ၾႆႈမႆႈႁိူၼ်းပီႈၼွင်ႉတႆး ဝၢၼ်ႈမႂ်ႇၵုင်းၵႅၼ် ဝဵင်းၵဵင်းတုင် ဢမ်ႇတၼ်းလႆႈၶူဝ်းသင် လုသုမ်း ၼပ်ႉႁူဝ်လၢၼ်ႇပျႃး ။

ဝၼ်းတီႈ 31/03/2016 ယၢမ်း 19:00-20:00 မူင်း ၾႆးမႆႈႁိူၼ်း ပီႈၸၢႆးဢွၼ်ႇ ယူႇဝၢၼ်ႈမႂ်ႇၵုင်းၵႅၼ် ဢိူင်ႇၵဵင်းလၢပ်ႈ ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ။ ယွၼ်ႉသၢႆၾႆးၾႃႉသျွတ်ႉ ဝႃႈၼႆ ။


ၵူၼ်းဝၢၼ်ႈ ၵေႃႉၼိုင်ႈလၢတ်ႈဝႃႈ “ ပဵၼ်ၶၢဝ်း ၸဝ်ႈႁိူၼ်း ဢမ်ႇယူႇႁိူၼ်း ။ ၵႂႃႇၸွႆႈပီႈၼွင်ႉၼႂ်းဝၢၼ်ႈ ႁႅၼ်းလူႇႁႅၼ်းတၢၼ်း တႃႇၶၢမ်ႇ သၢင်ႇ ။ ဢမ်ႇတၼ်းလႆႈၶူဝ်းသင် ပဵၼ်ၽဝ်ႇမူတ်း။  လွင်ႈမၢတ်ႇၸဵပ်း လုတၢႆတႄႉ ဢမ်ႇမီး ။ တေႃႈလဵဝ် ၵူၼ်းဝၢၼ်ႈ ဢွၼ်ၵၼ်ႁႃၶမ်းၸိူဝ်း ထုၵ်ႇၾႆးမႆႈၵႂႃႇၼၼ်ႉယူႇ ” ဝႃႈၼႆ ။


ႁိူၼ်းပီႈၼွင်ႉတႆး ဝၢၼ်ႈမႂ်ႇၵုင်းၵႅၼ်ၼႆႉ ပဵၼ်ႁိူၼ်းမႆႉပႅၼ်ႈၼႆလႄႈ ၶၢဝ်းယၢမ်း ၼိုင်ႈၸူဝ်ႈမူင်းပၢႆၵူၺ်း လႆႈမႆႈတင်းႁိူၼ်း  ပဵၼ်ၽဝ်ႇၵႂႃႇမူတ်း ။


ၸၢႆးသၢမ်တိပ်ႉသိူဝ် ႁူဝ်ၼႃႈ ၸုမ်းပၢႆးမွၼ်း မွၵ်ႇၵွၼ် ၵဵင်းတုင် လၢတ်ႈဝႃႈ “ ဝၼ်းတီႈ 02/04/2016 ၸုမ်းႁဝ်းလႆႈၵႂႃႇၸွႆႈၵမ်ႉထႅမ် ငိုၼ်းၼိုင်ႈသႅၼ်ပျႃး ၊ ၽႃႈႁူမ်ႇ ၊ ၶူဝ်းၼွၼ်း ၊ မေႃႈဝၢၼ်ႇ ၸဵမ်ၸိူဝ်းၼႆႉ ” ဝႃႈၼႆ ။


ပူၼ်ႉမႃး လိူၼ်မၢတ်ႉၶျ် ဝၼ်းတီႈ 22 ၵေႃႈ ၾႆးမႆႈသုမ်ႉၶၢႆၶူဝ်းၼႂ်းၵၢတ်ႇ တီႈဝၢၼ်ႈၼွႆႉၼေႃး ပွၵ်ႉ 5 ၵဵင်းတုင် ၼင်ႇၵဝ်ႇ ။ ပီၼႆႉၵေႃႈယွၼ်ႉပိူဝ်ႈ သၢႆလူမ်းမႆႈဢႄႊၼီႊၺဵဝ်ႊတေလတ်းထႅင်ႈလႄႈ တေမႆႈလိူဝ်ႁႅင်း ၊ ၼမ်ႉတေႁႅင်ႈလိူဝ်ႁႅင်း ။ ၾၢႆႇၶူၼ်ႉၶႂႃႉၾိင်ႈၾႃႉရႃႇသီႇတႄႉဝႃႈ ႁႂ်ႈၵူၼ်းဝၢၼ်ႈၵူၼ်းမိူင်းၾၢင်ႉၽေးၾႆး ။ ႁၵ်ႉသႃမႄႈၼမ်ႉ ၊ ၼမ်ႉၼွင် ၊ ႁႂ်ႈမေႃပႅင်းၸႂ်ႉၼမ်ႉ - ဝႃႈၼႆ ။