ၽူႈႁၢပ်ႇၵၢၼ်ၸိူဝ်ႉၸၢတ်ႈတႆး မႃးလၢႆသိုပ်ႇပၢၼ် ၸွမ်ႁၢၼ်ၶိူဝ်းသိူဝ် ႁိုဝ် ၸဝ်ႈပၼ်တိတ ၶိူဝ်းတႆး ၊ လူႉသဵင်ႈမုၼ်ၵႂႃႇ တီႈဝဵင်းၵဵင်းမႆႇ မိူင်းၸိုင်ႈထႆး လူၺ်ႈတၢင်းပဵၼ်ၵူၼ်းထဝ်ႈ ။

ပူၼ်ႉမႃးမိူဝ်ႈဝၼ်းဢႃးတိတ်ႉတီႈ 11/04/2016 ၸွမ်ႁၢၼ်ၶိူဝ်းသိူဝ် (ၸဝ်ႈၶိူဝ်းသိူဝ်) ႁိုဝ် ၸဝ်ႈပၼ်တိတ ၶိူဝ်းတႆး ၊ လႆႈလူႉသဵင်ႈမုၼ်ၵႂႃႇတီႈဝဵင်းၵဵင်းမႆႇ မိူင်းထႆး လူၺ်ႈတၢင်းပဵၼ်ၵူၼ်းထဝ်ႈ ၽွင်းဢႃယု 93 ပီ ။ ယၢမ်းလဵဝ် ၶၢပ်ႈတူဝ်မၼ်းၸဝ်ႈ ဢဝ်ဝႆႉတီႈတိၼ်လွႆထၢတ်ႈဝတ်ႉလွႆသၵဵတ်း ၸႄႈဝဵင်းလွႆသၵဵတ်း ၸႄႈတွၼ်ႈၵဵင်းမႆႇသေ ပီႈၼွင်ႉၸိူဝ်ႉၶိူဝ်းမၼ်းၸဝ်ႈလႄႈ ၽူႈႁၵ်ႉၸၢတ်ႈတင်းလၢႆ ၸတ်းႁဵတ်းပၢင်ၸႃပၼ သူတ်ႇဢၽိထမ်း ႁႅၼ်းတၢၼ်း ယၢတ်ႇၼမ်ႉၶႂမ်ႈတဝ်ႈ ၽႄၵုသူလ်ပၼ် ၸွမ်းၾိင်ႈထုင်း ပုတ်ႉထသႃသၼႃ ။ တေပူၼ်ႉၶၢပ်ႈတူဝ် - ႁွပ်ႇႁူဝ်ၶဝ်ႈႁဵဝ်ႈ ၼႂ်းဝၼ်းတီႈ 19/04/2016 - ယၢမ်းဝၢႆးဝၼ်း တီႈပႃႇၸႃႉလွႆသၵဵတ်း ။


ၶမ်ႈၶိုၼ်းဝၼ်းတီႈ 16/04/2016 တၢင်းၺႃတိပီႈၼွင်ႉလႄႈမိတ်ႉဢူၺ်းသႁၢႆ ဢိၵ်ႇလုၵ်ႈၼွင်ႉပွင်ႈပၢႆလႆႈႁႅၼ်းပၢင်သူတ်ႇဢၽိထမ်း သေဝၼ်းတီႈ 17/04/2016 ၼႆႉ သမ်ႉ ၽူႈႁပ်ႉပဵၼ်ၸဝ်ႈတႃႇၼလူင် သူတ်ႇဢၽိထမ်း လႄႈ လဵင်ႉလူၽူႈၶဝ်ႈႁူမ်ႈတင်းသဵင်ႈ ပဵၼ်ၸဝ်ႈၵွၼ်းၸိုၼ်ႈ ၽူႈၵွၼ်းၼႃႈလိၼ်သိုၵ်းၵဵင်းတုင် ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) လႄႈလုၵ်ႈၼွင်ႉပွင်ႈပၢႆတင်းသဵင်ႈ ။ ၶမ်ႈၶိုၼ်းဝၼ်းတီႈ 18/04/2016 ၽူႈႁပ်ႉပဵၼ်ၸဝ်ႈတႃႇၼလူင် သူတ်ႇဢၽိထမ်း လႄႈ လဵင်ႉလူၽူႈၶဝ်ႈႁူမ်ႈတင်းသဵင်ႈ ပဵၼ်ၸဝ်ႈဢွၼ်တိုၼ်း (RCSS/SSA) လႄႈပီႈၼွင်ႉၸိူဝ်ႉၶိူဝ်း ဢိၵ်ႇလုၵ်ႈၼွင်ႉပွင်ႈပၢႆတင်းသဵင်ႈ - ၼႆယဝ်ႉ ။


(ပိုၼ်းၵႅပ်ႈၸဝ်ႈၶိူဝ်းသိူဝ်)

ၸွမ်ႁၢၼ်ၶိူဝ်းသိူဝ်ၼႆႉ ၵိူတ်ႇမိူဝ်ႈပီ 1923 ။ တႄႇၼႃႈႁိူၼ်းၵိုၵ်းၼၢင်းသႅင်ႁူင် (တႆးလိုဝ်ႉ မိူင်းသိပ်းသွင်ပၼ်းၼႃး) ၊ မီးလုၵ်ႈလၢင်း ႁူမ်ႈၵၼ် 3 ၵေႃႉ - 1. ၸၢႆးဢူမိူင်း (သဵင်ႈၵမ်) ။ 2. ၸၢႆးဢူတႆး ။ 3. ၸၢႆးဢူႁိူင်း ။


ၸွမ်ႁၢၼ်ၶိူဝ်းသိူဝ် (ၸဝ်ႈၶိူဝ်းသိူဝ်) ဢမ်ႇၼၼ် ၸဝ်ႈပၼ်တိတ ၶိူဝ်းတႆး ၊ ၸဝ်ႈၵဵင်းတုင် ။ ၸိုဝ်ႈမိူင်းထႆးႁွင်ႉဝႃႈ ၼၢႆးသူမ်ၽူင်း ပၺ်းၺၢင်းၵုရ်း ၊ ၶုၼ်းပၼ်းၻိတ်ႇ ၽဝ်ႈရင်ႈ။ မၼ်းၸဝ်ႈၼႆႉ  ပဵၼ်ၽူႈၵေႃႇတင်ႈဝတ်ႉၶိူဝ်းတႆး ဝဵင်းလႃႈသဵဝ်ႈ ၊ မိူင်းတႆးပွတ်းႁွင်ႇ ဢၼ်ပဵၼ်တီႈ ၵူၼ်းၶိူဝ်းတႆးၶွၼ်ႈတုမ်ၵၼ် တင်းတူဝ်လႄႈတင်းၸႂ် ။ မၼ်းၸဝ်ႈလႆႈ တႅမ်ႈလိၵ်ႈပူၵ်းသူၼ်း ႁႂ်ႈတႆးႁူႉတူဝ် လုၵ်ႉၽိုၼ်ႉဢဝ်မိူင်းၸိုင်ႈတႆး ၵွၼ်းၶေႃ (3) ပပ်ႉ မိူၼ်ၼင်ႇ - 1. ၶိူဝ်းတႆး မိူင်းတႆး မိူဝ်ႈပီ 1984 ။ 2. လၢႆးၾၼ်းမိူင်း မိူဝ်ႈပီ 1957 လႄႈ 3. ႁူႉတူဝ်တႃႉတႆး မိူဝ်ႈပီ 1958 ။ မၼ်းၸဝ်ႈၶဝ်ႈထိူၼ်ႇ ႁၢပ်ႇၵိုတ်ႉၵၢၼ်လၢႆးလုၵ်ႉၽိုၼ်ႉၸိုင်ႈတႆး ၼႂ်းတပ်ႉသိုၵ်းၼုမ်ႇသိုၵ်းႁၢၼ် ဢၼ်ၸဝ်ႈၼွႆႉ သေႃးယၼ်ႇတ ဢွၼ်ႁူဝ်မိူဝ်ႈပီ 1960 ။