ပၢင်ၵုမ်လူင်တႃႇၶွတ်ႇၽွတ်ႈ ငဝ်ႈငုၼ်းပႃႊတီႊၼႂ်းမိူင်းတႆးၽွမ်ႉႁူမ်ႈ ဢၼ်ၸတ်းႁဵတ်းတီႈတႃႈၵုင်ႈၼၼ်ႉ ႁွင်ႉမွၵ်ႇထိုင်ပႃႊတီႊႁူဝ်သိူဝ် (SNLD) ဝႆႉသေတႃႉ တူဝ်ၵႅမ်ႁူဝ်ပဝ်ႈ တင်း ၽူႈၶၢၼ်ပၢၵ်ႇႁူဝ်သိူဝ် ၵႂႃႇၶဝ်ႈႁူမ်ႈၼၼ်ႉ ပိတ်းဢိုတ်းၽၵ်းတူဝ်ပႅတ်ႈ ၊  ဢမ်ႇပၼ်ၶဝ်ႈႁူမ်ႈၸွမ်း ။

မိူဝ်ႈဝၼ်းတီႈ 29/05/2016 ယၢမ်းၵၢင်ၼႂ် 9 မူင်းၼၼ်ႉ တီႈႁူင်းႁႅမ်းဢွၵ်ႉၶဵတ်ႊ ဝဵင်းလူင်တႃႈၵုင်ႈ ၊ မီးၵၢၼ်ၸတ်းႁဵတ်း ပၢင်ၵုမ်လူင်တႃႇၶွတ်ႇၽွတ်ႈ ငဝ်ႈငုၼ်းပႃႊတီႊၼႂ်းမိူင်းတႆးၽွမ်ႉႁူမ်ႈ။ ပၢင်ၵုမ်လူင်ၼႆႉ  ၾၢႆႇပႃႊတီႊၵၢၼ်မိူင်းၼႂ်းၸိုင်ႈတႆး 19 ပႃႊတီႊ ႁွင်ႉမွၵ်ႇၵၼ်သေ ႁဵတ်းသၢင်ႈပၢင်ၵုမ်လူင် ၊ ၼႂ်းၼၼ်ႉပႃးတင်း ငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ။ ၵူၺ်းၵႃႈ မိူဝ်ႈတူဝ်တႅၼ်းပႃႊတီႊႁူဝ်သိူဝ် ၵႂႃႇၶဝ်ႈႁူမ်ႈပၢင်ၵုမ် ယၢမ်းၵၢင်ၼႂ် 9 မူင်းတဵမ်ၼၼ်ႉ ၶဝ်ပိတ်းဢိုတ်းၽၵ်းတူပႅတ်ႈလႄႈ ဢမ်ႇလႆႈၶဝ်ႈႁူမ်ႈ - ၼႆယဝ်ႉ ။


ၽူႈၶၢၼ်ပၢၵ်ႇပႃႊတီႊႁူဝ်သိူဝ် (SNLD) ၸၢႆးလဵၵ်ႉ လၢတ်ႈဝႃႈ - “တူဝ်ၵဝ်ၶႃႈတင်း ၵႅမ်ႁူဝ်ပဝ်ႈၸၢႆးၸေႃးဢွင်ႇ ႁွတ်ႈၽႅဝ်ၵႂႃႇတီႈၼၼ်ႈ ၸဵမ်ၸဝ်ႉယဝ်ႉ ။ ၵူၺ်းၵႃႈ ၶၢဝ်းယၢမ်းမၼ်းပႆႇထိုင်လႄႈ လႆႈယူႇတၢင်းၼွၵ်ႈသေ ဢုပ်ႇၵၼ် ၊ ထိုင် 9 မူင်းတဵမ်တဵမ်ၸင်ႇၶိုၼ်ႈၵႂႃႇတီႈႁွင်ႈပၢင်ၵုမ် ၊ ၽူႈမီးပုၼ်ႈၽွၼ်းတီႈႁွင်ႈပၢင်ၵုမ်ၶဝ် သမ်ႉလၢတ်ႈဝႃႈ - ၶၢဝ်းယၢမ်းမၼ်းလႆႈယဝ်ႉလႄႈ ႁဝ်းၶႃႈပတ်းဢိုတ်းၽၵ်းတူယဝ်ႉ ၊ ဢမ်ႇႁပ်ႉထႅင်ႈၵူၼ်း တႃႇတေၶဝ်ႈႁူမ်ႈပၢင်ၵုမ်ထႅင်ႈယဝ်ႉ ၊ ဝႃႈၼႆသေဢိုတ်းႁပ်းၽၵ်းတူဝ်ပႅတ်ႈ ၊ ႁဝ်းၶႃႈၵေႃႈဢမ်ႇလႆႈၶဝ်ႈ ။ သိုပ်ႇၾူၼ်ႊထၢမ်ၽူႈမီးပုၼ်ႈၽွၼ်းၶဝ်ၵေႃႈ ၶဝ်တွပ်ႇဝႃႈ ၵူၼ်းလူင်သင်ႇဝႆႉလႄႈ ဢမ်ႇၸၢင်ႈႁဵတ်းႁိုဝ်၊ တွပ်ႇပၼ်ၶေႃႈလဵဝ်ၵူၺ်း - ဝႃႈၼႆ ။


တႃႇတေႁဵတ်းပၢင်ၵုမ်လူင်ဢၼ်ၼႆႉၼႆႉ ပႃႊတီႊႁူဝ်သိူဝ်ၵေႃႈ လႆႈႁပ်ႉဝႆႉလိၵ်ႈမွၵ်ႇမၼ်းတင်းႁိုင် ။ ၵူၺ်းၵႃႈ ၾၢႆႇၸတ်းၵၢၼ်ပၢင်ၵုမ်ၶဝ် ၵမ်းၵမ်းၵပ်းၾူၼ်ႊမႃးထၢမ်ဝႃႈ ၽႂ်တေမႃးၶဝ်ႈႁူမ်ႈ ၊ ႁႂ်ႈလၢတ်ႈၼႄ ၸိုဝ်ႈသဵင် တႅတ်ႈတႅတ်ႈတေႃးတေႃးၼႆသေ တွင်ႈထၢမ်ၸိူင်ႉၼႆတိၵ်းတိၵ်း - ၽူႈၼမ်းၼႂ်းၵူႈလွင်ႈလွင်ႈ ပႃႊတီႊႁူဝ်သိူဝ် ၸၢႆးၼုတ်း (ၸၢႆးၺုၼ်ႉလုၼ်ႇ) လၢတ်ႈၼႄၼင်ႇၼႆ ။


လွင်ႈဢၼ်ၶဝ်ႁဵတ်းၸိူင်ႉၼႆၼႆႉ မၼ်းႁၢင်ႈၸႃႉၼႃႈတႃပူၼ်ႉတီႈ ၊ ၵူၼ်းႁဵတ်းၵၢၼ်မိူင်းဢၼ်ဝႃႈၼႆႉ ဢမ်ႇၵိုင်ႇလီႁဵတ်းၸိူင်ႉၼႆ ၊ ပဵၼ်ၵူၼ်းႁႃၽွၼ်းပၢင်ႈၼိူဝ်ၵၢၼ်မိူင်းသႂ်ႇတူဝ်ၵူၺ်းယူဝ်ႉ ။ ပိူဝ်ႈတႃႇတေၶွတ်ႇၽွတ်ႈ ငဝ်ႈငုၼ်းပႃႊတီႊၼႂ်းမိူင်းတႆးၽွမ်ႉႁူမ်ႈၼႆႉ ပေႃးဢမ်ႇပႃးပႃႊတီႊႁူဝ်သိူဝ် ဢၼ်ပေႉဝႆႉ 40 တီႈၼင်ႈၼႆ ၸွင်ႇမၼ်းတေပဵၼ်ယူႇႁႃႉ ၊ ၸွင်ႇမၼ်းမီးၵႂၢမ်းမၢႆႁႃႉ ၊ ၸွင်ႇမၼ်းမီးလွင်ႈသိုဝ်ႈသႂ်ယူႇႁႃႉ ၊ လွင်ႈၼႆႉပဵၼ်ဢၼ်လီၵႂင်ၸႂ်ငမ်းငဝ်း - ၸၢႆးၼုတ်း သိုပ်ႇလၢတ်ႈၼင်ႇၼႆ ။


ပိူဝ်ႈတႃႇတေၶွတ်ႇၽွတ်ႈ ငဝ်ႈငုၼ်းပႃႊတီႊၵၢၼ်မိူင်းၼႂ်းမိူင်းတႆးၽွမ်ႉႁူမ်ႈၼႆႉ မွၵ်ႇထိုင်ဝႆႉပႃႊတီႊ (SNLD သေ ပႃႊတီႊ SNLD ဢမ်ႇလႆႈၶဝ်ႈႁူမ်ႈၼႆႉ လွင်ႈတၢင်းမၼ်းမီး 2 ၶေႃႈ - 1. ဝၼ်းတီႈ 28/05/2016 ယၢမ်းၵၢင်ၶမ်ႈ 9 မူင်းၼၼ်ႉ ၽႂ်တေၶဝ်ႈႁူမ်ႈပၢင်ၵုမ်ၼၼ်ႉ ပႃႊတီႊႁူဝ်သိူဝ် SNLD ဢမ်ႇလႆႈပၼ်သဵၼ်ႈမၢႆ ။ 2. ဝၼ်းတီႈ 29 ယၢမ်းၵၢင်ၼႂ် 9 မူင်း ၶဝ်ႁွတ်ႈမႃးသေ ၽူႈမီးပုၼ်ႈၽွၼ်း ဢၼ်လုမ်းလႃးပၼ်ၼႂ်း ႁူင်းႁႅမ်းၼၼ်ႉ ဢမ်ႇပၼ်ၶဝ်ၶဝ်ႈပၢင်ၵုမ် ၊ ဢိင်ဢၢင်ႈလွင်ႈဝႃႈၶဝ်ဢမ်ႇမီးၼႂ်းသဵၼ်ႈမၢႆ။ ၵွပ်ႈၼၼ်လႄႈ ဢမ်ႇပၼ်ၶဝ်ႈႁူမ်ႈပၢင်ၵုမ် ။


ဢိင်ၼိူဝ်လွင်ႈတၢင်းၸိူဝ်းၼႆႉသေ ၾၢႆႇၶပ်းၶိုင် တႃႇတေပဵၼ်ပၢင်ၵုမ်ၼၼ်ႉ တႅမ်ႈလိၵ်ႈၸူးပႃႊတီႊႁူဝ်သိူဝ်သေ လၢတ်ႈဝႃႈ - ယွမ်းၼွမ်း ဢၼ်ဢမ်ႇလႆႈပၼ်ပႃႊတီႊႁူဝ်သိူဝ် ၶဝ်ႈႁူမ်ႈပၢင်ၵုမ် ။ ၵဵဝ်ႇၵပ်းလွင်ႈၼႆႉ ၸၢႆးၼုတ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ - လိၵ်ႈဢၼ်ၶဝ်သူင်ႇမႃးၼႆႉ လႆႈႁပ်ႉယဝ်ႉ - ဝႃႈၼႆ ။


ပိူဝ်ႈတႃႇတေၶွတ်ႇၽွတ်ႈ ငဝ်ႈငုၼ်းပႃႊတီႊၵၢၼ်မိူင်းၼႂ်းမိူင်းတႆးၽွမ်ႉႁူမ်ႈ ဢွၼ်ၼႃႈၼႆႉ ႁွင်ႉမွၵ်ႇဝႆႉ ပႃႊတီႊၵၢၼ်မိူင်းၼႂ်းမိူင်းတႆး 19 ပႃႊတီႊ (ပႃးၸဵမ်ပႃႊတီႊၵူႈၸၢဝ်းၶိူဝ်း ၼႂ်းမိူင်းတႆး) ။ ပိူင်လူင်မၼ်း မီးယိူင်းဢၢၼ်း ပိူဝ်ႈတႃႇ ၵေႃႇတင်ႈၸိုင်ႈမိူင်းႁူမ်ႈတုမ်ၾႅတ်ႊၻရႄႊလ် မိူဝ်းၼႃႈၼႆႉ ႁႂ်ႈပဵၼ်ၼမ်ႉၼိုင်ႈ ၸႂ်လဵဝ်ၵၼ် ၊ ႁႂ်ႈဢဝ်ၸႄႈမိူင်းပဵၼ်လၵ်းသေ ဢုပ်ႇဢူဝ်းၵၢၼ်မိူင်းၵႂႃႇ ၊ မီးယိူင်းဢၢၼ်းၸိူင်ႉၼႆသေ ၸတ်းႁဵတ်းပၢင်ၵုမ် - ၼႆယဝ်ႉ ။