ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလၢႆလၢႆၸုမ်း ႁူမ်ႈၵၼ်ၸတ်းႁဵတ်းပၢင်ၵုမ်လူင် တီႈငဝ်ႈငုၼ်းၸုမ်းဝႃႉ UWSP/UWSA တီႈဝဵင်းပၢင်သၢင်း။ ဢုပ်ႇၵုမ်လႅၵ်ႈလၢႆႈလွင်ႈၵၢၼ်မိူင်း ယၢမ်းလဵဝ်လႄႈ လွင်ႈတေႁူမ်ႈမိုဝ်း လူင်ပွင်ၸိုင်ႈမႂ်ႇ ။ ႁူမ်ႈၵၼ်လႆႈၸႂ်တႅပ်းတတ်း ဢွၵ်ႇၶေႃႈပိုၼ်ၽၢဝ်ႇ တုၵ်းယွၼ်းႁႂ်ႈၵိုတ်းပၢင်တိုၵ်း ၼႂ်းၸိုင်ႈတႆးပွတ်းႁွင်ႇ ။

ပၢင်ၵုမ်လူင် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႈဝဵင်းပၢင်သၢင်း ပီ 2015

ပူၼ်ႉမႃး တင်ႈတႄႇဝၼ်းတီႈ 26-28/03/2016 ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၊ ၸုမ်းၶၢင်လွတ်ႈလႅဝ်း (KIO/KIA) ၊ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (TNLA) ၊ တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႉတိၵ်ႉ ၵူႈၸၢဝ်းၶိူဝ်း မိူင်းမၢၼ်ႈ (MNDAA) ၸုမ်းၵူဝ်းၵၢင်ႉ။ တပ်ႉသိုၵ်းရၶႅင်ႇ (AA) ၊ တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႉတိၵ်ႉ ၸိူဝ်ႉၸၢတ်ႈ (NDAA) ၸုမ်းမိူင်းလႃး ၸိူဝ်းၼႆႉတင်းမူတ်း တူဝ်တႅၼ်း 34 ၵေႃႉ ၊ ႁူပ်ႉထူပ်းဢုပ်ႇဢူဝ်းၵၼ် တီႈဝဵင်းပၢင်သၢင်း (ပၢင်ၶမ်း) ။ ပိူင်လူင်မၼ်း ဢုပ်ႇဢူဝ်းလႅၵ်ႈလၢႆႈၵၼ် ၵဵဝ်ႇၵပ်းလွင်ႈငဝ်းလၢႆးၵၢၼ်ဝၢၼ်ႈ ၵၢၼ်မိူင်း ယၢမ်းလဵဝ် ႁႂ်ႈတႅၵ်ႇတႅၵ်ႇလႅင်းလႅင်း ၊ သၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ် ၸိူဝ်းၼႆႉ - ၼႆယဝ်ႉ ။


တီႈပၢင်သၢင်းၼႆႉ ၸတ်းႁဵတ်းပၢင်ၵုမ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းမႃးယဝ်ႉ 2 ပွၵ်ႈ ။ ပၢင်ၵုမ်လူင်တင်း 2 ပွၵ်ႈၼႆႉ ပိူင်လူင်မၼ်း ဢုပ်ႇဢူဝ်းတူၵ်းလူင်းလႆႈၸႂ်ၵၼ် မီးၵၢင်ၸႂ် ပိူဝ်ႈတႃႇဢုပ်ႇဢူဝ်းၵၢၼ်ဝၢၼ်ႈ ၵၢၼ်မိူင်းလႄႈ ႁူမ်ႈမိုဝ်းႁဵတ်းသၢင်ႈၵၢၼ်ငၢၼ်း ၸွမ်းၵၼ်တင်းလူင်ပွင်ၸိုင်ႈမႂ်ႇ ၊ ၼင်ႇႁိုဝ်တေၵေႃႇသၢင်ႈ လႆႈၼႂ်းမိူင်း ႁႂ်ႈမီးလွင်ႈငမ်းယဵၼ်ၵႂႃႇတႄႉတႄႉ - ၼႆယဝ်ႉ ။


တီႈပၢင်ၵုမ်ၼၼ်ႉ ဢုပ်ႇလၢတ်ႈပႃး - ၵဵဝ်ႇၵပ်းလွင်ႈဢၼ် ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (TNLA) ပဵၼ်ပၼ်ႁႃၵၼ်ယူႇၼႆႉ ႁႂ်ႈသွင်ၾၢႆႇ ဢဝ်လၢႆးဢုပ်ႇဢူဝ်းၵၼ်သေ ၵိုတ်းၵၢၼ်တိုၵ်းတေႃးၵၼ်ၵမ်းလဵဝ် ။ သင်ၸိူဝ်ႉဝႃႈၾၢႆႇၼၼ်ႉ ႁဵတ်းႁႂ်ႈပဵၼ်ပၼ်ႁႃ ၶတ်းယႅင်ႈၵိူတ်ႇၶိုၼ်ႈမႃးၸိုင် ယူႇတီႈၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉၸိူဝ်းၼႆႉ တေႁူမ်ႈၵၼ်သေၵႅတ်ႇၵင်ႈၵႂႃႇ - လႆႈၸႂ်ၵၼ်ၼင်ႇၼႆ ။


တီႈပွတ်းတွၼ်ႈၼၼ်ႉ ၼင်ႇႁိုဝ်ၵူၼ်းဝၢၼ်ႈၵူၼ်းမိူင်း ပေႃးလႆႈယူႇၵတ်းယဵၼ် ၊ ဝၢၼ်ႈမိူင်း ပေႃးတေမီးလွင်ႈ ငမ်းယဵၼ်ၼိမ်သဝ်းၼၼ်ႉ တုၵ်းယွၼ်းသိုၵ်းမၢၼ်ႈ ဢၼ်ႁႅၼ်းသိုၵ်းလေႃႇတိုၵ်းယူႇ ၼႂ်းၸိုင်ႈတႆး ပွတ်းႁွင်ႇၼၼ်ႉ ၵိုတ်းၵၢၼ်ၸႂ်ႉႁႅင်းသိုၵ်းလေႃႇတိုၵ်း ဝႆးဝႆးၵမ်းလဵဝ် - ဢွၵ်ႇလိၵ်ႈပိုၼ်ၽၢဝ်ႇ မိူဝ်ႈဝၼ်းတီႈ 28 ၼင်ႇၼႆ ။