ပူဝ်ႇမွင်ႇဝႃႉ (ႁွင်ႉဢၢႆႈငိုၼ်း) ၵေႃႉႁၢပ်ႇၵၢၼ် ၸိူဝ်ႉၸၢတ်ႈတႆး၊ ၵေႃႉႁတ်းငၢၼ် ၵတ်ႉၶႅၼ်ႇၵူႈပွၵ်ႈ သဵင်ႈမုၼ်တီႈဝဵင်းၵဵင်းမႆႇ ၸိုင်ႈထႆး။

ဝၼ်းတီႈ 18/07/2015 ၶၢဝ်းယၢမ်းပွတ်းၼႂ်၊ ပူဝ်ႇမွင်ႇဝႃႉ ႁွင်ႉဢၢႆႈငိုၼ်းၼႆႉ လူႉသဵင်ႈသုတ်းမုၼ်ၵႂႃႇတီႈ ႁူင်းယႃလူင်ပႃႇငႄႉ (ၼၶွၼ်းၽိင်း) ဝဵင်းၵဵင်းမႆႇ ၸိုင်ႈထႆး၊ ယွၼ်ႉတၢင်းပဵၼ်ထဝ်ႈၵႄႇ ၽွင်းဢႃယု 90 ။ မိူဝ်ႈလဵဝ် ပီႈၼွင်ႉၽူႈႁၵ်ႉၸၢတ်ႈတင်းလၢႆ ၸိူဝ်းယုၵ်ႉယွင်ႈၵုၼ်းမုၼ် မၼ်းၸဝ်ႈ ၼမ်းဢဝ်ၶၢပ်ႈတူဝ်မၼ်းၸဝ်ႈ မႃးၸတ်းပၢင်ၸႃပၼ ႁႅၼ်းတၢၼ်းႁဵတ်းတၢင်းလီပၼ် ၸွမ်းၾိင်ႈထုင်း ပုတ်ႉထသႃသၼႃ တီႈဝတ်ႉပႃႇပဝ်ႈ ဢိူင်ႇသီႇၽုမ်း ဝဵင်းၵဵင်းမႆႇ။


ၸွမ်းၼင်ႇၽူႈယႂ်ႇၵူၼ်းလူင်ၼႂ်းတႆး လၢႆၸဝ်ႈလၢႆၵေႃႉ လႆႈၸႂ်ၵၼ်တႅပ်းတတ်းၼၼ်ႉ တေပူၼ်ႉၶၢပ်ႈတူဝ်-ႁွပ်ႇႁူဝ်ၶဝ်ႈႁဵဝ်ႈ မိူဝ်ႈၽုၵ်ႈ ဝၼ်းၸၼ်တီႈ 20/07/2015 ယၢမ်းဝၢႆးဝၼ်း တီႈပႃႇႁဵဝ်ႈသၼ်တိထမ်း ဢိူင်ႇၸၢင်ႉၽိူၵ်ႇ ၵဵင်းမႆႇ- ၼႆယဝ်ႉ။


ပူဝ်ႇမွင်ႇဝႃႉၼႆႉ ၵိူတ်ႇဝၼ်းတီႈ 05/10/1925 ၊ ပီၵေႃးၸႃႇ 1287 ။ ပဵၼ်ၽူႈႁၢပ်ႇၵၢၼ်ၸိူဝ်ႉၸၢတ်ႈတႆးမႃး ပီယၢဝ်းၶၢဝ်းႁိုင်၊ လႆႈဝႃႈပဵၼ်ၽူႈဢွၼ်ႁူဝ်ၵဝ်ႇၵႄႇတႆးၵေႃႉၼိုင်ႈ။ မၼ်းၸဝ်ႈၼႆႉ ၸိုဝ်ႈသဵင်ယႂ်ႇမိူဝ်ႈပွႆးတိုၵ်းတၢင်ႉယၢၼ်း ဢၼ်ႁူမ်ႈၵၼ်တင်း ၸဝ်ႈပူဝ်ႇတေဝိင်ႇ ယိုဝ်းသိုၵ်းမၢၼ်ႈ။

(ပိုၼ်းပူဝ်ႇမွင်ႇၼႆႉ ၸုမ်းၶၢဝ်ႇၽူႈတွႆႇႁွၵ်ႈ တေၶတ်းၸႂ်ၵဵပ်းႁွမ်သေ တႅမ်ႈတၢင်ႇပၼ်ထႅင်ႈဝၢႆးလင်)။