ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ဢွၵ်ႇၶေႃႈ ပိုၼ်ၽၢဝ်ႇ ၵဵဝ်ႇၵပ်းၸုမ်း SD တင်း UPWC ႁူပ်ႉဢုပ်ႇဢူဝ်းၵၼ် ၵမ်းတီႈ 8 လွင်ႈပိူင်ယုၵ်းယၢင်ႇ ၵၢၼ်ၵိုတ်းယိုဝ်းပတ်းပိုၼ်ႉ တူဝ်ႈမိူင်း၊ မိူဝ်ႈဝၼ်းတီႈ 27/07/2015 ။

1.ဝၼ်းတီႈ 22-24/07/2015 ၼႆႉ ၾၢႆႇၸၢဝ်းၶိူဝ်း ဢၼ်ပဵၼ်တူဝ်တႅၼ်းၸၼ်ႉၽူႈၼမ်း ၾၢႆႇဢုပ်ႇဢူဝ်းႁၢင်ႈႁႅၼ်းပိူဝ်ႈတႃႇၵိုတ်းယိုဝ်း ၶွင်ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉ တင်း ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ၶဝ် ႁူပ်ႉဢုပ်ႇၵုမ်ၵၼ် ၵမ်းတီႈ 8 ၵဵဝ်ႇၵပ်းလွင်ႈတႃႇႁၢင်ႈႁႅၼ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း လႄႈ လွင်ႈပၢင်ၵုမ်ၵမ်းတီႈ 8 ၼႆႉ ယူႇတီႈၸုမ်း UNFC  ႁၼ်ထိုင်ၸိူင်ႉၼင်ႇၼႆ။


2.ၵဵဝ်ႇၵပ်းလွင်ႈ ပၢင်ဢုပ်ႇဢူဝ်းၵၼ်ၼႆႉသေ မိူဝ်ႈၽွင်းတိုၵ်ႉဢုပ်ႇဢူဝ်းၵၼ်ၼႆႉ ယူႇတီႈသိုၵ်း လူင်ပွင်ၸိုင်ႈမၢၼ်ႈ သမ်ႉႁၢင်ႈႁႅၼ်းသိုၵ်းလေႃႇတိုၵ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းၶၢင် မိူင်းတႆး ၼႂ်းမိူင်းယၢင်းၽိူၵ်ႇ ၸိူဝ်ႈၼႆႉလၢႆလၢႆတီႈဢမ်ႇထၢတ်ႇ။ ဢိင်ၼိူဝ်လွင်ႈတၢင်းၸိူဝ်းၼႆႉသေ ပိူဝ်ႈတႃႇတေၽႅဝ်ႁွတ်ႈၵႂႃႇ တီႈဢၼ်ဝႃႈ  ၵိုတ်းယိုဝ်းၵၼ်ပတ်းပိုၼ်ႉတူဝ်ႈမိူင်းၼၼ်ႉ မၼ်းပဵၼ်ၶေႃႈၵိတ်ႇၶႂၢင်လူင်ဢၼ်ၼိုင်ႈ။

3.ပေႃးဝႃႈ ၶႂ်ႈႁဵတ်းလွင်ႈငမ်းယဵၼ်တႄႉတႄႉၸိုင် ဢိင်ၼိူဝ်လွင်ႈတၢင်းၸိူင်ႉႁိုဝ်ၵေႃႈယဝ်ႉ ဢၼ်ဢဝ်ႁႅင်းသိုၵ်းသေ ၵႂႃႇလေႃႇတိုၵ်း ႁဵတ်းပၢင်တိုၵ်းယူႇၵူႈမိုဝ်ႉၵူႈဝၼ်းၸိူဝ်းၼႆႉ ၵိုင်ႇလီႁုပ်ႈယိုတ်း ထွၼ်ဢွၵ်ႇပႅတ်ႈတင်းမူတ်းသေ မႃးႁႃလၢႆးၵႄႈလိတ်ႈ ဢုပ်ႇဢူဝ်းၵၼ်ၼိူဝ်ၽိူၼ်။

4.ပေႃးဝႃႈၵိုတ်းယိုဝ်း ပတ်းပိုၼ်ႉတူဝ်ႈမိူင်းယဝ်ႉ တေၸတ်းပၢင်ဢုပ်ႇဢူဝ်းၵၢၼ်မိူင်းသေ တေၵႄႈလိတ်ႈပၼ်ႁႃ ဢၼ်ပဵၼ်ယူႇၼႂ်းဝၢၼ်ႈၼႂ်းမိူင်း၊ တေဢဝ်လၢႆးၵတ်းယဵၼ်သေ ၵႄႈလိတ်ႈပၼ်ႁႃၵူႈသမ်ႇသႅၼ်ပိူင်။ ၵူၺ်းၵႃႈ လၢတ်ႈယူႇၸိူင်ႉၼႆသေတႃႉၵေႃႈ ၸၢဝ်းၶိူဝ်းၸိူဝ်းယိပ်းၵွင်ႈၵၢင်ႇ ၵူႈမူႇၵူႈၸုမ်းၸိူဝ်းၼႆႉ တႃႇတေၶဝ်ႈပႃးလူင်းလၢႆးမိုဝ်းႁူမ်ႈၵၼ်ၼၼ်ႉ ယူႇတီႈလူင်ပွင်ၸိုင်ႈ သမ်ႉဢမ်ႇႁပ်ႉ။ လိူဝ်သေၼၼ်ႉ ပိူဝ်ႈတႃႇၵိုတ်းယိုဝ်းၵၼ် ပတ်းပိုၼ်ႉတူဝ်ႈမိူင်းလႄႈသင်၊ ပိူဝ်ႈတႃႇ မႄးလီၵၼ်ၶိုၼ်းၼႂ်းၸိူဝ်ႉၸၢတ်ႈ ၸိူဝ်းၼႆႉလႄႈသင်၊ ပိူဝ်ႈတႃႇတေမႃးၵမ်ႉယၼ်လွင်ႈၸိူဝ်းၼႆႉ ၸၢဝ်းၶိူဝ်းတၢင်ႇလၢတ်ႈၵႂႃႇဝႃႈ ၶႂ်ႈႁႂ်ႈၼွၵ်ႈမိူင်းမႃးပဵၼ်ၽူႈႁူႉႁၼ်ၸွမ်း ၸိူဝ်းၼႆႉၵေႃႈ လူင်ပွင်ၸိုင်ႈ ယင်းပႆႇႁပ်ႉ၊ ယင်းတိုၵ်ႉမီးလွင်ႈတတ်းမၵ်းယူႇ။

5.ၵွပ်ႈၼၼ်လႄႈ တႃႇတေၵိုတ်းယိုဝ်းပတ်းပိုၼ်ႉတူဝ်ႈမိူင်းသေ ၵေႃႇသၢင်ႈလႆႈလွင်ႈယုမ်ႇယမ်ၵၼ်ၼၼ်ႉ ဢမ်ႇထုၵ်ႇလီမီးၶေႃႈၼွင်ႇ (ငိူၼ်ႈၶႆ)သေပိူင်၊ ထုၵ်ႇလႆႈႁုပ်ႈယိုတ်းၶိုၼ်း လွင်ႈဢၼ်ႁၢင်ႈႁႅၼ်းသိုၵ်း လေႃႇတိုၵ်းၼိူဝ်ၸၢဝ်းၶိူဝ်းၸိူဝ်းၼႆႉ တင်းသဵင်ႈသေ ယိုၼ်ႈမိုဝ်းႁႂ်ႈၵူႈမူႇၵူႈၸုမ်း ၶဝ်ႈပႃးၼႂ်းၵၢၼ်လူင်းလၢႆးမိုဝ်း ၵိုတ်းယိုဝ်းပတ်းပိုၼ်ႉတူဝ်ႈမိူင်း။ ႁႂ်ႈၵူႈၸိုင်ႈမိူင်း ၸိူဝ်းဢၼ်တေမႃးပဵၼ်ၽူႈႁူႉႁၼ်ၸွမ်း ၵၢၼ်ၵေႃႇသၢင်ႈ လွင်ႈငမ်းယဵၼ်ၸိူဝ်းၼႆႉ ႁႂ်ႈလႆႈမီးၵုမ်ႇထူၼ်ႈသေ မႃးပၵ်းတႃပႂ်ႉတူၺ်းၸွမ်း။ ၵွပ်ႈၼၼ် ၸင်ႇလႆႈဝႆႉၼၵ်းၼႃလွင်ႈၼႆႉသေ UNFC ၸင်ႇလႆႈဢွၵ်ႇၶေႃႈပိုၼ်ၽၢဝ်ႇ ၼင်ႇၼႆ။

ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ၼႆႉ လုၵ်ႈၸုမ်းၵမ်ႈၼမ် ၶဝ်ႈပႃးၼႂ်း ၸုမ်းဢုပ်ႇဢူဝ်းႁၢင်ႈႁႅၼ်း ပိူဝ်ႈတႃႇၵိုတ်းယိုဝ်း ၶွင်ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉ SD ။