သိုၵ်းမၢၼ်ႈတင်းသိုၵ်းတႆး  SSPP/SSA ပဵၼ်ပၢင်တိုၵ်း ၵၼ်ထႅင်ႈ တီႈႁိမ်းႁူင်းႁဵၼ်းသွၼ်လိၵ်ႈ ဝၢၼ်ႈႁူးသူၼ် ဢိူင်ႇႁူးသူၼ် ၸႄႉဝဵင်းၵျွၵ်ႉမႄး ၼႂ်းၼႃႈတီႈၵုမ်းၵမ် ပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး (SSPP/SSA) ။

ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA

မိူဝ်ႈဝၼ်းထီႉ 12/08/2015 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ တပ်ႉၵွင် 391 ဢၼ်ယူႇၾၢႆႇတႂ်ႈ တပ်ႉၸုမ်းလူင် (တပ်ႉမ) 77 ၊  ႁႅင်းၵူၼ်း 50 ပၢႆ လုၵ်ႉတီႈၼမ်ႉမင်းသေ မုင်ႈၼႃႈၸူးတၢင်းဝၢၼ်ႈႁူးသူၼ် ပိုၼ်ႉတီႈၼႃႈလိၼ် ဢၼ်မီးသို်ၵ်းတႆး  SSPP/SSA တူင်ႉၼိုင်ယူႇသဝ်းဝႆႉ။ ႁဵတ်းႁႂ်း လႆႈပဵၼ်ပၢင်တိုၵ်းၵၼ် SSPP /SSA ဢၼ်ၵႅမ်ၸႄႈဝဵင်းမၢႆ 20 ၸၢႆးသူဝ်းမိၼ်ႉ ဢွၼ်ႁူဝ်ဝႆႉ မီးႁႅင်းၵူၼ်း  22 ၵေႃႉ၊ တီႈ ႁူဝ်ဝၢၼ်ႈပဵင်း ႁိမ်းႁူင်းႁဵၼ်းသွၼ်လိၵ်ႈ ဝၢၼ်ႈႁူးသူၼ် ဢိူင်ႇႁူးသူၼ် ၸႄႈဝဵင်းၵျွၵ်ႉမႄး ၼႂ်းပိုၼ်ႉတီႈၼႃႈလိၼ် ၸႄႈဝဵင်းမၢႆ 20 ၶွင် SSPP /SSA - ၼႆယဝ်ႉ။

ၵဵဝ်ႇၵပ်း လွင်ႈလႆႈပဵၼ်ပၢင်တိုၵ်းၼႆႉ ၾၢႆႇတပ်ႉသိုၵ်းၸိုင်ႈတႆး  လုၵ်ႉတီႈပၢင်ႁုင်းသေ မႃးလိုဝ်ႈဝႆႉတီႈဝၢၼ်ႈ ႁူးသူၼ်၊ ၽွင်းတိုၵ်ႉလိုဝ်ႈယင်ႉ ယူႇဝႆႉတီႈဝၢၼ်ႈႁူးသူၼ်ၼၼ်ႉ ၾၢႆႇသိုၵ်းမၢၼ်ႈၵေႃႈ လုၵ်ႉၼမ်ႉမင်း လတ်းၶဝ်ႈထိူၼ်ႇၶိုၼ်ႈမႃး ၽုတ်းသႂ်ႇတီႈႁူဝ်လွႆဝၢၼ်ႈပဵင်း  ႁိမ်းႁူင်းႁဵၼ်းသွၼ်လိၵ်ႈ ဝၢၼ်ႈႁူးသူၼ်။ ယွၼ်ႉဢမ်ႇလႆႈၶၢဝ်ႇၵၼ်သေ သွင်ၾၢႆႇၸင်ႇလႆႈပဵၼ် ပၢင်တိုၵ်းၵၼ် တင်ႈတႄႇၶၢဝ်းယၢမ်းၵၢင်ၼ်ႂ 09:30 တေႃႇ 09:40 မူင်း၊ ၶၢဝ်းတၢင်း 10 မိၼိတ်ႊ။ ၾၢႆႇသိုၵ်းမၢၼ်ႈဝၢတ်ႇၸဵပ်း 2 ၵေႃႉ၊ ၾၢႆႇသိုၵ်းတႆး ဢမ်ႇမီးလွင်ႈဝၢတ်ႇၸဵပ်း လူႉသုမ်းသင်-  ၽူႈမီးပုၼ်ႈၽွၼ်းၼႂ်း SSPP/SSA ၵေႃႉၼိုင်ႈလၢတ်ႈၼႄ ၼင်ႇၼႆ။

ဝၢႆးသေပဵၼ်ပၢင်တိုၵ်းၵၼ်ယဝ်ႉ ၾၢႆႇသိုၵ်းတႆး လႆႈထွႆႇဢွၵ်ႇဢွင်ႈတီႈ ပဵၼ်ပၢင်တိုၵ်းၵၼ် ၼၼ်ႉသေ ၵႂႃႇယူႇဝႆႉၼႂ်းဝူင်ႈၵၢင် ၵဵင်ၵၢႆလႄႈ ၼမ်ႉသၢႆး။ ၾၢႆႇသိုၵ်းမၢၼ်ႈ သိုပ်ႇယူႇဝႆႉၼႂ်းဝၢၼ်ႈ ႁူးသူၼ်-ၽူႈမီးၸၼ်ႉၼႂ်း SSPP/SSA ၸဝ်ႈၼိုင်ႈလၢတ်ႈ။

သိုပ်ႇလၢတ်ႈထႅင်ႈဝႃႈ- ဢိင်ၼိူဝ်ပဵၼ်ပၢင်တိုၵ်းၵၼ်သေ လွင်ႈလူႉသုမ်းၼၼ်ႉ  ႁူင်းႁဵၼ်းသွၼ်လိၵ်ႈ ၺႃးမၢၵ်ႇၵွင်ႈမၢၼ်ႈလႄႈ သမ်ႉပေႃးပွင်ႇပဵၼ်ႁူးလူင်ၵႂႃႇသဵင်ႈ။ ၵူၺ်းၵႃႈ မေႃသွၼ်လႄႈ လုၵ်ႈႁဵၼ်းတင်းသဵင်ႈ ဢမ်ႇမီးလွင်ႈတိူဝ်ႉဝၢတ်ႇၸဵပ်းသင် လႆႈႁူႉၼင်ႇၼႆ။

သိုၵ်းလူင်ပွင်ၸိုင်ႈ တင်း တပ်ႉသိုၵ်းၸိုင်ႈတႆး SSPP/SSA ၼႆႉ လႆႈပဵၼ်ပၢင်တိုၵ်းၵၼ် ၼႂ်းလလိူၼ် August ၼႆႉ မီးသွင်ပွၵ်ႈ။

မိူဝ်ႈပူၼ်ႉမႃး ဢမ်ႇႁိုင်ၼႂ်းလိူၼ်ၼႆႉ မိူဝ်ႈဝၼ်းထီႉ 07/08/2015 ၼၼ်ႉ သိုၵ်းမၢၼ်ႈ တင်းသိုၵ်းတႆး ပဵၼ်ပၢင်တိုၵ်းၵၼ်တီႈ ၵွင်းမူးယႃႉတႂ်ႈ ႁိမ်းဝၢၼ်ႈပၢင်ႇဝူဝ်း ၼႂ်းၸႄႈဝဵင်းၵေးသီး၊
ၾၢႆႇသိုၵ်းမၢၼ်ႈ ဢဝ်ၵွင်ႈလူင် 120mm  လုၵ်ႉတီႈတပ်ႉၵိဝ်ႇမွၵ်ႇၶၢဝ် ဢၼ်မီးၾၢႆႇတၢင်းၸၢၼ်း ဝၢၼ်ႈႁႆးသေ ယိုဝ်းသႂ်ႇတီႈတပ်ႉပၢင်သဝ်း  ငဝ်ႈငုၼ်းဝၢၼ်ႈႁႆး ဢၼ်းမီးႁိမ်းၵွင်းမူးလွႆ ၼၼ်ႉ ။
ၼႂ်းၽွင်းၶၢဝ်းၸုမ်းၸၢဝ်းၶိူဝ်း တိုၵ်ႉဢုပ်ႇဢူဝ်း လွင်ႈငမ်းယဵၼ် တီႈဝဵင်းလူင်တႃႈၵုင်ႈ ယင်းပႆႇပွၵ်ႈမႃးၼႆႉ ၾၢႆႇၼိုင်ႈၵေႃႈ သိုၵ်းမၢၼ်ႈတိုၵ်ႉပိုတ်ႇၼႃႈသိုၵ်း ပိုတ်းယိုဝ်းတေႃႇ သိုၵ်းၸၢဝ်းၶိူဝ်းယူႇ တိၵ်းတိၵ်း။

ၽူႈထတ်ႈသၢင်လွင်ႈၵၢၼ်မိူင်း ၼႂ်းပႃႊတီႊမႂ်ႇသုင်ၸိုင်ႈတႆး ၵေႃႉၼိုင်ႈလၢတ်ႈဝႃႈ- ၾၢႆႇၼိုင်ႈၵေႃႈ ၶတ်းၸႂ်တႃႇၵေႃႇသၢင်ႈလွင်ႈငမ်းယဵၼ်၊ ၵူၺ်းၵႃႈ ၾၢႆႇၼိုင်ႈသမ်ႉ တိုၵ်းပိုတ်ႇၼႃႈသိုၵ်းယိုတ်းယိုဝ်း ၸုမ်းၸၢဝ်းၶိူဝ်းယူႇတိၵ်းတိၵ်းၸိူင်ႉၼႆ  တႃႇတေဢဝ်လွင်ႈငမ်းယဵၼ် ၵိုတ်းယိုဝ်းပတ်းပိုၼ်ႉ ၸိုင်ႈမိူင်းၼၼ်ႉ မၼ်းတိုၼ်းယၢပ်ႇ၊ သင်ၸိူဝ်ႉဝႃႈ ၸုမ်းလူင်ပွင်ၸိုင်ႈ တိုၵ်ႉပိုတ်ႇၼႃႈသိုၵ်း တေႃႇၸုမ်းၸၢဝ်းၶိူဝ်းယူႇ။ ထႅင်ႈလွင်ႈၼိုင်ႈၵေႃႈ ယွၼ်ႉပၢင်လိူၵ်ႈတင်ႈၵေႃႈ တေထိုင်မႃးယဝ်ႉလႄႈ ၾၢႆႇသိုၵ်းမၢၼ်ႈၶဝ် တိုၼ်းၶႂ်ႈယႃႉၵဝ်းႁိုဝ်- ဝႃႈၼႆ။

ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၼႆႉ လႆႈလူင်းလၢႆးမိုဝ်း ၵိုတ်းယိုဝ်းၵၼ် တင်းလူင်ပွင်ၸိုင်ႈ မိူဝ်ႈဝၼ်းတီႈ 28/01/2012 ။ တင်ႈတႄႇၼၼ်ႉမႃး တေႃႇထိုင်မိူဝ်ႈလဵဝ် ပၢင်တိုၵ်းယင်းပႆႇယဵၼ် သေပွၵ်ႈ၊ တိုၵ်ႉမီးပၢင်တိုၵ်းယူႇတိၵ်းတိၵ်း။ မိူဝ်ႈလိူၼ်ပူၼ်ႉၵေႃႈ ယင်းတိုၵ်ႉပဵၼ်ပၢင်တိုၵ်းၵၼ်ယူႇ ၼႂ်းၸႄႈဝဵင်းမိူင်းသူႈ။

ၵဵဝ်ႇၵပ်းလွင်ႈၼႆႉ ၽူႈထတ်းသၢင်ၵၢၼ်မိူင်း ၶဝ်လၢတ်ႈဝႃႈ- ပေႃးဝႃႈ ဢမ်ႇၵိုတ်းတိုၵ်း တူဝ်ႈမိူင်းလႆႈသေ  လူင်းလၢႆးမိုဝ်းလိၵ်ႈႁူမ်ႈမၢႆ NCA ၼၼ်ႉ ပၢင်တိုၵ်းတိုၼ်းတေၸၢင်ႈၵိူတ်ႇၶိုၼ်ႈမႃးလႆႈထႅင်ႈ ဝႃႈၼႆ။