ၵေႃလိၵ်ႈလၢႆးလႄႈ ၾိင်ႈငႄႈတႆး ၵူႈၸႄႈဝဵင်း ၼႂ်းမိူင်းၶၢင် ႁူပ်ႉထူပ်းဢုပ်ႇၵုမ်ၵၼ် တႃႇၵႄႈလိတ်ႈဝူၼ်ႉမႄးၶေႃႈၸႂ်ႉ ၊ လၢႆးသွၼ်လိၵ်ႈလၢႆးတႆး ႁႂ်ႈပဵၼ်ပိူင်သွၼ်ဢၼ်လဵဝ်ၵၼ်တင်းၵူႈတီႈ ။

ပၢင်ၵုမ် ၵေႃလိၵ်ႈလၢႆးလႄႈ ၾိင်ႈငႄႈတႆး ၸတ်းႁဵတ်းတီႈဝဵင်းမိတ်ႉၵျီးၼႃး ၼႂ်းဝၼ်းတီႈ 09-10/02/2016 08:00-17:00 မူင်း ။


ၸၢႆးမိုၼ်ႇပဝ်း ၾၢႆႇပွင်ပဵၼ်ပၢင်ၵုမ်ၵူႈၸႄႈဝဵင်း ၵေႃလိၵ်ႈလၢႆးလႄႈၾိင်ႈငႄႈတႆး မျိတ်ႉၵျီးၼႃး လၢတ်ႈဝႃႈ “ ယိူင်းဢၢၼ်းတႄႉ  ၼင်ႇႁိုဝ် တေမေႃဝႆႉၵႃႈၶၼ်လိၵ်ႈတႆး ႁႂ်ႈပေႃးၶိုၼ်ႈယႂ်ႇမႂ်ႇသုင်လိူဝ်ၵဝ်ႇ ၊ ႁဝ်းတေႁဵတ်းႁိုဝ် ႁူမ်ႈမိုဝ်းၵၼ် ပူၵ်းပွင်တႃႇလိၵ်ႈလၢႆးႁဝ်းၶိုၼ်ႈယႂ်ႇ ၊ ႁႂ်ႈလုၵ်ႈဢွၼ်ႇတႆးႁဝ်း ၼႂ်းမိူင်းၶၢင် ႁူႉလိၵ်ႈတႆးၵူႈၵေႃႉ ” ဝႃႈၼႆ ။


မၼ်းၸၢႆးသိုပ်ႇလၢတ်ႈထႅင်ႈဝႃႈ “ ၼႂ်းပၢင်ၵုမ်ၼၼ်ႉ တေဢုပ်ႇၵုမ်ပႃးတႃႇၵႄႈလိတ်းပၼ်ႁႃလိၵ်ႈလၢႆး ဢၼ်ပဵၼ်ဝႆႉၼႆႉသေ တေႁႂ်ႈ လၢႆးၸႂ်ႉတိုဝ်း၊ ပူင်သွၼ်လိၵ်ႈတႆး ၼႂ်းႁူင်းႁဵၼ်းလႄႈ ၼွၵ်ႈႁူင်းႁဵၼ်း လူင်ပွင်ၸိုင်ႈ မိူၼ်ၵၼ် ” ဝႃႈၼႆ ။ ပၢင်ၵုမ်ၼႆႉ ဢုပ်ႇဢူဝ်းႁၢင်ႈႁႅၼ်းဝႆႉပႃးတႃႇပူင်သွၼ်လိၵ်ႈတႆးၶၢဝ်းမႆႈ ။


ၵေႃလိၵ်ႈလၢႆးလႄႈၾိင်ႈငႄႈတႆး ၼႂ်းမိူင်းၶၢင် လၢႆလၢႆၸႄႈဝဵင်း မိူၼ်ၼင်ႇ ဝၢၼ်ႈမေႃႇ ၊ ဝၢၼ်ႈၸႄႊ ၊ ပူႇတႃႇဢူဝ်ႇ (ပူႇထဝ်ႈ) ၊ ၽႃၵၢၼ်ႉ ၊ မိူင်းလၢၼ်း ၊ မိူင်းယၢင်း ၊ မိူင်းၵွင် ၊ မိူင်းတီး ၸိူဝ်းၼႆႉ မႃးၶဝ်ႈ ႁူဝ်ၵူၼ်း 60 ပၢႆ ။


တေႃႈလဵဝ် ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး မျိတ်ႉၵျီးၼႃး-  ပဵၼ်ၸၢႆးယီႈၸၼ် ၵႅမ်ႁူဝ်ပဝ်ႈ ၸၢႆးမွင်ႇဢေး ။