ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၸတ်းပၢင်သွၼ် လၢႆးလူင်းလိၵ်ႈတႆး ၼႂ်းၶိူင်ႈၾူၼ်ႊ (မိုဝ်းထိုဝ်) လႄႈၶိူင်ႈၶွမ်ႊၽိဝ်ႊတိူဝ်ႊ၊ လူင်းပၼ် လိၵ်ႈတႆး ယူႊၼီႊၶူတ်ႊ ၼႂ်းၶိူင်ႈၾူၼ်ႊ၊ မီးၵူၼ်းၶဝ်ႈႁူမ်ႈလဵပ်ႈႁဵၼ်း လၢႆးလူင်းၾွၼ်ႉတႆး လႄႈလူင်းၾွၼ်ႉတႆး ၼႂ်းၶိူင်ႈၾူၼ်ႊ တင်းၼမ်။

ဝၼ်းဢႃးတိတ်ႉထီႉ 28/06/2015 ၊ တင်ႈတႄႇၵၢင်ၼႂ် ၶၢဝ်းယၢမ်း 9 မူင်းၵၢင်ၼႂ် ထိုင်ႁူဝ်ၶမ်ႈ 5 မူင်း၊ ၵေႃလိၵ်ႈလၢႆးလႄႈ ၾိင်ႈငႄႈတႆး (ၵဵင်းမႆႇ) ဢွၼ်ႁူဝ် ႁွင်ႈၵၢၼ်ၾၢႆႇ IT ၼႂ်းၵေႃလိၵ်ႈလၢႆးသေ လႆႈၸတ်းႁဵတ်း ပၢင်သွၼ်လၢႆးလူင်းလိၵ်ႈတႆး (Unicode) ၼႂ်းၶိူင်ႈၾူၼ်ႊ (မိုဝ်းထိုဝ်)လႄႈ ၶိူင်ႈၶွမ်ႊၽိဝ်ႊတိူဝ်ႊ၊ ဢိၵ်ႇတင်း လူင်းပၼ်လိၵ်ႈတႆး ၼႂ်းၶိူင်ႈၾူၼ်ႊ တီႈလုမ်းၵေႃလိၵ်ႈလၢႆးလႄႈ ၾိင်ႈငႄႈတႆး (ၵဵင်းမႆႇ) ဢၼ်ပၵ်းဝႆႉယူႇတီႈ ၼႂ်းဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး။


ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၸၢႆးသႅင်ယႃႉ ၵၢဝ်ႇလၢတ်ႈၵႂၢမ်း ပိုတ်ႇပၢင်သွၼ်ဝႃႈ- ယိူင်းဢၢၼ်း ဢၼ်လႆႈၸတ်းႁဵတ်းပၢင်သွၼ် လူင်းၾွၼ်ႉတႆး ၼႂ်းၶိူင်ႈၶွမ်ႊၽိဝ်ႊတိူဝ်ႊ လႄႈ ၼႂ်းၶိူင်ႈၾူၼ်ႊမိုဝ်းထိုဝ်ၼႆႉ ပိူဝ်ႈတႃႇပူၵ်းပွင်/ယုၵ်ႉမုၼ်း လိၵ်ႈလၢႆးတႆး၊ ႁႂ်ႈလိၵ်ႈတႆးယူႊၼီႊၶူတ်ႊ (Unicode) ၽႄႈတိူၼ်းၼမ်လၢႆ လႄႈ ႁႂ်ႈပီႈၼွင်ႉတႆး လႆႈၸႂ်ႉလိၵ်ႈတႆးငၢႆႈလူမ်လႄႈ ပွင်ႇပိုင်ႈလူင်ႉလႅင်းၵၼ်၊ လႆႈၸႂ်ႉလိၵ်ႈတႆးၵၼ်တူဝ်ႈလူၵ်ႈ၊ ႁႂ်ႈၽႃသႃလိၵ်ႈလၢႆး ၵႂၢမ်းလၢတ်ႈတႆး ၶိုၼ်ႈယႂ်ႇမႂ်ႇသုင်ၵႂႃႇ ဝၼ်းတႃမိူဝ်းၼႃႈ ၶိုတ်းတၼ်းၵၢပ်ႈပၢၼ် IT ။ ၵွပ်ႈၼၼ် ၽူႈဢၼ်မႃးၶဝ်ႈႁူမ်ႈ လဵပ်ႈႁဵၼ်းလၢႆးလူင်းၾွၼ်ႉၵူႈၵေႃႉၵေႃႈ ႁႂ်ႈဢွၼ်ၵၼ်ၶတ်းၸႂ်ၵႂႃႇ ႁင်းၽႂ်မၼ်း- ဝႃႈၼႆ။


ပၢင်သွၼ်လူင်းၾွၼ်ႉတႆး (Unicode) ၼႂ်းၶိူင်ႈၶွမ်ႊၽိဝ်ႊတိူဝ်ႊ တင်း ၶိူင်ႈၾူၼ်ႊၼႆႉ ႁွင်ႈၵၢၼ်ၾၢႆႇ IT ၼႂ်းၵေႃလိၵ်ႈလၢႆးလႄႈၾိင်ႈငႄႈတႆး (ၵဵင်းမႆႇ) ၸၢႆးပီႇယၽူင်း ၵေႃႉပၼ်ပၢင်သွၼ်။ ၸၢႆးၶိူဝ်းလွႆ၊ ၸၢႆးဢွၼ်ႇလႅင်း ပဵၼ်ၵေႃႉၸွမ်းၵုမ်း/ၵႅဝ် ၸွႆႈၼႄႉၼမ်းပၼ်တီႈ ၽူႈၶဝ်ႈႁူမ်ႈလဵပ်ႈႁဵၼ်း လၢႆးလူင်းၾွၼ်ႉ။ တူဝ်ယၢင်ႇ ၶိူင်ႈၾူၼ်ႊၼိုင်ႈၶိူင်ႈၼၼ်ႉ ႁႂ်ႈၶဝ်ႈတီႈၼၼ်ႈတီႈၼႆႈ၊ ၵႂႃႇတီႈၼၼ်ႈတီႈၼႆႈ၊ ၸွမ်းၵုမ်းၵႅဝ်ပၼ် ၸွင်ႇလုၵ်ႈႁဵၼ်းၶဝ်ႁဵတ်းလႆႈ- ၸိူဝ်းၼႆႉ။

ပၢင်သွၼ်ၼႆႉ ၵူၼ်းမႃးၶဝ်ႈႁူမ်ႈလဵပ်ႈႁဵၼ်း လၢႆးလူင်းၾွၼ်ႉတႆး ၼႂ်းၶိူင်ႈၶွမ်ႊၽိဝ်ႊတိူဝ်ႊ တင်း လူင်းၾွၼ်ႉၼႂ်းၶိူင်ႈၾူၼ်ႊ (မိုဝ်းထိုဝ်) မီး 25 ၵေႃႉ။ ၶိူင်ႈၾူၼ်ႊတင်းမူတ်း 60 ၶိူင်ႈ၊ ၶိူင်ႈၶွမ်ႊၽိဝ်ႊတိူဝ်ႊ (Notebook) ဢၼ်မႃးလူင်းလိၵ်ႈတႆး မီး 11 ၶိူင်ႈ၊ ၵူၼ်းၶဝ်ႈႁူမ်ႈတင်းမူတ်း မီးမွၵ်ႈ 100 ၵေႃႉပၢႆ။


တီႈပၢင်လူင်းၾွၼ်ႉလိၵ်ႈတႆး ယူႊၼီႊၶူတ်ႊၼႆႉ ၶိူင်ႈၾူၼ်ႊၸိူဝ်းမႃးပၼ်လူင်းၾွၼ်ႉလိၵ်ႈတႆးၼၼ်ႉ ၵမ်ႈၼမ်ပဵၼ်သႅၼ်း သမ်ႊသုင်ႊ (SAMSUNG) ၊ လိူဝ်သေၼၼ်ႉ မီးၶိူင်ႈသႅၼ်း Lenovo, HUAWEI, Vivo ၸိူဝ်းၼႆႉ။ ဢၼ်သႂ်ႇလိၵ်ႈတႆးသေ မီးပၼ်ႁႃၼၼ်ႉ ၵမ်ႈၼမ်ပဵၼ်ၶိူင်ႈၾူၼ်ႊ မိူင်းၶႄႇ- ၼႆယဝ်ႉ။

ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇၼႆႉ ပူၼ်ႉမႃးမိူဝ်ႈဝၼ်းတီႈ 08/10/2014 ဢၼ်ပဵၼ်ဝၼ်းဢွၵ်ႇဝႃႇသႃ လိူၼ် 11 မူၼ်းၼၼ်ႉၵေႃႈ ၸုမ်း IT တႆး လႆႈလူင်းၾွၼ်ႊယူႊၼီႊၶူတ်ႊ ပၼ်ပီႈၼွင်ႉတႆး ၼႂ်းၶိူင်ႈၾူၼ်ႊ/ မိုဝ်းထိုဝ် တင်းၶိူင်ႈၶွမ်ႊၼူတ်ႊၿုၵ်ႊ၊ တီႈၼႃႈလုမ်း ၵေႃလိၵ်ႈလၢႆးလႄႈ ၾိင်ႈငႄႈတႆး ၵဵင်းမႆႇ၊ မိူဝ်ႈၼၼ်ႉၵေႃႈ မီးပီႈၼွင်ႉတႆး မႃးၸူးသႂ်ႇၾွၼ်ႊတႆး (Unicode) ၵၼ်တင်းၼမ်၊ မီးၶိူင်ႈၾူၼ်ႊမိုဝ်းထိုဝ် ဢမ်ႇယွမ်းမွၵ်ႈ 100 ၶိူင်ႈ။