢၼ်မိူင်းႁဝ်းၵႂႃႇတၢင်းၼႃႈ ။ လုၵ်ႉတီႈပၢင်လူင် 1947 သေ တေယၢင်ႈၵႂႃႇၸူးပၢင်လူင် ပီႁူဝ်ပၢၵ်ႇ 21 ၼႆႉ ႁဝ်းသမ်ႉတေၸုၵ်းၼိူဝ်လွၵ်းလႂ်။ ယူႇတီႈ 3 ၸႄႈမိူင်း (မိူင်းတႆး ၊ ၶၢင် ၊ ၶျၢင်း ) ဢၼ်ၶဝ်ႈပႃးၼႂ်း လိၵ်ႈႁူမ်ႈမၢႆပၢင်လူင် 1947 တေႁူမ်ႈမိုဝ်းၵၼ်တင်း တၢင်ႇၸႄႈမိူင်းၸိူဝ်း ဢမ်ႇၶဝ်ႈပႃးၼႂ်းလိၵ်ႈႁူမ်ႈမၢႆပၢင်လူင် 1947 ၸိူင်ႉႁိုဝ် ၸိူဝ်းၼႆႉ ။


ၸုမ်းယိပ်းၵွင်ႈၵၢင်ႇႁဝ်းၶႃႈတင်းမူတ်းၼႆႉ ႁႂ်ႈမီးၶေႃႈပွင်ႇၸႂ်မိူၼ်ၵၼ် ၊ ႁႂ်ႈမီးၶေႃႈၸုၵ်းမၼ်ႈမိူၼ်ၵၼ်သေ ၶဝ်ႈႁူမ်ႈပႃးၼႂ်းပၢင်ၵုမ်လူင် ႁူဝ်ပၢၵ်ႇပီ 21 ၼႆႉ ။ ႁႂ်ႈမၼ်းပေႃးၵိူတ်ႇမႃးၼမ်ႉတွၼ်းၽွၼ်းလီ ၊ ႁႂ်ႈမၼ်းပေႃးၵိုင်ႇတင်း ဢၼ်ႁဝ်းယိပ်းၵွင်ႈၵၢင်ႇသေ လုၵ်ႉၽိုၼ်ႉတေႃႇသူႈဢဝ်ၶိုၼ်း သုၼ်ႇလႆႈသုၼ်ႇပဵၼ်ႁဝ်း ၊ မီးတၢင်းႁၼ်ထိုင်ၸိူင်ႉၼႆသေ တေသိုပ်ႇဢုပ်ႇဢူဝ်းၵၼ်ၵႂႃႇထႅင်ႈ ။ ၼႂ်းႁဝ်း 2 ၸႄႈမိူင်းၵူၺ်းပႆႇပေႃး ႁႂ်ႈပေႃးမီးထႅင်ႈလၢႆၸႄႈမိူင်း ။ ယူႇတီႈ 7 မိူင်းသေ ႁဝ်းၵေႃႇတင်ႈမႃးမိူင်းႁူမ်ႈတုမ် ၊ ၵွပ်ႈၼၼ် သိုပ်ႇၵႂႃႇၼႆႉ ႁဝ်းၶႃႈတေၸုၵ်းၼိူဝ်ၸႄႈမိူင်းၸိူင်ႉႁိုဝ် ၊ ႁႂ်ႈႁဝ်းပေႃးၸၢင်ႈသၢင်ႈလႆႈမိူင်းၵတ်းယဵၼ်သေ ယူႇသဝ်းႁူမ်ႈ ၸွမ်းၵၼ်ၵႂႃႇလႆႈ ၼင်ႇၵတ်းၵတ်းယဵၼ်ယဵၼ်ၼၼ်ႉ ၸင်ႇႁႃလွၵ်းလၢႆးၵႄႈၶႆပၼ်ႁႃၵၢၼ်မိူင်းႁဝ်းၶႃႈ ။ ပၢင်ဢုပ်ႇဢူဝ်းၵမ်းၼႆႉ ၸုမ်းၶျၢင်း CNF ဢမ်ႇမႃးၶဝ်ႈႁူမ်ႈလႆႈသေတႃႉၵေႃႈ ၶဝ်ႁၼ်လီယူႇ ။ လုၵ်ႉတီႈၼႆႈသေ ႁႂ်ႈမၼ်းဢုပ်ႇဢူဝ်းၵၼ်ၵႂႃႇ လႆႈၵႂၢင်ႈၵႂၢင်ႈၶႂၢင်ၶႂၢင် ၊ ၼင်ႇဢၼ်လႆႈတႄႇတင်ႈၸိုင်ႈမိူင်းႁူမ်ႈတုမ် မႃးၸွမ်းၵၼ်ၼၼ်ႉ ႁႂ်ႈပေႃးလႆႈၵႄႈၶႆၵၢၼ်မိူင်းၸွမ်းၵၼ်ၵႂႃႇ ၊ ႁႂ်ႈလႆႈၶဝ်ႈပႃးၵူႈၾၢႆႇ ၊ ယိူင်းဢၢၼ်းၸိူင်ႉၼႆ - ၽူႈၶၢၼ်ပၢၵ်ႇ RCSS လၢတ်ႈၵႂႃႇၼင်ႇၼႆ ။


ပၢင်ႁူပ်ႉၵၼ်သွင်ၾၢႆႇပွၵ်ႈၼႆႉ လႆႈဢုပ်ႇဢူဝ်းပႃး ပၼ်ႁႃဢၼ်ၵိူတ်ႇၶိုၼ်ႈ ဝူင်ႈၵၢင်တႆး RCSS/SSA တင်းတဢၢင်း PSLF/TNLA ။ လွင်ႈၼႆႉ ယူႇတီႈ RCSS/SSA ၵေႃႈ တုၵ်းယွၼ်းႁႂ်ႈ ၶွင်ႊသီႊႁူမ်ႈတုမ် ၵူႈၸၢဝ်းၶိူဝ်း (UNFC) ယူႇၵႄႈၵၢင်ၸွႆႈၵႄႈလိတ်ႈပၼ် - ၼႆယဝ်ႉ ။