ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဢွၼ်ႁူဝ်သေၸတ်းႁဵတ်း ပၢင်ဢုပ်ႇဢူဝ်းၵိူဝ်းၵုမ်ၵၼ် ပိူဝ်ႈတႃႇ သၢင်ႈလွင်ႈဢွမ်ႇလွမ်ႈၽွမ်ႉၵၼ် ပွၵ်ႈတီႈၼိုင်ႈ ။ လႆႈၸႂ်ထုၵ်ႇလီႁူမ်ႈၵၼ်ၵေႃႇတင်ႈၸုမ်းတႅၼ်းႁူမ်ႈ ။

ဝၼ်းတီႈ 29/05/2016 (မိူဝ်ႈဝႃး) တင်ႈတႄႇဝၢႆးဝၼ်း ယၢမ်း 1 မူင်းထိုင်ႁူဝ်ၶမ်ႈ 4 မူင်း ၊ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဝွၵ်ႇၸိူၼ်း (ၽိတ်ႈမွၵ်ႇ) ၸုမ်းတႆးၵူႈၸုမ်းၸုမ်း ၼႂ်းၵဵင်းမႆႇ သေႁဵတ်းပၢင်ဢုပ်ႇဢူဝ်းၵိူဝ်းၵုမ်ၵၼ် ပိူဝ်ႈတႃႇသၢင်ႈလွင်ႈဢွမ်ႇလွမ်ႈၽွမ်ႉၵၼ် ၊ တီႈလုမ်း ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဝတ်ႉၵူႇတဝ်ႈ ၊ ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး။ မီးၸုမ်းတႆးလၢႆမူႇၸုမ်း ၼႂ်းၵဵင်းမႆႇ ၶဝ်ႈႁူမ်ႈ ပိုတ်ႇၼႄ ၵၢၼ်တူင်ႉၼိုင်မူႇၸုမ်းၽႂ်မၼ်းလႄႈ ပၼ်တၢင်းႁၼ်ထိုင် လၢႆၸိူဝ်ႉလၢႆလွင်ႈ ။


ၵဵဝ်ႇၵပ်းလွင်ႈၼႆႉ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၊ ၸၢႆးသႅင်ယ လၢတ်ႈဝႃႈ - ယိၼ်းလီၼိူဝ်ၵူႈမူႇၵူႈၸုမ်း ဢၼ်ဝႆႉၼၵ်းပၵ်းၸႂ်ၼိူဝ်ၵၢၼ်ၽွမ်ႉႁွမ်းမိုဝ်း ၶဝ်ႈႁူမ်ႈသၢင်ႈလွင်ႈယုမ်ႇယမ်ၸမ်ၸႂ်ၵၼ် ပိူဝ်ႈတႃႇႁႂ်ႈမီးတႅၼ်းႁူမ်ႈ ဢၼ်တေတွမ်ႁွမ်းၶွၼ်ႈႁႅင်း ၵၢၼ်တူင်ႉၼိုင်တႃႇပုၼ်ႈ သၢင်ႈၸိုဝ်ႈသဵင်လီၼႂ်းမိူင်းထႆးလႄႈသင် ပုၼ်ႈတႃႇတူင်ႇဝူင်းၵူၼ်းတႆးႁဝ်းလႄႈသင် တႃႇပုၼ်ႈၸိူဝ်ႉၸၢတ်ႈတႆး ႁူမ်ႈတင်းၵၢၼ်ၵပ်းသၢၼ်ၼႂ်းမိူင်းတႆးလႄႈသင်ၸိူဝ်းၼႆႉ။ ႁူမ်ႈဝႃႈၵမ်းႁႅၵ်ႈၼႆႉ ဢမ်ႇပဵၼ်တၢင်းၵၢၼ်သေတႃႉၵေႃႈ လႆႈဝႃႈတၢင်ႇၾၢႆႇတၢင်ႇၸုမ်း ပိုတ်ႇဢူၵ်းပိုတ်ႇၸႂ် မီးလွင်ႈမုင်ႈမွင်းၵၢၼ်ၶွၼ်ႈႁႅင်း ၼင်ႇၵၼ်လႄႈယိၼ်းၸူမ်းၶွပ်ႈၸႂ်ယႂ်ႇၼမ်တႄႉတႄႉ - ၼႆယဝ်ႉ ။


ပၢင်ဢုပ်ႇဢူဝ်းၵိူဝ်းၵုမ်ၵၼ် မီးလွင်ႈလႆႈၸႂ်ႁၼ်လီၵမ်ႉထႅမ် ပိူဝ်ႈတႃႇႁႂ်ႈမီးတႅဝ်းႁူမ်ႈသၢင်ႈၵႅၼ်ၵၢင်ၸုမ်းတႆး ၊ တေႁူပ်ႉထူပ်းဢုပ်ႇဢူဝ်းၵၼ်ထႅင်ႈ လိူၼ်ၼႃႈ ဝၼ်းဢႃးတိတ်ႉထီႉ 26/06/2016 ၊ တီႈလုမ်းၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဝတ်ႉၵူႇတဝ်ႈ။ ၶၢဝ်းယၢမ်း 13:00-14:00 မူင်း။ ပိူဝ်ႈတႃႇတေႁူပ်ႉၵၼ်ထႅင်ႈပွၵ်ႈၼႃႈၼၼ်ႉ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ တေသိုပ်ႇဢဝ်ပုၼ်ႈၽွၼ်းႁပ်ႉဢွင်ႈတီႈၸတ်းပၢင်လႄႈသိုပ်ႇဝွၵ်ႇၸိူၼ်းထိုင် ၵူႈမူႇၵူႈၸုမ်း ၸိူဝ်းပႆႇတူဝ်ႈတၼ်းလႆႈၶဝ်ႈပႃး ။ (2) ႁၼ်လီလႆႈၸႂ် သၢင်ႈလွင်ႈၽွမ်ႉႁူမ်ႈ ။ (3) ပၢင်ၵုမ်တၢင်းၼႃႈၼႆႉ တေသိုပ်ႇဢုပ်ႇဢူဝ်းသၢင်ႈလွင်ႈယုမ်ႇယမ်ဝႆႉဝၢင်းၸႂ်ၵၼ်ႁႂ်ႈၼမ်တိူဝ်းလိူဝ်ၵဝ်ႇလႄႈၵိူဝ်းၵုမ်ဝၢင်းၶူင်းသၢင်ႈလွင်ႈၵွင်တိုၼ်းႁူမ်ႈၸွႆႈၸၢတ်ႈ - ၼႆယဝ်ႉ ။


ဢၼ်တေၵေႃႇသၢင်ႈတႅဝ်းႁူမ်ႈတုမ်ၸုမ်းတႆးၼႂ်းၵဵင်းမႆႇၼႆႉ ပိူင်လူင်မၼ်း တေဢမ်ႇယႃႉယူင်ႉၶၢပ်ႈပၵ်းပိူင်ၸုမ်းလႂ် ၊ တေဢမ်ႇၶဝ်ႈယုင်ႈၸိမ်ၵႅဝ်ၵၢၼ်ၸုမ်းလႂ် ၊ တေဢမ်ႇယႃႉယူင်းပူင်းသႄႇၸုမ်းလႂ် ၊ လၵ်းၼမ်းလႄႈၼႃႈၵၢၼ်ၸုမ်းလႂ်မီးၸိူင်ႉႁိုဝ်ၵေႃႈႁဵတ်းၵႂႃႇၸိူင်ႉၼၼ်လႄႈတေႁူမ်ႈမိုဝ်းၵၼ် ဢၼ်ပဵၼ်ပုၼ်ႈပၢင်ႈၽွၼ်းလီတႃႇတူင်ႇဝူင်းၵူၼ်းတႆး - ၼႆယဝ်ႉ ။


မူႇၸုမ်းၸိူဝ်းၶဝ်ႈႁူမ်ႈပၢင်ဢုပ်ႇဢူဝ်း ၵမ်းႁႅၵ်ႈဝၼ်းတီႈ 29/05/2016 ၼႆႉ မီး-

1. ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ။ 2. မုၵ်ႉၸုမ်းၸၢဝ်းၶိူဝ်းတႆး ။ 3. ၸုမ်းႁူမ်ႈတုမ်ႁႅင်းၵၢၼ်ယၢၼ်မိူင်း ။ 4.M.W.F ။

5. ၸုမ်း ပၢင်သွၼ်လိၵ်ႈတႆး ဝတ်ႉပႃႇပဝ်ႈ ။ 6. MLC (သုၼ်ၵၢၼ်ႁဵၼ်းႁႅင်းၵၢၼ်ယၢၼ်မိူင်း) ။ 7. ၸုမ်းၶၢဝ်ႇၽူႈတွႆႇႁွၵ်ႈ ။ 8. သိူဝ်ၶွၼ်ႈႁႅင်း ဝဵင်းမိူင်းၼၢႆး ။ 9. ငဝ်းႁၢင်ႈသဵင်တႆး ။ 10. မူႇၸုမ်းၸွႆႈလိူဝ်ၵူၼ်းပၢႆႈၽေးမိူင်းၸိုင်ႈတႆး ၸိူဝ်းၼႆႉ ။