ၸိူဝ်ႉငိူၼ်ႈၶိူဝ်းၶုၼ် ၸဝ်ႈၾႃႉမိူင်းၵဵင်းတုင် ၸဝ်ႈၵႅဝ်ႈမိူင်း မင်းရၢႆး လူႉသဵင်ႈမုၼ်ၵႂႃႇ တီႈဝဵင်းၿိူဝ်ႊမိင်ႊႁႅမ်ႊ ၸိုင်ႈမိူင်းဢိင်ႇၵလၢၼ်ႇ ။


ၸဝ်ႈၵႅဝ်ႈမိူင်း မင်းရၢႆး ဢႃယု 96 ပီ ၊ (ၵေႃႉပဵၼ်လုၵ်ႈၸၢႆးၸဝ်ႈၵွၼ်ႈၵႅဝ်ႈ ဢိၼ်းထလႅင်၊ ၸဝ်ႈၾႃႉမိူင်းၵဵင်းတုင် ၸိုင်ႈတႆးပွတ်းဢွၵ်ႇ) လူႉသဵင်ႈသုတ်းမုၼ်ၵႂႃႇ တီႈဝဵင်းၿိူဝ်ႊမိင်ႊႁႅမ်ႊ မိူင်းဢိင်းၵလဵတ်ႈ ၊ ပူၼ်ႉမႃးမိူဝ်ႈဝၼ်းတီႈ 11/04/2016 ၼၼ်ႉ - ၼႆယဝ်ႉ ။

ႁေႃၸဝ်ႈၾႃႉၵဝ်ႇ မိူင်းၵဵင်းတုင်

ၸဝ်ႈၵႅဝ်ႈမိူင်း မင်းရၢႆးၼႆႉ ဢိင်ၼိူဝ်လုၵ်ႈယိင်းမၼ်းၸဝ်ႈ ၸဝ်ႈၽွင်းၵႅဝ်ႈ (ပီႈၼၢင်းၸဝ်ႈၼုမ်ႇ) ႁွင်ႉမႃးသေ လႆႈလုၵ်ႉတီႈဝဵင်းလူင်တူၼ်ႈတီး မိူင်းတႆးပွတ်းၸၢၼ်းယၢမ်းလဵဝ် ၶၢႆႉၵႂႃႇယူႇၸွမ်းလုၵ်ႈယိင်းမၼ်းၸဝ်ႈ တီႈမိူင်းဢိင်းၵလၢၼ်ႇ ပူၼ်ႉမႃးလႆႈ 10 ပီပၢႆယဝ်ႉ ။ မၼ်းၸဝ်ႈၼႆႉ ပဵၼ်ၵေႃႉဢၼ်ႁူမ်ႈၵၼ်တင်း ၽူႈဢၼ်သူၼ်ၸႂ်ၶိူဝ်းသိုပ်ႇၸဝ်ႈၾႃႉ မိူင်းၵဵင်းတုင်သေ ၶဵၼ်ႇတႅမ်ႈသိူၵ်ႈပိုၼ်းၶိူဝ်းႁိူၼ်း (Family Tree) ၸဝ်ႈၾႃႉမိူင်းၵဵင်းတုင်ဝႆႉ ။


ၸဝ်ႈၵႅဝ်ႈမိူင်း မင်းရၢႆးၼႆႉ ပေႃႈပဵၼ်ၸဝ်ႈၵွၼ်ႈၵႅဝ်ႈ ဢိၼ်းထလႅင် ၊ မႄႈပဵၼ်ၸဝ်ႈၼၢင်းဝူဝ်းတိပ်ႉလူင်။ မီးပီႈၼွင်ႉႁူမ်ႈပေႃႈလဵဝ်ၵၼ် 19 ၵေႃႉ ။ မၼ်းၸဝ်ႈမီးလုၵ်ႈလၢင်း 5 ၵေႃႉ ၊ မီးလၢၼ် 6 ၵေႃႉ ၊ ၵမ်ႈၼမ်ယူႇသဝ်း ၸွမ်းလႅၼ်လိၼ်တႆး - ထႆး လႄႈၼႂ်းမိူင်းတႆး ။


လုၵ်ႈၸၢႆးမၼ်းၸဝ်ႈ ၸဝ်ႈၼုမ်ႇ လၢတ်ႈဝႃႈ - “ မၼ်းၸဝ်ႈၼႆႉ ပဵၼ်ၵေႃႉဢၼ်ႁူမ်ႈၶဵၼ်ႇတႅမ်ႈ သၢႆသိုပ်ႇၸိူဝ်ႉငိူၼ်ႈၽၼ်းသႅင် ၸဝ်ႈၾႃႉမိူင်းၵဵင်းတုင် ။ ၸဝ်ႈၾႃႉၵဵင်းတုင် တူၼ်လိုၼ်းသုတ်း ၸဝ်ႈၸၢႆးလူင်ၼႆႉ ပဵၼ်လၢၼ်ၸၢႆးၸဝ်ႈၵႅဝ်ႈမိူင်း မင်းရၢႆး ၊ ၵွပ်ႈဝႃႈ ၸဝ်ႈၵွင်တႆး ပဵၼ်ၼွင်ႉၸဝ်ႈၵွၼ်ႈၵႅဝ်ႈ ဢိၼ်းထလႅင် ”- ဝႃႈၼႆ ။