မိူဝ်ႈၼႆႉပွတ်းၼႂ် မၢၵ်ႇတႅၵ်ႇတီႈႁူင်းၵဵပ်းၶွင် ၼႂ်းဝဵင်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 ၸိုင်ႈတႆးပွတ်းဢွၵ်ႇ ။ မီးလွင်ႈလူႉသုမ်း ၾႆးမႆႈႁိူၼ်းၵူၼ်း၊ ၵူၼ်းမိူင်းလူႉတၢႆ 7 ၵေႃႉ ၊ ဝၢတ်ႇၸဵပ်းၼပ်ႉႁူဝ်သိပ်း ။


ဝၼ်းတီႈ 07/05/2016 (မိူဝ်ႈၼႆႉ) ၵၢင်ၼႂ် ယၢမ်း 9 မူင်းပၢႆ၊ မၢၵ်ႇတႅၵ်ႇ ၼႂ်းႁူင်းၵဵပ်းၶွင် (ၵူဝ်ႇတွင်ႇ) ဢၼ်ၼိုင်ႈ၊ တီႈၼႂ်းဝဵင်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 ၊ ဢၼ်ပဵၼ်ပိုၼ်ႉတီႈၵုမ်းၵမ်ၶွင် တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊၸိူဝ်ႉၸၢတ်ႈ - ၸိုင်ႈတႆးပွတ်းဢွၵ်ႇ (NDAA-ESS) ၸုမ်းမိူင်းလႃး ။ ယွၼ်ႉမၢၵ်ႇတႅၵ်ႇသေ ၾႆးမႆႈႁိူၼ်းၵူၼ်းမိူင်းလၢႆလင် ၊ ၵူၼ်းမိူင်းလူႉတၢႆ 7 ၵေႃႉ ၊ ဝၢတ်ႇၸဵပ်းတင်းမူတ်း 50 ပၢႆ ။

ဝဵင်းမိူင်းလႃးၼႆႉ ၸွမ်းၼင်ႇပိူင်ၽွင်းငမ်းဢၼ်လူင်ပွင်ၸိုင်ႈမၢၼ်ႈ တမ်းဝၢင်းဝႆႉၼၼ်ႉ ပဵၼ်ၼႂ်းၸႄႈတွၼ်ႈ ၵဵင်းတုင် ၸိုင်ႈတႆးပွတ်းဢွၵ်ႇ ၊ ယၢၼ်ၾၢႆႇႁွင်ႇဝဵင်းၵဵင်းတုင် 60 လၵ်းပၢႆ ၊ ယူႇႁိမ်းလႅၼ်လိၼ်တႆး - ၶႄႇ ။


ၵဵဝ်ႇၵပ်းလွင်ႈမၢၵ်ႇတႅၵ်ႇၼႆႉ ၵူၼ်းမိူင်းလႃး ဢၼ်ယူႇႁိမ်းၵိၼ်ၸမ်ၵေႃႉၼိုင်ႈ လၢတ်ႈဝႃႈ - မၢၵ်ႇတႅၵ်ႇတီႈၼႂ်း ႁူင်းၵဵပ်းၶွင်ဢၼ်ၼိုင်ႈသေ ႁဵတ်းႁႂ်ႈၸၢၵ်ႇၾႆးဢၼ်ၽူင်ႉပိဝ်ၶိုၼ်ႈၼိူဝ်ၵၢင်ႁၢဝ်ၵႂႃႇၼၼ်ႉ တူၵ်းလူင်းမႃးသႂ်ႇႁိူၼ်းၵူၼ်းဝၢၼ်ႈ မႆႈပႃးလၢႆလၢႆလင် ၊ ၵူၼ်းမိူင်းလႆႈလူႉတၢႆ 7 ၵေႃႉ ၊ ဝၢတ်ႇၸဵပ်း 50 ပၢႆ - ဝႃႈၼႆ ။


ၵူၼ်းယူႇႁိမ်းၵိၼ်ၸမ်ၵေႃႉၼိုင်ႈ ၸိုဝ်ႈဢူးလၢဝ်းယၢင်ႉ လၢတ်ႈဝႃႈ - တီႈဢၼ်မၢၵ်ႇတႅၵ်ႇၼႆႉ ပဵၼ်ဢွင်ႈတီႈ ဢၼ်ၸဝ်ႈၼႃႈတီႈၶဝ်ႁဵတ်းၵၢၼ်၊ ပဵၼ်ႁူင်းၵဵပ်းၶွင် (ၵူဝ်ႇတွင်ႇ) ၊ ၵူၺ်းၵႃႈ တၢင်းၼႂ်းမၼ်းမီးၶိူင်ႈဢီႈသင်တႄႉ ႁဝ်းဢမ်ႇၸၢင်ႈလၢတ်ႈလႆႈတႅတ်ႈတေႃး ၊ ၵူၺ်းၵႃႈ မၼ်းၸၢင်ႈပဵၼ်ၶိူင်ႈဢၼ်ၸႂ်ႉသွႆၼႂ်းၵၢၼ်သိုၵ်း - ဝႃႈၼႆ ။


ၾၢႆႇၸဝ်ႈၼႃႈတီႈ ၸုမ်းမိူင်းလႃးၶဝ်လၢတ်ႈဝႃႈ - တီႈဢၼ်မၢၵ်ႇတႅၵ်ႇၼႆႉ မၼ်းပဵၼ်တီႈဢၼ်ဝႆႉမၢၵ်ႇမိုဝ်ႈ ၸိုၼ်းယၢမ်း ပိူဝ်ႈတႃႇတေၸႂ်ႉၵၢၼ်မိူင်ႁႄႈ ။ မိူဝ်ႈလဵဝ် ယွၼ်ႉမၢၵ်ႇတႅၵ်ႇၼႆႉသေ လႆႈၵုမ်းၵမ်ပိုၼ်ႉတီႈဝႆႉ လီငၢမ်းယဝ်ႉ ၊ ငဝ်းလၢႆးၶႅမ်ႉလႅပ်ႈယဝ်ႉ ၊ ၵူၼ်းဝၢၼ်ႈၵူၼ်းမိူင်းၵေႃႈ ယႃႇပေမႆႈၸႂ်သင် - ဢွၵ်ႇလိၵ်ႈပိုၼ်ၽၢဝ်ႇၸွမ်း မိူဝ်ႈၼႆႉၵမ်းလဵဝ်ၼင်ႇၼႆ ။


ၵဵဝ်ႇၵပ်းမၢၵ်ႇတႅၵ်ႇၼႆႉသေ ဢၼ်ဝႃႈၵူၼ်းတၢႆ 7 ၵေႃႉ ၊ ဝၢတ်ႇၸဵပ်း 50 ပၢႆဢၼ်ဝႃႈၼၼ်ႉ ထုၵ်ႇမႅၼ်ႈယူႇ ။ ၵူၼ်းဢၼ်ၶဝ်ႈပႃးၼႂ်းၸုမ်းၶႄၾႆး ဢူးဢႃးၾၢင်ႇ လၢတ်ႈ ။ ၵူၺ်းၵႃႈ မၢၵ်ႇတႅၵ်ႇယွၼ်ႉသင်ၼၼ်ႉ မၼ်းၸၢႆးဢမ်ႇလၢတ်ႈပႃး ။


ၼႂ်းၼႃႈလိၼ်ၶိုၵ်ႉတွၼ်းမၢႆ 4 ၼႆႉ မိူဝ်ႈႁူဝ်ပီ 2016 ၼႂ်းလိူၼ်ၵျႅၼ်ႊၼိဝ်ႊရီႊၼၼ်ႉ တီႈႁူင်းပၢင်တေႃႇလွင်း (ၶႃႊသီႊၼူဝ်ႊ) ဝၢၼ်ႈသဵဝ်ႈၼၼ်ႉၵေႃႈ မၢၵ်ႇတႅၵ်ႇၵမ်းၼိုင်ႈ ။


ၼႃႈလိၼ်ၶိုၵ်ႉတွၼ်းမၢႆ 4 ၸုမ်းမိူင်းလႃး ၸိုင်ႈတႆးပွတ်းဢွၵ်ႇၼႆႉ တႄႇၵိုတ်းတိုၵ်းတင်း ၸုမ်းသိုၵ်း လူင်ပွင်ၸိုင်ႈ ဢဝ်လွင်ႈငမ်းယဵၼ် မိူဝ်ႈပီ 1989 ၊ ၽူႈဢွၼ်ႁူဝ်ၼမ်းၼႃႈ ပဵၼ်ၸဝ်ႈၸၢႆးလိုၼ်း ။ ဝၢႆးသေ 1990 ပၢႆမႃးၼႆႉ လူင်ပွင်ၸိုင်ႈသိုၵ်း ၵေႃႈပိုၼ်ၽၢဝ်ႇဝႃႈ ၼႃႈလိၼ်ၶိုၵ်ႉတွၼ်းမၢႆ 4 ၼႆႉ ပဵၼ်ပိုၼ်ႉတီႈ ဢၼ်ႁၢမ်းႁႅၵ်း ယႃႈမဝ်းၵမ်လႄႈ ၵၢၼ်ၽုၵ်ႇတူၼ်ႈၾိၼ်ႇ ။


ထိုင်မႃးပၢၼ်လူင်ပွင်ၸိုင်ႈတဵင်းၸဵင်ႇ ဢၼ်ပေႉပၢင်လိူၵ်ႈတင်ႈမိူဝ်ႈပီ 2010 ၼၼ်ႉၵေႃႈ ဢိင်ၼိူဝ်ၸွမ်ၸိုင်ႈတဵင်းၸဵင်ႇ ပိုၼ်ၽၢဝ်ႇယိုၼ်ႈမိုဝ်းလွင်ႈငမ်းယဵၼ် (18/08/2011)ထႅင်ႈသေ ထိုင်မႃးၼႂ်းလိူၼ် ဢွၵ်ႊထူဝ်ႊၿိူဝ်ႊ 2011 ၼၼ်ႉ ၸုမ်းမိူင်းလႃးၵေႃႈ လႆႈလူင်းလၢႆးမိုဝ်းၵိုတ်းတိုၵ်း ၵေႃႇသၢင်ႈလွင်ႈငမ်းယဵၼ် တင်းလူင်ပွင်ၸိုင်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ်ဝႆႉ ။