ပႃႊတီႊသိူဝ်ၽိူၵ်ႇ တၢင်းပွတ်းဢွၵ်ႇၶူင်း တေၶဝ်ႈၶေႉၶဵင်ႇ 29 တီႈၼင်ႈ တေၶဝ်ႈလိူၵ်ႈတင်ႈ ၽွင်းတႅၼ်း ၸိူဝ်ႉၸၢတ်ႈ၊ ၽွင်းတႅၼ်းၵူၼ်းမိူင်းလႄႈ ၽွင်းတႅၼ်း သၽႃးၸႄႈမိူင်း။

ပၢင်လိူၵ်ႈတင်ႈ ဢၼ်တေထိုင်မႃး ၼႂ်းဝၼ်းတီႈ 08/11/2015 ယူႇတီႈပႃႊတီႊသိူဝ်ၽိူၵ်ႇ တၢင်းပွတ်းဢွၵ်ႇၶူင်း လႆႈတၢင်ႇသဵၼ်ႈသၢႆမၢႆၼေႃႇၽွင်းတႅၼ်း ဢၼ်တေၶဝ်ႈၶေႉၶဵင်ႉ 29 ၵေႃႉတီႈၶွမ်ႊမသျိၼ်ႊ ၵၢၼ်လိူၵ်ႈတင်ႈမိူင်းႁူမ်ႈတုမ်၊ ၼင်ႇႁိုဝ် ၾၢႆႇၶွမ်ႊမသျိၼ်ၶဝ် တေထတ်းလိူၵ်ႈၼေႃႇတႅၼ်းၽွင်း ၵေႃႉလႂ်တေပႃး/ဢမ်ႇပႃး တေႃႈလဵဝ်ပဵၼ်ၽွင်းၶွမ်ႊမသျိၼ်ႊၶဝ် တိုၵ်ႉထတ်းလိူၵ်ႈယူႇ ပေႃးထိုင်မႃး ႁူဝ်လိူၼ်ဢေႃႊၵိူဝ်ႊ ဝၼ်းတီႈ 8 ၸင်ႇတေလႆႈႁူႉ ၼႆယဝ်ႉ။

ၸၢႆးဝုၼ်းတိပ်ႉ ၽူႈပွင်ၵၢၼ်ပႃႊတီႊသိူဝ်ၽိူၵ်ႇ တၢင်းပွတ်းဢွၵ်ႇလၢတ်ႈဝႃႈ ပႃႊတီႊတၢင်းပွတ်းဢွၵ်ႇ တေၶဝ်ႈလိူၵ်ႈတင်ႈ မိူၼ် ၽွင်းတႅၼ်းၸိူဝ်ႉၸၢတ်ႈ 2 ၵေႃႉ၊ ၽွင်းတႅၼ်းၵူၼ်းမိူင်း 9 ၵေႃႉ၊ ၽွင်းတႅၼ်းသၽႃးၸႄႈမိူင်း 18 ၵေႃႉ ဝႃႈၼႆ။

သိုပ်ႇလၢတ်ႈထႅင်ႈဝႃႈ ၽွင်းတႅၼ်းၸိူဝ်ႉၸၢတ်ႈ 2 ၵေႃႉၼႆႉ ဢၼ်တေၶဝ်ႈၶေႉၶဵင်ႇ 1. ၽွင်းတႅၼ်းၸိူဝ်ႉၸၢတ်ႈ ၸႄႈတွၼ်ႈၵဵင်းတုင် ၸၢႆးတွင်းၸဵင်ႇ(သိူဝ်ႁၢၼ်)၊ 2. ၽွင်းတႅၼ်းၸိူဝ်ႉၸၢတ်ႈ ၸႄႈတွၼ်ႈတႃႈၶီႈလဵၵ်း ၸၢႆးသၢၼ်းဢွင်ႇ။ ၽွင်းတႅၼ်းၵူၼ်းမိူင်း ဢၼ်လႆႈႁူႉသၢႆမၢႆမၼ်းတႄႉ ၽွင်းတႅၼ်းၵူၼ်းမိူင်းၵဵင်းတုင် တွၵ်ႇတိူဝ်ႇ ၸၢႆးယွတ်ႈႁွင်(ၸၢႆးယွတ်ႈ)၊ ၽွင်းတႅၼ်းၵူၼ်းမိူင်းၶၢၵ်ႇ လုင်းၸၢႆးသၢမ်တိပ်ႉ၊ ၽွင်းတႅၼ်းၵူၼ်းမိူင်းယၢင်း လုင်းၸၢႆးလူင်၊ ၽွင်းတႅၼ်းၵူၼ်းမိူင်းပဵင်း ၸၢႆးထုၼ်းဢေး။ ၽွင်းတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(1) ဝဵင်းၵဵင်းတုင် ၸၢႆးသူဝ်းမူဝ်းဢေး(ၸၢႆးဝုၼ်းသီ)၊ ၽွင်းတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(2) ဝဵင်းၵဵင်းတုင် ၸၢႆးဝုၼ်းတိပ်ႉ၊ ၽွင်းတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆႇ(1) မိူင်းၶၢၵ်ႇ ၼၢင်းၵွင်ၽူး၊ ၽွင်းတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(2) မိူင်းပဵင်း လုင်းၸၢႆးယီႈၼုမ်ႇ လႆႈႁူႉသဵၼ်ႈသၢႆမၢႆ ဝႆႉၼင်ႇၼႆ။

ပႃႊတီႊသိူဝ်ၽိူၵ်ႇ တၢင်းပွတ်းဢွၵ်ႇၶူင်းၼႆႉ တေၶဝ်ႈၶေႉၶဵင်ႇ ပၢင်လိူၵ်ႈတင်ႈ ၼႂ်းပီ 2015 ၼႆႉ တင်းမူတ်းတေၶဝ်ႈၶဵင်ႇ 9 ၸႄႈဝဵင်း တၢင်းပွတ်းဢွၵ်ႇၶူင်း လႆႈႁူႉၼင်ႇၼႆ။

ပၢင်ၵုမ်လူင် ၶွမ်ႊမတီႊငဝ်ႈငုၼ်း ပႃႊတီႊသိူဝ်ၽိူၵ်ႇ ႁိုဝ် ၻီႊမူဝ်ႊၶရႅတ်ႊတိၵ်ႉၶ် ပႃႊတီႊၸၢဝ်းၶိူဝ်းတႆး (SNDP) ၼႆႉ ၸတ်းႁဵတ်းၵႂႃႇမိူဝ်ႈဝၼ်းတီႈ 24/07/2015 တီႈဝတ်ႉဝေလုဝၼ် ပွၵ်ႉၵျွင်းၵျီးသု ဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ၵေႃပွင်ၵၢၼ်ငဝ်ႈငုၼ်း တင်းၽွင်းတႅၼ်းလႄႈၽူႈတႅၼ်းၶဝ် လႆႈႁူပ်ႉထူပ်းဢုပ်ႇၵုမ် ၵၼ်သေ ႁဵတ်းဢွၵ်ႇမႃးလိၵ်ႈၵိၼ်ၵႅၼ်ႇ ၼႂ်းၵႄႈၵၢင်ပႃႊတီႊလႄႈၽူႈတႅၼ်း။ လိၵ်ႈၵိၼ်ၵႅၼ်ႇၼႆႉ မီး 6 ၶေႃႈ။ ၽူႈတႅၼ်းၶဝ်လႄႈၶွမ်ႊမတီႊၾၢႆႇပၵ်းပိူင်မၢႆမီႈပႃႊတီႊ ၼႂ်းၸုမ်းၶွမ်ႊမတီႊငဝ်ႈငုၼ်း သွင်ပႃႈသွင်ၾၢႆႇ လႆႈဢွၼ်ၵၼ်လူင်းလၢႆးမိုဝ်း တီႈလိၵ်ႈၵိၼ်ၵႅၼ်ႇၼၼ်ႉ- ၼႆယဝ်ႉ။

ပႃႊတီႊသိူဝ်ၽိူၵ်ႇၼႆႉ မိူဝ်ႈပီ 2010 ၶဝ်ႈၶေႉၶႅင်ႇလိူၵ်ႈတင်ႈ လႄႈ လႆႈၽူႈတႅၼ်းၼႂ်းသၽႃး 58 ။ ၼႂ်းပၢင်လိူၵ်ႈတင်ႈပီ 2015 ၼႆႉ တေသူင်ႇလုၵ်ႈၸုမ်းၶဝ်ႈၶႄႉၶႅင်ႇလူင်းလိူၵ်ႈပဵၼ်ၽူႈတႅၼ်း 200 ၊ ၼႂ်းၼၼ်ႉ မီးၼၢင်းယိင်း 30 ၵေႃႉ။