သိုၵ်းမၢၼ်ႈမိူင်းပၼ်ႇ ၶမယ 520 ၶလယ 117 ႁႅၼ်းသိုၵ်း လေႃႇတိုၵ်း ပႃႇတီႇမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး SSPP/SSA  ႁိမ်းငဝ်ႈၸိုင်ႈဝၢၼ်ႈႁႆး ၸိုင်ႈတႆးပွတ်းၵၢင် ။

မိူဝ်ႈဝၼ်းတီႈ 06/10/2015 ၶၢဝ်းယမ်း 08:30 သိုၵ်းမၢၼ်ႈဢၼ်တူင်ႉၼိုင်တၢင်းမိူင်းပၼ်ႇ ဢၼ်ႁႅၼ်းသိုၵ်းၶိုၼ်ႈၵႂႃႇ တၢင်းၼႃႈ လိၼ်ငဝ်ႈငုၼ်းဝၢၼ်ႈႁႆး ၼၼ်ႉမႃးၺႃးသႂ်ႇၵၼ်လႄႈ လႆႈပဵၼ်ပၢင်တိုၵ်းႁိမ်းၽင်ႇၼမ်ႉပၢင် ၽၢႆႇတႅမ်ႇတႃႈသၢမ်ပူး  တီႈႁိမ်းတႃႈၶၢမ်ႈ မီးၾၢႆႇဢွၵ်ႇမိူင်းၼွင် မွၵ်ႈ 5 လၵ်း ။


ၵဵဝ်ႇၵပ်းလွင်ႈၼႆႉၸဝ်ႈသိုၵ်းလူင်ၸၢႆးလႃႉ ၽူႈၶၢၼ်ပၢၵ်ႇ SSPP/SSA လၢတ်ႈဝႃႈ - သိုၵ်းမၢၼ်ႈဢၼ်လုၵ်ႉတၢင်းမိူင်းၸၢင် သေၶိုၼ်ႈမႃးတၢင်းၼမ်ႉ မေႃၼူၵ်ႉတူႈၼႆႉမီးယူႇမွၵ်ႈ 200 ပၢႆဢၼ်လုၵ်ႉတၢင်းမိူင်းၶၢင်လႄႈၼွင်ယႃႈသႆးသေၶိုၼ်ႈမႃးမီး 50 ပၢႆ တီႈဝၢၼ်ႈဢူလိူင်းမီး 40 ပၢႆ ယၢမ်းလဵဝ်သိုၵ်းမၢၼ်ႈ မီးလွင်ႈတူင်ႉၼိုင်လၢၵ်ႇလၢႆးမႃး ၵွပ်ႈၼၼ်လႄႈငဝ်းလၢႆးၵၢၼ်သိုၵ်းၾၢႆႇၼႆႉဢမ်ႇပေႃးၶႅမ်ႉလႅပ်ႈလီၼႆၶႃႈ ။


လိူဝ်ၼၼ်ႉပေႃးလုၵ်ႉတၢင်းဝၢၼ်ႈႁႆႈၵႂႃႇတၢင်းလႃႈသဵဝ်ႈ ၊ သီႇပေႃႉ ၊ မိူင်းယႆၼႆႉသိုၵ်ႉမၢၼ်ႈပႂ်ႉၵူတ်ႇထတ်းၸွမ်းတၢင်း ယူႇယူႇလုၵ်ႉၼႂ်းယုမ်းသေ ဢွၵ်ႇမႃးႁႄႉၵႃးထတ်းၸႅတ်ႈၵူၼ်းၵႂႃႇမႃးၸိူဝ်းၼႆႉ ႁဵတ်းႁႂ်ႈၵူၼ်းၵႂႃႇမႃးယၢပ်ႇၽိုတ်ႇၵိၼ်းၸႂ် ။


ၼေႃႇၽူႈတႅၼ်းၵေႃႉ ၼိုင်ႈဢၼ်ဢမ်ႇၶႂ်ႈဢွၵ်ႇၸိုဝ်ႈ လၢတ်ႈဝႃႈ - ဢၼ်လုၵ်ႈတီႈလၢႆႈၶႃႈဢွၵ်ႇမႃးတၢင်းၸဵင်ႇႁွင်ႇဝၼ်းဢွၵ်ႇ တီႈႁိမ်းၸလၢႆးၶုၼ်ႇၼႆႉ ၵေႃႈသိုၵ်းမၢၼ်ႈမီးငႃးသိုၵ်းဢၼ်ၼိုင်ႈ သမ်ႉထႅင်ႈလုၵ်ႉတၢင်းၵႃလိ - ၵုၼ်ႁိင်းသေၶိုၼ်ႈၵႂႃႇတၢင်း ငဝ်ႈငုၼ်းဝၢၼ်ႈႁႆး ၵေႃႈမီးမွၵ်ႈ 200 ပၢႆ ၸိူဝ်းၼႆႉၵေႃႈမုင်ႈၸူးဝၢၼ်ႈႁႆးယူႇ တိၵ်းတိၵ်းယဝ်ႉ ။


မိူဝ်ႈဝၼ်းတီႈ 2- 6 /10/ 2014 (ပီၵၢႆ) ၼၼ်ႉၵေႃႈ သိုၵ်းမၢၼ်ႈထႅမ်ႁႅင်းသိုၵ်းလေႃႇတိုၵ်း ပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA သေလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း ။


ၵဵဝ်ႇလူၺ်ႈၼႆႉ လုင်းၸၢႆးသႅင် ၵေႃႉဢၼ်ပဵၼ်ၽူႈလဵပ်ႈႁဵၼ်းၵၢၼ်သိုၵ်းလႄႈ ယၢမ်ႈယူႇၼႂ်းပၢင်လုၵ်ႉၽိုၼ်ႉ လၢတ်ႈဝႃႈ -“ ဢၼ်ပဵၼ်ပၢင်တိုၵ်းၵၼ်ယူႇၼႆႉတႄႉ လႅပ်ႈတေပဵၼ်ယွၼ်ႉဢၼ် ပႃႊတီႊမႂ်ႇသုင်ၸိုင်ႈတႆး SSPP/SSA တေဢမ်ႇလူင်းလၢႆးမိုဝ်းတိုၵ်း NCA ၊ ၵွပ်ႈၼၼ်ႉသိုၵ်းမၢၼ်ႈၸင်ႇၶႂ်ႈမိပ်ႇငႅၼ်း  ပႃႊတီႊမႂ်ႇသုင်ၸိုင်ႈတႆး SSPP/SSA ၵေႃႈၸၢင်ႈပဵၼ်လႆႈ ” ဝႃႈၼႆ ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး SSPP/SSA ဢမ်ႇလူင်းလၢႆးမိုဝ်း NCA သေတႃႉ ၵူၺ်းၵႃႈလႆႈလူင်းလၢႆးမိုဝ်းၵိုတ်းယိုဝ်းတင်းၸၼ်ႉၸႄႈမိူင်း လႄႈၸၼ်ႉမိူင်းႁူမ်ႈတုမ် ယဝ်ႉ မိူဝ်ႈဝၼ်းတီႈ 28/01/2 012 တီႈဝဵင်းလူင်တူၼ်ႈတီႈ ၸိုင်ႈတႆးပွတ်းၸၢၼ်း ။