ၸဝ်ႈၼႃႈတီႈပလိၵ်ႈၵဵင်းမႆႇ ၶဝ်ႈၵူတ်ႇထတ်းၵူၼ်း ႁဵတ်းၵၢၼ်  တီႉၺွပ်းလႆႈပႃး ၵူၼ်းထႆးလႄႈ ႁႅင်းၵၢၼ်ယၢၼ်မိူင်း ၸမ်ပၢၵ်ႇ ။

ဝၼ်းတီႈ 01 လိူၼ်ၵျူႊလၢႆႊ 2015 ၽူႈၵွၼ်းၸႄႈတွၼ်ႈၵဵင်းမႆႇ  မွပ်ႈပုၼ်ႈၽွၼ်းႁႂ်ႈ ၸဝ်ႈ ၼႃႈတီႈပလိၵ်ႈလၢႆၾၢႆႇ ႁူမ်ႈၵၼ်ႁိမ်း 200 ၵေႃႉ  ၶဝ်ႈ ၵူတ်ႇထတ်းၵူၼ်းပႂ်ႉႁႃၵၢၼ်  ႁိမ်းႁွမ်းသဵၼ်ႈတၢင်း ဢတ်ႊသ်ၻႃႊထွၼ်ႊ လႄႈ ၵၢတ်ႇၶမ်းတဵင်ႈ ၸႄႈဝဵင်းမိူင်း ၸႄႈတွၼ်ႈ ၵဵင်းမႆႇ ၸိုင်ႈထႆး။

ထီႊဝီႊထႆး ၶျွင်ႉ 7  ပိုၼ်ၽၢဝ်ႇဝႃႈ ၸဝ်ႈၼႃႈတီႈတီႉၺွပ်းလႆႈ ၵူၼ်းပႂ်ႉႁႃၵၢၼ်  ၵူၼ်းယိပ်းဝတ်းဝႂ်ထႆး (ၵူၼ်းထႆး) 59 ၵေႃႉ။ ႁႅင်းၵၢၼ် ယၢၼ်မိူင်း 14 ၵေႃႉ ၵူၼ်းယိပ်းဝတ်းဝႂ် ပိုၼ်ႉတီႈသုင် 8 ၵေႃႉ။ ၵူၼ်းယိပ်းၾၢတ်းသ်ပွတ်ႊ (ၸူဝ်ႈၶၢဝ်း)  6 ၵေႃႉ ဝႂ်(ဝတ်း)သီၶွင်ႇ 1 ၵေႃႉ ၵူၼ်းဢမ်ႇမီးဝႂ်သင် 1 ၵေႃႉ။

ဢၼ်တီႉလႆႈတၢင်းမူတ်းသူင်ႇၵႂႃႇပၼ်တီႈႁူင်းပလိၵ်ႈၵူတ်ႇၵူၼ်းၶဝ်ႈမိူင်း တႃႇၵူတ်ႇထတ်းထႅင်ႈၵမ်းၼိုင်ႈ။ ၵူၼ်းထႆး 59 ၼၼ်ႉတႄႉ  ၸဝ်ႈၼႃႈတီႈ လႆႈထတ်းထၢမ်ပိုၼ်းၶဝ်သေ တေႁႃပေႃႈလဵင်ႉ(ၼၢႆးၸၢင်ႈ) မႃးႁူပ်ႉထူပ်း ဢုပ်ႇၵုမ်ႁႂ်ႈပေႃႈလႆႈပဵၼ်ၵူၼ်းႁဵတ်းၵၢၼ် ၸွမ်းပၵ်းပဵၼ်ပိူင်ၵူတ်းမၢႆ(မၢႆမီႈ) - ဝႃႈၼႆ။

တီႈၼိူဝ်သဵၼ်ႈတၢင်း  ဢတ်ႊသ်ၻႃႊထွၼ်ႊ ဢမ်ႇၼၼ်သီႇယႅၵ်ႈၵၢတ်ႇၶမ်းတဵင်ႈ ၼၼ်ႉ ပေႃးၵၢင်ၼႂ်မႃးမီးႁႅင်းၵၢၼ်ဢၢၼ်ႇႁူဝ်ပၢၵ်ႇ ဢွၵ်ႇမႃးပႂ်ႉ ပေႃႈလဵင်ႉတၢင်ႇတီႈတၢင်ႇလႅၼ် တေမႃးႁပ်ႉၶဝ်ၵႂႃႇႁဵတ်းၵၢၼ်ၵူႈဝၼ်း။ ၵွပ်ႈၼၼ်လႄႈ ၸဝ်ႈၼႃႈတီႈထႆးၵေႃႈ ဢမ်ႇႁိုင်ဢမ်ႇၼၢၼ်း ၵႆႉၵႆႉမႃး ထတ်းတိၺွပ်းၵူၼ်းယူႇ။