ႁႅင်းၵၢၼ်ၵူၼ်းတႆးထုင်ႉပူင်း ၶဝ်ႈႁဵတ်းၵၢၼ်ၼႂ်းမိူင်းထႆး ၼႃႈၵၢၼ်ၵေႃႇသၢင်ႈ / ၸၢင်ႈၸိူမ်ႈလဵၵ်း ထုၵ်ႇၾႆးၾႃႉသျွတ်ႉ ၊ လႆႈလူႉသဵင်ႈတၢႆၵႂႃႇ တီႈႁူင်းယႃသႃၽီး ၸႄႈတွၼ်ႈၵဵင်းမႆႇ ။


ပူၼ်ႉမႃးမိူဝ်ႈဝၼ်းတီႈ 08/05/2016 ႁႅင်းၵၢၼ်ယၢၼ်မိူင်း ၵေႃႉလုၵ်ႉမိူင်းတႆး ၶဝ်ႈႁဵတ်းၵၢၼ်ၼႂ်းမိူင်းထႆး၊ ၸိုဝ်ႈၸၢႆးထုၼ်းမွင်ႇ ဢႃယု 34 ပီ ၊ လႆႈထုၵ်ႇၾႆးၾႃႉသျွတ်ႉ ၽွင်းႁဵတ်းၵၢၼ်ၸိူမ်ႈလဵၵ်း (ၶျိူမ်ႉလဵၵ်း) ။ မၼ်းၸၢႆး လႆႈလူႉတၢႆၵႂႃႇတီႈႁူင်းယႃ သႃရၽီး ၶၢဝ်းယၢမ်း 15:30 မူင်း ၼႂ်းဝၼ်းတီႈ 8 ၼၼ်ႉ - ၼႆယဝ်ႉ ။

မိူဝ်ႈလဵဝ် ၾၢႆႇပီႈၼွင်ႉၸိူဝ်ႉၶိူဝ်းမေးၼၢင်း လႆႈဢဝ်ၶၢပ်ႈတူဝ်တၢႆမၼ်းၸၢႆး ဝႆႉတီႈ ဝတ်ႉသီဢရုၼ်းဝိဝၢတ်ႉ မႄႈရိမ်း ၸႄႈတွၼ်ႈၵဵင်းမႆႇ ။ တေပူၼ်ႉၶၢပ်ႈတူဝ် ဝၼ်းတီႈ 12/05/2016 (မိူဝ်ႈၽုၵ်ႈ) - ၼႆယဝ်ႉ ။


ၵေႃႉပဵၼ်မေးၼၢင်း ၸိုဝ်ႈၼၢင်းယူင်ႇ ၵူၼ်းၵဵင်းတွင်း လၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ -“ မၼ်းပဵၼ်ၽူႈႁပ်ႉမဝ်ဢွၼ်ႇ ႁဵတ်းၵၢၼ်ၵေႃႇသၢင်ႈ ၸိူမ်ႈလဵၵ်း ႁဵတ်းၸွမ်းပီႈၸွမ်းၼွင်ႉ ။ ၶႃႈၼၢင်းသမ်ႉႁဵတ်းၵၢၼ်မႄႈဝၢၼ်ႈ ဢမ်ႇလႆႈၵႂႃႇႁဵတ်းၵၢၼ်ၸွမ်းၵၼ် ၊ မၼ်းႁပ်ႉႁဵတ်းႁိူၼ်းမႂ်ႇပိူၼ်ႈ ။ ပီႈၼွင်ႉဢၼ်ႁဵတ်းၵၢၼ်ၸွမ်းၵၼ် လၢတ်ႈဝႃႈ မၼ်းဢဝ်လဵၵ်းလႅမ်ႈၼိုင်ႈ ဢၼ်တိုၵ်ႉၸႂ်ႉႁဵတ်းၵၢၼ်ယူႇ ၵႂႃႇတိူဝ်ႉမႅၼ်ႈသႂ်ႇသၢႆၾႆးၾႃႉႁႅင်းသုင်လႄႈ ၾႆးသျွတ်ႉ ။ ဢဝ်ၵႂႃႇႁူင်းယႃသႃရၽီး ၊ ၵူၺ်းၵႃႈမေႃၶဝ်ၸွႆႈပမ်ႊပၼ်ႁူဝ်ၸႂ်မၼ်း 2 ၵမ်းၵေႃႈ ဢမ်ႇၸွႆႈလႆႈယဝ်ႉ ”- ဝႃႈၼႆ ။


မၼ်းၼၢင်း သိုပ်ႇလၢတ်ႈဝႃႈ - မိူဝ်ႈလဵဝ် လွင်ႈငိုၼ်းတွင်းၵေႃႈ ဢမ်ႇၸၢင်ႈၸႂ်ယႂ်ႇၽႂ် ၊ ပၢင်ၸႃပၼၼႆႉၵေႃႈ ၸူးဢဝ်ငိုၼ်းတွင်းဢၼ်လႆႈႁဵတ်းႁႃမႃးဝႆႉ ၵမ်ႈၽွင်ႈသေၸတ်းၵႂႃႇၵူၺ်း ၊ ၵွပ်ႈပိူဝ်ႈဝႃႈ ဢမ်ႇမီးၼၢႆးၸၢင်ႈ (ပေႃႈလဵင်ႉမႄႈလဵင်ႉ) ၊ ၸူးဢဝ်ပိူၼ်ႈဢေးလူသေၸွႆႈထႅမ်ၵူၺ်း ၊ ယဝ်ႉၵေႃႈ ပႆႇမီးမူႇၸုမ်းလႂ် မႃးၸွႆႈထႅမ် - ဝႃႈၼႆ ။


ၸၢႆးထုၼ်းမွင်ႇ ၵေႃႉဢၼ်လူႉလၢႆၵႂႃႇၼႆႉ ပဵၼ်ၵူၼ်းဝၢၼ်ႈၼွင်မူဝ် ဢိူင်ႇဝၢၼ်ႈယဵၼ်ႇ (ထုင်ႉပူင်း) ၸႄႈဝဵင်းသီႇသႅင်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ။ ၼၢင်းယူင်ႇ ၵေႃႉပဵၼ်မေးၼၢင်းၼႆႉ ယၢမ်းလဵဝ်ပႃးတွင်ႉဝႆႉလႆႈ 4 လိူၼ် ။ သွင်ၵေႃႉၽူဝ်မေးၼႆႉ တႄႇၼႃႈႁိူၼ်းၵိုၵ်းၵၼ်မႃးလႆႈမွၵ်ႈ 4-5 ပီ ။ ၾၢႆႇၼၢင်းယူင်ႇတႄႉ ယၢမ်ႈတႄႇၼႃႈႁိူၼ်းမႃးယဝ်ႉပွၵ်ႈၼိုင်ႈ ၊ မိူဝ်ႈလဵဝ် မီးလုၵ်ႈယိင်းသၢဝ် ဢႃယု 14 ယဝ်ႉၵေႃႉၼိုင်ႈ - ၼႆယဝ်ႉ ။