မိူင်းမၢၼ်ႈ ပိုတ်ႇလုမ်းၽွင်းတၢင် (ၵူင်းသုၼ်)မႂ်ႇ ၼႂ်းၵဵင်းမႆႇ ၸိုင်ႈထႆး၊ ဝၢႆးသေဢိုတ်းလုမ်းမႃးၼပ်ႉႁူဝ်သိပ်းပီ၊ ဝၢႆးမိူင်းမၢၼ်ႈ ပဵၼ်မိူင်းၸဝ်ႈဢမ်းၼၢၸ်ႈသိုၵ်း။

ဝၼ်းတီႈ 29/07/2015 မိူဝ်ႈၼႆႉ ၵၢင်ၼႂ် 9 မူင်း၊ ၸဝ်ႈၼႃႈတီႈ ၾၢႆႇမိူင်းမၢၼ်ႈ (ၸိုင်ႈမိူင်းႁူမ်ႈတုမ်မၢၼ်ႈ) မႃးပိုတ်ႇၶိုၼ်ႈပၢႆႉ လုမ်းၽွင်းတၢင် (Consulate) ၼႂ်းဢိူင်ႇသီၽုမ်း ဝဵင်းၵဵင်းမႆႇ။ မီးၵၢၼ်ၵႂႃႇလဵင်ႉၿဵလ်း (ၵၢပ်ႈသွမ်း) ဝၼ်း တီႈဝတ်ႉသၢႆးမုၼ်း (ဝတ်ႉမၢၼ်ႈ) ဢၼ်မီးတီႈၼႂ်းၶူးဝဵင်း မိူင်းၵဵင်းမႆႇ။ ယၢမ်းဝၢႆးဝၼ်း 2 မူင်း ၵႂႃႇလူင်းလၢႆးမိုဝ်းၵၼ်တီႈ ႁူင်းႁႅမ်းသႅင်ႊၵရီႊလႃႊ ႁူဝ်ႊတႄႊလ် ။

ၽူႈယႂ်ႇၵူၼ်းလူင် ၸိူဝ်းမႃးၶဝ်ႈႁူမ်ႈ ပၢင်ပိုတ်ႇလုမ်းၽွင်းတၢင်ၼႆႉ ၾၢႆႇမိူင်းမၢၼ်ႈ မီးၽွင်းလူင်ၾၢႆႇၼွၵ်ႈမိူင်း ဢူးဝၼ်ၼမွင်ႇလုၼ်ႇ၊ ၽွင်းတၢင်လူင်မိူင်းမၢၼ်ႈ ၵဵဝ်ႇၵပ်းမိူင်းထႆး ဢူးဝိၼ်းမွင်ႇ။ ၾၢႆႇမိူင်းထႆး ပဵၼ်ၵႅမ်ႁွင်ႈၵၢၼ်လူင်ၾၢႆႇၼွၵ်ႈမိူင်း ထၼသၵ်ႇ ပၻိမႃႊပရႃႊၵွၼ်း မႃးၶဝ်ႈႁူမ်ႈ ။


ၸိုင်ႈမိူင်းႁူမ်ႈတုမ်မၢၼ်ႈၼႆႉ ၼႂ်းၶၢဝ်းတၢင်း 40 ပီပူၼ်ႉမႃး ဢမ်ႇမီးလုမ်းၽွင်းတၢင်မၢၼ်ႈ ၼႂ်းၵဵင်းမႆႇ။ မိူဝ်ႈပူၼ်ႉမႃး 40 ပီပၢႆၼၼ်ႉ လုမ်းၽွင်းတၢင်မၢၼ်ႈ တီႈၼႂ်းၵဵင်းမႆႇ မီးတီႈႁိမ်းႁူင်းယႃသူၼ်ပရုင်း။ ဝၢႆးပီ 1970 ပၢႆမႃးၼႆႉ ၼႂ်းဝူင်ႈၵၢင်မိူင်းမၢၼ်ႈ တင်းမိူင်းထႆး ငဝ်းလၢႆးဢမ်ႇလီၵၼ် ယွၼ်ႉမိူင်းမၢၼ်ႈ ပဵၼ်မိူင်းၸဝ်ႈ ဢမ်းၼၢၸ်ႈ (ဢႃႇၼႃႇ)သိုၵ်းလႄႈ မီးၵၢၼ်တတ်းၶၢတ်ႇၵၼ်မႃး၊ ၸင်ႇမႃးပိုတ်ႇလုမ်းၽွင်းတၢင်ၶိုၼ်း ၵမ်းၼႆႉ။