တီႈၼႂ်းဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇၼၼ်ႉ ၸဝ်ႈၵွၼ်းဝတ်ႉ (ၸဝ်ႈသြႃႇၼင်ႈၵျွင်း) ၵႂႃႇလွမ်ႉႁူဝ်ႉပႃႇႁဵဝ်ႈသင်ၶ ဢၼ်မီးၼႂ်းဝၢင်းဝတ်ႉ ။ ၽွင်းတိုၵ်ႉလွမ်ႉႁူဝ်ႉယူႇၼၼ်ႉ ၽူႈၵွၼ်းၸႄႈဝဵင်း ပုင်ႇပႃႇၶႅမ် မႃးႁႄႉႁၢမ်ႈ၊ ႁႂ်ႈၼႄဝႂ်တီႈလိၼ် လွင်ႈဝႃႈပဵၼ်တီႈလိၼ်ၶွင်ဝတ်ႉ ၶူဝ်းၶွင်သႃသၼႃ ။

မိူဝ်ႈဝၼ်းတီႈ 06/06/2016 တူဝ်ၸဝ်ႈၵွၼ်းဝတ်ႉ / ၵျွင်းဝၢၼ်ႈလူင် တင်းၵေႃးပၵ လႄႈတၵ်ႉၵႃႇသတ်ႉထႃး ႁူမ်ႈၵၼ် ၵႂႃႇလွမ်ႉႁူဝ်ႉပႃႇႁဵဝ်ႈ (သၢင်းၶျႅင်း) မုၼ်ၸဝ်ႈၸိူဝ်းလူႉလွၼ်ႇၵႂႃႇ ဢၼ်မီးၼႂ်းဝၢင်းဝတ်ႉ ၊ တီႈၼႂ်းပွၵ်ႉ 1 ၼႂ်းဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် ။ ၽွင်းတိုၵ်ႉလွမ်ႉႁူဝ်ႉယူႇၼၼ်ႉ ၵေႃႉပဵၼ်ၽူႈၵွၼ်းၸႄႈဝဵင်း ပုင်ႇပႃႇၶႅမ် ဢူးၶၢႆႇဝူၺ်ႇလိၼ်း ၊ ၽႅဝ်မႃးသေ ၸႂ်ႉၵိုတ်းၵမ်းလဵဝ် - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၸဝ်ႈသြႃႇပုင်ႇပႃႇၶႅမ် လၢတ်ႈၼႄဝႃႈ- မိူဝ်ႈၵၢင်ၼႂ် 7 မူင်း ၊ မိူဝ်ႈၽွင်းၸဝ်ႈႁဝ်းၶဝ် တိုၵ်ႉႁႃ လွမ်ႉႁူဝ်ႉယူႇၼၼ်ႉ ဢၼ်ပဵၼ်ၽူႈၵွၼ်းၸႄႈဝဵင်း ၽႅဝ်ႁွတ်ႈမႃးသေ မႃးႁႄႉႁၢမ်ႈဝႃႈ ယႃႇပေႁႂ်ႈလွမ်ႉထႅင်ႈ ၊ ႁႂ်ႈၵိုတ်းၵမ်းလဵဝ်။ ပေႃးသိုပ်ႇလွမ်ႉႁူဝ်ႉထႅင်ႈ တေတီႉၺွပ်းၵူၼ်းႁဵတ်းၵၢၼ် ။ ၸဝ်ႈႁဝ်းသမ်ႉဝႃႈ ႁဝ်းၸႂ်ႉၶဝ် လွမ်ႉဢိူဝ်ႈ ၊ ပေႃးၶႂ်ႈတီႉၵေႃႈတီႉၸဝ်ႈႁဝ်းလႄႈ၊ ဝႃႈၸိူင်ႉၼႆသေ ႁဝ်းၸဝ်ႈၵေႃႈ ၸႂ်ႉသိုပ်ႇလွမ်ႉထႅင်ႈ - ဝႃႈၼႆ ။


တူၼ်ၸဝ်ႈသိုပ်ႇလၢတ်ႈဝႃႈ - ၽိူဝ်ႇသိုပ်ႇလွမ်ႉထႅင်ႈ ၊ ၽူႈၵွၼ်းၸႄႈဝဵင်း မႃးဝႃႈထႅင်ႈဝႃႈ ပေႃးၸဝ်ႈႁဝ်းၶဝ် ဢမ်ႇၼႄလႆႈဝႂ်တီႈလိၼ် ဝႃႈတီႈလိၼ်ဢၼ်ၼႆႉ ပဵၼ်တီႈလိၼ်ဝတ်ႉၼႆတႄႉ ဢမ်ႇပၼ်လွမ်ႉ ။ ၸဝ်ႈႁဝ်းၵေႃႈ ၸီႉၼႄၶုမ်ၵုတ်းမုၼ်ၸဝ်ႈ ၼႂ်းႁူဝ်ႉဢၼ်တိုၵ်ႉလွမ်ႉယူႇသေလၢတ်ႈဝႃႈ - ၶုမ်ၵုတ်းမုၼ်ၸဝ်ႈ ၶဝ်ၼႆႉ မီးမႃးလႆႈပၢၵ်ႇပီပၢႆယဝ်ႉ ၊ ဢမ်ႇလိူဝ်သေၼႆႉယဝ်ႉလၵ်းထၢၼ်မၼ်း ၊ ႁဝ်းတေၵႂႃႇဢဝ်လၵ်းထၢၼ် (သၢၵ်ႈသေႇ) လႂ်မႃးထႅင်ႈ ၊ ၼႆသေလႆႈတွၵ်ႉတႅၵ်ႉမေႃးမႄးၵၼ် - ဝႃႈၼႆ ။


လွင်ႈတၢင်းဢၼ်လႆႈမႃးႁၢမ်ႈၼၼ်ႉ ၾၢႆႇၽူႈၵွၼ်းၸႄႈဝဵင်းၶဝ် လၢတ်ႈၼႄဝႃႈ - ၶဝ်တေႁဵတ်းလုမ်း တႃႇပွၵ်ႉ 2 တၢင်းၼႃႈၶုမ်ၵုတ်းမုၼ်ၸဝ်ႈၸိူဝ်းၼၼ်ႉ ။ ယွၼ်ႉၶုမ်ၵုတ်းဢမ်ႇပေႃးၼမ်လႄႈ ၶဝ်တေႁဵတ်းလုမ်းတီႈလိၼ်ပဝ်ႇ ဢၼ်ၵိုတ်းဝႆႉၶိုင်ႈၼိုင်ႈ ၼႃႈ ၶုမ်ၵုတ်းၸိူဝ်းၼၼ်ႉ ၊ တေဢမ်ႇဢဝ်တင်းမူတ်းၼင်ႇၵဝ်ႇ ၊ ယွၼ်ႉၼႆလႄႈ ၸင်ႇလႆႈမႃးႁၢမ်ႈ - ၼႆယဝ်ႉ ။


ၸၢႆးဝိၼ်းမျၢတ်ႉဢူး ဢၼ်ပဵၼ်ၽွင်းတႅၼ်းသၽႃးၸႄႈမိူင်း (ၵဝ်ႇ) မိူင်းတူၼ် လၢတ်ႈဝႃႈ - ပေႃးတေမႃးယွၼ်း ဝႂ်တီႈလိၼ်ၼႆတႄႉ ဝဵင်းပုင်ႇပႃႇၶႅမ်တင်းဝဵင်းၼႆႉ ဢမ်ႇမီးၽႂ်မီးဝႂ်တီႈလိၼ် တီႈႁိူၼ်း ။ ပေႃးၾၢႆႇၽူႈၵွၼ်း ၸႄႈဝဵင်းၶဝ် ၶႂ်ႈလႆႈတီႈလိၼ် ၊ ၶႂ်ႈႁိမ်ဢဝ်တီႈလိၼ် ၊ ၶႂ်ႈသၢၼ်ၶတ်း ၽႅဝ်ၵႃႈၼၼ်ႉၵေႃႈ တၢင်ႇလၢတ်ႈ ၶိုၼ်ႈလုမ်းတြႃးလႄႈ ၊ ႁဝ်းၵူၼ်းဝၢၼ်ႈၵူၼ်းမိူင်းတေၶိုၼ်ႈလုမ်းတြႃးတင်းမူတ်း ။ ဢၼ်တႄႉမၼ်း ပဵၼ်တီႈလိၼ် သႃသၼႃ ဢမ်ႇမီးၽႂ်မႃးယူႇလႆႈ ။ တီႈၼႆႈ ပဵၼ်လိၼ်သႃသၼႃၼႆၵေႃႈ လၵ်းထၢၼ်မၼ်းမီးယူႇယဝ်ႉ ပႃႇႁဵဝ်ႈ ၶုမ်ၵုတ်းၸဝ်ႈသြႃႇၶဝ်ၸိူဝ်းၼႆႉ - ဝႃႈၼႆ ။


တီႈဢၼ်ၸဝ်ႈသြႃႇၶဝ် ၵႂႃႇလွမ်ႉႁူဝ်ႉဝႆႉယူႇၼႆႉ မၼ်းပဵၼ်လိၼ်ဝတ်ႉဝႃးလႄႈ ၸဝ်ႈသြႃႇၶဝ်ၵႂႃႇလွမ်ႉႁူဝ်ႉၵူၺ်း ။ ၼင်ႇႁိုဝ်ပိူၼ်ႈတေဢမ်ႇၶႂၢၵ်ႈၼႃႈလိၼ် ၶဝ်ႈမႃးၸူးတီႈၶုမ်ၵုတ်း ၊ တီႈဢၼ်ၵူၼ်းဝၢၼ်ႈၵူၼ်းမိူင်းသၢင်ႈဝႆႉ  ႁႂ်ႈပဵၼ်တီႈမဵတ်ႇမၢႆတွင်း၊ ၵွပ်ႈၼၼ် ၸဝ်ႈသြႃႇၶဝ်လႄႈတၵ်ႉၵႃႇ ၸင်ႇလႆႈၵႂႃႇလွမ်ႉႁူဝ်ႉ ။ ၼင်ႇႁိုဝ်တေလွမ်ႉႁူဝ်ႉ လႆႈၼၼ်ႉၵေႃႈ လႆႈဢၼုၺၢတ်ႈတီႈသင်ၶၼႃယၵ ၸႄႈမိူင်းယဝ်ႉ ။ ဢၼ်လွမ်ႉႁူဝ်ႉၼႆႉ ပဵၼ်တၢင်းၼႃႈ မၼ်းၵူၺ်း ၊ သင်ၸိူဝ်ႉဝႃႈမီးၸဝ်ႈတႃႇၼ ၶႂ်ႈမႃးလူႇတၢၼ်းငိုၼ်းတွင်းၼႆၵေႃႈ တေၶတ်းၸႂ်လွမ်ႉႁူဝ်ႉ တင်းသီႇၾၢႆႇ ၊ ၼင်ႇႁိုဝ်ပိူၼ်ႈတေဢမ်ႇၶၢမ်ႈၶဝ်ႈမႃးဢဝ် တီႈလိၼ်သႃသၼႃႁဝ်းလႆႈၼၼ်ႉ - ၸဝ်ႈသြႃႇဝတ်ႉဝၢၼ်ႈလူင် ပုင်ႇပႃႇၶႅမ် လၢတ်ႈၼႄၼင်ႇၼႆ ။