ပေႃႈမႄႈ လုၵ်ႈလၢင်းၼၢင်းမေးလႄႈၵူၼ်းမိူင်းၼႂ်း မိူင်းဝီး ဢိၵ်ႇ ပီႈၼွင်ႉၵူၼ်းပၢႆႈၽေး  ၼႂ်း မိူင်းဝီး  ၸတ်းႁဵတ်း ပၢင်လူႇတၢၼ်းယွၼ်းသူးပၼ်ၵူၼ်းမိူင်းၸိူဝ်း ၺႃးသိုၵ်းတဢၢင်း တိၺွပ်း ၵႂႃႇ ။

ပၢင်လူႇတၢၼ်းၸတ်းႁဵတ်းၼႂ်းဝၼ်းတီႈ 16/02/2016 ၊ ယၢမ်းၵၢင်ၼႂ် 8:00 ။ တီႈဝတ်ႉပၺ်ႇၺႃႇ လင်ႇၵႃႇ ပႃႇလၸေႃးတိၵႃႇယူင်ႇ ၵျွင်းၸၢၼ်း ၊ ၵျွင်းၵၢင်မႁႃႇမျၢတ်ႈမုၼိ ၊ ၵျွင်းလူင် ဢုၵ်ႉတရႃႇ  ရႃႇမ ၸိူဝ်းၼႆႉ ။ ၽူႈၶဝ်ႈႁူမ်ႈမီး  400 ပၢႆ ။


ဝၢႆးသေလူႇတၢၼ်းယဝ်ႉ လႆႈဢွၼ်ၵၼ် ထွမ်ႇတြႃးလႄႈ ႁူမ်ႈၵၼ်ယွၼ်းသူးပၼ်တွၼ်ႈတႃႇ ၵူၼ်း ၸိူဝ်း ဢၼ်ၺႃးတိၺွပ်းၵႂႃႇ   ႁႂ်ႈလွတ်ႈၽေး ၊ ႁႂ်ႈၸဵဝ်းလႆႈပွၵ်ႈၶိုၼ်းႁိူၼ်းဝႃႈၼႆ ။  

   
မိူဝ်ႈဝၼ်းတီႈ 27/11/2015 ၼၼ်ႉ တပ်ႉသိုၵ်းတဢၢင်း  PSLF/TNLA တိၺွပ်း ၵူၼ်းဝၢၼ်ႈ မိူင်းဝီး ၊ ႁူဝ်ပၢင် ၊ မိူင်းၶၢၵ်ႇ  ၵႂႃႇ 20 ပၢႆ ။  ၵူၼ်းဝၢၼ်ႈ မိူင်းၶၢၵ်ႇ 8 ၵေႃႉၼၼ်ႉတေႉ ပွႆႇပၼ်ၶိုၼ်းယဝ်ႉ ၊ တႃႇ 13 ၵေႃႉဢၼ်ပဵၼ် ၵူၼ်းဝၢၼ်ႈမိူင်းဝီး လႄႈ ႁူဝ်ပၢင်ႇ တေႉတေႃႇထိုင်ယၢမ်းလဵဝ် ပႆႇပွႆႇပၼ်ၶိုၼ်း ။