ၶွင်ႊသီႊဢဝ်ၶိုၼ်းၸိုင်ႈတႆး (RCSS) ပွႆႇပၼ်ႁူဝ်ပဝ်ႈ တင်းၵႅမ်ႁူဝ်ပဝ်ႈ ပႃႊတီႊတဢၢင်း TNP ၸႄႈဝဵင်းမိူင်းၵိုင်၊ ယိုၼ်ႈမိုဝ်းတႃႇႁူပ်ႉဢုပ်ႇဢူဝ်း သၢင်ႈလွင်ႈၶိုၼ်းလီၵၼ်။

ဝၼ်းတီႈ 28/07/2015 ၼႆႉ ၽူႈၶၢၼ်ပၢၵ်ႇ ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ- ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လႆႈပွႆႇပၼ်ၶိုၼ်း ႁူဝ်ပဝ်ႈ လႄႈ ၵႅမ်ႁူဝ်ပဝ်ႈ ပႃႊတီႊၸိူဝ်ႉၸၢတ်ႈတဢၢင်း (TNP) ဢၼ်လႆႈတီႉၺွပ်းၵုမ်းတူဝ်ဝႆႉယဝ်ႉ။ လွင်ႈၼႆႉ ဢိင်ၼိူဝ်ၶဝ် မႃးလူင်းၼႂ်းပိုၼ်ႉတီႈၼႃႈလိၼ် RCSS ၵုမ်းၵမ်၊ (ပိုတ်ႇလုမ်းၸွမ်းဝၢၼ်ႈ ဢၼ်ပီႈၼွင်ႉပလွင်ႈယူႇသဝ်း) သမ်ႉဢမ်ႇၸႅင်ႈလူင်ႈၼႃႈဝႆႉလႄႈ ၵိူတ်ႇလွင်ႈဢမ်ႇၶဝ်ႈၸႂ်ၵၼ်တင်း ၸုမ်းတူင်ႉၼိုင်ၼႂ်းပိုၼ်ႉတီႈသေ လႆႈပဵၼ်ၵႂႃႇၵူၺ်း။ တီႈငဝ်ႈငုၼ်းႁဝ်းၶႃႈ မႄးထတ်းထွင်ၶိုၼ်းသေ ပေႃးဝႃႈလႆႈႁူႉယဝ်ႉၼႆၵေႃႈ ပွႆႇပၼ်ၶိုၼ်းယဝ်ႉ- ဝႃႈၼႆ။


ၵဵဝ်ႇၵပ်းလွင်ႈၼႆႉ လႆႈႁူႉဝႃႈ တီႉၺွပ်းမိူဝ်ႈဝၼ်းတီႈ 19/06/2015 ။ ပွႆႇပၼ်ၶိုၼ်းမိူဝ်ႈဝၼ်းတီႈ 12/07/2015 ၵေႃႉၼိုင်ႈ၊ ထိုင်မႃးမိူဝ်ႈဝၼ်းတီႈ 22/07/2015 ပွႆႇပၼ်ထႅင်ႈၵေႃႉၼိုင်ႈ။ ၾၢႆႇၼိုင်ႈတၢင်းၼိုင်ႈၵေႃႈ ပိူဝ်ႈတႃႇတေႁူပ်ႉထူပ်းဢုပ်ႇဢူဝ်းၵၼ်၊ ၶိုၼ်းမႄးသၢင်ႈလွင်ႈၶိုၼ်းလီၵၼ်ၼႂ်းၸိူဝ်ႉၸၢတ်ႈၼၼ်ႉ တၢင်း RCSS ယိုၼ်ႈမိုဝ်း ႁပ်ႉပႃႊတီႊ TNP ဝႆႉ ႁိုင်ယဝ်ႉ၊ ၵူၺ်းၵႃႈ TNP ပႆႇတူဝ်ႈတၼ်းလႄႈ ပႆႇပဵၼ်ႁူပ်ႉဢုပ်ႇၵၼ်- လႆႈႁူႉၼင်ႇၼႆ။

ၽူႈၶၢၼ်ပၢၵ်ႇ RCSS သိုပ်ႇလၢတ်ႈထႅင်ႈဝႃႈ- ပေႃႇလသီႇၸၢဝ်းၶိူဝ်း ၼႂ်းမိူင်းတႆးႁဝ်းၶႃႈၼႆႉ ဢၼ်ၶွင်ႊသီႊဢဝ်ၶိုၼ်းၸိုင်ႈတႆး တမ်းဝၢင်းဝႆႉၼႆႉ ၵူႈၸၢဝ်းၶိူဝ်းၽဵင်ႇပဵင်းၵၼ်။ ၵွပ်ႈၼၼ် ပေႃးမီးပၼ်ႁႃသင်ၵေႃႈ ႁႂ်ႈႁဝ်းၶႃႈႁူပ်ႉထူပ်းဢုပ်ႇဢူဝ်းၵၼ်၊ ၵပ်းသၢၼ်ၵၼ်သေ ႁဵတ်းသၢင်ႈၵၢၼ်ငၢၼ်း ပိူဝ်ႈတႃႇႁႂ်ႈႁဝ်းၶႃႈ ႁႂ်ႈပေႃးလႆႈသုၼ်ႇလႆႈသုၼ်ႇပဵၼ်ႁဝ်းႁူမ်ႈၵၼ်ၼႆၼၼ်ႉ ႁဝ်းၶႃႈမီးဝႆႉပေႃႇလသီႇၽဵင်ႇပဵင်း ပဵၼ်တီႈၼိုင်ႈ။ မၼ်းဢမ်ႇၸႂ်ႈဝႃႈ ပဵၼ်ၸၢဝ်းၶိူဝ်းလႄႈႁဝ်းပေႉၵိၼ်တဵၵ်းတဵင်၊ မၢင်ပွၵ်ႈမႃးၼႆႉ ၵဵဝ်ႇၵပ်းလူၺ်ႈပၵ်းပိူင်မၢႆမီႈသေ မၼ်းၵေႃႈလႆႈဢဝ်လိူင်ႈၵၼ်၊ ပေႃးၽိတ်းပၵ်းပိူင်မၢႆမီႈၼႆႉ ပဵၼ်တႆးႁဝ်းၵေႃႈ လႆႈဢဝ်လိူင်ႈၵၼ်ယူႇ၊ လႆႈႁဵတ်းသၢင်ႈၸွမ်းမၢႆမီႈၵူၺ်း- ဝႃႈၼႆ။

ၼွၵ်ႈသေၼၼ်ႉ ၽူႈၶၢၼ်ပၢၵ်ႇ RCSS ယင်းလၢတ်ႈထႅင်ႈ ၵဵဝ်ႇၵပ်းၵၢၼ်လိူၵ်ႈတင်ႈ လႄႈ လွင်ႈၽွမ်ႉႁူမ်ႈၸၢဝ်းၶိူဝ်းဝႃႈ- ပေႃးၵဵဝ်ႇၵပ်းလွင်ႈ ႁဝ်းၶႃႈဢွၼ်ၵၼ်တုၵ်းယွၼ်း သုၼ်ႇလႆႈသုၼ်ႇပဵၼ် မိူင်းတႆးႁဝ်းၶႃႈၶိုၼ်းယူႇၼႆတႄႉ ႁဝ်းၶႃႈၵူႈၸၢဝ်းၶိူဝ်း ဢၼ်ယူႇၼိူဝ်ၽႅၼ်ႇလိၼ်မိူင်းတႆးၼႆႉ ႁဝ်းလီၽွမ်ႉႁူမ်ႈၵၼ်၊ လီၵပ်းသၢၼ်ၵၼ်၊ လီႁူမ်ႈၵၢၼ်ငၢၼ်းၵၼ်၊ ဢၼ်တီႈမိူၼ်ၵၼ်ၵေႃႈ ႁဝ်းႁူမ်ႈၵၼ်ႁဵတ်း၊ ဢၼ်တီႈပႆႇမိူၼ်ၵေႃႈ ႁဵတ်းၽႂ်ႁဵတ်းမၼ်း ယႃႇႁႂ်ႈလႆႈၵႂႃႇတုမ်ႉတိူဝ်ႉၵၼ်။ ပေႃးႁဝ်းၶႃႈမီးပေႃႇလသီႇသေ ႁဵတ်းသၢင်ႈလႆႈၸိူင်ႉၼၼ်တႄႉ ႁဝ်းၶႃႈတေယူႇသဝ်းႁူမ်ႈၵၼ်ၵႂႃႇလႆႈ ၼင်ႇၵတ်းၵတ်းယဵၼ်ယဵၼ်ယူႇ- ဝႃႈၼႆ။

ပႃႊတီႊ TNL ၼႆႉ  ဢွၼ်ၼႃႈၼႆႉ ႁူဝ်ပဝ်ႈပဵၼ်မၢႆႇဢၢႆႈမူင်ႉ၊ ၽူႈၼမ်းၸုမ်းၵိုတ်းသိုၵ်းၵဝ်ႇ တပ်ႉသိုၵ်းပူတ်းပွႆႇမိူင်းပလွင်ႈ (PSLA) ဢၼ်လႆႈထုၵ်ႇ သိုၵ်းမၢၼ်ႈပူတ်းၵွင်ႈ/ ဝၢင်းၶိူင်ႈ မိူဝ်ႈႁူဝ်ပီ 2005 သေ ၵေႃႇတင်ႈၶိုၼ်ႈမႃး ပႃႊတီႊၸိူဝ်ႉၸၢတ်ႈတဢၢင်း (TNP) ၶဝ်ႈလိူၵ်ႈတင်ႈပီ 2010 ။