ဝၼ်းတီႈ 24-30/06/2016 ငဝ်ႈငုၼ်းမုၵ်ႉၸုမ်းႁူင်းႁဵၼ်းထမ်မ ဝဵင်းၼမ်ႉၶမ်း ၸဝ်ႈၶူးၼၼ်ႇ တဝုၼ်ႇသ ဢွၼ်ႁူဝ်ၸတ်းႁဵတ်းပၢင်ၾိုၵ်းၽွၼ်ႉမေႃသွၼ်ႁူင်းႁဵၼ်းထမ်မ တီႈဝတ်ႉၸေႃးတိၵႃႇရူင်ႇ ဝၢၼ်ႈၵုၼ်လူင် ဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇ ။ မီးမေႃသွၼ်း 240 ပၢႆ ၊ သင်ၶၸဝ်ႈ 12 တူၼ် ၊ ၸဝ်ႈၶၢဝ် 2 ၸဝ်ႈ ၶိုၼ်ႈလဵပ်ႈႁဵၼ်းဢဝ် ။

ၶူးပူင်သွၼ်မီး14 ၵေႃႉ မိူၼ်ၼင်ႇ ၸဝ်ႈၶူးၼၼ်ႇတဝုၼ်ႇသ၊ ၸဝ်ႈၶူးထမ်မသီရိ ၊ ၸဝ်ႈၶူးပၼ်တိတ ၊ မေႃသွၼ်ၸၢႆးလႃႉဢွင်ႇ ၊ ၸၢႆးသႅင်မိူင်း ၊ ၼၢင်းမူဝ်သႅင်ၶိူဝ်း ၊ ၼၢင်းၸၢမ်ၶမ်း ၊ ၸၢႆးလၢဝ်ၶိူဝ်း ၊ ၸၢႆးၸၢမ်ႇ ထုၼ်း ၊ ၸၢႆးယီႈသႅင် ၊ ၼၢင်ႁွမ်လႅင်း ၊ ၸၢႆးလႃႉၸူဝ်း ၊ ၸၢႆးလိူၼ်ငိုၼ်းၸိုၼ်ႈ ၊ ၸၢႆးၼွႆႉ ၊ ၸၢႆးသၢႆၾႃႉ ၸိူဝ်းၼႆႉ ။


ပူင်သွၼ်ပၼ်တၢင်းႁူႉႁွပ်ႈတူဝ် ၊ လၢႆးၶႆႈဢပုမ်ႇ ၊ လၢႆးပူင်သွၼ် ၊ လၢႆးလဵၼ်ႈတၢင်းလဵၼ်ႈ Game၊၊ လွင်ႈ ပိူင်ပိုင်းလၵ်းမိူင်း Constitution 2008 ၊ လွင်ႈၸတ်းၵၢၼ်ႁဵၼ်းၵၢၼ်သွၼ်Edcation System ၊ လၢႆးၸတ်းဝၢင်းႁွင်ႈႁဵၼ်း Classroom Management ၸိူဝ်းၼႆႉ ။


ယိူင်းဢၢၼ်းၼင်ႇႁိုဝ်မေႃသွၼ်ၵူႈၵေႃႉ ပေႃးတေမီးၼမ်ႉၵတ်ႉ တဵမ်ထူၼ်ႈသေ ပွၵ်ႈမိူဝ်းပူၵ်းပွင်မူႇ ဝၢၼ်ႈ ပိုၼ်ႉတီႈၽႂ်မၼ်းၼႆယဝ်ႉ ။
ၸုမ်းပွင်ပဵၼ်ပၢင်သွၼ်ၵေႃႉၼိုင်ႈလၢတ်ႈဝႃႈ - “ ယိူင်းဢၢၼ်းဢၼ်ႁဝ်းၶႃႈလႆႈၸတ်းႁဵတ်းၼႆႉတႄႉ ပိူဝ်ႈတႃႇႁႂ်ႈၵိူတ်ႇဢွၵ်ႇမေႃသွၼ်ၼမ်ၼမ် ၼင်ႇႁိုဝ်တေၸၢင်ႈၵႂႃႇပူၵ်းပွင်ၼႂ်းဢိူင်ႇပိုၼ်ႉတီႈၽႂ်မၼ်း ႁႂ်ႈလုၵ်ႈဢွၼ်ႇပေႃးတေမီးပၺ်ႇၺႃႇၶိုတ်းၸၼ်ႉပဵင်းပိူၼ်ႈသေဢမ်ႇၵႃႈ  ႁႂ်ႈပေႃႈလႆႈႁဵၼ်းႁူႉလွင်ႈ ၾိင်ႈငႄႈႁိတ်ႈႁွႆးၸိူဝ်ႉၶိူဝ်းတူဝ်ၵဝ်ႇ မီးသိၼ်ထမ်းၸပ်းတူဝ်  ပေႃးယႂ်ႇမႃးႁႂ်ႈပေႃးပဵၼ် တီႈပိုင်ႈတီႈဢိင် ” ဝႃႈၼႆ ။


ၸဝ်ႈတႃႇၼ ဢၼ်မႃးလဵင်ႉလူၼႂ်းပၢင်ၾိုၵ်းၽွၼ်ႉတႄႉပဵၼ်ပီႈၼွင်ႉဝၢၼ်ႈၵုၼ်လူင်၊ၸုမ်းသင်ၶ ၼႃႇယၵ ၊ ၸုမ်းၼၢင်းဢေမႆႇ ၊ ၸုမ်းၼၢင်းသႅင်ႁွမ် (ငူၺ်ႇပၢၼ်းပိၼ်ႇ) ၊ ႁူင်းႁဵၼ်း ထမ်မၵုၼ်ႁႆး (ၸၢၼ်း) ၊ ပွၵ်ႉမူဝ်ၶမ်း ၊ ပွၵ်ႉၼွင်ဝူဝ်၊ ၸုမ်းၵေႃႇမိူင်းၶမ်း ၸိူဝ်းၼႆႉ ။


ပၢင်ၾိုၵ်းၽွၼ်ႉမေႃသွၼ်ႁူင်းႁဵၼ်းထမ်မၼႆႉ တႄႇၸတ်းႁဵတ်းမႃးမိူဝ်ႈပီ 2014 တီႈၵျွင်းတေႃႇၵၢင် ဝဵင်း မီးၽူႈၶိုၼ်ႈႁဵၼ်း 135 ၵေႃႉ ၊ ပွၵ်ႈၵမ်း 2 မိူဝ်ႈပီ 2015 တီႈဝတ်ႉၸေႇယသုၶ ၽူႈၶိုၼ်ႈႁဵၼ်း 150 ၵေႃႉ ၊ 2016 ပွၵ်ႈၼႆႉပဵၼ်ပွၵ်ႈတီႈ 3 ယဝ်ႉဝႃႈၼႆ ။