ၵူၼ်းလႃႈသဵဝ်ႈ ဢႃယု 27 ႁဵတ်းၵၢၼ်ယူႇၵဵင်းမႆႇ တူမ်ႈၵိၼ်ၶဝ်ႈသွႆး ၾႆးၵႅတ်ႉသ်ၽုပ်ႉတႅၵ်ႇ ၺႃးၾႆးမႆႈတင်းတူဝ် လူႉတၢႆ ၾႆးမႆႈတင်းႁွင်ႈၼွၼ်း ငိုၼ်းၶမ်းသုမ်း ၼပ်ႉမိုၼ်ႇ ။

ဝၼ်းတီႈ 19/01/2016 ၶၢဝ်းယၢမ်း 13:00 မူင်းၼႆႉ ၸၢႆးသႅၼ် ဢၼ်ႁဵတ်းၵၢၼ်ၼႂ်းဝဵင်း ၵဵင်းမႆႇ ၺႃးၾႆးၵႅတ်ႉသ် ႁုပ်ႇၽွင်းတူမ်ႈၵိၼ်ၶဝ်ႈသွႆး ၼႂ်းႁွင်ႈၶၢတ်ႈ ယူႇပွၵ်ႉၸဵတ်းယွတ်ႈ ဝဵင်းၵဵင်းမႆႇ ၸိုင်ႈထႆး ။


ၸၢႆးၶိူဝ်းမႂ်ႇ ဢူၺ်းၵေႃႉၸမ်ၸႂ် ၸၢႆသႅၼ် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ “ ၽွင်းၶႃသွင်ၵေႃႉ တိုၵ်းတေတူမ်ႈၵိၼ်ၶဝ်ႈသွႆးဢေႃႇတေႃ (မမ) ၼၼ်ႉ ၾႆးၵႅတ်ႉသ် တႅၵ်ႇ မၼ်းၸၢႆးႁႂ်ႈၵေႃႉပဵၼ်မေး လႅၼ်ႈဢွၵ်ႇပၢႆႈ မၼ်းၸၢႆးသမ်ႉၶိုင်ၶႄၾႆးၼႆသေၶႄဢမ်ႇလၢႆႈၾႆးမႆႈၵႂႃႇတင်းႁွင်ႈမႆႈပႃးတူဝ်မၼ်းၸၢႆး ။ ၵေႃႉပဵၼ်မေးၵႂႃႇယွၼ်းတၢင်းၸွႆႈထႅမ်တီႈ ၵူၼ်းႁိမ်းၸမ်မႃးၸွႆႈဢဝ်တူဝ်ၸၢႆးသႅၼ်သူင်ႇႁူင်းယႃ သူၼ်ၻွၵ်ႇ မိူဝ်ႈဝႃႈ ။ ယွၼ်ႉမၢတ်ႇၸဵပ်းႁၢဝ်ႈႁႅင်းလႄႈ ဝၼ်းတီႈ 20/01/2016 ၶၢဝ်းယၢမ်း 09:00 ပၢႆၸၢႆးသႅၼ်လႆႈသဵင်ႈသၢႆၸႂ်ၵႂႃႇ ” ဝႃႈၼႆ ။


တဝ်ႈၵႅတ်ႉသ် ဢၼ်တႅၵ်ႇၼၼ်ႉ ပဵၼ်မေႃႈၾႆးၵႅတ်ႉသ်ဢွၼ်ႇ ပႃးၵႂႃႇႁုင်တူမ်ႈလႆႈၵူႈတီႈမေႃႈၾႆး ၵႅတ်ႉသ်တႅၵ်ႇမႆႈၼၼ်ႉ မႆႈပႃးၶူဝ်းၶွင်ၼႂ်းႁိူၼ်းယေး မိူၼ်ၼင်ႇ ၶမ်း ၊ ငိုၼ်း ၊ ထီးဝီး ၊ တူႈယဵၼ် ၶိူင်ႈၸႂ်ႉၶူဝ်းတိုဝ်း ၼႂ်းၼႃႈႁိူၼ်းႁူမ်ႈတင်းသဵင်ပဵၼ် ငိုၼ်းမွၵ်ႈ 50,000 ၿၢတ်ႇ ၼႆယဝ်ႉ ။


ၶၢပ်ႈတူဝ်တၢႆ ၸၢႆးသႅၼ်ဢဝ်ဝႆႉတီႈ ဝတ်ႉသၢႆးမုၼ်း (မၢၼ်ႈ) ဢိူင်ႇၽရႃႉသိင်ႊ ၸႄႈဝဵင်းမိူင်းၸႄႈ တွၼ်ႈၵဵင်းမႆႇ တေပူၼ်ႉၶၢပ်ႈတူဝ် မိူဝ်ႈလႂ်ယူႇတီႈပီႈၼွင်ႉတေဢုပ်ႇၵၼ်ထႅင်ႈၵမ်းၼိုင်ႈၼႆယဝ်ႉ ။


ၸၢႆသႅၼ် ဢႃယု 27 ပီ ၸိုဝ်ႈပေႃႈ လုင်းဢွင်ႇဝုၼ်း - ပႃႈထူၺ်းယဵၼ်ႇ မီး ပီႈၼွင်ႉ 4 ၵေႃႉၸၢႆးသႅၼ် ပဵၼ်ၵေႃႉ ယႂ်ႇသုတ်း ၸၢႆးသႅၼ်ၼႆႉပဵၼ်ၵူၼ်းၼုမ်ႇ တူင်ႉၼိုင်လွင်ႈၾိင်ႈငႄႈႁိတ်ႈႁွႆး ၊ တၢင်းၵႃႈ တၢင်းဝႅၼ် ၊ ႁဵတ်းလွင်ႈမူတ်းသႂ် ယူႇၼႂ်းၸုမ်းတႆးသဵင်ၼုမ်ႇႁႅင်းမႂ်ႇ မႃးၸဵမ်မိူဝ်ႈပီ 2007 ဝႃႈၼႆ ။