ၵဵဝ်ႇၵပ်းလူၺ်ႈပၢင်တိုၵ်း ၼႂ်းၵႄႈ တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈတဢၢင်း (TNLA) မိူဝ်ႈႁူဝ်လိူၼ်မေႊ ဝၼ်းတီႈ 1 သေ RCSS ဢွၵ်ႇၶေႃႈပိုၼ်ၽၢဝ်ႇ 3 ၶေႃႈ ။ RCSS ၶႂ်ႈဢုပ်ႇဢူဝ်းၵႄႈလိတ်ႈပၼ်ႁႃ လူၺ်ႈလၢႆးၵတ်းယဵၼ် ။


ၼႂ်းလိၵ်ႈပိုၼ်ၽၢဝ်ႇၼၼ်ႉ ဢၼ်လမ်ႇလွင်ႈမၼ်း တႅမ်ႈဝႆႉဝႃႈ - မုင်ႈမွင်းတႃႇတေ ဢုပ်ႇဢူဝ်းၵႄႈလိတ်ႈပၼ်ႁႃ ၼႂ်းၵႄႈၵၢင်သွင်ၾၢႆႇလူၺ်ႈလၢႆးၵတ်းၵတ်းယဵၼ်ယဵၼ် ။ ဢၼ်ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) တင်း တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ယိုၼ်ႈမိုဝ်းမႃး ပိူဝ်ႈတႃႇႁဵတ်းပၼ်ၶဵဝ် ၼႂ်းၵႄႈဝူင်ႈၵၢင်သွင်ၾၢႆႇသေ ၸွႆႈၵႄႈလိတ်ႈပၼ် လွင်ႈတပ်ႉသိုၵ်းပူတ်းပွႆႇ ၸိူဝ်ႉၸၢတ်ႈတဢၢင်း (TNLA) တင်း RCSS/SSA ဢၼ်ပဵၼ်ပၼ်ႁႃၵၼ်ယူႇၼႆႉ RCSS/SSA ယိၼ်းလီႁပ်ႉတွၼ်ႈ - ၼႆယဝ်ႉ ။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ - ႁဝ်းၶႃႈယိၼ်းလီႁပ်ႉတွၼ်ႈ လၢႆလၢႆၾၢႆႇလႄႈ UNFC ၶဝ် ယိုၼ်ႈမိုဝ်းၶဝ်ႈမႃး ၸွႆႈၼႂ်းၵႄႈဝူင်ႈၵၢင်ႁဝ်း ႁႂ်ႈႁဝ်းထူပ်းၵၼ်။ မိူၼ်ၼင်ႇတီႈ ပၢင်ၵုမ်ပၢင်သၢင်း မီးလိၵ်ႈပိုၼ်ၽၢဝ်ႇဢွၵ်ႇမႃး တေၶဝ်ႈမႃးၵႄႈၶႆပၼ်ႁႃၸွႆႈႁဝ်းၶႃႈၸိူဝ်းၼၼ်ႉ ႁဝ်းၶႃႈဢဝ်မႃးဢုပ်ႇဢူဝ်းၵၼ်။ ၾၢႆႇႁဝ်းၶႃႈတႄႉ ပဵၼ်ဢၼ်ယိၼ်းလီယိၼ်းၸူမ်း ၊ ႁပ်ႉႁူမ်ၸူမ်းတွၼ်ႈၸွမ်း ဢၼ်တေမႃးၸွႆႈထႅမ် ၶပ်းၶိုင်ပၼ်ၼႂ်းၵၢင် တႃႇႁႂ်ႈႁဝ်းၶႃႈပေႃးလႆႈ ဢုပ်ႇဢူဝ်းၵၼ်ယူႇ - ဝႃႈၼႆ ။


ႁဝ်းၶႃႈႁဵတ်းပၢင်ၵုမ်ၵၼ် မိူဝ်ႈဝၼ်းတီႈ 26/05/2016 သေ မီးၶေႃႈတႅပ်းတတ်းဝႃႈ တေတႅမ်ႈလိၵ်ႈၸူးတီႈ UNFC တင်း UWSA ဢိၵ်ႇတင်း NDAA ၸုမ်းမိူင်းလႃး ၊ လွင်ႈ RCSS/SSA ယိၼ်းလီယိၼ်းၸူမ်း ၶွပ်ႈၵုၼ်းမုၼ်တၢင်ႇလႄႈ မုင်ႈမွင်းတႃႇတေလႆႈဢုပ်ႇဢူဝ်းၵၼ်သေ ၵႄႈၶႆပၼ်ႁႃၵႂႃႇဝႆးဝႆး ။ မီးၶေႃႈတႅပ်းတတ်းသေ တႅမ်ႈလိၵ်ႈသူင်ႇပၼ် မိူဝ်ႈဝၼ်းတီႈ 26 ၼၼ်ႉ ။ သူင်ႇလိၵ်ႈၸူးတီႈ UWSA ၶိုၼ်းယဝ်ႉ ၊ လွင်ႈဝႃႈႁဝ်းၶႃႈၶႂ်ႈဢုပ်ႇၵၼ်လူၺ်းလၢႆး ၵတ်းၵတ်းယဵၼ်ယဵၼ် - ၸဝ်ႈသိုၵ်းလူင်ၸၢႆးလႃႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ။


ၵူၺ်းၵႃႈ ဝၢႆးသေသူင်ႇလိၵ်ႈယဝ်ႉ ထိုင်မႃးမိူဝ်ႈဝၼ်းတီႈ 1 လိူၼ်မေႊၼၼ်ႉ တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းတဢၢင်း (TNLA) လႆႈပဵၼ်ပၢင်တိုၵ်းၵၼ်ထႅင်ႈ တီႈႁိမ်းဝၢၼ်ႈသၢႆးလိူင် ၊ ဝၢၼ်ႈဝုၼ်း ၊ ဝဵင်းမူၼ်း ၊ ဝၢၼ်ႈမိူင်းဝီး၊ လွႆႁွမ်လႄႈ တင်းဢိူင်ႇသၢႆးလိူင် ၼႂ်းၸႄႈဝဵင်းၼမ်ႉၶမ်း ။


ၵဵဝ်ႇၵပ်းလွင်ႈၼႆႉ ၸဝ်ႈသိုၵ်းလူင်ၸၢႆးလႃႉ သိုပ်ႇလၢတ်ႈထႅင်ႈဝႃႈ- RCSS ၼႆႉ တႅပ်းတတ်းမၵ်းမၼ်ႈဝႃႈ - (တႅဝ်းႁူမ်ႈပူတ်းပွႆႇမိူင်းပလွင်ႈ/ တပ်ႉသိုၵ်းၸိူဝ်ႉၸၢတ်ႈတဢၢင်း) PSLF/TNLA ၼႆႉ ဢမ်ႇပဵၼ်ၽူႈၶဵၼ် RCSS/SSA သေပွၵ်ႈ။ ႁဝ်းၶႃႈပဵၼ်ၵူၼ်းမိူင်း ဢၼ်ယူႇသဝ်းၸွမ်းၵၼ် ၼႂ်းၽႅၼ်ႇလိၼ်လဵဝ်ၵၼ် ၊ ၸႃႉႁူမ်ႈၶီ-လီႁူမ်ႈပူၺ်ႈမႃးၸွမ်းၵၼ် ၼႂ်းၽႅၼ်ႇလိၼ်မိူင်းတႆးႁဝ်းၶႃႈ ၼင်ႇၵၼ်လႄႈ ၵိူတ်ႇပၼ်ႁႃသင်မႃးၵေႃႈလီ ၊ ဢဝ်ၵၢၼ်သိုၵ်းၵႄႈၶႆပၼ်ႁႃၼၼ်ႉ မၼ်းဢမ်ႇယဝ်ႉတူဝ်ႈ ၊ မၼ်းဢမ်ႇၵတ်းယဵၼ်လႆႈ ။ ႁဝ်းၶႃႈမုင်ႈမွင်း ဢဝ်လၢႆးၵတ်းယဵၼ်ဢုပ်ႇဢူဝ်းၵၼ်ၵႄႈၶႆပၼ်ႁႃၵႂႃႇ - ဝႃႈၼႆ ။


တီႈၶေႃႈပိုၼ်ၽၢဝ်ႇ RCSS ၶေႃႈတီႈ 3 ၼၼ်ႉ လၢတ်ႈဝႆႉဝႃႈ - လၢႆးႁဵတ်းသၢင်ႈတပ်ႉသိုၵ်းတဢၢင်း TNLA ဢၼ်ႁၢင်ႈႁႅၼ်းသိုၵ်း မႃးလေႃႇတိုၵ်းယိုဝ်း တပ်ႉသိုၵ်းၸိုင်ႈတႆး (RCSS/SSA) ထႅင်ႈၸိူင်ႉၼႆၼႆႉ လႆႈႁူႉထိုင်ၵၢင်ၸႂ် TNLA လီလီဝႃႈ ၶဝ်ဢမ်ႇၶႂ်ႈဢဝ်လၢႆးၵတ်းယဵၼ်သေ ဢုပ်ႇဢူဝ်းၵႄႈလိတ်ႈပၼ်ႁႃ - ၼႆယဝ်ႉ ။


ၵူၺ်းၵႃႈ ၾၢႆႇပွင်ႇၶၢဝ်ႇတပ်ႉသိုၵ်းတဢၢင်း TNLA ပိုၼ်ၽၢဝ်ႇဝႆႉဝႃႈ - ပူၼ်ႉမႃးၼႂ်းလိူၼ်မၢတ်ႊၶျ် လႄႈလိူၼ်ဢေႊပရိူဝ်ႊလ် 2 လိူၼ်ၼႆႉ မၼ်းပဵၼ်ၶၢဝ်းၵူၼ်းၶိူဝ်းၸၢဝ်းတဢၢင်းပိတ်းၼဵင်ႈ ၊ ၼင်ႇႁိုဝ်တေဢမ်ႇပဵၼ်ပၢင်တိုၵ်းၼၼ်ႉ ၾၢႆႇတပ်ႉတဢၢင်းလႆႈၶတ်းၸႂ်ဝႄႈမႃးယူႇသေတႃႉ ၾၢႆႇတပ်ႉ RCSS/SSA သမ်ႉ ပူၼ်ႉပႅၼ်ၶဝ်ႈမႃးၼႂ်းၼႃႈလိၼ်တဢၢင်းလႄႈ ၸင်ႇလႆႈပဵၼ်ပၢင်တိုၵ်းၵၼ်ၶိုၼ်းၶိူဝ်းယႂ်း - ၼႆယဝ်ႉ ။


ၵဵဝ်ႇၵပ်းလွင်ႈငမ်းယဵၼ်သေ ၸဝ်ႈႁၢၼ်မၢႆႇဢၢႆႈၵျေႃႇ ၽူႈၶၢၼ်ပၢၵ်ႇ TNLA ၵေႃႈလၢတ်ႈဝႃႈ - တင်းလူင်ပွင်ၸိုင်ႈမႂ်ႇ ပႆႇလႆႈတူၵ်းလူင်း လွင်ႈငမ်းယဵၼ်ၵၼ်သေတႃႉ TNLA  တႄႉၶႂ်ႈဢုပ်ႇဢူဝ်းလွင်ႈငမ်းယဵၼ်ယူႇ - ယၢမ်ႈလၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ် လူင်းလၢႆးမိုဝ်း ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် တင်းလူင်ပွင်ၸိုင်ႈတဵင်းၸဵင်ႇဝႆႉ ပိူဝ်ႈတႃႇၵေႃႇသၢင်ႈ လွင်ႈငမ်းယဵၼ် ဢိၵ်ႇတင်းယင်းပဵၼ်ၸုမ်းဢၼ်လူင်းလၢႆးမိုဝ်းလိၵ်ႈၵိၼ်ၵႅၼ်ႇၵၢၼ်ၵိုတ်းယိုဝ်းတူဝ်ႈမိူင်း (NCA) ဝႆႉတင်းလူင်ပွင်ၸိုင်ႈမၢၼ်ႈ ။ တႅဝ်းႁူမ်ႈပူတ်းပွႆႇမိူင်းပလွင်ႈ တပ်ႉသိုၵ်းၸိူဝ်ႉၸၢတ်ႈတဢၢင် (PSLF/TNLA) ပဵၼ်ၸုမ်း ပႆႇလူင်းလၢႆးမိုဝ်းသေဢၼ် ။