ၸွမ်သိုၵ်းယွတ်ႈသိုၵ်း ဢွၼ်ႁူဝ်ၼမ်းၼႃႈ လုၵ်ႈၸုမ်း ၵႂႃႇဢႅဝ်ႇယိမ်ႉသူႇၸႂ်း ၸွမ်ၽွင်းလူင် မိူင်းတႆး သၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ် တီႈဝဵင်းတူၼ်ႈတီး ။

ဝၼ်းတီႈ 24/05/2016 ယၢမ်းၵၢင်ၼႂ် ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး ၸွမ်သိုၵ်းယွတ်ႈသိုၵ်း ဢွၼ်ႁူဝ်ၼမ်းၼႃႈ လုၵ်ႈၸုမ်း 10 ပၢႆ ၵႂႃႇဢႅဝ်ႇယိမ်ႉသူႇၸႂ်း ၸွမ်ၽွင်းလူင် မိူင်းတႆး Dr. လိၼ်းထုတ်ႉ တီႈႁွင်ႈပၢင်ၵုမ်လူင်ပွင်ၸိုင်ႈ မိူင်းတႆး ဢၼ်မီးတီႈဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်း ။


ၸွမ်သိုၵ်းယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး လၢတ်ႈဝႃႈ “ လွင်ႈႁူပ်ႉထူပ်းၵၼ်ၼႆႉ ယွၼ်ႉပိူဝ်ႈပဵၼ်ၸွမ်ၽွင်းလူင်မိူင်းတႆး ၵေႃႉမႂ်ႇလႄႈ မႃးႁူပ်ႉထူပ်းၵၼ်လူၺ်ႈ လွင်ႈယုမ်ႇယမ် မိုတ်ႈၵိုဝ်းၸမ်ၸႂ်ၵၼ်ၵူၺ်း ၊ ၼႂ်းၵၢၼ်ႁူမ်ႈသၢင်ႈ ႁုၼ်ႈမုၼ်းမႂ်ႇသုင်ၸိုင်ႈတႆးၼၼ်ႉ RCSS/SSA တေလႆႈၶဝ်ႈပႃးၶၵ်ႉလႂ် တွၼ်ႈလႂ် ၊ RCSS/SSA တေလႆႈၸွႆႈသင် တေလႆႈႁူမ်ႈမိုဝ်းလူင်ပွင်ၸိုင်ႈမိူင်းတႆးသေ ႁဵတ်းၸိုင်ႉႁိုဝ် ႁဵတ်းၵၢၼ်ငၢၼ်းၵႂႃႇ ” ဝႃႈၼႆ ။


ၸွမ်ၽွင်းလူင်မိူင်းတႆး Dr.လိၼ်းထုတ်ႉ ဢွၼ်ႁူဝ်ၼမ်းၼႃႈ ၽွင်းလူင်တင်း ၶႃႈႁၢပ်ႇၵၢၼ်ၶုၼ် လူင်ပွင်ၸိုင်ႈမိူင်းတႆးသေ ပႂ်ႉႁပ်ႉတွၼ်ႈႁူပ်ႉထူပ်းၸွမ်သိုၵ်းယွတ်ႈသိုၵ်း ။


ပူၼ်ႉမႃး ဝၼ်းတီႈ 21/05/2016 ၼႂ်းဝၼ်းလိူၼ်ႁူၵ်းမူၼ်းၼၼ်ႉ ၸွမ်သိုၵ်း ယွတ်ႈသိုၵ်း တင်းမေးၼၢင်း ၼၢင်းလိူၼ်ၶမ်း ႁူမ်ႈလူၺ်ႈ လုၵ်ႉၼွင်ႉပွင်ပၢႆသေ ပဵၼ်ၸဝ်ႈတႃၼ တင်ႇထီးထၢတ်ႈၸေးတီး (ၵွင်းမူး) တၼ်းၸႂ် တီႈမူၺ်ႇတေႃႇၵၢတ်ႇၵူႇ ၸႄႈဝဵင်းတူၼ်ႈတီး ၼႆယဝ်ႉ ။