ႁူဝ်ပဝ်ႈပႃႊတီႊသိူဝ်ၽိူၵ်ႇ (SNDP) လုင်းၸၢႆးဢၢႆႈပဝ်း လၢတ်ႈဝႃႈ တေဢမ်ႇၵၢဝ်ႇႁႃ (ၸွႆးတြႃး) လုင်းၸၢႆးၾႃႈ ၊ ယင်ႉလိုဝ်ႈဝႆႉၵွၼ်ႇ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆ ။

လုင်းၸၢႆးဢၢႆႈပဝ်း ႁူဝ်ပဝ်ႈပႃႊတီႊသိူဝ်ၽိူၵ်ႇ

ထၢမ် - ဢၼ်ဝႃႈတေၵၢဝ်ႇႁႃႇ (ၸွႆးတြႃး) လုင်းၸၢႆးၾႃႈၼၼ်ႉ တေသိုပ်ႇႁဵတ်းၸိူင်ႉႁိုဝ်ၵႂႃႇထႅင်ႈၶႃႈ ?။


တွပ်ႇ - ၵွပ်ႈပိူဝ်ႈဝႃႈၸုမ်းၶဝ် မႃးယွၼ်းၼွမ်းႁပ်ႉ (တွင်းပၢၼ်ႇ) ပႃႊတီႊႁဝ်း တီႈၶွမ်ႊမသျိၼ်ႊသေ တေဢမ်ႇႁႂ်ႈမၼ်းလႆႈပဵၼ်ထႅင်ႈယဝ်ႉ၊ ၽႅၼ်ႊသီႊၻီႊၼၼ်ႉၵေႃႈ တေဢမ်ႇပိုၼ်ထႅင်ႈယဝ်ႉ ၊ ၵွပ်ႈပိူဝ်ႈၶဝ်လၢတ်ႈၸိူင်ႉၼႆသေ ႁဝ်းၵေႃႈဢမ်ႇပၼ်လိူင်ႈ (ၸွႆးတြႃး) ႁဝ်းယင်ႉဝႆႉၵွၼ်ႇယဝ်ႉ ။


ထၢမ် - ဢၼ်ဝႃႈယင်ႉဝႆႉၼႆႉ တေဢမ်ႇသိုပ်ႇႁဵတ်းၵႂႃႇယဝ်ႉၶႃႈႁႃႉ၊ ၸိူင်ႉႁိုဝ်ၶႃႈ ?။


တွပ်ႇ - ယင်ႉဝႆႉၼႆႉ ႁဝ်းတူၺ်းၵွၼ်ႇ ၊ ယင်ႉဝႆႉၵမ်းၼိုင်ႈၵွၼ်ႇ ။ ၵွပ်ႈပိူဝ်ႈၶဝ်ၵေႃႈ မီးၶေႃႈၵႂၢမ်းမႃးယွၼ်းၼွမ်းတူတ်ႈ (တွင်းပၢၼ်ႇ) ပႃႊတီႊႁဝ်း ၊ ၽွင်းတႅၼ်းႁဝ်းတီႈ ပၢင်လူင် ၸႄႈဝဵင်းလွႆလႅမ် ။


ထၢမ် - ပဵၼ်ၽႂ်ၵေႃႉမႃးယွမ်းၼွမ်းၶႃႈ ?။


တွပ်ႇ - ပဵၼ်ပႃႊတီႊၶဝ်တီႈလွႆလႅမ်၊ ၸိုဝ်ႈမၼ်းတႄႉဢမ်ႇႁူႉ ။ တၢင်းၾၢႆႇႁဝ်းတႄႉ ပဵၼ်ၸၢႆးၶမ်းပၢင်ႇ ၊ ၶဝ်မႃးယွၼ်းၼွမ်းတီႈ ၸၢႆးၶမ်းပၢင်ႇ ၽွင်းတႅၼ်းႁဝ်းတီႈ ၸႄႈတွၼ်ႈလွႆလႅမ် ။


ထၢမ် - တူဝ်လုင်းၸၢႆးၾႃႈ ၵေႃႉမႃးၶႃႈႁႃႉ ?။


တွပ်ႇ - ဢမ်ႇၸႂ်ႈ ၊ ပဵၼ်ၵူၼ်းပႃႊတီႊၶဝ်ၵူၺ်းမႃး ။ ၸုမ်းပႃႊတီႊႁူဝ်သိူဝ် မႃးတွင်းပၢၼ်ႇတီႈၵူၼ်းႁဝ်းဝႃႈ ၶဝ်တေဢမ်ႇႁႂ်ႈမၼ်းပဵၼ်ယဝ်ႉ ၊ ၵွပ်ႈဝႃႈ ၼႂ်းၸႄႈဝဵင်းၵူႈဢၼ်ဢၼ်ၼႆႉ မၼ်းမီးၶွမ်ႊမတီႊ ။ ၶဝ်ၵေႃႈဢဝ်ပုၼ်ႈၽွၼ်းမၼ်း တေဢမ်ႇႁႂ်ႈပိုၼ်ၽႅၼ်ႇၼၼ်ႉယဝ်ႉ ။ လွင်ႈၼႆႉ ပေႃးဢဝ်ၸွမ်းမၢႆမီႈဝႃႈတႄႉ ၵေႃႉၼိုင်ႈလႄႈၵေႃႉၼိုင်ႈ ၊ ၽႃသႃၼိုင်ႈလႄႈၽႃသႃၼိုင်ႈ ၊ ပႃႊတီႊၼိုင်ႈလႄႈပႃႊတီႊၼိုင်ႈ တေဢမ်ႇလႆႈသႄႉသွမ်းၵၼ် ၊ ၸိူဝ်းၼႆႉမၢႆမီႈၵၢၼ်လိူၵ်ႈတင်ႈမီးဝႆႉယူႇ ။


ဢၼ်ၼႆႉ ဢမ်ႇၸိုဝ်ႈဢမ်ႇၸႂ်ႈ၊ ပဵၼ်လွင်ႈသႄႉသွမ်းၵၼ် ။ ပေႃႈမႄႈၵူၼ်းမိူင်းတႄႉ ပေႃးထွမ်ႇၵႂၢမ်းၾၢႆႇလဵဝ်ၵေႃႈ ပဵၼ်လၢႆးၼိုင်ႈ ။ ၵူၺ်းၵႃႈ ပႃႊတီႊသိူဝ်ၽိူၵ်ႇႁဝ်း ၸၢႆးလိူၼ်မၢဝ်းၵေႃႈ ၶိုၼ်းမႄးတွပ်ႇၵႂႃႇၵူႈၶေႃႈ ။ ပေႃႈမႄႈၵူၼ်းမိူင်းၵေႃႈႁူႉပွင်ႇယဝ်ႉ လွင်ႈဝႃႈမၼ်းဢမ်ႇၸႂ်ႈဢမ်ႇၸႂ်ႈ ။ ၽႅၼ်ႇ ၸၢႆးလိူၼ်မၢဝ်းၵေႃႈ ၽႅဝ်ၸွတ်ႇၵႂႃႇၵူႈဝဵင်းယဝ်ႉ ၊ လွင်ႈၼႆႉ လိုဝ်ႈယင်ႉဝႆႉၵွၼ်ႇယဝ်ႉ ။