ပႃႊတီႊ သိူဝ်ၽိူၵ်ႇ ဝဵင်းတႃႇၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း လႆႈၵႂႃႇၸွႆႈထႅမ် ၵူၼ်းထူပ်းၽေးၼမ်ႉ ထူမ်ႈတၢင်း ပွတ်းပႃႇလႅဝ်း ၵဵင်းလၢပ်ႈ ၸႄႈတွၼ်ႈတႃႈၶီႈလဵၵ်း မွၵ်ႈငိုၼ်းထႆး ၼိုင်ႈသႅၼ်ဝၢတ်ႇပၢႆ ။

မိူဝ်ႈဝၼ်းတီႈ 04/08/2015 ၼႆႉ ပႃႊတီႊ သိူဝ်ၽိူၵ်ႇ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႆႈလူင်းၸွႆႈထႅမ် ၵူၼ်းထူပ်းၽေး ၼမ်ႉထူမ်ႈ တၢင်းပွတ်းပႃႇလႅဝ်း ၵဵင်းလၢပ်ႈ ၸႄႈတွၼ်ႈတႃႈၶီႈလဵၵ်း ၸိုင်ႈတႆး ပွတ်းဢွၵ်ႇ ပဵၼ်ပွၵ်ႈၵမ်းတီႈ 2 လႄႈသိုဝ်ႉၶူဝ်းၸႂ်ႉသွႆလႄႈ ၶွင်ၵိၼ်ယမ်ႉ တႃႇငိုၼ်း 15,0000 ဝၢတ်ႇ ပိူဝ်ႈတႃႇ ၸွႆႈထႅမ် ၵႄႈၶဵတ်းႁူဝ်တီး ပီႈၼွင်ႉတႆး ၸိူဝ်းတူၵ်း ၵိၼ်းၶၼ်ၸႂ် ထုၵ်ႇၼမ်ႉထူမ်ႈ။


လုၵ်ႈၸုမ်း ပႃႊတီႊသိူဝ်ၽိူၵ်ႇ ႁူမ်ႈႁူဝ် ၵူၼ်းမွၵ်ႈပၢၵ်ႇၵေႃႉပၢႆသေ လူင်းႁူပ်ႉထူပ်း ၸွႆႈထႅမ်ၶွင်ၵိၼ် ၶွၼ်ၸႂ်ႉ ၵူၼ်းထူပ်းၽေးၼမ်ႉထူမ်ႈ တၢင်းဝၢၼ်ႈၼမ်ႉသၢၼ်ႈ ၊ ဝၢၼ်ႈၼမ်ႉၶိုမ်း ၊ ဝၢၼ်ႈပုင်ႈၵၢင်ႈ ၊ ဝၢၼ်ႈၵေႃမႆႉႁုင်း ႁူမ်ႈတင်း ဝၢၼ်ႈပီႈၼွင်ႉဢႃးၶႃႇ လၢႆလၢႆဝၢၼ်ႈ။


ဝၼ်းတီႈ 07/08/2015 ၼႆႉ သမ်ႉသိုပ်ႇလူင်းၵႂႃႇၸွႆႈထႅမ် ၶူဝ်းၶွင် ၶိူင်ႈၸႂ်ႉတို်ဝ်း မိူၼ် ၵွၼ်ႈသပူႇ (သပ်ႉပျႃႇ) ၊ ယႃသီၶဵဝ်ႈ ၊ မႆႉသီၶဵဝ်ႈ ၊ ၶဝ်ႈသွႆးမႃႉမႃး ၊ ၶႅပ်းတိၼ် လႄႈ ၶွင်ၵိၼ်ယမ်ႉ ၸဵမ်ၸိူဝ်ႉၼႆႉ  ပဵၼ်ပွၵ်ႈၵမ်းတီႈ 2 တၢင်းဝၢၼ်ႈတေႃၵေႃႉ ၊ ဝၢၼ်ႈၼမ်ႉၵႆး ၊ ဝၢၼ်ႈပုင်ႇ ၊ ဝၢၼ်ႈလၢၼ်း ၊ ဝၢၼ်ႈၼမ်ႉၽႅင် ၊ ဝၢၼ်ႈၼမ်ႉဝၼ်း 2 ဝၢၼ်ႈ ၊ ဝၢၼ်ႈလူင် ၵဵင်းလၢပ်ႈ ၸိူဝ်းၼႆႉ။


ၽူႈသူၼ်းတုမ် ပႃႊတီႊ သိူဝ်ၽိူၵ်ႇ ဝဵင်းတႃႈၶီႈလဵၵ်း ၼၢင်းၽူး လၢတ်ႈဝႃႈ ႁဝ်းၶႃႈလႆႈၵႂႃႇၸွႆႈ ၸိူင်ႉၼင်ႇ ၶွင်ၵိၼ်ယႅမ်ႉ ဢွၼ်ႇဢိတ်းဢီႈ၊ ၶူဝ်းၼုင်ႈတၢင်းဝႆ ၊ ၶူဝ်းၸႂ်ႉၶူဝ်းသွႆ ၸိူဝ်းၼႆႉ ႁၼ်ထိုင်ဝႃႈ ပီႈၼွင်ႉၵူၼ်းထူပ်းၽေးၼမ်ႉထူမ်ႈၶဝ် ၸိူဝ်းတူၵ်းၵိၼ်းယူႇၼၼ်ႉ  ႁႂ်ႈပေႃးၸၢင်ႈ ၵႄႈလိတ်ႈပၼ်ႁႃ ပၢၵ်ႇတွင်ႉၵိုင်ႉၵၢင်ႉလႄႈ ပေႃးတေၸၢင်ႈ ၵႄႈလိတ်ႈပၼ်ႁႃ ၵႂႃႇၸူဝ်ႈၶၢဝ်း ဝႃႈၼႆ။


တင်းမူတ်း ၶူဝ်းၶွင် လႄႈ တၢင်းၵိၼ်တၢင်းယႅမ်ႉ ဢၼ်ႁဝ်းၶႃႈ လႆႈၸွႆႈထႅမ် မႅၼ်ႈငိုၼ်းထႆး 15,0000 ဝၢတ်ႇ ။  လိူဝ်ၼၼ်ႉ တီႈဝၢၼ်ႈၼမ်ႉၵႆး ဢၼ်မီးလင်ႁိူၼ်းယူႇမွၵ်ႈ 100 လင်ပၢႆ ၼၼ်ႉၵေႃႈ လႆႈၸွႆႈထႅမ်ပၼ်ၵူႈႁိူၼ်း တင်းဢၼ်ၵူၼ်းတၢႆ ထုၵ်ႇၼမ်ႉလုပ်ႇၼၼ်ႉၵေႃႈ ၼိုင်ႈၵေႃႉ 1000 ဝၢတ်ႇ ဝႃႈၼႆ။


ယွၼ်ႉၾူၼ် တူၵ်းႁႅင်း လၢႆဝၼ်းထပ်းၵၼ်သေ ႁဵတ်းႁႂ်ႈမႄႈၼမ်ႉၵႆး ၼွင်းထူမ်ႈလုပ်ႇၶဝ်ႈဝၢၼ်ႈ ၼႂ်းဢိူင်ႇပႃးလႅဝ်း ၵဵင်းလၢပ်ႈလၢႆ လၢႆဝၢၼ်ႈၵမ်းၼႆႉ မီးၽူႈထူပ်းၽေး ၼပ်ႉႁူဝ်ပၢၵ်ႇ ၼႆယဝ်ႉ ။