ပီႈၼွင်ႉသတ်းထႃးလဝ်ႈႁူဝ်ဝတ်ႉယၢင်းပူးလႄႈ ၸုမ်းလုၵ်ႈႁဵၼ်းႁူင်းႁဵၼ်း ၾၢႆႇပူၵ်းပွင်ၵူၼ်းၼုမ်ႇၸိုင်ႈတႆး ဢွၼ်ၵၼ်ၸတ်းႁဵတ်း ပၢင်ယွင်ႈၵုၼ်းမုၼ် ၸဝ်ႈတူၼ်ၶူးၸေႃးတိၵ (ၶ) ၶုၼ်ၸွမ်ၾႃႉ မိူင်းမိတ်ႈ ၊ ပီႈၼွင်ႉသတ်းထႃးလၢႆလၢႆၸႄႈဝဵင်းၶဝ်ႈႁူမ်ႈယေႃးၵုၼ်းမုၼ်တင်းၼမ်လၢႆ ။

ဝၼ်းတီႈ 10/04/2016 ယၢမ်း 10:00-15:00 မူင်း ၊ ပီႈၼွင်ႉသတ်းထႃးတီႈၸမ် / ၵႆလႄႈ ႁူမ်ႈပႃးပီႈၼွင်ႉႁူဝ်ဝတ်ႉယၢင်းပူး ဢိၵ်ႇပႃးၸုမ်းလုၵ်ႈႁဵၼ်းႁူင်းႁဵၼ်း ၶုၼ်ၸွမ်ၾႃႉလႄႈ ၾၢႆႇပူၵ်းပွင်ၵူၼ်းၼုမ်ႇၸိုင်ႈတႆး ႁူမ်ႈၵၼ်ၸတ်းႁဵတ်းပၢင်ယွင်ႈၵုၼ်းမုၼ် ၸဝ်ႈတူၼ်ၶူးၸေႃးတိၵ (ၶ) ၶုၼ်ၸွမ်ၾႃႉ (မိူင်းမိတ်ႈ) ၸတ်းႁဵတ်းတီႈဝတ်ႉယၢင်းပူး ဢိူင်ႇလွႆလူင် ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ။


ၼၢင်းသီလႃး ၽူႈၶၢၼ်ပၢၵ်ႇပၢင်ယွင်ႈၵုၼ်းမုၼ်ၼႆႉ လၢတ်ႈဝႃႈ - “ တႃႇပွႆးယုၵ်ႉယွင်ႈၸဝ်ႈၶူးၼႆႉ ၸဵမ်မိူဝ်ႈၵွၼ်ႇ လူင်ပွင်ၸိုင်ႈ မိူဝ်ႈပႆႇပိုၼ်ၽၢဝ်ႇပၼ်ၸုမ်ႈၶူးၼၼ်ႉ ႁဝ်းၶႃႈမီးဝၢင်းၽႅၼ်ဝႆႉဝႃႈ ၸဝ်ႈၶူးၵေႃႈ မႃးယူႇတၢင်းပွတ်းဢွၵ်ႇ ၊ ႁဝ်းၶႃႈၶတ်းၸႂ်ယုၵ်ႉယွင်ႈလိၵ်ႈလၢႆးၾိင်ႈငႄႈသေဢမ်ႇၵႃး ၵေႃႇသၢင်ႈႁူင်းႁဵၼ်းၶိုၼ်ႈမႃးသေလႄႈ ပူင်သွၼ် / ပူၵ်းတိုၼ်ႇပၼ်ၵူၼ်းၼုမ်ႇႁဝ်း ၸိူဝ်းဢၼ်ၵႂင်သဵၼ်ႈတၢင်းယူႇၸိူဝ်းၼၼ်ႉ ၼင်ႇႁိုဝ် ပေႃးတေပိုတ်ႇႁူလႅင်းတႃမႃး ၊ ႁဝ်းၶႃႈၵေႃႈ ငိၼ်းၸူမ်းၶွပ်ႈၸႂ်မၼ်းၸဝ်ႈ ၸင်ႇလႆႈၸတ်းႁဵတ်းပွႆးယုၵ်ႉယွင်ႈ ၸဝ်ႈႁဝ်းၼင်ႇၼႆ ”- ဝႃႈၼႆ ။


ပၢင်ယွင်ႈၵုၼ်းမုၼ်ၸဝ်ႈတူၼ်ၶူးၸေႃးတိၵၼႆႉ လႆႈၽိတ်ႈမွၵ်ႇပၢင်းထိုင်သင်ၶၸဝ်ႈ ႁူဝ်ဝတ်ႉၼႂ်းၸႄႈဝဵင်းၵဵင်းတုင် လၢႆလၢႆၸႄႈဝဵင်း လၢႆလၢႆတီႈ ၊ ပီႈၼွင်ႉသတ်ႉထႃးတီႈၸမ် / ၵႆလႄႈ ၸိူဝ်းပဵၼ်လုၵ်ႈၼွင်ႉ / လုၵ်ႈႁဵၼ်းပွင်ပၢႆတင်းၼမ်လၢႆ ၶဝ်ႈႁူမ်ႈဢဝ်ၵုၼ်းမုၼ်ႁူမ်ၸူမ်းၸွမ်းသေ မီးပၢင်လူလိၵ်ႈယေႃးၵုၼ်းမုၼ်ၸဝ်ႈတူၼ်ၶူး ၊ မီးပၢင်လူဢၢၼ်ႇပိုၼ်းၸဝ်ႈတူၼ်ၶူး ။ ဝၢႆးၼၼ်ႉၸင်ႇလူႇတၢၼ်းယၢတ်ႇၼမ်ႉယဝ်ႉတူဝ်ႈလီငၢမ်း ။


ပူၼ်ႉမႃးဝၼ်းတီႈ 08-09/04/2016 ၼၼ်ႉ လုၵ်ႈႁဵၼ်းၸိူဝ်းပဵၼ်လုၵ်ႈႁဵၼ်းၼႂ်းႁူင်းႁဵၼ်း ၶုၼ်ၸွမ်ၾႃႉ လႄႈ ၾၢႆႇပူၵ်းပွင်ၵူၼ်းၼုမ်ႇၸိုင်ႈတႆး 15 ၸုပ်ႈ လႆႈၸတ်းႁဵတ်းပၢင်ႁူပ်ႉထူပ်းဢုပ်ႇဢူဝ်းလႅၵ်ႈလၢႆႈၵၼ် ၊ လႆႈၶေႃႈတႅပ်းတတ်းသၢင်ႈၼႅင်ႈသၢၼ်ၵွင်ႉၵၢႆႇၵၼ် တႃႇတေၸတ်းႁဵတ်းပၢင်ႁူပ်ႉထူပ်းလုၵ်ႈႁဵၼ်းသွင်ပီၼိုင်ႈပွၵ်ႈ ။ ယဝ်ႉၵေႃႈလႆႈၶွတ်ႇၽွတ်ႈတင်ႈၶွမ်ႊမတီႊမႃး မိူၼ်တၢင်းပွတ်းဢွၵ်ႇၶူင်း ၊ လႆႈလိူၵ်ႈၶွမ်ႊမတီႊတူဝ်တႅၼ်းၼိုင်ႈၵေႃႉ ၊ ပွတ်းၸၢၼ်း 2 ၵေႃႉ ၊ ပွတ်းႁွင်ႇ 2 ၵေႃႉလႄႈ ၸိူဝ်းလုၵ်ႈႁဵၼ်းၼႂ်းမိူင်းထႆး 2 ၵေႃႉ ၊ ႁူမ်ႈတင်းမူတ်း 7 ၵေႃႉ - ၼႆယဝ်ႉ ။


ၵဵဝ်ႇၵပ်းလူၺ်ႈပၢင်ယွင်ႈၵုၼ်းမုၼ် ၸဝ်ႈတူၼ်ၶူးၸေႃးတိၵၼႆႉသေ ပူၼ်ႉမႃးဝၼ်းတီႈ 23/03/2016 လူင်ပွင်ၸိုင်ႈမိူင်းမၢၼ်ႈ လႆႈမွပ်ႈဢၢပ်ႈပၼ် ၸုမ်ႈၶူးသတ်ႉထမ်ႇမၸေႃးတိၵထၸ တီႈၼေႇပျီႇတေႃႇ ။


သင်ၶၸဝ်ႈၸိူဝ်းလႆႈႁပ်ႉၸုမ်ႈၶူးၼႂ်းမိူင်းတႆးမီး 13 တူၼ် ၊ ၼၢႆးၶၢဝ် 3 တူၼ် ႁူမ်ႈ 16 တူၼ် ၊ 1.ၸဝ်ႈတူၼ်ၶူးမုၼိၼ်တ မႁႃၼႃယၵ ငဝ်ႈငုၼ်းမုၵ်ႉၸုမ်းလူင်သင်ၶၸိုင်ႈတႆး ဝတ်ႉၵၢင်မိူင်း ဝဵင်းလႃႈသဵဝ်ႈ ။ 2. ၸဝ်ႈတူၼ်ၶူးဝိၸယ (ထမ်မႃၸရိယ) ဝတ်ႉဝေလုဝၼ် ဝဵင်းတူၼ်ႈတီး ။ 3. ၸဝ်ႈတူၼ်ၶူးလူင်ဢၵ်ႉၵသေၼ ဝတ်ႉဢွင်ႇမင်ႇၵလႃႇ ဝဵင်းၵုၼ်ႁဵင် ။ 4. ၸဝ်ႈတူၼ်ၶူးဝိသုတ်ႉထ ( ၸဝ်ႈဢွၼ်ႁူဝ်တင်ႈႁူင်းႁဵၼ်းသႃရိပုတ်ႉတၵေႃးလဵၵ်ႉၶျ်  M.A Sri Lanka ) ဝတ်ႉၼၼ်တဝၼ် ၵွင်းမူးၶမ်း ဝဵင်းမူႇၸႄႈ ။ 5. ၸဝ်ႈတူၼ်ၶူးသုဝရ(M.A, Sri Lanka) ။ 6. ၸဝ်ႈတူၼ်ၶူးဝိၸတ်ႉတႃၽိပႃလ (လၢႆးၶႃႈ) (M.A, Sri Lanka) ။ 7. ၸဝ်ႈတူၼ်ၶူးသုၼ်တရ (ဝတ်ႉတႆးၵဝ်ႈလၵ်းတႃႈၵုင်ႈ) ဝတ်ႉႁုင်းၶမ်း ဝဵင်းၵေးသီး ။ 8. ၸဝ်ႈတူၼ်ၶူးၸၼ်တႃဝရ ဝတ်ႉၶမ်း ဝဵင်းသႅၼ်ဝီ ။ 9. ၸဝ်ႈတူၼ်ၶူးၸေႃးတိၵ ဝတ်ႉယၢင်းပူး ဝဵင်းၵဵင်းတုင် ။ 10. ၸဝ်ႈတူၼ်ၶူးမုၼိၼ်တ (M.A, Sri Lanka) ဝတ်ႉလူင်ဝၢၼ်ႈၸၢမ်သူၺ်ႇၸၵႃးဝႃႇသုၶပလ ဝဵင်းၼမ်ႉတူႈ ။ 11. ၸဝ်ႈတူၼ်ၶူးတေဝိၼ်တ ဝတ်ႉၵုင်းသႃႇ ဝဵင်းၼမ်ႉၶမ်း ။ 12. ၸဝ်ႈတူၼ်ၶူးၼေမိၼ်တ (M.A, Sri Lanka) ဝတ်ႉဝေလုဝၼ် ၼမ်ႉပွင်ႈ လႃႈသဵဝ်ႈ ။ 13. ၸဝ်ႈတူၼ်ၶူးတွၵ်ႊတိူဝ်ႊၵေလႃၼၼ်တ (ၼမ်ႉၶမ်း) ထမ်မႃၸရိယ M.A Sri Lanka, Ph D, India) ဝတ်ႉတႆးၶူးဝႃးဝုၼ်းၸုမ်ႉပုတ်ႉ ထၵယႃ ၊ မိူင်းဢိၼ်းတီးယိူဝ်း ။ 14. ၸဝ်ႈၶၢဝ်လူင် ဢုတ်ႉတမၼၼ်တီ (သွင်ထမ်မႃၸရိယ တႆးမၢၼ်ႈ ၊ M.A,Sri Lanka) ဝတ်ႉၶၢဝ်သႃသၼဝမ်သီ ဝဵင်းတူၼ်ႈတီး။ 15 ၸဝ်ႈၶၢဝ်လူင် သုၼၼ်တီ (သွင် ထမ်မႃၸရိယ တႆးမၢၼ်ႈ) ဝတ်ႉၶၢဝ်သႃသၼႁိတၵႃရီ ဝဵင်းလႃႈသဵဝ်ႈ ။ 16 ၸဝ်ႈၶၢဝ်လူင် ဢေသိင်ၵီ (မၢႆ 1 ဢွင်ႇဝိၼယပိတၵၢတ်ႈၼႂ်းမိူင်းႁူမ်ႈတုမ်) ဝတ်ႉၶၢဝ်ဢတုလၸေယျဝမ်သီ ဝဵင်းလႃႈသဵဝ်ႈ ၸဵမ်ၸိူဝ်းၼႆႉ ။