ၼႂ်းပီ 2016 ၼႆႉ သင်ၶတႆး ဢၼ်လႆႈမႃးလဵပ်ႈႁဵၼ်းၼႂ်းမိူင်းထႆး လႆႈႁပ်ႉၸုမ်ႈၶူးတင်းမူတ်း 17 တူၼ် လႄႈ ၵူၼ်းႁိူၼ်းထႅင်ႈ 3 ၵေႃႉ ။

မိူဝ်ႈဝၼ်းတီႈ15/5/2016 ၸၼ်ႉၸွမ်မႁႃၸူႊလႃႊလူင်းၵွၼ်း ရႃႊၸႃႊဝိတ်ႊထယႃႊလႆႊ ၸတ်းပၢင်မွပ်ႈၸုမ်ႈၶူး ပွၵ်ႈၵမ်းတီႈ 61 တီႈၸႄႈဝဵင်း ဝင်းၼွႆႉ ၊ ၸႄႈတွၼ်ႈ ဢယုတ်ႉထယႃႊ ၊ ၸိုင်ႈထႆး ။ လုၵ်ႈႁဵၼ်းသင်ၶ ဢၼ်လႆႈႁပ်ႉၸုမ်ႈတင်းမူတ်း 20 ၸဝ်ႈ ၊ ပဵၼ်ၸုမ်ႈၶူး ဢႅမ်ႊဢေႇ (Master of Art) 3 ၸဝ်ႈ လႄႈပီႊဢေႊ (Bachelor of Art Degree) 17 ၸဝ်ႈ ။


ၸဝ်ႈမႁႃသၢႆၾႃႉ ဢၼ်ယဝ်ႉပီႊဢေႊ (BA) ၾၢႆႇၵပ်းသိုပ်ႇတူင်ႇဝူင်းၵူၼ်း လၢတ်ႈဝႃႈ - ၸူမ်းသိူဝ်းတႄႉတႄႉ ၊ ယွၼ်ႉပိူဝ်ႈႁဝ်းၸႂ်ႉၶၢဝ်းတၢင်း 4 ပီ လဵပ်ႈႁဵၼ်းၼႂ်းႁွင်ႈႁဵၼ်း လႄႈ လူင်းၽိုၵ်းၵၢၼ်တူဝ်ထူပ်းထႅင်ႈ 1 ပီ ၊ ဢၼ်လႆႈၸႂ်ႉၼႂ်းၶၢဝ်းတၢင်း 5 ပီၼႆႉ မိူဝ်ႈၼႆႉမီးတၢင်းၸူမ်းသိူဝ်းတႄႉတႄႉ ။


မၼ်းၸဝ်ႈလၢတ်ႈဝႃႈ - တၢင်းႁူႉဢၼ်လႆႈလဵပ်ႈႁဵၼ်းမႃးၼႆႉ တေပဵၼ်ၽွၼ်းလီတွၼ်ႈတႃႇၵူၼ်းဝၢၼ်ႈ ၵူၼ်းမိူင်းတႆးယူႇ ။ ယွၼ်ႉပိူဝ်ႈဝႃႈ ၵဵဝ်ႇလူၺ်ႈလွင်ႈၵပ်းသိုပ်ႇ လွင်ႈလၢတ်ႈၸႃၵၼ်ၼၼ်ႉ ၼႂ်းတူင်ႇဝူင်းႁဝ်းယင်းပႆႇတဵမ်ထူၼ်ႈၵေႃႈဝႃႈလႆႈ ။ ၵွပ်ႈၼၼ် လွင်ႈၼႆႉမၼ်းလမ်ႇလွင်ႈတႄႉတႄႉ - ဝႃႈၼႆ ။


ၸဝ်ႈၶူးၶမ်းလႅင်း ၵေႃၵမ်ၵၢၼ်ၸတ်းပၢင်ပွႆးလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ - သင်ၶတႆးႁဝ်းမႃးႁဵၼ်းလိၵ်ႈၸၼ်ႉၸွမ်မႁႃၸူႊလႃႊလူင်းၵွၼ်းရႃႊၸႃႊဝိတ်ႊထယႃႊလႆႊၵူႈပီ ၊ ပီၼႆႉမီးလုၵ်ႈႁဵၼ်းတင်းမူတ်းမွၵ်ႈ 130 ပႃး ။ ၵမ်ႈၼမ်မႃးႁဵၼ်းၸၼ်ႉ ပီႊဢေႊ (Bachelor of Art Degree) ၊ ဢႅမ်ႊဢေႊ (Master of Art) လႄႈ ၸၼ်ႉၽီႊဢဵတ်ႊၻီႊ (Doctorate of Philosophy) ၵေႃႈမီး - ဝႃႈၼႆ ။


သင်ၶတႆးႁဝ်း လုၵ်ႉမႃးလၢႆဝၢၼ်ႈလၢႆဝဵင်းၼႂ်းမိူင်းတႆး မိူၼ်ၼင်ႇ - မိူင်းၵိုင် ၊ မိူင်းပၼ်ႇ ၊ မိူင်းသူႈ ၊ လွႆလႅမ် ၊ လၢင်းၶိူဝ်း ၊ ၵုၼ်ႁဵင် ၊ ၵေးသီး ၊ မူႇၸႄႈ ၊ ၼမ်ႉၶမ်း လႄႈတၢင်းပွတ်းဢွၵ်ႇၶူင်း မိူၼ်ၼင်ႇၵဵင်းတုင် ၊ တႃႈၶီႈလဵၵ်း ၸဵမ်ၸိူဝ်းၼႆႉ ၼႆယဝ်ႉ ။


ပၢင်ပွႆးယိုၼ်ႈမွပ်ႈၸုမ်ႈၶူးပွၵ်ႈၵမ်းၼႆႉ ယူႇတီႈၸၼ်ႉၸွမ်မႁႃၸူႊလႃႊလူင်းၵွၼ်း ရႃႊၸႃႊဝိတ်ႊထယႃႊလႆႊ သေလႆႈမွပ်ႈၸုမ်ႈၶူးပၼ် ၻွၵ်ႊတိူဝ်ႊၾၢႆႇပၢႆးပၺ်ၺႃ (An Honorary PhD In Educational Administration) ပၼ်တွၵ်ႊတိူဝ်ႊၸၢႆးမွၵ်ႇၶမ်း ၵႅမ်ၸွမ်ၸိုင်ႈၵဝ်ႇ မိူင်းႁူမ်ႈတုမ်မၢၼ်ႈ - ၼႆယဝ်ႉ ။