ၸုမ်းၵွင်ႉသၢၼ်ၶွမ်ႊၽိဝ်ႊၻိူဝ်ႊ (S.A.C.T) ဢွၼ်ႁူဝ်ၵူၼ်းၼုမ်ႇ ဝဵင်းၵျွၵ်ႉမႄး ႁဵတ်းလွင်ႈမူတ်းသႂ် ႁေႃၵဝ်ႇၸဝ်ႈၾႃႉ ယိူင်းဢၢၼ်းႁႂ်ႈလုၵ်ႈလၢၼ်တေမေႃဝႆႉၵႃႈၶၼ် လႄႈမႅတ်ႇပႅင်း ၶူဝ်းၶွင်ၵိုၵ်းပိုၼ်း ၶိူဝ်းၸဝ်ႈၵဝ်ႇ ။

ဝၼ်းလိုဝ်ႈၵၢၼ်ၶၢဝ်းသွၼ်းၼမ်ႉဝၼ်းတီႈ 14/04/2016 ၸုမ်းၵွင်ႉသၢၼ်ၶွမ်ႊၽိဝ်ႊၻိူဝ်ႊ (S.A.C.T – Shan Association Computer Training) ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇလုမ်းလႃး ႁဵတ်းလွင်ႈမူတ်းသႂ် ႁေႃၸဝ်ႈၵျႃႇသႅင် ၸဝ်ႈၾႃႉဝဵင်းသီႇပေႃႉ ပႃးလိုၼ်းသုတ်း ဢၼ်မီးတီႈႁိမ်း ဝၢၼ်ႈဝၢင်းမႃႉ ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။


ယိူင်းဢၢၼ်းတႄႉၶႂ်ႈႁႂ်ႈလုၵ်ႈဢွၼ်ႇတႆးမေႃဝႆႉၵႃႈၶၼ် ၶူဝ်းၶွင်ၾိင်ႈတိုၼ်း ၊ ႁူႉၸၵ်းပိုၼ်းၶိူဝ်းၸဝ်ႈ ၵဝ်ႇလႄႈၸွႆႈၵၼ်မႅတ်ႇပႅင်းလုမ်းလႃးႁၵ်ႉသႃၵႂႃႇၼႆယဝ်ႉ ။


ၽူႈၶဝ်ႈႁူမ်ႈႁဵတ်းလွင်ႈမူတ်းသႂ် ၵေႃႉၼိုင်ႈ လၢတ်ႈဝႃႈ “ ၶႂ်ႈႁႂ်ႈပီႈၼွင်ႉတႆးၸိူဝ်းဢၼ်ယူႇႁိမ်းႁွမ်းႁႂ်ႈ မေႃဝႆႉၵႃႈၶၼ် ၊ ဝၢင်းႁေႃၼႆႉမိူဝ်ႈၵူႈပွၵ်ႈၵႂၢင်ႈယႂ်ႇၼႃႇ ယၢမ်းလဵဝ်လႆႈႁၼ်ၵူၼ်းႁဵတ်းႁႆႈ ၶဝ်ၶႂၢၵ်ႈႁႆႈ၊ ၶႂၢၵ်ႈၼႃႈလိၼ်တိၵ်းတိၵ်းလႄႈဢၼ်ပဵၼ်ၼမ်ႉၼွင်ဢၼ်ၸဝ်ႈၾႃႉၶဝ်ဢၢပ်ႇၼမ်ႉၼၼ်ႉၵေႃႈပဵၼ် တီႈပႅတ်ႈယုၵ်းယၢၵ်းပေႃးတဵမ်ၵႂႃႇသဵင်ႈ ပေႃးထႅင်ႈ 10 -20 ပီၼႆၸိုင် ၵူဝ်ၶူဝ်းၶွင်ၵဝ်ႇႁဝ်း ၸိူဝ်းၼႆႉႁၢႆ လၢႆ  ၊ လူႉၵွႆၵႂႃႇပႅတ်ႈ လႄႈ ၶႂ်ႈႁႂ်ႈႁဝ်းၵူႈၵေႃႉ ၸွႆႈၵၼ်မႅတ်ႇပႅင်း ႁၵ်ႉသႃ ၼင်ႇႁိုဝ်ပေႃးတေ လႆႈမီးဝႆႉ ၼႄ လုၵ်ႈလၢၼ်မိူဝ်ႈၼႃႈ ” ၼႆယဝ်ႉ ။


 ၵဵဝ်ႇလူၺ်ႈႁဵတ်းလွင်ႈမူတ်းသႂ်ႁေႃၸဝ်ႈၾႃႉၼႆႉသေပူၼ်ႉမႃးမိူဝ်ႈဝၼ်းတီႈ 20/07/2015 ၊ ၼၼ်ႉၵေႃႈ ၵေႃၵပ်းသၢၼ်ၵူၼ်းၼုမ်ႇတႆး (SYN) ဢွၼ်ႁူဝ်လုၵ်ႈႁဵၼ်း ပၢင်သွၼ် လၢတ်ႈၵႂၢမ်း ဢိင်းၵလဵတ်ႈ (English Speaking) ပွၵ်ႈၵမ်း 3 ႁႅင်းၵူၼ်းမွၵ်ႈ 300 ၵေႃႉ ၊ ၶိုၼ်ႈႁဵတ်းလွင်ႈမူတ်းသႂ် တီႈၼိူဝ်လွႆမူပ်ႇ ဢၼ်ပဵၼ်ပႃႇႁဵဝ်ႈၶုမ်ၵုတ်း (သၢႆသိုပ်ႇၶိူဝ်းၸဝ်ႈၾႃႉ မိူင်းဢုင်းပွင်ႇသီႇပေႃႉ) ၵူႈပၢၼ်ပၢၼ် ။
လိူဝ်ၼၼ်ႉမိူဝ်ႈပီ 2014 ၼၼ်ႉၵေႃႈၵူၼ်းၼုမ်ႇမိူင်းၼၢႆးႁူမ်ႈၵၼ်ၵႂႃႇတီႇၽဵဝ်ႈယုမ်းၶိူဝ်း ႁဵတ်းလွင်ႈမူတ်းသႂ်တီႈၶုမ်ၵုတ်း ၸဝ်ႈၾႃႉမိူင်းၼၢႆးၼၼ်ႉၼင်ႇၵဝ်ႇ - ဝႃႈၼႆ ။