ဝၼ်းတီႈ 06/02/2016 ၶၢဝ်းယၢမ်း 10:00-11:00 မူင်း ပီႈၼွင်ႉႁႅင်းၵၢၼ်တႆး လုၵ်ႉၵဵင်းမႆႇ ၵႂႃႇၶဝ်ႈ ပွႆးဝၼ်းၸိူဝ်ႉၸၢတ်ႈၸိုင်ႈ တႆး တီႈငဝ်ႈၸိုင်ႈ လွႆႇတႆးလႅင်း ၶပ်းရူတ်ႉဝႆး ဢမ်ႇၵုမ်းလႆႈ တၢင်းႁႅင်းဝႆး သေပိၼ်ႈတူၵ်းႁူၺ်ႈ ၵႂႃႇ ၵူၼ်းမႃးၸွမ်းၼႂ်းရူတ်ႉတင်းမူတ်း 12 ၵေႃႉ ဝၢတ်ႇၸဵပ်း ႁၢဝ်ႉႁႅင်း 2 ၵေႃႉ ဝႃႈၼႆ ။

ၾႅပ်ႉပိဝ်ႊရီႊ 7 ဝၼ်း 2016 - ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇတဵမ် 69 တီႈငဝ်ႈၸိုင်ႈလွႆတႆးလႅင်း ႁၢင်ႈႁႅၼ်းၵိုၼ်းယႂ်ႇလူင် ၊ တႆးႁွတ်ႈၵဵင်းမႆႇ ၊ လမ်းပုၼ်း ၊ လမ်းပၢင်း ၊ မိူင်းၵွၵ်ႇ ၊ ၽတ်းထယႃႊ ၊ ရၼွင်း ဢိၵ်ႇလၢႆလၢႆၸေႈဝဵင်း ၵႂႃႇၶဝ်ႈႁူမ်ႈ ၼပ်ႉၵူၼ်းႁူဝ်ႁဵင် ။


ၼႂ်းၼၼ်ႉ ၵႃးဢၼ်လုၵ်ႉၸႄႈဝဵင်းလမ်းပုၼ်းၵႂႃႇ တၢင်ႇၵူၼ်း 12 ၵေႃႉ ၼၼ်ႉ ႁေႃႈဝႆး ဢမ်ႇၵုမ်းလႆႈႁႅင်းဝႆးလႄႈပိၼ်ႈတူၵ်းႁူၺ်ႈ ၼႂ်းၵႄႈ ၵဵင်းမႆႇလႄႈ မိူင်းပၢႆး ။


ပီႈၼွင်ႉႁႅင်းၵၢၼ်တႆး 12 ၵေႃႉ ၊ ၸိူဝ်းတိတ်းၸပ်းရူတ်ႉလမ်းၵႂႃႇပိၼ်ႈၼႆႉ ႁဵတ်းၵၢၼ်ယူႇသဝ်း တီႈလမ်းၽုၼ်း ၸႄႈတွၼ်ႈ လမ်းၽုၼ်း။ ၵူၼ်းၶပ်ႉရူတ်ႉ ပဵၼ်ၸၢႆးမူၼ်း ဢႃယု 40 ပီ ။


ၸၢႆးလိူၼ် ၽူႈႁပ်ႉပုၼ်ႈၽွၼ်း သဵၼ်ႈသၢႆမၢႆ ၶပ်းၶိုင်တႃႇၶိုၼ်ႈလွႆတႆးလႅင်း ၼႂ်းဝၼ်းၸိူဝ်ႉ ၸၢတ်ႈၼႆႉ လၢတ်ႈဝႃႈ  - “ တေႃႈလဵဝ် ပီႈၼွင်ႉတႆး ၼႂ်းရူတ်ႉသွင်ၵေႃႉၼၼ်ႉ ပႆႇၸၢင်ႈဢဝ် ဢွၵ်ႇ ။ ဢၼ်လိူဝ် 10 ၵေႃႉတႄႉ ၸဝ်ႈၼႃႈတီႈၶဝ် ဢဝ် သူင်ႇၵႂႃႇတီႈႁူင်းယႃယဝ်ႉ ၵိုတ်းထႅင်ႈသွင်ၵေႃႉတႄႉ ၸဝ်ႈၼႃႈတီႈ ပလိၵ်ႈၾၢႆႇထႆးၶဝ် တိုၵ်ႉၶတ်းၸႂ် ၸွႆႈဢဝ်ဢွၵ်ႇယူႇ လွင်ႈလူႉတၢႆတႄႉဢမ်ႇမီး။ သွင်ၵေႃႉ ၼႂ်းရူတ်းၼၼ်ႉတႄႉ တေလႆႈဝႃႈ ဝၢတ်ႇၸဵပ်းႁႅင်းလိူဝ်ပိူၼ်ႈ - ဝႃႈၼႆ ။


ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇတဵမ် 69 ဢၼ်ၸတ်းႁဵတ်းတီႈလွႆတႆးလႅင်း ၼႆႉ ပီႈၼွင်ႉတႆး ၼႂ်းမိူင်းတႆးၵေႃႈ မႃးၼမ် ။ ပီႈၼွင်ႉ ၼႂ်းၸႄႈတွၼ်ႈတႃႈၶီႈလဵၵ်း ၊ မိူင်းသၢတ်ႇ ၊ ၵဵင်းတုင် ၊ တူၼ်ႈတီး ၊ လွႆလႅမ် ၊ လၢင်းၶိူဝ်း ၊ ၼႂ်းၸိုင်ႈတႆး ပွတ်းႁွင်ႇၵေႃႈ ၵူၼ်းမိူင်း ၼႂ်းၸႄႈတွၼ်ႈ လႃႈသဵဝ်ႈ ၊ မူႇၸႄႈ ၊ ၵျွၵ်ႉမႄး ၊ မိူင်းမိတ်ႈ ၸိူဝ်းၼႆႉၵေႃႈ မႃးၶဝ်ႈႁူမ်ႈၼမ် ။