ၸုမ်းတူင်ႇဝူင်းတႆးလၢႆမူႇၸုမ်း ႁူပ်ႉထူပ်း တူဝ်တႅၼ်းၾၢႆႇသုၼ်ႇလႆႈၵူၼ်း ၸၢတ်ႈၸိုင်ႈ လုမ်ႈၾႃႉ UN



ဝၼ်းတီႈ 26/06/2016 ၼၢင်းယၼ်ႊႁီႊလီႊ တူဝ်တႅၼ်းၾၢႆႇသုၼ်ႇလႆႈၵူၼ်းၸၢတ်ႈၸိုင်ႈ လုမ်ႈၾႃႉ UN ႁွတ်ႈၽႅဝ် ၼႂ်းၸိုင်ႈတႆး ပွတ်းႁွင်ႇသေ ႁူပ်ႉထူပ်း လၢႆမူႇလၢႆၸုမ်း၊ ၼႂ်းၼၼ်ႉ ၸုမ်းၵူၼ်းၼုမ်ႈတႆး ၵေႃႈ ႁူပ်ႉထူပ်းၶႆႈၼႄငဝ်းလၢႆးမိူင်းတႆး ။


ဝၼ်းတီႈ 26/06/2016 ယၢမ်း 09:30-10:30 မူင်း ၸုမ်းၵေႃႁူမ်ႈသၢင်ႈ ၵူၼ်းၼုမ်ႇတႆး (TYN) တင်း ၸုမ်းၸဝ်ႈႁႆႈၸဝ်ႈၼႃး ၸိုင်ႈတႆး ႁူပ်ႉထူပ်း တင်ႇလၢတ်ႈၼႄႇ လွင်ႈငဝ်းလၢႆး ပၼ်ႁႃဢၼ်ပဵၼ် ၼႂ်းမိူင်းတႆးယၢမ်းလဵဝ် လွင်ႈပၢင်တိုၵ်းသိုၵ်းသိူဝ် လႄႈ လွင်ႈၵေႃႇသၢင်ႈၾၢႆၼိူဝ်မႄႈၼမ်ႉတူႈ ၸိူဝ်းၼႆႉ ။ ႁူပ်ႉထူပ်းၵၼ်တီႈ Golden Hill Hotel ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ။

Photo: Ying Lao Tai 
ၼၢင်းသႅင်လၢဝ် ၽူႈပွင်ၵၢၼ်ၼႂ်းၸုမ်း ၵေႃႁူမ်ႈသၢင်ႈ ၵူၼ်းၼုမ်ႇတႆး (TYN) လၢတ်ႈဝႃႈ “ ယူႇတီႈၸုမ်းၵူၼ်းၼုမ်ႇတႆး (TYN) ႁဝ်းၶႃႈသေ လႆႈတင်ႇလၢတ်ႈၼႄ 1. လွင်ႈဢၼ်ၵပ်းၵၢႆႇပၢင် တိုၵ်းၸိူဝ်းပဵၼ် ပူၼ်ႉမႃး ၼႂ်းမိူင်းတႆးႁဝ်း တီႈၵျွၵ်ႉမႄး ၊ မိူင်းဝီး လႄႈၵူႈတီႈတီႈ ၊ လွင်ႈပေႃႈမႄႈၵူၼ်းမိူင်းလႆႈလူႉသုမ်း သုၼ်ႇလႆႈသုၼ်ႇပဵၼ်ၵူၼ်း ၵူႈၾၢႆႇၾၢႆႇ ။ 2. လွင်ႈပၢႆႉလိၵ်ႈတႆးႁဝ်း ဢၼ်တိုၵ်ႉပဵၼ်ပၼ်ႁႃယူႇယၢမ်းလဵဝ် ၊ 3. တင်ႇၼႄလွင်ႈယၢပ်ႇၽိုတ်ႇၾၢႆႇပၢႆးပၺ်ၺႃ လုၵ်ႈဢွၼ်ႇၸိူဝ်းလႆႈပၢႆႈၽေးသိုၵ်းလႄႈ လွင်ႈသုၼ်ႇလႆႈပီႈၼွင်ႉလႆႈပၢႆႈၽေးသိုၵ်း ၸဵမ်ၸိူဝ်းၼႆႉ ။


ယူႇတီႈ တူဝ်တႅၼ်းၾၢႆႇသုၼ်ႇလႆႈၵူၼ်း ၸၢတ်ႈၸိုင်ႈလုမ်ႈၾႃႉ Ms Yanhee Lee ထၢမ်ဝႃႈ - “ ယူႇတီႈမၼ်းၼၢင်းတေၸွႆႈသင်လႆႈ ဝႃႈၼႆ ။ ယူႇတီႈၸုမ်းၵူၼ်းၼုမ်ႇႁဝ်း TYN လၢတ်ႈဝႃႈ ႁႂ်ႈၸွႆႈပၼ်ႁႅင်းဢီးတီႈ လူင်ပွင်ၸိုင်ႈ ႁႂ်ႈၸွႆႈၵႄႈလိတ်ႈပၼ်ႁႃ ဢၼ်ၵိူတ်ႇပဵၼ်ယူႇၼႂ်းမိူင်းတႆးၵူႈတီႈတီႈ မိူၼ်ၼင်ႇ ၸုမ်းလုမ်ႈၾႃႉ” ၵူႈၸုမ်းၸုမ်းၵေႃႈ ဢုပ်ႇၵုမ်ၸွမ်းလူင်ပွင်ၸိုင်ႈသေဢမ်ႇၵႃး ႁႂ်ႈမေႃမႃး ႁူမ်ႈၽူႈတၢင်တူဝ်ၵူၼ်းပိုၼ်ႉတီႈလႄႈ ပေႃႈမႄႈၵူၼ်းမိူင်းပိုၼ်ႉတီႈၼမ်ၼမ် ” ဝႃႈၼႆ ။


ၸၢႆးထမ်းဢၢႆႈ ၽူႈတင်တူဝ် ၸုမ်းၵေႃႁူမ်ႈသၢင်ႈ ၸဝ်ႈႁႆႈၸဝ်ႈၼႃး ၸိုင်ႈတႆး လၢတ်ႈဝႃႈ “ ပိူင်လူင်မၼ်းတႄႉ ႁဝ်းၶႃႈၵႂႃႇဢုပ်ႇဢူဝ်း လွင်ႈႁဵတ်းသၢင်ႈၾၢႆ ၼိူဝ်မႄႈၼမ်ႉတူႈ ယွၼ်ႉပိူဝ်ႈဝႃႈ  ဢမ်ႇမီးၵၢၼ်လူင်ႉလႅင်းၼႄၵူၼ်းမိူင်း / ၵူၼ်းပိုၼ်ႉတီႈ ၊ ဢမ်ႇမီးလွင်ႈၵတ်းယဵၼ် ၵၢၼ်သၢင်ႈၾၢႆၼိူဝ်မႄႈၼမ်ႉတူႈၼႆႉ ဢမ်ႇထုၵ်ႇလီႁဵတ်း ၊ ထႅင်ႈၾၢႆႇၼိုင်ႈၵေႃႈ ၼႂ်းမိူင်းတႆးႁဝ်း တင်းပွတ်းႁွင်ႇၼႆႉ တိုၵ်ႉပဵၼ်ပၢင်တိုၵ်းၵၼ် ႁၢဝ်ႈႁႅင်း ၊ ႁူင်းၵၢၼ် ဢၼ်ယႂ်ႇဢၼ်လူင်ၸိူဝ်းၼႆႉ ဢမ်ႇထုၵ်ႇလီႁဵတ်း” ။


သိုပ်ႇလၢတ်ႈထႅင်ႈဝႃႈ ႁူင်းၵၢၼ်ယႂ်ႇလူင် ဢၼ်မႃးပၵ်း တႃႇႁဵတ်းသၢင်ႈၾၢႆၼႂ်းမိူင်းမၢၼ်ႈသေဢမ်ႇဝႃႈ၊ မိူင်းတႆးသေဢမ်ႇဝႃႈ ၊ တေႃႈလဵဝ် ပႆႇထုၵ်ႇလီႁဵတ်း ၊ သင်ၸိူဝ်ႉဝႃႈ ၼႂ်းမိူင်းႁူမ်ႈတုမ်ၼႆႉ မၼ်းငမ်းယဵၼ် တႄႉယဝ်ႉၼႆၸိုင်  မိူဝ်းၼႃႈမႃး ၸင်ႇမႃးထတ်းသၢင်ႈၶိုၼ်း ဢုပ်ႇဢူဝ်း ငူပ်ႉငီႉၶိုၼ်းသေ ထုၵ်ႇႁဵတ်းၸင်ႇၵွႆႈႁဵတ်း လႆႈတင်ႇလၢတ်ႈၼႄၵႂႃႇ ၼင်ႇၼႆ ။


ၵဵဝ်ႇၵပ်းလူၺ်ႈ လွင်ႈပၢင်ႁူပ်ႉထူပ်းၵၼ်ၼႆႉသေ ယူႇတီႈတူဝ်တႅၼ်း ၾၢႆႇသုၼ်ႇလႆႈၵူၼ်း UN ၼၢင်းယၼ်ႊႁီႊလီႊ (Ms. Yanghee Lee) မွၵ်ႇၸုမ်းၵေႃႁူမ်ႈသၢင်ႈ ၵူၼ်းၼုမ်ႇတႆး (TYN) တင်း ၸုမ်းၵေႃႁူမ်ႈသၢင်ႈ ၸဝ်ႈႁႆႈၸဝ်ႈၼႃး ၸိုင်ႈတႆး လႄႈ ႁူမ်ႈပႃး ၸုမ်းၸၢဝ်းၶိူဝ်း ၼႂ်းမိူင်းတႆးထႅင်ႈလၢႆၸုမ်း ၸုမ်းတဢၢင်း (ပလွင်ႈ) ၊ ၸုမ်းၶၢင် ၸိူဝ်းၼႆႉၵေႃႈ ႁူပ်ႉထူပ်း ၼႆယဝ်ႉ ။


ယူႇတီႈၸုမ်းၵေႃႁူမ်ႈသၢင်ႈ ၵူၼ်းၼုမ်ႇတႆး လႆႈသူင်ႇတူဝ်တႅၼ်းၶဝ်ႈ 4 ၵေႃႉ ၊ ၸုမ်းၵေႃႁူမ်ႈသၢင်ႈ ၸဝ်ႈႁႆႈၸဝ်ႈၼႃး ၸိုင်းတႆး 2 ၵေႃႉ ၼႆယဝ်ႉ ။
ပူၼ်ႉမႃး 21/06/2016 ၼၢင်းယၼ်ႊႁီႊလီႊ(Ms. Yanghee Lee) တူဝ်တႅၼ်း ၾၢႆႇသုၼ်ႇလႆႈၵူၼ်း UN ၵဵဝ်ႇၵပ်းမိူင်းမၢၼ်ႈ ႁူပ်ႉထူပ်း ဢုပ်ႇၵုမ်ၵၼ်တင်း ၸုမ်းတူင်ႇဝူင်းတႆး တီႈတႃႈၵုင်ႈယဝ်ႉ ၵမ်းၼိုင်ႈ ။ တႄႇဢဝ် ဝၼ်းတီႈ 20/06/2016 ၶၢဝ်းတၢင်း 12 ဝၼ်း ၼၢင်းယၼ်ႊႁီႊလီႊ(Ms. Yanghee Lee)ၼႆႉ တေသိုပ်ႇႁူပ်ႉထူပ်း ၸုမ်းတူင်ႇဝူင်းၵူၼ်း ၼႂ်းမိူင်းၸၢဝ်းၶိူဝ်းလႄႈ ၼႂ်းမၢၼ်ႈ လၢႆလၢႆၸုမ်း ဝႃႈၼႆ ။





 
© 2012 All Rights Reserved | Asean Celebrity | Fonts @ AtFonts | Free Templates