လုၵ်ႈႁဵၼ်းၸၼ်ႉၵၢင် ၸၼ်ႉသုင် ၼႂ်းၸႄႈဝဵင်းၵျွၵ်ႉမႄး 400 ပၢႆ ၵၢတ်ႈၵၢၼ်ႁဵၼ်း ယွၼ်ႉပၢင်တိုၵ်း ၼႂ်းၵႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း TNLA လႄႈ တပ်ႉသိုၵ်းၸိုင်ႈတႆး RCSS/SSA ။

ဝၼ်းတီႈ10-14/02/2016 ၵူၼ်းဝၢၼ်ႈ တၢင်းပွတ်းဢိူင်ႇတေႃႉသၢင်ႇ ၊ ဢိူင်ႇပၢင်ၸၢမ် ၊ ဢိူင်ႇမၢင်းၵုင်း ၊ ဝၢၼ်ႈပၢင်ၵွၼ်းလႄႈ ဝၢၼ်ႈၵၢင်ႉၵၢင် ၼႂ်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၊ ပၢႆႈၽေးသိုၵ်း မႃးယူႇဝႆႉတီႈဝတ်ႉသီႇႁူဝ်ႇ ။ ၼႂ်းၼၼ်ႉလုၵ်ႈႁဵၼ်း ဢၼ်တေလႆႈတွပ်ႇလိၵ်ႈၸၼ်ႉသိပ်းမီး 45 ၵေႃႉ ၊ ယၢမ်းလဵဝ် ႁၢမ်းႁဵၼ်းဝႆႉလႄႈ မႆႈၸႂ်ယွၼ်ႉၸမ်ပၢင်တွပ်ႇလိၵ်ႈ ။


ၼၢင်းၼူၼ်းမူဝ် ၸုမ်းၶႅၵ်ႇလီပၢင်ၸႃႉၼမ်ႉၶူင်း လၢတ်ႈဝႃႈ “ တေႃႈလဵဝ်လုၵ်ႈဢွၼ်ႇၸၼ်ႉသိပ်း 45 ၵေႃႉ လႄႈၶူးသွၼ်ၸၼ်ႉသိပ်း 7 ၵေႃႉၶဝ်မီးဝႆႉတီႈဝတ်ႉသီႇႁူဝ်။ ဢမ်ႇၸင်ႈၵႂႃႇၶိုၼ်ႈႁဵၼ်း ။ ၾၢႆႇၼိုင်ႈၵေႃႈ ၸမ်ၶၢဝ်းတွပ်ႇလိၵ်ႈၸၼ်ႉသိပ်းယဝ်ႉ ။ ယွၼ်ႉပိူဝ်ႈဝႃႈၶၢဝ်းယၢမ်းၼႆႉ ပဵၼ်ၶၢဝ်းလုၵ်ႈႁဵၼ်းၶဝ်ႁၢင်ႈႁႅၼ်းလိၵ်ႈ တႃႇၶဝ်ႈပၢင်တွပ်ႇလိၵ်ႈ ” - ဝႃႈၼႆ ။


ယူႇတီႈ ၸုမ်းၼမ်ႉၶူင်းသေ လႆႈၵမ်ႉၸွႆႈလုၵ်ႈႁဵၼ်းၸၼ်ႉသိပ်းလႄႈ ၶူးသွၼ်ၵႃႈပပ်ႉ / ၵမ်တႅမ်ႈၼိုင်ႈၵေႃႉ 20,000 ပျႃး ။ ၶဝ်ႈသွႆးဢေႃႇတေႃႇၼိုင်ႈၵေႃႉ 10 ထူင် ၊ ၽႃႈၸဵတ်းၼႃႈၼိုင်ႈၵေႃႉ 1 ၽိုၼ် ။ ၼွၵ်ႈသေၼၼ်ႉၵေႃႈ ယင်းမီးမႄႈလုၵ်ႈဢွၼ်ႇတိုၵ်ႉလဵင်ႉလုၵ်ႈလႆႈ 14 ဝၼ်းသေ ပၢႆႈၽေးသိုၵ်းမႃးမီးဝႆႉယူႇတီႈ ဝတ်ႉမႆႉၺွင်ႇၶမ်း ၼၼ်ႉၵေႃႈလႆႈၸွႆႈထႅမ်ပႃး ။


ၸၢႆးတၢၼ်းမွင်ႇ ၽူႈၶဝ်ႈၶွမ်ႊမတီႊဢွၼ်ႁူဝ် ပႃႊတီႊႁူဝ်သိူဝ် ဝဵင်းၵျွၵ်ႉမႄးလၢတ်ႈဝႃႈ - “ တေႃႈလဵဝ်တိူၵ်ႈယႃႈယႃသိူဝ်ႁႃႈတူဝ် ဝဵင်းၵျွၵ်ႉမႄး လႆႈႁပ်ႉလုၵ်ႈဢွၼ်ႇႁဵၼ်းၸၼ်ႉဢွၼ်ႇႁိမ်းၸမ် 120-150 ၵေႃႉ ပၼ်တၢင်းၸွႆႈထႅမ်တႃႇယူႇတႃႇၵိၼ်ဝႆႉ ” ။


ပၢင်တွပ်ႇလိၵ်ႈၼႂ်းႁူင်းႁဵၼ်းလူင်ပွင်ၸိုင်ႈၼႆႉ ဝၼ်းတီႈ 15-20/02/2016  ပဵၼ်ပၢင်တွပ်ႇလိၵ်ႈ ၸၼ်ႉသီႇလႄႈၸၼ်ႉပႅတ်ႇ။ ဝၼ်းတီႈ 22-27/02/2016 ၸၼ်ႉငဝ်ႈ ၊ ၸၼ်ႉၼိုင်ႈ ၊ ၸၼ်ႉသွင် ၊ ၸၼ်ႉသၢမ် ၊ ၸၼ်ႉႁႃႈ ၊ ၸၼ်ႉႁူၵ်း ၊ ၸၼ်ႉၸဵတ်း ၊ ၸၼ်ႉၵဝ်ႈၶဝ်တေတွပ်ႇလိၵ်ႈ ။ ဝၼ်းတီႈ09-18/03/2016 သမ်ႉပဵၼ်ၸၼ်ႉသိပ်း - ၼႆယဝ်ႉ ။


ၸုမ်းတူင်ႇဝူင်းတႆး ဢၼ်လႆႈၵႂႃႇၸွႆႈၵမ်ႉထႅမ်ၵူၼ်းပၢႆႈၽေး တီႈဝဵင်းၵျွၵ်ႉမႄးၼႆႉ ၸုမ်းယႂ်ႇ ၸုမ်းလူင် မီးၸုမ်းၶႅၵ်ႇလီပၢင်ၸႃႉၼမ်ႉၶူင်း တူၼ်ႈတီး ၊ ၸုမ်းၵေႃႁူမ်ႈသၢင်ႈ ၵူၼ်းၼုမ်ႇတႆး ၊ ၸုမ်းဝူၺ်ႇလုၵျေႃႇၽွင်ႊတေႊသျိၼ်ႊလႄႈ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၊ ၶွမ်ႊပၼီႊၵရဵၵ်ႉႁေႃၶမ်း ။ လိူဝ်ၼၼ်ႉႁူမ်ႈပႃးၸဝ်ႈတႃႇၼ သုၼ်ႇတူဝ်ၽႂ်မၼ်းၵေႃႈယင်းၵႂႃႇၸွႆႈထႅမ် ။


သဵၼ်ႈသၢႆမၢႆၵူၼ်းပၢႆႈၽေးသိုၵ်း ၼႂ်းၸိုင်ႈတႆးပွတ်းႁွင်ႇ တႄႇဢဝ်ဝၼ်းတီႈ 10-14/02/2016 ဢၼ်မႃးမီးယူႇတီႈၸႄႈဝဵင်းၵျွၵ်ႉမႄး တီႈႁူင်းလုမ်းလႃးၵူၼ်းထဝ်ႈ (ပူဝ်းပႂႃးယဵၵ်ႉတႃႇ) မီး 350 ၵေႃႉ ၊ ဝတ်ႉသီႇႁူဝ်ႇ 226 ၵေႃႉ ၊ ဝတ်ႉၼမ်ႉၸဵတ်းလိၼ်း 116 ၵေႃႉ ၊ ဝတ်ႉႁူမ်ႈယဵၼ်ႁူဝ်ၼမ်ႉ 267 ၵေႃႉ ၊ ဝတ်ႉတွင်ၼဝ်ႈ 243 ၵေႃႉ ၊ ဝတ်ႉဢွင်ႇသူႉပၢၼ်ႇ 180 ၵေႃႉ ၊ ဝတ်ႉဝႃႇသူဝ်ႇ 85 ၵေႃႉ ၊ ဝတ်ႉၵျွင်းယွတ်ႈ 90 ၵေႃႉ ၊ ဝတ်ႉသူၺ်ႇၺွင်ႇပိၼ်ႇ 150 ၵေႃႉ ၊ ဝတ်ႉဝူၺ်ႇလုဝုၼ်ႇ 80 ၵေႃႉ ၊ ဝတ်ႉၵၢင်မိူင်း 96 ၵေႃႉ ၊ ဝတ်ႉပဵင်းၼိမ် 48 ၵေႃႉ ၊ ဝတ်ႉၵျွင်းၽႃႉပွတ်း 130 ၵေႃႉ ႁူမ်ႈၵၼ်တင်းမူတ်း 2,061 ၵေႃႉ ၊ ဢမ်ႇပႆႇၼပ်ႉပႃး ၸိူဝ်းယူႇဝႆႉၸွမ်းႁိူၼ်းပီႈႁိူၼ်းၼွင်ႉ ။