ၸဝ်ႈၼႃႈတီႈထႆး - မၢၼ်ႈဢုပ်ႇဢူဝ်းတူၵ်းလူင်းလႆႈၸႂ်ၵၼ် 3 ၶေႃႈ ပိူဝ်ႈၵႄႈ ပၼ်ႁႃႁႅင်းၵၢၼ်ယၢၼ် မိူင်းၽိတ်းမၢႆမီႈလႄႈ ႁႅင်းၵၢၼ်ဢၼ်ထုၵ်ႇၶီႇၼဵၵ်းတဵၵ်းတဵင် ၼႆယဝ်ႉ ။

မိူဝ်ႈဝၼ်းတီႈ 13/02/2016 ၸဝ်ႈၼႃႈတီႈႁွင်ႈၵၢၼ်ၾၢႆႇ ႁႅင်းၵၢၼ်လႄႈၸဝ်ႈတီႈၾၢႆၵဵဝ်ႇၶွင်ႈလၢႆႁွင်ႈ ၵၢၼ်မိူင်းထႆး - မိူင်းမၢၼ်ႈၶဝ်ႈႁူမ်ႈပၢင်ၵုမ် Thailand-Myanmar Technical Meeting ဢၼ်ၸတ်းႁဵတ်းတီႈႁူင်းလိုဝ်ႈသဝ်း The Heritage Pattaya Beach Resort ၸႄႈတွၼ်ႈ သူၼ်းၿူးရီႊ ၸိုင်ႈထႆး ပွတ်းဢွၵ်ႇ ။


တီႈပၢင်ၵုမ်ၼၼ်ႉလႆႈတူၵ်းလူင်းၵၼ် 3 ၶေႃႈ -

1. ပိူဝ်ႈႁူမ်ႈမိုဝ်းၵၼ် ႁႄႉၵင်ႈပၼ်ႁႃႁႅင်းၵၢၼ် ဢၼ်ထုၵ်ႇတဵၵ်းတဵင် ၊ ပႄႉၵိၼ်လႄႈ တူၵ်းပဵၼ်ယိူဝ်ႇၵူၼ်း ၵႃႉၶၢႆၵူၼ်း ။


2. တင်းသွင်ၸိုင်ႈမိူင်းႁူမ်ႈၵၼ် တိုၵ်းသူၼ်းပၼ်ႁႅင်းဢီး ႁႂ်ႈႁႅင်းၵၢၼ်ၸိူဝ်းၶဝ်ႈ ႁဵတ်းၵၢၼ်ၼႂ်းမိူင်းထႆး ထုၵ်ႇမႅၼ်ႈၸွမ်းၼင်ႇပၵ်းပိူင် မၢႆမီးမိူင်းထႆး ။


3. တင်းသွင်ၸိုင်ႈမိူင်း တေပိၼ်ႇပၢႆႇလႅၵ်ႈလၢႆႈၶေႃႈမုၼ်း ႁႅင်းၵၢၼ်မိူင်းမၢၼ်ႈ ၼင်ႇႁိုဝ်တေမီးၽွၼ်းလီ တင်းသွင်ၾၢႆႇ ပိူဝ်ႈႁႄႉၵင်ႈလႆႈပၼ်ႁႃ ႁႅင်းၵၢၼ် ။


ယူႇတီႈၾၢႆႇၸတ်းႁႃၵၢၼ်ငၢၼ်း ၸိုင်ႈထႆးၵေႃႈတိုၵ်းသူၼ်းႁႂ်ႈ မိူင်းမၢၼ်ႈႁိပ်ႈၼႅတ်ႈလွင်ႈထတ်းထွင် ၵူၼ်းၵိုၵ်းမိူင်းႁႂ်ႈယဝ်ႉတူဝ်ႈၽႂ်းၽႂ်း ၊ လိူဝ်ၼၼ်ႉယင်းတုၵ်းယွၼ်းႁႂ်ႈ လူင်ပွင်ၸိုင်ႈမၢၼ်ႈ ႁဵတ်းၵၢၼ် ႁႂ်ႈမီးလွင်ႈၸိုၼ်ႈသႂ်ၵဵဝ်ႇၵပ်းၶၵ်ႉတွၼ်ႈၸိူဝ်းၼၼ်ႉ သေႁႂ်ႈႁိပ်ႈၼႅတ်ႈႁဵတ်းသၢင်ႈ ၼင်ႇႁိုဝ်ပၼ်ႁႃ ၼၢႆးၼႃႈၼၼ်ႉတေလူတ်းယွမ်း ၼႆယဝ်ႉ ။

ၶေႃႈမုလ်းၶၢဝ်ႇ ASTV