သိုၵ်းမၢၼ်ႈ တင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ် တီႈဝၢၼ်ႈလူင်တေႃႉသၢင်ႇ ၸႄႈဝဵင်းၵျွၵ်ႉမႄး ၊ ၾႆးမႆႈႁိူၼ်းၵူၼ်း ဝၢၼ်ႈလူင်တေႃႉသၢင်ႇ ပွၵ်ႉၵၢတ်ႇ 3 လင် ။


ဝၼ်းတီႈ 11/05/2016 ၵၢင်ၼႂ်ယၢမ်း 8 မူင်း တေႃႇထိုင်း 11 မူင်းပၢႆၼၼ်ႉ သိုၵ်းမၢၼ်ႈ (တပ်ႉမတေႃႇ) တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ပဵၼ်ပၢင်တိုၵ်းၵၼ် တီႈဝၢၼ်ႈလူင်တေႃႉသၢင်ႇ ဢိူင်ႇတေႃႉသၢင်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ၶၢဝ်းယၢမ်း 11 မူင်းၶိုင်ႈၼၼ်ႉ  ၾႆးလႆႈမႆႈႁိူၼ်း ၵူၼ်းဝၢၼ်ႈၵႂႃႇ 3 လင် - ၼႆယဝ်ႉ ။

ၽွင်းၾႆးတိုၵ်ႉမႆႈႁိူၼ်းၵူၼ်း တီႈဝၢၼ်ႈလူင်တေႃႉသၢင်ႇ

ၵဵဝ်ႇၵပ်းလွင်ႈ ဢၼ်သွင်ၾၢႆႇလႆႈပဵၼ်ပၢင်တိုၵ်းၵၼ်လႄႈ ၾႆးမႆႈႁိူၼ်းၵူၼ်းဝၢၼ်ႈၼႆႉ လုင်းၸၢႆးမႆၶမ်း ၵူၼ်းၼႂ်းပိုၼ်ႉတီႈ လၢတ်ႈဝႃႈ - သိုၵ်းလွႆလႄႈတင်း ၸုမ်းဢူၺ်းလီၶဝ် ၶဝ်ႈမႃးၼႂ်းဝၢၼ်ႈ၊ သိုၵ်းမၢၼ်ႈသမ်ႉမႃး ယူႇတၢင်းၼွၵ်ႈဝၢၼ်ႈသေ ဢဝ်ၵွင်ႈလူင်ယိုဝ်းသႂ်ႇၼႂ်းဝၢၼ်ႈ ၊ ပဵၼ်ပၢင်တိုၵ်းၵၼ်တင်းႁိုင်။ မိူဝ်ႈသိုၵ်းလွႆ ထွၼ်ဢွၵ်ႇဝၢၼ်ႈၵႂႃႇမိူဝ်ႈယၢမ်း 11 မူင်းပၢႆၼၼ်ႉ ၾႆးၵေႃႈတႄႇမႆႈယဝ်ႉ ။ သိုၵ်းမၢၼ်ႈၶဝ်ၶဝ်ႈမႃးၼႂ်းဝၢၼ်ႈ ယၢမ်း 12 မူင်းၵၢင်ဝၼ်း ၊ မႃးႁွင်ႉသႅၼ်ႇဝႃႈယႃႇပေၵူဝ် ၊ မႃးၸွႆႈၵၼ်ၶႄၾႆးလႄႈ ၼႆသေ ႁွင်ႉၵူၼ်းဝၢၼ်ႈၵူၼ်းသူၼ် ၵႂႃႇၸွႆႈၶႄ ႁူတ်းၾႆးလႄႈ ၸင်ႇၶႄၾႆးလႆႈၵႂႃႇ - ဝႃႈၼႆ ။


ႁိူၼ်းၵူၼ်းဝၢၼ်ႈ 3 လင် တီႈပွၵ်ႉၵၢတ်ႇ ဝၢၼ်ႈလူင်တေႃႉသၢင်ႇ ဢၼ်ၾႆးမႆႈၵႂႃႇၼၼ်ႉ ပဵၼ်ႁိူၼ်း 1. ၼၢင်းဢေးထၢႆႉ ၊ ၶၢႆၵုၼ်ႇသိၼ်ၵႃႉၵိုၵ်းႁိူၼ်း ။ 2. ႁိူၼ်းလုင်းၸၢႆးဢွင်ႇၵျေႃႇ ။ 3. ႁိူၼ်းၼၢင်းဢေးၸၢမ်ႇ ပိုတ်ႇႁၢၼ်ႉႁၢင်ႈၶိူင်ႈ ၸိူဝ်းၼႆႉ - ၼႆယဝ်ႉ ။


ၵဵဝ်ႇၵပ်းလွင်ႈလႆႈပဵၼ်ပၢင်တိုၵ်းသေ ၾႆးလႆႈမႆႈဝၢၼ်ႈသူၼ်ၼႆႉ ႁွင်ႈၵၢၼ်ၾၢႆႇပွင်ႇၶၢဝ်ႇသိုၵ်းတဢၢင်း (TNLA) ၶဝ် ဢွၵ်ႇၶၢဝ်ႇဝႃႈ - သိုၵ်းမၢၼ်ႈမႃးလေႃႇတိုၵ်း ယိုဝ်းၵွင်ႈလူင်သႂ်ႇလႄႈ ၾႆးလႆႈမႆႈႁိူၼ်းၵူၼ်းဝၢၼ်ႈ - ၼႆယဝ်ႉ ။


ဢိင်ၼိူဝ်ပဵၼ်ပၢင်တိုၵ်းသိုၵ်းသိူဝ်သေ ၵူၼ်းဝၢၼ်ႈၵူၼ်းမိူင်းႁဵင်ပၢႆ လႆႈပၢႆႈယၢၼ်ႁိူၼ်းယေးတီႈယူႇ မႃးပိုင်ႈႁူမ်ႈသေႃႉၽူၺ်း ယူႇသဝ်းတီႈဝတ်ႉ / ၵျွင်းမုၼ်ၸဝ်ႈ တီႈဝဵင်းၵျွၵ်ႉမႄး ။ မိူဝ်ႈလဵဝ် ၶူဝ်းၶွင်ၸႂ်ႉသွႆ ဢၼ်ၵူၼ်းပၢႆႈၽေးၶဝ် ၶႂ်ႈလႆႈ (လူဝ်ႇ)သေပိူၼ်ႈၼၼ်ႉ ပဵၼ်ၶဝ်ႈၼမ်ႉတၢင်းၵိၼ် - ႁူဝ်ပဝ်ႈၾၢႆႇတူင်ႇဝူင်းၵူၼ်း ဝဵင်းၵျွၵ်ႉမႄး ဢူးတိၼ်ႇမွင်ႇတဵင်း လၢတ်ႈ ။