ၵူၼ်းဝၢၼ်ႈၵူၼ်းမိူင်း ၸိူဝ်းပဵၼ်ၵူၼ်းၼုမ်ႇ 7 ၵေႃႉ တင်းရူတ်ႉၵႃး 1 လမ်း ဢၼ်လုၵ်ႉၼမ်ႉၶမ်း လူင်းလႃႈသဵဝ်ႈ၊ ႁၢႆလၢႆၵႂႃႇတီႈ ၼိူဝ်သဵၼ်ႈတၢင်းၼမ်ႉၶမ်း - ၼမ်ႉၽၵ်းၵႃ ။ ၵူၼ်းၼႂ်းပိုၼ်ႉတီႈဝႃႈ - ၸုမ်းယိပ်းၵွင်ႈၵၢင်ႇ ၼႂ်းပိုၼ်ႉတီႈတီႉၺွပ်းၵႂႃႇ ၊ ႁဵတ်းႁႂ်ႈတၢင်းႁိူၼ်း ဢမ်ႇၸၢင်ႈၵပ်းသိုပ်ႇသေ မႆႈၸႂ်ဝႆႉ ။

မိူဝ်ႈဝၼ်းတီႈ 05/06/2016 ရူတ်ႉၵႃးၸၢႆးယီႈသႅင်မိူင်း ၵူၼ်းဝဵင်းၼမ်ႉၶမ်း ၊ သႅၼ်ႊတူဝ်ႊယူဝ်ႊတႃႊ မၢႆၵႃး FF 9723 ၊ တၢင်ႇၵူၼ်း 6 ၵေႃႉ ၊ (ႁူမ်ႈၵူၼ်းႁေႃႈၵႃး 7 ၵေႃႉ) လုၵ်ႉတီႈဝၢၼ်ႈၼမ်ႉတီး ဝဵင်းၼမ်ႉၶမ်းသေ တေလူင်းၵႂႃႇတၢင်းလႃႈသဵဝ်ႈ ၊ ၵႂႃႇႁၢႆလၢႆပႅတ်ႈၵၢင်တၢင်း ။ ႁၢႆလၢႆၵႂႃႇၼိူဝ်သဵၼ်ႈတၢင်း ၼမ်ႉၶမ်း - ၼမ်ႉၽၵ်းၵႃ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ။ ၵႃးလမ်းၼႆႉ လႅၼ်ႈၼိူဝ်သဵၼ်ႈတၢင်း ၼမ်ႉၶမ်း - လႃႈသဵဝ်ႈ - ဝဵင်းလိူဝ်ႇ (မၼ်းတလေး) - ၼႆယဝ်ႉ ။


ၵေႃႉပဵၼ်ပီႈဢၢႆႈ (ပီႈၼွင်ႉၶႅၼ်ႈတွင်ႉ) ၸၢႆးယီႈသႅင်မိူင်း လၢတ်ႈဝႃႈ - “ ၵူႈပွၵ်ႈၼႆႉ ၼွင်ႉၶႃႈၸၢႆးယီႈၼႆႉ မၼ်းၽႅဝ်တီႈလႂ်ၵေႃႈ မၼ်းသိုပ်ႇၾူၼ်ႊ ႁႃၶႃႈ ။ ၵူႈပွၵ်ႈတႄႉ ၶၢဝ်းတၢင်း 3 ၸူဝ်ႈမူင်းထိုင်လႃႈသဵဝ်ႈယဝ်ႉ ။ ပွၵ်ႈၼႆႉ မၼ်းဢမ်ႇသိုပ်ႇမႃးႁႃၶႃႈ ၊ ၶႃႈသိုပ်ႇႁႃမၼ်းၵေႃႈဢမ်ႇလႆႈ ။ ၸင်ႇလႆႈႁွင်ႉဢဝ်ပေႃႈမၼ်းသေ ၵႂႃႇၸွပ်ႇထၢမ်တူၺ်းၵူႈတီႈတီႈ၊ တၢင်းလၢၼ်ႇၼမ်ႉၽၵ်းၵႃၵေႃႈဝႃႈ လူတ်ႉၵႃးမၼ်းဢမ်ႇလႆႈလတ်းမႃးတၢင်းၼႆႉ - ၼႆယဝ်ႉ ။


ၽိူဝ်ႇထၢမ်တူၺ်းတူင်ႇဝူင်းၸဝ်ႈၵႃးၶဝ် လၢတ်ႈဝႃႈ- မိူဝ်ႈၽွင်းမၼ်းဢွၵ်ႇၵႂႃႇၼၼ်ႉ တီႈဝၢၼ်ႈၽႃလႅင် ၼႂ်းဢိူင်ႇၼမ်ႉၽၵ်းၵႃၼၼ်ႉ ၸုမ်းသိုၵ်းတဢၢင်း TNLA ၶဝ် ပိၵ်ႉဢိုတ်းသဵၼ်ႈတၢင်းသေ တိုၵ်ႉတူင်ႉၼိုင် ၵၢၼ်သိုၵ်းယူႇ ။ ၵွပ်ႈၼၼ် တေထုၵ်ႇတီႉၵႂႃႇပႃးယဝ်ႉႁိုဝ် ၸင်ႇလႆႈႁၢႆလၢႆဝႆႉ ႁဝ်းၶႃႈလၢမ်းၶၢတ်ႈၼင်ႇၼႆ ။ မိူဝ်ႈဝၼ်းတီႈ 5 ယၢမ်းၵၢင်ၼႂ် ၊ ၸုမ်းသိုၵ်း TNLA ၶဝ်တႅပ်းတူၼ်ႈမႆႉသေ မႃးႁႄႉၶႂၢင်တၢင်းဝႆႉတီႈႁိမ်း တၢင်းၶဝ်ႈဝၢၼ်ႈၽႃလႅင် ၊ ဢိင်ဢၢင်ႈဝႃႈ တိုၵ်ႉမႄးၵုမ်းတၢင်းယူႇၼႆသေ ႁႄႉဝႆႉမွၵ်ႈ 1 ၸူဝ်ႈမူင်းၸင်ႇပွႆႇ - ဝႃႈၼႆ ။


ၸဝ်ႈၵႃးၵေႃႉၼိုင်ႈ လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ - “ မိူဝ်ႈတႄႇမၼ်း ႁဝ်းၶႃႈထၢင်ႇဝႃႈၶဝ်ၶိုၼ်းမႄးၵုမ်း သဵၼ်ႈတၢင်းတႄႉယူႇ ၊ ၵူၺ်းၵႃႈဢမ်ႇၸႂ်ႈ။ မိူဝ်ႈႁဝ်းလတ်းမႃးတၢင်းဝၢၼ်ႈၽႃလႅင်ၼၼ်ႉ ႁဝ်းၶႃႈႁၼ်တႄႉ ၶဝ်ဢိုတ်းသဵၼ်ႈတၢင်းသေ တီႉဢဝ်လၢႆႊၵႃႊ (ရူတ်ႉသၢႆ) ၊ မတ်ႉမိုဝ်းသေႁွင်ႉၵႂႃႇၵူၼ်း 10 ၵေႃႉ ”- ဝႃႈၼႆ ။


ဝၢၼ်ႈၽႃလႅင် ဢိူင်ႇၼမ်ႉၽၵ်းၵႃ ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼႆႉ ပဵၼ်ဝၢၼ်ႈပီႈၼွင်ႉတႆးလႄႈ ပီႈၼွင်ႉတဢၢင်း ႁူမ်ႈၵၼ်ယူႇသဝ်းဝႆႉ ။ မၢင်ပွၵ်ႈမၢင်လႂ် ၸုမ်းသိုၵ်းၶၢင် KIA ၵေႃႈမႃးတူင်ႉၼိုင် ။ ၵူၺ်းၵႃႈ ၵမ်ႈၼမ်ပဵၼ်သိုၵ်းတဢၢင်း TNLA မႃးတူင်ႉၼိုင် - ၼႆယဝ်ႉ ။


လုင်းယီႈၽူး ၵႅမ်ႁူဝ်ပဝ်ႈပႃႊတီႊႁူဝ်သိူဝ် (SNLD) ၸႄႈဝဵင်းၼမ်ႉၶမ်းဝႃႈ - “ ပူၼ်ႉမႃး 3-4 ဝၼ်းၼႆႉၵေႃႈ ၵူၼ်းတဢၢင်း 2 ၵေႃႉ ၺႃးတီႉၺွပ်းၶႃႈႁႅမ်တၢႆ ။ ယၢမ်းလဵဝ် ၵူၼ်းတႆးၺႃးတီႉဝႆႉထႅင်ႈ ။ ၵွပ်ႈၼၼ်လႄႈ ပဵၼ်ၽွင်းပၢင်တိုၵ်းသိုၵ်းသိူဝ်ယူႇၼႆႉ ၵူၼ်းမိူင်းၸၢင်ႈတူၵ်းပဵၼ်ယိူဝ်ႇသိုၵ်း ။ ၵွပ်ႈၼၼ် ၶႂ်ႈၾၢင်ႉသတိပၼ် ပီႈၼွင်ႉတႆး ပႃးၸဵမ်ပီႈၼွင်ႉတဢၢင်းတင်းမူတ်းတင်းသဵင်ႈ ၊ ထုၵ်ႇလႆႈဝႆႉသတိၼၵ်းၼၵ်းၼႃၼႃသေ ၸင်ႇၵွႆႈဢွၵ်ႇၶၢဝ်းတၢင်းၵႂႃႇမႃး ။ ပေႃးပၼ်ႁႃမၼ်းယႂ်ႇၶိုၼ်ႈမႃးထႅင်ႈ ဢၼ်တေလႆႈၺႃးၸၢၵ်ႇမၼ်းၼႆႉ ပဵၼ်ၵူၼ်းမိူင်းၸၢဝ်းတႆး လႄႈတဢၢင်းၵူၺ်း ။ ဢမ်ႇၸႂ်ႈၸုမ်းယိပ်းၵွင်ႈၵၢင်ႇၶဝ် ”- ဝႃႈၼႆ ။


ပူၼ်ႉမႃးမိူဝ်ႈလိူၼ်မေႊ 6 ဝၼ်းၼၼ်ႉၵေႃႈ ဝၢၼ်ႈတႆးဝၢၼ်ႈႁူဝ်ပၢင်ႇ ဢိူင်ႇႁူဝ်ပၢင်ႇ (မိူင်းဝီး) ၸႄႈဝဵင်းၼမ်ႉၶမ်း ထုၵ်ႇၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶဝ်ႈဢဝ်ၾႆးၽဝ် ။ မိူဝ်ႈၼၼ်ႉ ၵူၼ်းၼႂ်းပိုၼ်ႉတီႈဝႃႈ ပဵၼ်ၼမ်ႉမိုဝ်းၸုမ်းသိုၵ်းတဢၢင်း TNLA ။ မိူဝ်ႈဝၼ်းတီႈ 04/06/2016 ၵူၼ်းၸၢဝ်းၶိူဝ်းတဢၢင်း ထုၵ်ႇတီႉၺွပ်းၶႃႈတၢႆ 2 ၵေႃႉ ၊ ၾၢႆႇၵူၼ်းတဢၢင်းၶဝ်ၼႄးဝႃႈ ပဵၼ်ၼမ်ႉမိုဝ်း ၶွင်ႊသီႊဢဝ်ၶိုၼ်းၸိုင်ႈတႆး RCSS/SSA ၼႆသေ လုၵ်ႉႁိုၼ်ႇၼႄၵၢင်ၸႂ် ။ ပၼ်ႁႃဝူင်ႈၵၢင်သိုၵ်း 2 ၸုမ်း ဢၼ်ၵိူတ်ႇၶိုၼ်ႈမႃးၼႂ်း ၸႄႈဝဵင်းၼမ်ႉၶမ်းၼႆႉ ၵူၼ်းမိူင်းတူၵ်းပဵၼ်ယိူဝ်ႇယူႇတိၵ်းတိၵ်း ။ ၾၢႆႇၼိုင်ႈၵေႃႈ ပိူဝ်ႈတႃႇၵႄႈလိတ်ႈပၼ်ႁႃၼႆႉ သွင်ၸုမ်းယင်းပႆႇႁပ်ႉဢုပ်ႇဢူဝ်းၵၼ် တေႃႇထိုင်ယၢမ်းလဵဝ် ။


ၸၢႆးယီႈသႅင်မိူင်း ဢၼ်ၵႃးမၼ်းႁၢႆဝႆႉၼႆႉ ႁေႃႈၵႃးလႅင်ႊ (ရူတ်ႉသၢႆ)သေ ႁႃၵိၼ်လဵင်ႉတွင်ႉ ၊ မၼ်းပဵၼ် ၵူၼ်းဝၢၼ်ႈၵူၼ်းမိူင်း ထမ်ႇမတႃႇၼိုင်ႈၵေႃႉၵူၺ်း ၊ မၼ်းဢမ်ႇႁဵတ်း ဢမ်ႇသူၼ်ၸႂ်ၵၢၼ်ဝၢၼ်ႈၵၢၼ်မိူင်းသင် ။ ယၢမ်းလဵဝ်  တီႈႁိူၼ်းမၼ်းၵေႃႈမီးမေးၼၢင်းမၼ်းလႄႈ လုၵ်ႈယိင်းဢွၼ်ႇဢႃယု 4 ၶူပ်ႇၵူၺ်း ။ တေႃႇထိုင်မိူဝ်ႈလဵဝ်ၼႆႉ ပႆႇလႆႈႁူႉၶၢဝ်ႇသင်လႄႈ ၶဝ်မႄႈလုၵ်ႈၵေႃႈဢွၼ်ၵၼ်မႆႈၸႂ်ႁွင်ႉႁွင်ႉႁႆႈႁႆႈယူႇ - ၵေႃႉပဵၼ်ပီႈဢၢႆႈ ၸၢႆးယီႈသႅင်မိူင်း လၢတ်ႈ ။


ယၢမ်းလဵဝ် ရူတ်ႉၵႃးၵူၼ်းမိူင်း ဢၼ်ႁၢႆလၢႆဝႆႉ ၼိူဝ်သဵၼ်ႈတၢင်းၼမ်ႉၶမ်း - ၼမ်ႉၽၵ်းၵႃၼႆႉ တင်းမူတ်းမီး 4 လမ်း ။ ပဵၼ်ၵႃးတၢင်းမူႇၸေႈ 3 လမ်း ၊ ၵႃးဝၢၼ်ႈၼမ်ႉတီး ၼႂ်းၸႄႈဝဵင်းၼမ်ႉၶမ်း 1 လမ်း ၊ ၵႃးၼမ်ႉၶမ်း ပဵၼ်ၵႃးၸၢႆးယီႈသႅင်မိူင်း ၊ မၢႆၵႃး FF 9723 ။ ၵဵဝ်ႇၵပ်းလွင်ႈၵူၼ်းႁၢႆဝႆႉၼႆႉၵေႃႈ ပေႃႈမႄႈပီႈၼွင်ႉၶဝ်ဢွၼ်ၵၼ် ၵႂႃႇ တၢင်ႇလၢတ်ႈတီႈ ၽူႈမီးပုၼ်ႈၽွၼ်းၾၢႆႇၽွင်းငမ်း ၊ ၸဝ်ႈၼႃႈတီႈပလိၵ်ႈ၊ သိုၵ်း ၶဝ်ဝႆႉယဝ်ႉ - လႆႈႁူႉၼင်ႇၼႆ ။


ၼိူဝ်သဵၼ်ႈတၢင်းၼမ်ႉၶမ်း - ၼမ်ႉၽၵ်းၵႃၼႆႉ ဝၢႆးလင်ၵႃးၵူၼ်းဝၢၼ်ႈၵူၼ်းမိူင်း တင်းၵူၼ်းမိူင်း ၸိူဝ်းဢွၵ်ႇတၢင်း ၵႂႃႇမႃး ထုၵ်ႇတီႉၺွပ်းယဝ်ႉ မိူဝ်ႈဝႃး (06/06/2016) ပဵၼ်ဢၼ်မွင်သဝ်ႈ တဵတ်ႇယဵၼ်ဝႆႉ ၊ ဢမ်ႇမီးရူတ်ႉၵႃး ၵႂႃႇမႃး။ ၵွပ်ႈၼၼ် တေလႆႈၾၢင်ႉၵႅမ်း သတိယႂ်ႇယႂ်ႇၼမ်ၼမ်သေၵႂႃႇမႃး ။ ပေႃးပဵၼ်လႆႈတႄႉ ၸႂ်ႉသဵၼ်ႈတၢင်း မူႇၸေႈ - လႃႈသဵဝ်ႈၼႆႉ လီတီႈသုတ်း- လုင်းယီႈၽူးလၢတ်ႈ ။