ၽူႈၸတ်းၵၢၼ် ႁူင်းႁဵၼ်းၸိူဝ်ႉၸၢတ်ႈ ၸိုင်ႈတႆး ပွတ်းဢွၵ်ႇၶူင်း ဢွၼ်ပႃးဢဝ်ၽူႈၼမ်းၼႂ်းလူင် ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၵႂႃႇယဵမ်ႈလွမ်တူၺ်း ပိုၼ်ႉတီႈ ႁူင်းႁဵၼ်းၸိူဝ်ႉၸၢတ်ႈ ၸိုင်ႈတႆး ပွတ်းဢွၵ်ႇၶူင်း  ပိူဝ်ႈတႃႇယုၵ်ႉၸၼ်ႉပဵၼ် ႁူင်းႁဵၼ်းၸၼ်ႉသုင်။

ၸၢႆးသၢမ်တိပ်ႉသိူဝ် ၽူႈၸတ်းၵၢၼ်ႁူင်းႁဵၼ်းၸိူဝ်ႉၸၢတ်ႈၸိုင်ႈတႆးပွတ်းဢွၵ်ႇၶူင်း၊ ၸဝ်ႈပိုၼ်ၶမ်း ၽူႈၼမ်းၼႂ်းလူင် ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ဢိၵ်ႇပႃးၵူၼ်းဝၢၼ်ႈ လၢႆလၢႆဝၢၼ်ႈ ၵႂႃႇယဵမ်ႈတူၺ်းတီႈလိၼ်  ပိုၼ်ႉတီႈတႃႇတေၶိုၼ်းမႄးၵေႃႇသၢင်ႈယုၵ်ႉၸၼ်ႉႁဵတ်းႁူင်းႁဵၼ်းၸၼ်ႉသုင် ၶွင်ႁူင်းႁဵၼ်းၸိူဝ်ႉၸၢတ်ႈၸိုင်ႈတႆး ပွတ်းဢွၵ်ႇၶူင်း တီႈဝၢၼ်ႈၼွင်ငိုၼ်း၊ ဢိူင်ႇၵၢတ်ႇၾႃႉ ဝဵင်းၵဵင်းတုင် ။

မိူဝ်ႈဝၼ်းတီႈ 09/06/2015 ၸၢႆးသၢမ်တိပ်ႉသိူဝ် ၽူႈၸတ်းၵၢၼ်ႁူင်းႁဵၼ်းၸိူဝ်ႉၸၢတ်ႈၸိုင်ႈတႆး  ၵဵင်းတုင် တင်း ၸဝ်ႈပိုၼ်းၶမ်း ၽူႈၼမ်းၼႂ်းလူင်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး(CSSU) ဢိၵ်ႇပႃးၵူၼ်းဝၢၼ်ႈၼွင်ငိုၼ်း၊ ဝၢၼ်ႈၼွင်လိူဝ်ႇ၊ ဝၢၼ်ႈၼွင်ၵူမ် လႄႈဝၢၼ်ႈၵုင်း မွၵ်ႈႁိမ်း 30 ၵေႃႉပၢႆ  ၵႂႃႇယဵမ်ႈလွမ်တူၺ်းတီႈလိၼ် ပိုၼ်ႉတီႈႁူင်းႁဵၼ်းၸိူဝ်ႉၸၢတ်ႈၸိုင်ႈတႆး တီႈဝၢၼ်ႈၼွင်ငိုၼ်း ဢၼ်ယၢၼ်ႇဝဵင်း မွၵ်ႈ 5 လၵ်း ၼႂ်းဢိူင်ႇၵၢတ်ႇၾႃႉ ဝဵင်းၵဵင်းတုင် ၸိုင်ႈတႆး ပွတ်းဢွင်ႇၶူင်း၊ ဢၼ်တပ်ႉသိုၵ်းလူင်ပွင်ၸိုင်ႈမၢၼ်ႈ ႁုပ်ႈယိုတ်းဢဝ်ဝႆႉ တီႈလိၼ်ၵူၼ်းဝၢၼ်ႈၵူၼ်းသူၼ်မႃးၶၢဝ်းတၢင်းမွၵ်ႈ20 ပီပၢႆၼၼ်ႉ ၵူၼ်းဝၢၼ်ႈၵူၼ်းသူၼ် လႄႈၽူႈယႂ်ႇၵူၼ်းလူင်တေလဝ်ႈယိုၼ်ႈယွၼ်းဢဝ်ၶိုၼ်းတီႈလိၼ်ၼႆႉသေ ၸဝ်ႈၶွင်မၼ်း တေယုၵ်ႉမွပ်ႈပၼ်ပဵၼ်ၵၢၼ်ၵုသူလ် ႁႂ်ႈၵေႃၵမ်ၵၢၼ်ႁူင်းႁဵၼ်းၸိူဝ်ႉၸၢတ်ႈၸိုင်ႈတႆးၶဝ် လႆႈဢဝ်သၢင်ႈႁဵတ်းပဵၼ်ႁူင်းႁဵၼ်းၸၼ်ႉသုင် ၶွင်ႁူင်းႁဵၼ်းၸိူဝ်ႉၸၢတ်ႈၸိုင်ႈတႆးပွတ်းဢွၵ်ႇၶူင်း ။
ၸၢႆးသၢမ်တိပ်ႉသိူဝ် ၽူႈၸတ်းၵၢၼ်ႁူင်းႁဵၼ်းၸိူဝ်ႉၸၢတ်ႈၸိုင်ႈတႆး ပွတ်းဢွၵ်ႇၶူင်း လၢတ်ႈဝႃႈ တေႃႈလဵဝ်ၼႆႉ ႁဝ်းႁၢင်ႈႁႅၼ်းတႃႇတေလဝ်ႈယိုၼ်ႈယွၼ်းဢဝ်ၶိုၼ်းတီႈလိၼ်တၢင်းၵႂၢင်ႈ 50 ဢေႊၵိူဝ်ႊပၢႆ ၶွင်ၵူၼ်းဝၢၼ်ႈ ဢၼ်ထုၵ်ႇသိုၵ်းမၢၼ်ႈႁုပ်ႈယိုတ်းဢဝ်ၵႂႃႇလႄႈ မိူဝ်ႈလႆႈမႃးၵေႃႈ ႁဝ်းတေလူင်းမိုဝ်း ၵေႃႇသၢင်ႈမႄႇႁဵတ်းပဵၼ်ႁူင်းႁဵၼ်းၸၼ်ႉသုင်ၵမ်းလဵဝ်၊ ၽူႈၵမ်ႉထႅမ်တႃႇတေႁဵတ်းႁူင်းႁဵၼ်းၵေႃႈ မီးဝႆႉယဝ်ႉ။ ႁူင်းႁဵၼ်းၸိူဝ်ႉၸၢတ်ႈၼႆႉ တေသဵင်းငိုၼ်းမွၵ်ႈ 10000 သႅၼ်ပျႃး ၼႆယဝ်။

သိုပ်ႇလၢတ်ႈထႅင်ႈဝႃႈ ႁူင်းႁဵၼ်းၸိူဝ်ႉၸၢတ်ႈဢၼ်တေယုၵ်ႉပဵၼ်ၸၼ်ႉသုင်ၼႆႉ တေမီးၸၼ်ႉငဝ်ႈထိုင် ၸၼ်ႉသိပ်း မိူၼ်ႁူင်းႁဵၼ်းလူင်ပွင်ၸိုင်ႈမၢၼ်ႈ၊ ၼႂ်းႁူင်းႁဵၼ်းၼႆႉ ၵၢၼ်သွၼ်ၵၢၼ်ႁဵၼ်း တေမိူၼ်ႁူင်းႁဵၼ်းလူင်ပွင်ၸိုင်ႈမၢၼ်ႈ ယဝ်ႉၵေႃႈတၵ်းတေလႆႈသွၼ်လိၵ်ႈတႆး ပဵၼ်ပိုၼ်ႉထၢၼ်လႄႈလိၵ်ႈပိုၼ်ႉမိူင်း (လိၵ်ႈၶိုၼ် ႁိုဝ် လိၵ်ႈထမ်း)။ တၢင်ႇၽႃသႃ မိူၼ်လိၵ်ႈထႆး၊ ဢင်းၵိတ်း၊ ၶႄႇလႄႈၵျႃႇပၢၼ်ႇၼႆႉ တေဝႆႉၼွၵ်ႈၶၢဝ်းယၢမ်းသေသွၼ်၊ သင်ဝႃႈလုၵ်ႈႁဵၼ်းသူၼ်ၸႂ် ၶႂ်ႈႁဵၼ်းထိုင်လႆႈၸုမ်ႈၶူးၵေႃႈ တေဢဝ်ဢႃးၸၢရ်ယ(ဢႃးၸႃရိယ)ၼွၵ်ႈမိူင်းမႃးသွၼ် ၼႆယဝ်ႉ။