ႁူဝ်ပဝ်ႈ ၵေႃပူၵ်းပွင် ၸဝ်ႈႁႆႈ ၸဝ်ႈၼႃး SAD ၸၢႆးသိူဝ်ႁၢၼ် တေၶဝ်ၶေႉၶႅင်ႇ ၵၢၼ်လိူၵ်ႈတင်ႈ လူၺ်ႈသုၼ်ႇတူဝ် ဢၼ်ဢမ်ႇယူႇတီႈ ပႃႊတီႊလႂ်သေ ၶဝ်ႈလိူၵ်ႈတင်ႈ။

ၵဵဝ်ႇၵပ်းလွင်ႈၼႆႉ ႁူဝ်ပဝ်ႈ ၵေႃပူၵ်းပွင် ၸဝ်ႈႁႆႈ ၸဝ်ႈၼႃး (Shan Agricultural Development-SAD) ၸၢႆးသိူဝ်ႁၢၼ် လၢတ်ႈဝႃႈ- ပၢင်လိူၵ်ႈတင်ႈ ဢၼ်တေမႃးၼႆႉ တေယူႇတီႈ သုၼ်ႇတူဝ်သေ ၶဝ်ႈလိူၵ်ႈတင်ႈ တွၼ်ႈတႃႇ ၸဝ်ႈႁႆႈ ၸဝ်ႈၼႃး၊ တေၶဝ်ႈလိူၵ်ႈတင်ႈ တီႈၸႄႈဝဵင်း လၢင်းၶိူဝ်း ၸိုင်ႈတႆး ပွတ်းၸၢၼ်း။ တေၶဝ်ႈ ၶေႉၶႅင်ႇလိူၵ်ႈတင်ႈ တီႈၶဵတ်ႇလိူၵ်ႈတင်ႈ မၢႆ1 သၽႃးၸႄႈမိူင်း ဝဵင်းလၢင်းၶိူဝ်း။


“ပေႃးမႃးတူၺ်း ၵၢၼ်မိူင်းလႄႈ ၵၢၼ်ၸဝ်ႈႁႆႈ ၸဝ်ႈၼႃးၼႆ ၵၢၼ်ၸဝ်ႈႁႆႈ ၸဝ်ႈၼႃးၼႆႉ လမ်ႇလွင်ႈလိူဝ် တႄႉတႄႉ။ ၵၢၼ်မိူင်း ဢၼ်ဝႃႈၼႆႉ ပဵၼ်ထီႉ 2 ဢမ်ႇၸႂ်ႈထီႉ 1”- ႁူဝ်ပဝ်ႈ ၸဝ်ႈႁႆႈၸဝ်ႈၼႃး ၸၢႆးသိူဝ်ႁၢၼ် လၢတ်ႈ။


သိုပ်ႇလၢတ်ႈထႅင်ႈဝႃႈ- ပႃႊတီႊၵၢၼ်မိူင်း ဢၼ်လႂ်သေ ဢမ်ႇဝႃႈ ဝႆႉၵၢၼ်မိူင်း ပဵၼ်ပိူင်လူင်သေ ၶဝ်ႈၶေႉၶႅင်ႇ ၵၢၼ်လိူၵ်ႈတင်ႈ ၊ ၶဝ်ဢွၼ်ၵၼ် လိုမ်းလွင်ႈ ၸဝ်ႈႁႆႈ ၸဝ်ႈၼႃး။ ၵဝ်ၶႃႈႁၼ်ထိုင်တႄႉ ပေႃးဝႃႈၸဝ်ႈႁႆႈ ၸဝ်ႈၼႃး လႆႈယူႇလီ ၵိၼ်လီၼႆ ၵၢၼ်မိူင်း ၵၢၼ်မၢၵ်ႈမီးၸိူဝ်းၼႆႉ မၼ်းတိုၼ်း တေၶိုၼ်ႈယႂ်ႇ မႂ်ႇသုင်မႃး ႁင်းၵူၺ်းမၼ်း။


 “သင်ၸိူဝ်ႉဝႃႈ ၶႃႈႁဝ်းလႆႈ ၶဝ်ႈၼႂ်း သၽႃးတႄႉ တွၼ်ႈတႃႇ ၸဝ်ႈႁႆႈ ၸဝ်ႈၼႃး မိူင်းႁဝ်း တေမီး ၽွၼ်းလီ တႄႉတႄႉဝႃႈဝႃႈ”- မၼ်းၸၢႆးသိုပ်ႇလၢတ်ႈ ၼင်ႇၼႆ။


ပႃႊတီႊၵၢၼ်မိူင်း ဢၼ်တေၶဝ်ႈ လိူၵ်ႈတင်ႈ (2015) ၼႂ်းၸႄႈဝဵင်းလၢင်းၶိူဝ်း မီးပႃႊတီႊႁူဝ်သိူဝ် (SNLD) ၊ ပႃႊတီႊသိူဝ်ၽိူၵ်ႇ (SNDP) ၊ ပႃႊတီႊၼူၵ်ႉယုင်း (NLD) လႄႈ တင်းပႃႊတီႊသၢင်ႇသီႈ (USDP) - ၼႆယဝ်ႉ။