ဝၢၼ်ႈၵူၼ်း ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ႁၢမ်းၵႂႃႇတင်းၼမ် ၊ ၽွင်းသိုၵ်းမၢၼ်ႈႁၢင်ႈသိုၵ်းလေႃႇတိုၵ်း  တပ်ႉသိုၵ်းႁူမ်ႇလူမ်ႈငဝ်ႈငုၼ်းဝၢၼ်ႈႁႆး SSPP/SSA ။ ၵူၼ်းဝၢၼ်ႈၵေႃႈ ထုၵ်ႇသိုၵ်းမၢၼ်ႈတီႉၺွပ်းပေႃႉထုပ်ႉ ၸဵပ်းလိူဝ်ႁႅင်း ။ သင်ၶၸဝ်ႈၵေႃႈ လႆႈပၢႆႈယၢၼ်ဝတ်ႉဝႃး ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 18/05/2016 ၼၼ်ႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ (တပ်ႉမတေႃႇ) သေ ႁၢင်ႈသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ၼႂ်းၼႃႈတီႈၵုမ်းၵမ်ၸႄႈဝဵင်းမၢႆ 10 ၊ ပွတ်းတွၼ်ႈၼမ်ႉမႃႉ ဢိူင်ႇၼမ်ႉမႃႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။ ၽွင်းသိုၵ်းမၢၼ်ႈၶဝ် တေၶဝ်ႈတိုၵ်းတပ်ႉသိုၵ်းၸိုင်ႈတႆးၼၼ်ႉ သိုၵ်းမၢၼ်ႈယိုဝ်းၵွင်ႈၵႂႃႇၵူႈႁူးၵူႈတၢင်း ၸွမ်းၵွင်းၸွမ်းလွႆၸိူဝ်းၼၼ်ႉ ။


ယွၼ်ႉသိုၵ်းမၢၼ်ႈ ယိုဝ်းၵွင်ႈၵႂႃႇၵူႈႁူးၵူႈတၢင်းသေ ၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈ ၸိူဝ်းၵႂႃႇႁဵတ်းၵၢၼ် ၼႂ်းႁႆႈၼႂ်းသူၼ်ၶဝ်၊ ပေႃးလႆႈငိၼ်းသဵင်ၵွင်ႈၵေႃႈ ၼႅတ်ႈဢွၼ်ၵၼ်ပွၵ်ႈမႃးႁိူၼ်းၽႂ်မၼ်း ။ ၵူၺ်းၵႃႈ ၽွင်းၵူၼ်းဝၢၼ်ႈၶဝ်ပွၵ်ႈၶိုၼ်းႁိူၼ်းၼၼ်ႉ ၽႃႇၺႃးသိုၵ်းမၢၼ်ႈၸွမ်းတၢင်းသေ ထုၵ်ႇသိုၵ်းမၢၼ်ႈတီႉၺွပ်းၵႂႃႇ 8 ၵေႃႉ ။


ၼႂ်းၵူၼ်း 8 ၵေႃႉၼၼ်ႉ တႃႇ 6 ၵေႃႉ သိုၵ်းမၢၼ်ႈပွႆႇပၼ်ၶိုၼ်းယဝ်ႉ။ ၵူၺ်းၵႃႈ လုင်းဢေႃးဢွင်ႇ ၵူၼ်းဝၢၼ်ႈလူင် ၼမ်ႉမႃႉ၊ ဢၼ်လုၵ်ႉတီႈႁႆႈ ႁိမ်းၶူဝ်ၼၢင်းၾႃႉသေ ႁေႃႈရူတ်ႉ / ၵႃး ပွၵ်ႈၶိုၼ်းႁိူၼ်း ထုၵ်ႇသိုၵ်းမၢၼ်ႈတီႉၺွပ်း ၸွမ်းတၢင်း လႄႈ ၸၢႆးၵႃႉ ဝၢၼ်ႈလူင်ၼမ်ႉမႃႉ သွင်ၵေႃႉၼႆႉလွတ်ႈၶိုၼ်းမႃးသေတႃႉၵေႃႈ  ထုၵ်ႇၺႃးသိုၵ်းမၢၼ်ႈ ပူၼ်ႉပႅၼ်သုၼ်ႇလႆႈၵူၼ်း ၊ ၺႃးပေႃႉထုပ်ႉၸဵပ်းႁၢဝ်ႈႁႅင်း ၊ မိူဝ်ႈလဵဝ် လႆႈၵႂႃႇယူတ်းယႃတူဝ်ဝႆႉ တင်း 2 ၵေႃႉ ။ ရူတ်ႉၵႃးလုင်းဢေႃးဢွင်ႇၼၼ်ႉ သိုၵ်းမၢၼ်ႈဢဝ်ၵႂႃႇဝႆႉတီႈၼမ်ႉပွင်ႈယဝ်ႉ - ၸၢႆးလူႇ ၵူၼ်းၼမ်ႉမႃႉ ဝၢၼ်ႈလူင် လၢတ်ႈ ။


လိူဝ်သေၼၼ်ႉ မိူဝ်ႈဝၼ်းတီႈ 19/05/2016 သိုၵ်းမၢၼ်ႈၶဝ်တီႉၺွပ်းထႅင်ႈ ၸၢႆးဢေႃး ဢႃယု 35 ပီ၊ ယူႇဝၢၼ်ႈၼွင်ၼူၺ်း ( ၸိုဝ်ႈပေႃႈလုင်းၶႅမ်း ၸိုဝ်ႈမႄႈ ပႃႈၵျႃႇပီး ။) တင်း ၸၢႆးမူၼ်း ဢႃယု 18 ယူႇဝၢၼ်ႈၼႃးၵုၼ် ၊ ၸိုဝ်ႈပေႃႈ ၸၢႆးတီႉ ၊ ၸိုဝ်ႈမႄႈ ၼၢင်းၸိင်း ။ ၶဝ်သွင်ၵေႃႉၼႆႉ တေႃႇထိုင်မိူဝ်ႈလဵဝ် ပႆႇပွႆႇပၼ်ၶိုၼ်း ၊ ဢဝ်ၵႂႃႇဝႆႉတီႈလႂ် တၢႆႁိုဝ်လိပ်းႁိုဝ်ၵေႃႈ ဢမ်ႇလႆႈႁူႉၸွမ်းၶၢဝ်ႇသင် - ဝႃႈၼႆ ။


ဢိင်ၼိူဝ်သိုၵ်းမၢၼ်ႈ ၸႂ်ႉႁႅင်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) တီႈပွတ်းတွၼ်ႈၼမ်ႉမႃႉ ၸႄႈဝဵင်းသီႇပေႃႉ ၼႃႈတီႈတပ်ႉႁူမ်ႇလူမ်ႈငဝ်ႈငုၼ်းဝၢၼ်ႈႁႆး ၊ ၸႄႈဝဵင်းမၢႆ 10 သေ သိုၵ်းမၢၼ်ႈၸႂ်ႉတိုဝ်းပႃး ႁိူဝ်းဝိၼ်တိုၵ်းသိုၵ်းယိုဝ်းၸွႆႈ၊ ၼႂ်းၶၢဝ်းယၢမ်း 12:00 တေႃႇ 15:00 မူင်းဝၢႆးဝၼ်း၊ ႁဵတ်းႁႂ်ႈၵူၼ်းမိူင်း တူၵ်းၸႂ်တိုၼ်ႇ လႆႈဢွၼ်ၵၼ်ပၢႆႈယၢၼ်ႁိူၼ်းယေးတီႈယူႇ ။


ၵူၼ်းဝၢၼ်ႈၸိူဝ်းလႆႈပၢႆႈယွၼ်ႉၽေးသိုၵ်း ၽေးပၢင်တိုၵ်းၼၼ်ႉ မီးလၢႆလၢႆဝၢၼ်ႈ မိူၼ်ၼင်ႇဝၢၼ်ႈလူင် ၼမ်ႉမႃႉ ၊ ဝၢၼ်ႈပဵင်းသၢႆး၊ ဝၢၼ်ႈၼႃႈၵုၼ် ၊ ဝၢၼ်ႈၵျွင်းမႂ်ႇ ၊ ဝၢၼ်ႈၼႃးတေႃ ၊ ဝၢၼ်ႈၵုင်းပဝ်း ၊ ဝၢၼ်ႈပၢင်ငႃး၊ ဝၢၼ်ႈသၢႆးၶၢဝ် ၊ ဝၢၼ်ႈသၢႆးလႅင် ၊ ဝၢၼ်ႈၼွင်ၼူၺ်း ၊ ဝၢၼ်ႈၼႃးၼၼ်း ၸိူဝ်းၼႆႉ ႁူဝ်ၵူၼ်းၼပ်ႉႁူဝ်ပၢၵ်ႇ ။ ၵမ်ႈၽွင်ႈၵႂႃႇပၢႆႈသွၼ်ႈ တီႈဝတ်ႉမုၼ်ၸဝ်ႈ တီႈဝတ်ႉ / ၵျွင်းမၢၼ်ႈသူႈ ။ ၵမ်ႈၽွင်ႈပၢႆႈၵႂႃႇယူႇၸွမ်းပီႈၸွမ်းၼွင်ႉ ၊ ၵမ်ႈၽွင်ႈၵေႃႈပၢႆႈမႃး တၢင်းမိူင်းယႆ ၸိူဝ်းၼႆႉ - ၵူၼ်းၼုမ်ႇၸိူဝ်းမီးတီႈ ၵူၼ်းပၢႆႈၽေးလၢတ်ႈ ။


လိူဝ်သေၼၼ်ႉ ယွၼ်ႉသိုၵ်းမၢၼ်ႈယိုဝ်းမၢၵ်ႇလူင် တူၵ်းသႂ်ႇႁိမ်းဝတ်ႉ / ၵျွင်း ဢမ်ႇပေႃးၵႆၵျွင်းလူင်ၼမ်ႉမႃႉလႄႈ ၸဝ်ႈသၢင်ႇၸဝ်ႈၸၢင်းၶဝ် 94 တူၼ် လႆႈၶၢႆႉပၢႆႈၵႂႃႇယူႇဝႆႉတီႈ ဝတ်ႉၶၼ်ႇထီႇရႃႇမ ပွၵ်ႉမၢၼ်ႈၸၢတ်ႈ ဝဵင်းသီႇပေႃႉ - ၼႆယဝ်ႉ ။


လွင်ႈတၢင်းဢၼ်တပ်ႉသိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး SSPP/SSA ပွၵ်ႈၵမ်းၼႆႉ ပဵၼ်ယွၼ်ႉၵူၼ်းဝၢၼ်ႈ ဝၢၼ်ႈလူင်ၼမ်ႉမ ဢွၼ်ၵၼ်သၢၼ်ၶတ်း ၶူင်းၵၢၼ်ၶုတ်းထၢၼ်ႇႁိၼ် ၊ ၾၢႆႇၶွမ်ႊပၼီႊၶဝ် ဢမ်ႇၶႂ်ႈၵိုတ်းယိုတ်း ၵၢၼ်ၶုတ်းထၢၼ်ႇႁိၼ် ၊ ၵွပ်ႈဝႃႈၵၢၼ်ၶုတ်းထၢၼ်ႇႁိၼ်ၼႆႉ ယွၼ်ႉပႃးဝႆႉ ႁုၼ်ႈသူၼ်ႇ ၽူႈၵွၼ်းတိူင်း လႃႈသဵဝ်ႈ ပုၼ်ႈၼိုင်ႈ။ ပေႃးဝႃႈၵိုတ်းယိုတ်းပႅတ်ႈ ၵၢၼ်ၶုတ်းထၢၼ်ႇႁိၼ်ၼႆႉၸိုင် မၼ်းတေၵႂႃႇတုမ်ႉတိူဝ်ၵၢၼ်ပၢႆးမၢၵ်ႈမီး ၽူႈၵွၼ်းတိူင်းသိုၵ်းလႃႈသဵဝ်ႈ။ ၵွပ်ႈၼၼ် တူဝ်ၽူႈၵွၼ်းတိူင်းသိုၵ်း လႃႈသဵဝ်ႈ ၸင်ႇမႃးၼင်ႈတီႈ တပ်ႉၼမ်ႉပွင်ႈသေ ၸတ်းၵၢၼ်ၼႃႈသိုၵ်းၵမ်းသိုဝ်ႈ - ၵူၼ်းမိူင်းထုင်ႉၼမ်ႉမႃႉ လၢတ်ႈတီႈၵေႃၶၢဝ်ႇ ၼင်ႇၼႆ ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်ၸုမ်းဢၼ်ပႆႇတူဝ်ႈတၼ်း တႃႇတေလူင်းလၢႆးမိုဝ်း ၵိုတ်းယိုဝ်းတူဝ်ႈမိူင်း (NCA) ၼႆသေတႃႉ ပဵၼ်ၸုမ်းဢၼ်ၵေႃႇသၢင်ႈလွင်ႈငမ်းယဵၼ် လူင်းလၢႆးမိုဝ်းၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ်ဝႆႉ တင်း လူင်ပွင်ၸိုင်ႈတဵင်းၸဵင်ႇ ပူၼ်ႉမႃးမိူဝ်ႈႁူဝ်ပီ 2012 ။