ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 69 ပီၼၼ်ႉ ႁူင်းႁဵၼ်းၵေႃတႆး  ၸတ်းပၢင်လိုဝ်ႈ ပၢင်သွၼ်ယုၵ်ႉမုၼ်း ၼမ်ႉၵတ်ႉၵူၼ်းၼုမ်ႇတႆး တီႈပၢင်သဝ်းလွႆၽႃ ၊ တပ်ႉၸုမ်းမၢႆ 7 တပ်ႉသိုၵ်းၵူၼ်းမိူင်း / တပ်ႉသိုၵ်းၸိုင်ႈတႆး ။

ပူၼ်ႉမႃးမိူဝ်ႈဝၼ်းတီႈ 07/02/2016 ဢၼ်ပဵၼ်ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 69 ပီၼၼ်ႉ ႁူင်းႁဵၼ်းၵေႃတႆး  ၸတ်းပၢင်လိုဝ်ႈ ပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇတႆး (ၸုပ်ႈ 9) ဢၼ်ၸတ်းႁဵတ်းတီႈ ပၢင်သဝ်းလွႆၽႃ ၊ တပ်ႉၸုမ်းမၢႆ 7 တပ်ႉသိုၵ်းၵူၼ်းမိူင်း / တပ်ႉသိုၵ်းၸိုင်ႈတႆး ဝဵင်းၵႃလိ ၸႄႈဝဵင်းၵုၼ်ႁဵင် ။ မီးၽူႈယႂ်ႇ ၵူၼ်းလူင်ၼႂ်းတပ်ႉၸုမ်းလၢႆလၢႆၸဝ်ႈ ၊ ႁူင်းႁဵၼ်းၸိူဝ်ႉၸၢတ်ႈ ဝဵင်းၵႃလိ ၊ ၵေႃလိၵ်ႈလၢႆး လႄႈၾိင်ႈငႄႈတႆး ဝဵင်းၵႃလိ ၊ ပႃႊတီႊႁူဝ်သိူဝ် ၸႄႈဝဵင်းၵႃလိ / ၵုၼ်ႁဵင် လႄႈ ပေႃႈမႄႈလုၵ်ႈႁဵၼ်း ၶဝ်ႈႁူမ်ႈပၼ်ႁႅင်း 200 ၵေႃႉပၢႆ ။


မေႃသွၼ်လူင်ၸၢႆးၽူင်းၶွင်ႇ ၽူႈၵပ်းသၢၼ်ၵၢၼ်ၵေႃတႆး ၵၢဝ်ႇလၢတ်ႈ သပ်းလႅင်းၼႄၶေႃႈယိူင်းဢၢၼ်းလႄႈ ၼႃႈၵၢၼ်ၵေႃတႆး ။ မေႃသွၼ်ၼၢင်းလိူၼ်သႂ် ၾၢႆႇပွင်ၵၢၼ် ပၢႆးပၺ်ၺႃ ၵေႃတႆး (ၵႃလိ) ႁၢႆးငၢၼ်းၼႄ ၵၢၼ်ႁဵၼ်းၵၢၼ်သွၼ် ။ မေႃသွၼ် ၼၢင်းႁဵဝ်းသႅင် ၾၢႆႇပွင်ၵၢၼ် ပၢႆးပၺ်ၺႃ ၽႃသႃဢင်းၵိတ်း ၵေႃတႆး (တႃႈၵုင်ႈ) လၢႆးငၢၼ်းၼႄလွင်ႈၵေႃတႆး လႆႈတူင်ႉၼိုင် မႃးၶၢဝ်းတၢင်း 7 ပီ (2009-2016) ။  လိူဝ်သေၼၼ်ႉ  ၽူႈတၢင်တူဝ်ပေႃႈမႄႈလုၵ်ႈႁဵၼ်း ၵေႃတႆး (ၵႃလိ) ၵေႃႉၼိုင်ႈ ၊ ၽူႈတၢင်တူဝ်လုၵ်ႈႁဵၼ်းၵေႃတႆး (တႃႈၵုင်ႈ) ၵေႃႉၼိုင်ႈ ပိုတ်ႇလၢတ်ႈၶေႃႈၵႂၢမ်း ။


လုၵ်ႈႁဵၼ်းၸုပ်ႈၼႆႉ ပဵၼ်ၵူၼ်းၼုမ်တႆး (ၵႃလိ) ၸုပ်ႈတီႈ 9 (43 ၵေႃႉ) လႄႈ ၵူၼ်းၼုမ်ႇတႆး (တႃႈၵုင်ႈ) ၸုပ်ႈတီႈ 7  (14 ၵေႃႉ) ။ လိူဝ်သေယိုၼ်ႈမွပ်ႈၶႅပ်းဝႂ်လဵပ်ႈႁဵၼ်းယဝ်ႉ ယင်းမီးရၢင်းဝလ်း (သူး) ၾိင်ႈလီ မွပ်ႈပၼ်လုၵ်ႈႁဵၼ်း 3 ၵေႃႉ ။ သူးတီႈ 1 ပဵၼ် ၼၢင်းႁဵဝ်းႁွမ်ႁိုၼ်း ၊ တီႈ 2 ပဵၼ် ၼၢင်းမွၼ်းၶိူဝ်းတႆး လႄႈ တီႈ 3 ပဵၼ် ၼၢင်းၶမ်းၶိၼ်ႇ ။


ၼၢင်းမွၼ်းၶိူဝ်းတႆး (မိူင်းသူႈ) ၽူႈလႆႈႁပ်ႉရၢင်းဝလ်းၾိင်ႈလီ လၢတ်ႈဝႃႈ - “ မီးတၢင်းသိူဝ်းၸႂ်လႄႈ ၸႂ်တိုၼ်ႇတဵၼ်ႈတႄႉတႄႉ ၊ ဢမ်ႇထၢင်ႇတေ လႆႈႁပ်ႉရၢင်းဝလ်းၾိင်ႈလီ ။ တေလႆႈသိုပ်ႇၶတ်းၸႂ်ၵႂႃႇထႅင်ႈ ” - ဝႃႈၼႆ ။


မေႃသွၼ်ၼၢင်းလိူၼ်သႂ် ၾၢႆႇပွင်ၵၢၼ်ပၢႆးပၺ်ၺႃ ၵေႃတႆး (ၵႃလိ) လၢတ်ႈဝႃႈ - “ ဝၢႆးသေၵူၼ်းၼုမ်ႇတႆး လႆႈမႃးလဵပ်ႈႁဵၼ်းတီႈ ႁူင်းႁဵၼ်းၵေႃတႆးယဝ်ႉ လုၵ်ႈႁဵၼ်း မီးတၢင်းႁတ်းႁၢၼ် ၊ ႁတ်းလၢတ်ႈႁတ်းၸႃမႃး ၊ မေႃလဵပ်ႈႁဵၼ်းႁူႉႁၼ် လွင်ႈႁူမ်ႈသၢင်ႈသေ မီးၼမ်ႉၵတ်ႉမေႃထတ်းသၢင်မႃး ၊ မေႃပွင်ႇၸႂ် ၼိူဝ်တူင်ႇဝူင်းၵူၼ်းမႃး ” - ဝႃႈၼႆ ။


မၼ်းၼၢင်းသိုပ်ႇလၢတ်ႈထႅင်ႈဝႃႈ - ၵူၼ်းၼုမ်ႇ ဢၼ်တေမႃးလဵပ်ႈႁဵၼ်းၼႆႉ ပိူင်လူင် တၵ်းလႆႈမီးၵၢင်ၸႂ် ၶႂ်ႈလဵပ်ႈႁဵၼ်းတႄႉတႄႉ ၊ တေလႆႈလႅၼ်ႇလိၵ်ႈတႆး ၊ ၵႂၢမ်းတႆး ။ ၵူၼ်းၼုမ်ႇဝၼ်းမိူဝ်ႈၼႆႉ  ၵမ်ႈၽွင်ႈ မေႃလၢတ်ႈၵႂၢမ်းတႆးယူႇသေတႃႉ လိၵ်ႈတႆးသမ်ႉဢမ်ႇပေႃးပေႉ ၊  တွၼ်ႈတႃႇလိၵ်ႈဢင်းၵိတ်းၵေႃႈ သမ်ႉလႆႈပၼ် ၶၢဝ်းယၢမ်းထႅင်ႈၼႆလႄႈ တၵ်းလႆႈႁိူဝ်ႉယၢပ်ႇၸႂ်  ဝႃႈၼႆ ။


ႁူင်းႁဵၼ်းၵေႃတႆးၼႆႉ မီးၵူၼ်းၼုမ်ႇၸိုင်ႈတႆး လၢႆလၢႆၸႄႈဝဵင်း ပႃးၸဵမ်လုၵ်ႈႁဵၼ်းမိူင်းၶၢင် မႃးၶဝ်ႈလဵပ်ႈႁဵၼ်း  ။ တႃႇၸုပ်ႈမႂ်ႇတႄႉ ႁူင်းႁဵၼ်း တေတႄႇႁပ်ႉသဵၼ်ႈမၢႆလုၵ်ႈႁဵၼ်း ၼႂ်းဝၼ်းတီႈ 01/05/2016  - လႆႈႁူႉၼင်ႇၼႆ ။