ႁူဝ်ပဝ်ႈလူင် ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းယွတ်ႈသိုၵ်း လၢတ်ႈထတ်းသၢင် လွင်ႈလူင်ပွင်ၸိုင်ႈမႂ်ႇၶိုၼ်ႈမႃး ၊ တေလႆႈပႂ်ႉတူၺ်းၼမ်ႉမိုဝ်း ဢွင်ႇသၢၼ်းၸုၵျီႇ ။ ဢေႃးၸႃႇမၼ်းၼၢင်း တေမီးၼိူဝ်တပ်ႉသိုၵ်းၵႃႈႁိုဝ် ။ ၾၢႆႇၼိုင်ႈ ၸၢဝ်းၶိူဝ်းတၵ်းလႆႈ ပိုင်ႈဢိင်တူဝ်ၵဝ်ႇၼမ် ။ ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆ ။

ၸွမ်သိုၵ်းယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး

ထၢမ် - ဢၼ်လူင်ပွင်ၸိုင်ႈမႂ်ႇ ၶိုၼ်ႈမႃးၼႆႉ ၸွင်ႇမီးတၢင်းမုင်ႈမွင်းယူႇၶႃႈႁႃႉ ၊ တႃႇတေၵႄႈလိတ်ႈပၼ်ႁႃ ဢၼ်ပဵၼ်ပၼ်ႁႃပၢင်တိုၵ်းသိုၵ်းသိူဝ် ၼႂ်းမိူင်းတႆးၵေႃႈလီ ၊ ပတ်းပိုၼ်ႉမိူင်းႁူမ်ႈတုမ်ၵေႃႈလီၶႃႈ ?။


တွပ်ႇ - လူင်ပွင်ၸိုင်ႈမႂ်ႇၶိုၼ်ႈမႃးၼႆႉ ပေႃးမႃးတူၺ်းတၢမ်လၵ်းၵၢၼ် ၻီႊမူဝ်ႊၶရေႊၸီႊတႄႉ ပဵၼ်ၵၢင်ၸႂ်ၵူၼ်းမိူင်း ။ ၵူၺ်းၵႃႈ ပေႃးမႃးဢဝ်ၵၢၼ်ထူပ်းမိုဝ်းတႄႉ ႁဝ်းထၢင်ႇမၼ်းတေယၢပ်ႇတႄႉတႄႉ ။ ၵွပ်ႈပိူဝ်ႈဝႃႈ ဢႃႇၼႃႇသိုၵ်းၼႆႉ မၼ်းတိုၵ်ႉၵိုတ်းၼမ်ၼႃႇ ။ ၵူၺ်းၵႃႈ ႁဝ်းတေလႆႈပႂ်ႉတူၺ်းၵႂႃႇထႅင်ႈၵွၼ်ႇ မၼ်းတေႁဵတ်းလႆႈမွၵ်ႈၵႃႈႁိုဝ် ။ မိူဝ်ႈလဵဝ် ဢမ်ႇဝႃႈၵူၼ်းမိူင်း ၊ ဢမ်ႇဝႃႈၸုမ်းယိပ်းၵွင်ႈၵၢင်ႇတင်းသဵင်ႈၼႆႉ ပႂ်ႉမွင်းတူၺ်းပေႃႇလသီႇလူင်ပွင်ၸိုင်ႈမႂ်ႇတင်းၼမ် ၊ ယဝ်ႉၵေႃႈပႂ်ႉတူၺ်းၾီမိုဝ်းဢွင်ႇသၢၼ်းၸုၵျီႇၵွၼ်ႇ ၊ ၾီမိုဝ်းမၼ်းၼၢင်း တေမီးမွၵ်ႈၵႃႈႁိုဝ် ။ ၾီမိုဝ်းမၼ်းၼၢင်းမီးသေတႃႉၵေႃႈ ဢေႃးၸႃႇလွၵ်းတွၼ်ႈ မၼ်းၼၢင်းၼႆႉ မီးၼိူဝ်တပ်ႉသိုၵ်းမွၵ်ႈၵႃႈႁိုဝ် ၊ ဢၼ်ၼႆႉႁဝ်းလီပႂ်ႉတူၺ်း ။


ထၢမ် - ႁဝ်းၶႃႈလႆႈႁူႉတႄႉ ၵွၼ်ႇပႆႇထိုင်ပၢင်လိူၵ်ႈတင်ႈ (2015) ၼႆႉ မၼ်းၼၢင်းၶႂ်ႈႁူပ်ႉၾၢႆႇသိုၵ်းမိူဝ်ႈလႂ်ၵေႃႈ ၾၢႆႇသိုၵ်းဢမ်ႇယွမ်းႁပ်ႉႁူပ်ႉ ၊ ၵူၺ်းၵႃႈ ဝၢႆးပေႉပၢင်လိူၵ်ႈတင်ႈယဝ်ႉ လႆႈႁူပ်ႉသၢမ်မိူဝ်ႈသၢမ်ပွၵ်ႈၵမ်းလဵဝ် ။ ၵွပ်ႈၼၼ် လွင်ႈၵပ်းသိုပ်ႇၼႂ်းဝူင်ႈၵၢင် တပ်ႉသိုၵ်းတင်းဢွင်ႇသၢၼ်းၸုၵျီႇၼႆႉ လႅပ်ႈတေမီးၽွၼ်းလီ တႃႇၸၢဝ်းၶိူဝ်းႁဝ်းမႃးယူႇၶႃႈႁႃႉ ?။


တွပ်ႇ - ႁဝ်းထၢင်ႇတႄႉ တၢင်းမုင်ႈမွင်းတႃႇၸၢဝ်းၶိူဝ်းၼႆႉမၼ်းဢေႇၼႃႇ ။ တူၺ်းဢဝ်တင်ႈလူင်ပွင်ၸိုင်ႈၼႆႉ ၵူၺ်းၵေႃႈႁူႉ ။ သၽႃဝမိူဝ်ႈလဵဝ်ၼႆႉ NLD တင်းတပ်ႉသိုၵ်းၼႆႉ မၼ်းႁူမ်ႈၵၼ်ဝႆႉ ။ ၸွမ်ၸိုင်ႈပဵၼ် NLD ၊ ၵႅမ်ၸွမ်ၸိုင်ႈပဵၼ်တပ်ႉသိုၵ်း ၊ မျိၼ်ႉသူၺ်ႇပဵၼ်တပ်ႉသိုၵ်းလိူၵ်ႈမႃး ၊ ၶဝ်ႁူမ်ႈၵၼ် ။ ၸၢဝ်းၶိူဝ်းဢၼ်ၶဝ်ႈပႃး ၼႂ်းၼႆႉ ဢမ်ႇမီးၽႂ်လူး ၊ ၸၢဝ်းၶိူဝ်းၼႆႉ ဢၼ်ဢဝ်ဢူးတီႇၶုၼ်မျၢတ်ႈ ၵူတ်ႉၶၢႆၼၼ်ႉ မၼ်းၵေႃႈပဵၼ်ၼႂ်း ပီႇတုၸိတ်ႉၶဝ်ၵူၺ်း ၊ ၼႂ်းၶျၢင်းၵေႃႈ ပဵၼ်ၼႂ်း NLD ၶဝ်ၵူၺ်းၼင်ႇၵဝ်ႇ ၊ ပေႃးမႃးတူၺ်းၸိူဝ်းၼႆႉမၼ်းယၢပ်ႇ ။


ထၢမ် - ၽိဝ်မၼ်းတႄႉ ပဵၼ်လူင်ပွင်ၸိုင်ႈၵႂႃႇယဝ်ႉ ၊ လွၼ်ႉၵႅၼ်မၼ်းၶႃႈလူး ။ ပေႃးႁဝ်းၶႃႈမႃးတူၺ်း မိူဝ်ႈမၼ်းၼၢင်းတႄႇဢွၵ်ႇၶွၵ်ႈမႃးၼႆႉ ႁဝ်းလူဝ်ႇႁဵတ်းပၢင်ၵုမ်လူင်ပၢင်လူင် 21 ၸူဝ်ႈပၢၵ်ႇပီမိူင်းၼႆ တူၵ်ႇလၢတ်ႈတီႈမိူင်းၶျၢင်းၵမ်းလဵဝ် ။ ၽိူဝ်ႇမႃးပဵၼ်ပၼ်ႁႃ မိူဝ်ႈသိုၵ်းမၢၼ်ႈၶဝ်ႈယိုဝ်းၵူဝ်းၵၢင်ႉယဝ်ႉၼႆ မၼ်းၼၢင်းတူၵ်ႇလၢတ်ႈဝႃႈ တပ်ႉမတေႃႇၼႆႉ မၼ်းၵိုင်ႇယိုဝ်း ၊ မၼ်းၵိုင်ႇႁဵတ်းၵၢၼ်လႄႈႁဵတ်းၵႂႃႇၵူၺ်း ဝႃႈၼႆ ။ ၵွပ်ႈၼၼ် ယူႇတီႈႁူဝ်ပဝ်ႈလူင်သေ မီးတၢင်းမုင်ႈမွင်း ၼႂ်းၵၢၼ်ၵႄႈလိတ်ႈပၼ်ႁႃၸၢဝ်းၶိူဝ်းၼႆႉ မွၵ်ႈၵႃႈႁိုဝ်ၶႃႈ ?။


တွပ်ႇ - ၸၢဝ်းၶိူဝ်းႁဝ်းတေလႆႈပိုင်ႈဢိင်တူဝ်ၸဝ်ႈၵဝ်ႇၼမ်တႄႉတႄႉ ။ ႁဝ်းတေၵႂႃႇပိုင်ႈဢိင်ပိူၼ်ႈမႃး ႁဵတ်းပၼ်ႁဝ်းၼႆႉ မၼ်းတေယၢပ်ႇ ။ လူဝ်ႇပိုင်ႈဢိင်ၶႅင်ႈၶႃတူဝ်ၵဝ်ႇ ယႃႇမုင်ႈမွင်းႁႂ်ႈပိူၼ်ႈမႃးႁဵတ်းပၼ်ႁဝ်း ၊ ဢၼ်ၼႆႉပဵၼ်ထီႉ 1 ။ ဢွင်ႇသၢၼ်းၸုၵျီႇၼႆႉ ႁဝ်းဢမ်ႇလူဝ်ႇပိုင်ႈႁႃႉ လူဝ်ႇပိုင်ႈယူႇ ၊ ၵွပ်ႈပိူဝ်ႈဝႃႈ မၼ်းၼၢင်းႁပ်ႉဝႆႉပုၼ်ႈၽွၼ်းလူင်ပွင်ၸိုင်ႈ ပဵၼ်တၢင်းၵၢၼ် ၊ ပေႃးႁပ်ႉဝႆႉပဵၼ်တၢင်းၵၢၼ် မၼ်းမီးၼႃႈတီႈပုၼ်ႈၽွၼ်း တႃႇတေၵႄႈလိတ်ႈပၼ်ႁႃၸၢဝ်းၶိူဝ်း ဝၼ်းမိူဝ်ႈၼႆႉ ။


လူင်ပွင်ၸိုင်ႈ မိူင်းႁူမ်ႈတုမ်မိူင်းမၢၼ်ႈႁဝ်းၼႆႉ မၼ်းဢမ်ႇၸႂ်ႈပၼ်ႁႃၵၢၼ်မိူင်းဢၼ်လဵဝ် ၊ မၼ်းပဵၼ်ပၼ်ႁႃ ၸၢဝ်းၶိူဝ်း ၊ တႃႇတေၵႄႈလိတ်ႈပၼ်ႁႃၵၢၼ်မိူင်းၼႆႉ တေလႆႈၵႄႈလိတ်ႈပၼ်ႁႃၸၢဝ်းၶိူဝ်းၵွၼ်ႇ ။ မိူဝ်ႈႁဝ်းၵႂႃႇၼေႇပျီႇတေႃႇၵေႃႈ ႁဝ်းလၢတ်ႈယူႇတႃႇသေႇ ၊ လူဝ်ႇသၢင်ႈလွင်ႈယုမ်ႇယမ်ၵၼ် ၊ လူဝ်ႇသိူဝ်ႇတၢင်း ႁႂ်ႈမီးလွင်ႈယုမ်ႇယမ်ၵၼ် ၊ လွင်ႈယုမ်ႇယမ်ၵၼ်ၵိူတ်ႇၶိုၼ်ႈမႃးၵွၼ်ႇ မၼ်းၸင်ႇၽွမ်ႉႁူမ်ႈၵၼ် ၊ လွင်ႈၽွမ်ႉႁူမ်ႈမီးၵွၼ်ႇ မၼ်းၸင်ႇသၢင်ႈလႆႈလွင်ႈငမ်းယဵၼ် ၸိူဝ်းၼႆႉႁဝ်းလၢတ်ႈယဝ်ႉ ။ ၵူၺ်းၵႃႈ ဝၼ်းမိူဝ်ႈၼႆႉ ၵႄႈလိတ်ႈပၼ်ႁႃၸၢဝ်းၶိူဝ်းပႆႇမီးသင် ။


(ၶႅၼ်းတေႃႈ ပႂ်ႉသိုပ်ႇဢၢၼ်ႇ ၸဝ်ႈယွတ်ႈသိုၵ်းလၢတ်ႈလွင်ႈ ၶၢဝ်းတၢင်းသူႇယဵမ်ႈၸႂ်း ပီႈၼွင်ႉၵူၼ်းမိူင်းတႆး လၢႆတီႈလၢႆၸႄႈဝဵင်း)