ၵူၼ်းၼုမ်ႇလႄႈပီႈၼွင်ႉၵူၼ်းမိူင်းသူႈၵဵပ်းယုၵ်းယၢၵ်းႁဵတ်းလွင်ႈမူတ်းသႂ်လၢႆတီႈ ၼႂ်းဝဵင်းမိူင်းသူႈ မိူၼ်ၼင်ႇၼမ်ႉ ငႃႉ၊ၽြႃးလူင်ၵၢင်ဝဵင်း ၸိူဝ်းၼႆႉယိူင်းဢၢၼ်း ႁႂ်ႈဝၢၼ်ႈမိူင်းၸိုၼ်ႈၸၢင်ႇမူတ်းသႂ် ၵူၼ်းၼႂ်းပိုၼ်ႉတီႈလၢတ်ႈ ။


မိူဝ်ႈဝၼ်းတီႈ 30/04/2016 ၼႆႉၸုမ်းၵူၼ်းၼုမ်ႇမိူင်းသူႈ ၊ ၶႃႈႁၢပ်ႇၵၢၼ်ၶုၼ်လႄႈၵူၼ်းမိူင်းႁူမ်ႈ ၵၼ်သေလူင်းၵဵပ်းယုၵ်းယၢၵ်းႁဵတ်းလွင်ႈမူတ်းသႂ် ၼႂ်းဝၢၼ်ႈ ၊ ဝဵင်း မိူၼ်ၼင်ႇတီႈသွင်ၾၢၵ်ႇၶၢင်ႈ ၼမ်ႉငႃႉလႄႈႁိမ်းႁွမ်း ၽြႃးလူင်ၵၢင်ဝဵင်းၸိူဝ်းၼႆႉ ၵူၼ်းၶဝ်ႈႁူမ်ႈတင်းသဵင်ႈ 300 ၵေႃႉပၢႆ ။

Photo by Hseng Herng

ယိူင်းဢၢၼ်းၼင်ႇႁိုဝ်တေပဵၼ်တူဝ်ယၢင်ႇလီတွၼ်ႈတႃႇမိူဝ်းၼႃႈ ၼင်ႇႁိုဝ်ၵူၼ်းမိူင်းသူႈလႄႈ လုၵ်ႈလၢၼ်တေမေႃႁၵ်ႉသႃလွင်ႈမူတ်းသႂ်ဢမ်ႇပႅတ်ႈယုၵ်းယၢၵ်းမၢၵ်ႇမိူဝ်၊ႁႂ်ႈပႅတ်ႈယုၵ်းယၢၵ်းပဵၼ်တီႈပဵၼ်တၢင်း ၊ မေႃၸႅၵ်ႇၽေယုၵ်းယၢၵ်းၼဝ်ႈလႄႈယုၵ်းယၢၵ်း ဢၼ်တေၸၢင်ႈၶိုၼ်း ဢဝ်ၸႂ်ႉလႆႈ ၊ ႁႂ်ႈမေႃၸွႆႈၵၼ်ႁဵတ်းလွင်ႈမူတ်းသႂ် လုမ်းလႃးသိင်ႇဝႅတ်ႉလွမ်ႉၸဵမ်ၸိူဝ်းၼႆႉ ။


ၼၢင်းယိင်း ၵူၼ်းမိူင်းသူႈလၢတ်ႈဝႃႈ - “ လွင်ႈဢၼ်လူင်းၵဵပ်းယုၵ်းယၢၵ်းၼႆႉၵူၼ်းဝႃႈလီၵေႃႈမီးၵူၼ်း ဢမ်ႇႁၼ်လီၵေႃႈမီးယူႇတႃႇတေတိုၵ်းသူၼ်းႁႂ်ႈၵူၼ်းၼုမ်ႇလႄႈၵူၼ်းမိူင်းပေႃးတေပွင်ႇၸႂ်ၼႆႉလႆႈၸႂ်ႉ ၶၢဝ်းယၢမ်းပဵၼ်လၢႆပီႈၶႃႈ ၵွပ်ႈၼၼ်လႄႈၼင်ႇႁိုဝ်ၾိင်ႈၾႃႉတေလီ ၊ ၼမ်ႉတေသႂ်လီ ၊ သိင်ႇဝႅတ်ႉ လွမ်ႉႁဝ်းပေႃးတေႁၢင်ႈလီၼၼ်ႉႁဝ်းၶႃႈမီးပုၼ်ႈၽွၼ်းၵူႈၵေႃႉ ။


ပေႃးၾိင်ႈႁိမ်းႁွမ်းႁဝ်းမူတ်ႈသႂ်ၵေႃႈ ၵူၼ်းယူႇသဝ်းမၼ်းၵေႃႈတေမီးပၢႆးယူႇလီၶႅမ်ႉ၊ဝၢၼ်ႈမိူင်းၵေႃႈ တေႁၢင်ႈလီၼႆလႄႈၶႂ်ႈတိုၵ်းသူၼ်းထိုင်ႈၵူႈၵေႃႉဝႃႈ ဢမ်ႇလီပႅတ်ႈယုၵ်းယၢၵ်းတူၵ်းၼမ်ႉ ။


ၵူၼ်းၼုမ်ႇမိူင်းသူႈၼႆႉတႄႇလူင်းၵဵပ်းယုၵ်းယၢၵ်း မိူဝ်ႈႁၢင်ႈပီ 2014 ၵဵပ်းယုၵ်းယၢၵ်းၵူႈဝၼ်းသဝ် ။ မိူဝ်ႈၽွင်းၶၢဝ်းၾူၼ်လႄႈၽွင်းပဵၼ်ပၢင်တိုၵ်းၼၼ်ႉလႆႈလိုဝ်ႈၵႂႃႇၵမ်းၼိုင်ႈသေ ၶိုၼ်းမႃး တႄၵဵပ်း ၶိုၼ်းႁူဝ်ပီ 2016 ။ ၽွင်းၼၼ်ႉမီးၵူၼ်း 40 - 50 ၵေႃႉၵူၺ်း ။ ယၢမ်းလဵဝ် တႄႉမီးၵူၼ်းမႃးႁူမ်ႈၵဵပ်း ယုၵ်းယၢၵ်း 300 ၵေႃႉယဝ်ႉ ။ သိုပ်ႉၼႆႉၵႂႃႇတေဢၢၼ်းၸူဝ်းၵၼ်ၵဵပ်း ၼိုင်ႈလိူၼ်လႂ် 2 ပွၵ်ႈဝႃႈၼႆ ။


ဝဵင်းမိူင်းသူႈၼႆႉမီး 4 ပွၵ်ႉ ။ ပဵၼ်ဝဵင်းဢၼ်ဢွၵ်ႇၵႅဝ်ႈသႅင် ၸိုဝ်ႈသဵင်လိုဝ်းလငၼႂ်းလုမ်ႈၾႃႉ ။ မီးလၢႆလၢႆၸၢဝ်းၶိူဝ်း လၢႆလၢႆၽႃႇသႃႇ - သႃသၼႃႇ လုၵ်ႉလၢႆတီႈလၢႆ တၢင်းမႃးယူႇ သဝ်းႁႃ ၵိၼ် လဵင်ႉတွင်ႉ ။