ၸဝ်ႈသုၶမ်း တၢင်ႉယၢၼ်း၊  ပၼ်ပၢင်သွၼ်လွင်ႈ Wikipedia လႄႈ လွင်ႈၾွၼ်ႉ Tai Unicode တီႈႁူင်းႁေႃ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး မီးၵူၼ်းၶဝ်ႈႁူမ်ႈထွမ်ႇငိၼ်း လဵပ်ႈႁဵၼ်း တင်းၼမ်။

ဝၼ်းတီႈ 28 လိူၼ်ၵျႃၼ်ႊ 2015 ၸဝ်ႈသုၶမ်း ႁူမ်ႈတင်းလုၵ်ႈၼွင်ႉပွင်ႈပၢႆ လႆႈဢွၼ် ႁူဝ်ၸတ်းႁဵတ်းပၢင်သပ်းၸႅင်ႈ လွင်ႈဝိၶိၽိၻီႊယိူဝ်ႊ (Wikipedia) (ႁိုဝ်) ပပ်ႉသႅၼ်သမ်ႇၼိူဝ် Online လႄႈ လွင်ႈၾွၼ်ႉယူႊၼီႊၶူတ်ႉတႆး (Tai Unicode)  ။ ဢွင်ႈတီႈ ႁူင်းႁေႃၵေႃလိၵ်ႈလၢႆး လႄႈၾိင်ႈငႄႈတႆး ဝဵင်းတူၼ်းတီႈ ၸိုင်ႈတႆးပွတ်းၸၢၼ်း ။

ပၢင်သပ်းၸႅင်ႈၼႆႉ တႄႇၶၢဝ်းယၢမ်း 2:15 – 17:30  မူင်း။  မီးၽူႈယႂ်ႇၵူၼ်းလူင်၊ သင်ၶၸဝ်ႈ၊ လုၵ်ႈ ႁဵၼ်းၸၼ်ႉၸွမ်တၢင်းလူင် ဝဵင်းတူၼ်ႈတီး ၊ ၵေႃလိၵ်ႈလၢႆးလႄႈၾိင်ႈ ငႄႈတႆးဢိၵ်ႇၽူႈသူၼ် ၸႂ်ၶဝ်ႈႁူမ်ႈ100 ပၢႆ။

ၸဝ်ႈသုၶမ်း ၼႄႉၼမ်းလၢတ်ႈၼႄပိူင်လူင်မၼ်းၵဵဝ်ႇၵပ်း တၢင်းႁူႉလွင်ႈ ၾွၼ်ႉယူႊၼီႊ ၶူတ်ႉတႆး (Tai Unicode) ။  လွင်ႈပိုၼ်ႉႁူႉ ဝိၶိၽီႊၻီႊယိူဝ်ႊ (Wikipedia) ။ ပိူဝ်ႈတႃႇတႆးႁဝ်း တေလႆႈၸႂ်ႉၾွၼ်ႉ ယူႊၼီႊၶူတ်ႉ ဢၼ်ၼိုင်ႈဢၼ်လဵဝ်ၼၼ်ႉ ပဵၼ်ၽွင်းတိုၵ်ႉၶတ်းၸႂ်ယူႇ။


လွင်ႈဝိၶိၽီႊၻီႊယိူဝ်ႊၼၼ်ႉ လၢတ်ႈၼႄလၢႆးႁဵတ်း Account ၽႂ်မၼ်းလႄႈ လၢႆးတႅမ်ႈပွင်ႈ ၵႂၢမ်းတၢင်ႇၼိူဝ် ဝိၶိၽီႊၻီႊယိူဝ်ႊ၊ လၢႆးသွၵ်ႈႁႃၶေႃႈမုလ်း ဢိၵ်ႇလၢႆးတၢင်ႇၶႅပ်းႁၢင်ႈ လႄႈ ၵူတ်းမၢႆ(မၢႆမီႈ) ၶႅပ်းႁၢင်ႈ ၸိူဝ်းၼႆႉ။ မၼ်းၸဝ်ႈသပ်းလႅင်းၼႄဝႃႈ- ဝိၶိၽီႊၻီႊယိူဝ်ႊၼႆႉ ၵႂၢမ်းတႆးႁွင်ႉ ဝႃႈပပ်ႉသႅၼ်သမ်ႇ၊ တႅၵ်ႈလႆႈမိူၼ်ၼင်ႇႁူင်းတူၺ်းလိၵ်ႈယႂ်ႇလူင်။ ၶႂ်ႈႁူႉၶေႃႈမုလ်းသင်ၵေႃႈ ၶဝ်ႈတူၺ်း။ တေႃႈၼင်ႇၽူႈၵၢၼ်ႁဵၼ်းသုင်ၶဝ် ပိူဝ်ႈတႃႇဢဝ်ၸုမ်းၶူး (Ph.D) ၶဝ်ၵေႃႈ ၵမ်ႈၼမ်သွၵ်ႈႁႃၶေႃႈမုလ်း ၼႂ်းဝိၶိၽီႊၻီႊယိူဝ်ႊၼႆႉ။

ၼင်ႇႁိုဝ်တႆးႁဝ်း ပေႃးတေၶိုၼ်ႈယႂ်ႇၶိုတ်းၸၼ်ႉမိူၼ်ပိူၼ်ႈၼၼ်ႉသေ ၸဝ်ႈသုၶမ်းလႆႈၶူၼ်ႉၶႆႈ လဵပ်ႈႁဵၼ်းသေလႄႈ ၶတ်းၸႂ်သိုပ်ႇပိုၼ်ၽႄႈသပ်းၸႅင်းလွင်ႈၽွၼ်းလီလႄႈ လွင်ႈလမ်ႇလွင်ႈ ၵၢၼ်သၢင်ႈ တႆးဝိၵိၽီႊၻီႊယိူဝ်ႊ (Wikipedia) မႃးယူႇ ပူၼ်ႉမႃးမိူဝ်ႈဝၼ်းတီႈ 28/01/2015 ၼၼ်ႉ ၵေႃႈမၼ်းၸဝ်ႈယၢမ်းမႃး သပ်းၸႅင်ႈလွင်ႈ Wikipedia တီႈဝတ်ႉၵူႇတဝ်ႈ ဝဵင်းၵဵင်းမႆႇ ၸိုင်ႈထႆး။