လုမ်းၽွင်း တၢင်မိူင်း ဢႃႊမေႊရီႊၵႃႊ ဢၼ်ပၵ်းလုမ်းဝႆႉ တီႈတႃႈၵုင်ႈ လူင်းပိုၼ်ႉတီႈ ႁူပ်ႉထူပ်း ပႃႊတီႊ ၵၢၼ်မိူင်း ဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ပိူဝ်ႈလူင်းၵဵပ်း ၶေႃႈမုလ်း ပႃႊတီႊ ၵၢၼ်မိူင်း ။ ၵဵဝ်ႇလူၺ်ႈလွင်ႈဢဵၼ်းဢၢၼ်း ပႃႊတီႊ လႄႈ လွင်ႈႁၢင်ႈႁႅၼ်းတႃႇ ပၢင်လိူၵ်ႈတင်ႈ ။

ပူၼ်ႉမႃး မိူဝ်ႈ ဝၼ်းတီႈ 27/08/2015 ၶၢဝ်းယၢမ်း 11:00-15:00 မူင်း လုမ်းၽွင်း တၢင်မိူင်း ဢႃႊမေႊရီႊၵႃႊ ဢၼ်ပၵ်း လုမ်းဝႆႉတီႈ တႃႈၵုင်ႈ လႆႈလူင်းပိုၼ်ႉတီႈ ႁူပ်ႉထူပ်း ပႃႊတီႊ ႁူဝ်သိူဝ် တင်း ပႃႊတီႊသိူဝ်ၽိူၵ်ႇ တၢင်းပွတ်းဢွၵ်ႇၶူင်း ဝဵင်းၵဵင်းတုင် ၼႆလႄႈ Mr.Nick O´Neill ဢွၼ်ႁူဝ် ၽွင်းတၢင်ၸိုင်ႈမိူင်း ဢႃႊမေႊရီႊၵႃႊ ၼႂ်းတႃႈၵုင်ႈ လူင်းႁူပ်ႉ ပႃႊတီႊ ၵၢၼ်မိူင်း ပိူဝ်ႈလႆႈႁူႉ ဢဵၼ်းဢၢၼ်း ပႃႊတီႊ တူင်ႉၼိုင် တွၼ်ႈတႃႇ ၵူၼ်းမိူင်း ၸိူင်ႉႁိုဝ် လွင်ႈႁၢင်ႈႁႅၼ်း ၵၢၼ်လူင်းလိူၵ်ႈ တင်ႈသမ်ႉ မီးၸိူင်ႉႁိုဝ် ၊ လွင်ႈၽႃသႃ ၸိူဝ်ႉၶိူဝ်း ပဵၼ်ဝႆႉ ၸိူင်ႉႁိုဝ် ၊ လိူဝ်ၼၼ်ႉသမ်ႉ ၶႂ်ႈႁႂ်ႈ ၽွင်းတၢင် မိူင်းဢႃႊမေႊရီႊၵႃႊ ၸွႆႈထႅမ်ၸိူင်ႉႁိုဝ် ၸိူဝ်းၼႆႉ ။


Mr.Nick O´Neill ၽွင်းတၢင် မိူင်းဢႃႊမေႊရီးၵႃႊ ထၢမ်ဝႃႈ ႁဝ်းၶႃႈ တေလႆႈ ၸွႆႈထႅမ်သင် ပၼ်ၸိူင်ႉႁိုဝ် ၊ ပႃႊတီႊသမ်ႉ ၶႂ်ႈႁူႉလွင်ႈသင် ၊ ၵၢၼ်ၵပ်းသိုပ်ႇ ၶဝ်ႈဢွၵ်ႇႁႃ ၵၼ်တၢင်းၽႃသႃ ၸိူဝ်ႉၶိူဝ်းလူး မႅၼ်ႈၵၼ်ယူႇႁႃႉ ၊ တီႈၶွမ်ႊမသျိၼ်ႊ ပၢင်လိူၵ်ႈတင်ႈ မိူင်းႁူမ်ႈတုမ်သမ်ႉ ၸၵ်းၸႅၵ်ႇ ပႃႊတီႊ ဝႆႉၸိူင်ႉႁိုဝ် ၸွင်ႇလႆႈႁပ်ႉ ႁူႉႁၼ်ၸွမ်း ၊ တႃႇတေၶဝ်ႈ လိူၵ်ႈတင်ႈလူး လႆႈႁၢင်ႈႁႅၼ်းဝႆႉ ၸိူင်ႉႁိုဝ် ၊ လွင်ႈသူၼ်းတုမ် ၵူၼ်းမိူင်းၸိူဝ်းၼႆႉ ငဝ်းလၢႆးမၼ်း ပဵၼ်ၸိူင်ႉႁိုဝ်ၽွင်ႈ ၸဵမ်ၸိူဝ်းၼႆႉ ။


ၸၢႆးသိူဝ်ႁၢၼ် ၽူႈပွင်ၵၢၼ် ပႃႊတီႊ သိူဝ်ၽိူၵ်ႇ တိုၵ်းယွၼ်းတီႈ ၽွင်းတၢင် မိူင်းဢႃႊမေႊရီႊၵႃႊ ဝႃႈ ႁႂ်ႈတၢင်ႇ ထိုင်ပၼ်တီႈ လူင်ပွင်ၸိုင်ႈ ၊ တီႈႁူင်း တွတ်ႈၶႅပ်း ၵၢင်ၸႂ်ၼၼ်ႉ ႁႂ်ႈၼပ်ႉ (ဢၢၼ်ႇ) ယဝ်ႉၵမ်းလဵဝ် ၊ ႁဵတ်းပၼ်ယဝ်ႉ ၵမ်းလဵဝ် ။ လိူဝ်ၼၼ်ႉ ႁဝ်းတေ လူင်းလၢႆးမိုဝ်း ၵမ်းလဵဝ် ဝႃႈၽႂ်ပႄႉ ၽႂ်ၵၢၼ်ႉၼႆၵေႃႈ တေလႆႈႁူႉ ၵမ်းလဵဝ် ၊ ႁႂ်ႈၾၢႆႇ လူင်ပွင်ၸိုင်ႈ လႆႈႁဵတ်း လိၵ်ႈၽိုၼ်မိူၼ် ဢၼ်လႆႈ လူင်းလၢႆးမိုဝ်း ၼၼ်ႉၸႅၵ်ႇပၼ် ၽူႈတႅၼ်းၵူႈၵေႃႉ ပေႃးဝႃႈ ၶဝ်ယိပ်းလိၵ်ႈ ၽိုၼ်မိူၼ်ၾၢႆႇ လဵဝ်ၸိုင် ၶဝ်တေၸင်ႈ ဝွၵ်း (လႅၼ်) ႁဝ်းလႆႈထႅင်ႈ ။


ယွၼ်ႉၼၼ် ႁႂ်ႈႁႂ်ႈၶဝ် ႁဵတ်းလိၵ်ႈ ၽိုၼ်မိူၼ် ဢၼ်လူင်း လၢႆးမိုဝ်းၼၼ်ႉ ပၼ် ၽူႈတႅၼ်းၵူႈၵေႃႉ ။ ဝၢႆးလင်မႃး ပေႃးဝႃႈ ႁဝ်းထဵင်ၵၼ်ၼႆ တေဢမ်ႇပေႉ ၶဝ်လႆႈ ၵွပ်ႈဝႃႈ ႁဝ်းလူင်း လၢႆးမိုဝ်း ၵႂႃႇယဝ်ႉ ။ ၵွပ်ႈၼၼ်လႄႈ ႁႂ်ႈလႆႈ ပၼ်ၸႅၵ်ႇ ပၼ်ၽိုၼ်မိူၼ် လူင်းလၢႆးမိုဝ်းတီႈ ၽူႈတႅၼ်းၵူႈၵေႃႉ လွင်ႈၼႆႉ တုၵ်းယွၼ်းႁႂ်ႈ ၽွင်းတၢင် မိူင်းဢႃႊမေႊရီႊၵႃႊ ၸွႆႈဢဝ် ပဵၼ်လွင်ႈယႂ်ႇပၼ် ၼႆယဝ်ႉ ။


ၽွင်းတၢင် မိူင်းဢႃႊမေႊရီႊၵႃႊ တွပ်ႇတီႈ ၸၢႆးသိူဝ်ႁၢၼ်ဝႃႈ တေလႆႈႁဵတ်း ၸိူင်ႉႁိုဝ် ဢမ်ႇႁူႉ မိူဝ်ႈလဵဝ်ၼႆႉ ၵူတ်းမၢႆ (မၢႆမီႈ) လွင်ႈၼႆႉ ဢမ်ႇမီးလွင်ႈ ဢၼ်သူ တုၵ်းယွၼ်းမႃး  ႁဝ်းတေ မိူဝ်းၸွႆႈ ထၢမ်ပၼ် ဝႃႈၼႆ ။


ၼၢင်းၼူၼ်းတုၺ်ႈ ၽူႈပွင်ၵၢၼ် ပႃႊတီႊ ႁူဝ်သိူဝ် လၢတ်ႈဝႃႈ ပႃႊတီႊ ႁူဝ်သိူဝ် ႁဝ်းၶႃႈတႄႉ တုၵ်းယွၼ်း ႁႂ်ႈၽွင်းတၢင် မိူင်းဢႃႊမေႊရီႊၵႃႊ လႄႈ ၼွၵ်ႈမိူင်း မႃးၸွႆႈတူၺ်းပၼ် တီႈႁူင်း လိူၵ်ႈတင်ႈ တၢင်းပွတ်း ၵဵင်းတုင် မိူဝ်ႈၽွင်း တိုၵ်ႉလိူၵ်ႈတင်ႈယူႇ လႆႈတုၵ်းယွၼ်းၵႂႃႇ  ၼင်ႇၼႆ ။


ၽွင်းတၢင် မိူင်းဢႃႊမေႊရီႊၵႃႊ လႆႈမႃးႁူပ်ႉထူပ်း ပႃႊတီႊ သိူဝ်ၽိူၵ်ႇ မိူဝ်ႈ 11:00-12:00 မူင်း တီႈဝၢၼ်ႈပႃႇမၢၼ်ႈ ပွၵ်ႉ 3  ယဝ်ႉ သိုပ်ႇၵႂႃႇ ႁူပ်ႉထူပ်း ပႃႊတီႊ ႁူဝ်သိူဝ် မိူဝ်ႈ 13:30-15:00 မူင်း တီႈဝၢၼ်ႈၵဵင်းယိုၼ်း ၼႂ်းဝဵင်း ၵဵင်းတုင်ထႅင်ႈ ။


Mr.Nick O´Neill ၽွင်းတၢင် မိူင်းဢႃႊမေႊရီႊၵႃႊ တင်းၽူႈပွင်ၵၢၼ် ထႅင်ႈသွင်ၵေႃႉ ႁူမ်ႈတင်း ၽူႈပိၼ်ႇၽႃသႃ (လၢမ်ႈ) ၵေႃႉ 1 ၊ ၽူႈမီး ပုၼ်ႈၽွၼ်း ဢဝ်ႁူမ်ႇလုမ်ႈ ၼိုင်ႈၵေႃႉ ႁူမ်ႈၵၼ် တင်းမူတ်း 5 ၵေႃႉ ။


မိူဝ်ႈပီ 2014 ၵေႃႈ လႆႈမႃး လႆႈမႃးထၢမ် ၵၢင်ၸႂ် ပႃႊတီႊ တီႈၵဵင်းတုင် လွင်ႈတွတ်ႈၶႅပ်း လိူၵ်ႈတင်ႈ မီးလွင်ႈ လွတ်ႈလႅဝ်း ထၢင်ႇႁၢင်ႈ လွင်ႈၽဵင်းပဵင်း ယူႇႁႃႉ ၊ မိူဝ်ႈပူၼ်ႉမႃး ဝၢၼ်ႈမိူင်းလူး ပဵၼ်ၸိူင်ႉႁိုဝ်ဝႆႉ ၊ တၢင်းၼႃႈလူး ၸွင်ႇတေမီး လွင်ႈ လွတ်ႈလႅဝ်းလႄႈ ၽဵင်ႇပဵင်းယူႇႁႃႉ လႆႈထၢမ် တီႈပႃႊတီႊ သိူဝ်ၽိူၵ်ႇ ၼင်ႇၼႆ ။