ၸုမ်းၵူၼ်းၼုမ်ႇမိူင်းယႆ ဢွၼ်ႁူဝ်ၸတ်းႁဵတ်း ပၢင်သွၼ် ၽိုၵ်းၾွၼ်ႉ ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ ဝဵင်းမိူင်းယႆ၊ ႁႂ်ႈပေႃးမေႃဝၢင်းၽႅၼ်၊ မေႃၸတ်းၵၢၼ် ၵူႈလွင်ႈလွင်ႈ၊ မေႃဢွၼ်ႁူဝ် ဢိၵ်ႇတင်း ပၢႆးၵၢၼ်သိုဝ်ႇၶၢဝ်ႇ။

မိူဝ်ႈဝၼ်းတီႈ 17-19/06/2015 ၶၢဝ်းတၢင်း 3 ဝၼ်း၊ ၸုမ်းၵူၼ်းၼုမ်ႇဝဵင်းမိူင်းယႆ ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင်သွၼ်ၽိုၵ်းၾွၼ်ႉ ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ တီႈဝတ်ႉဝိႁၢရ်ၸိၼမၢၼ်ႇဢွင်ႇ ပွၵ်ႉ(1)၊ ဝဵင်းမိူင်းယႆ ၸိုင်ႈတႆးပွတ်းႁွင်ႇ၊ ပိူဝ်ႈတႃႇ ႁႂ်ႈၵူၼ်းၼုမ်ႇ ပေႃးတေမေႃပူၵ်းပွင် ဝၢင်းၽႅၼ်၊ ပၢႆးၽူႈဢွၼ်ႁူဝ်လႄႈ ၵၢၼ်သိုဝ်ႇၶၢဝ်ႇ Media ႁူမ်ႈပႃး မေႃၸတ်းၵၢၼ်ၵူႈလွင်ႈလွင်ႈ ၼႂ်းၸူဝ်ႈပၢၼ်ၵူၼ်းၼုမ်ႇ ၸိူဝ်းၼႆႉ။


ၽူႈယႂ်ႇၵူၼ်းလူင်ၸိူဝ်းၶဝ်ႈႁူမ်ႈ ၵၢဝ်ႇလၢတ်ႈၶေႃႈၵႂၢမ်း မိူဝ်ႈဝၼ်းပိုတ်ႇပၢင်သွၼ် ဝၼ်းတီႈ 17 ၼၼ်ႉ မီးၽူႈၼမ်းၼႂ်းၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းမိူင်းယႆ ၶူးထွၼ်းသႃႇ၊ တူဝ်တႅၼ်းၵေႃႁူမ်ႈသၢင်ႈၵူၼ်းၼုမ်ႇတႆး (TYN) ၼိုင်ႈၵေႃႉ၊ ၽွင်းတႅၼ်းၵူၼ်းမိူင်းၼမ်ႉၸၢင် ၸၢႆးတူႇရိင်ႇဢူး၊ ၸၢႆးတီႇတီႇသူင်ႇ သိုဝ်ႇၶၢဝ်ႇသႅၼ်ပၢႆး၊ တူဝ်တႅၼ်းၵူၼ်းၼုမ်ႇမိူင်းယႆ ၸၢႆးၽူင်း ၸိူဝ်းၼႆႉ။
ၵမ်ႈၼမ် ပဵၼ်ၵၢၼ်တိုၵ်းသူၼ်းလၢတ်ႈ ၵူၼ်းၼုမ်ႇဝႃႈ မိူဝ်ႈလဵဝ်ၼႆႉ ၵူၼ်းၼုမ်ႇ ထုၵ်ႇလီမီးၼမ်ႉၵတ်ႉတဵမ်ထူၼ်ႈ တူဝ်ႈတၢၼ်းဝႆႉၵူႈမိူဝ်ႈ ပိူဝ်ႈတႃႇသိုပ်ႇႁဵတ်းၵၢၼ်ၸိူဝ်ႉၶိူဝ်း ၵၢၼ်ဝၢၼ်ႈမိူင်း ၼႆယဝ်ႉ။

ယိူင်းဢၢၼ်းလႆႈၸတ်းႁဵတ်း ပၢင်ၾိုၵ်းၾွၼ်ႉၵူၼ်းၼုမ်ႇၼႆႉ ၼိုင်ႈပီႈၼိုင်ႈပွၵ်ႈ တႃႇတေလႅၵ်ႈလၢႆႈၽူႈပွင်ၵၢၼ်မႂ်ႇ ယုမ်ႇယမ်ဝႃႈ ၽူႈပွင်ၵၢၼ်မႂ်ႇ တေၽုတ်းဢွၵ်ႇမႃးထႅင်ႈသေ တေပဵၼ်ႁႅင်းၵမ်ႉထႅမ်လႅၵ်ႈလၢႆႈၵူၼ်းၼုမ်ႇ ၶိုၼ်ႈမႃးပုတ်ႈတႅၼ်းၵႂႃႇၵႂႃႇမိူဝ်းၼႃႈ ။

ႁူဝ်ၼႃႈၵူၼ်းၼုမ်ႇဝဵင်းမိူင်းယႆ ၸၢႆးၸူင်ၶမ်း လၢတ်ႈဝႃႈ လွင်ႈဢၼ်လႆႈၸတ်းႁဵတ်းပၢင်သွၼ်ၼႆႉ မီးတၢင်းႁၢၼ်ႉၸႂ်လႄႈ တၢင်းယၢပ်ႇၽိုတ်ႇယူႇ။

လွင်ႈႁၢၼ်ႉၸႂ်ႁဝ်းၶႃႈတႄႉ ဢၼ်ႁဝ်းၶႃႈလႆႈၸတ်းႁဵတ်းပၢင်သွၼ်ၵႂႃႇၼႆႉ မုင်ႈမွင်းဝႃႈတေမီးၸုမ်းပွင်ၵၢၼ်မႃးပုတ်ႈတႅၼ်းတၢင်ႁဝ်းယူႇ၊ ယွၼ်ႉလူၺ်ႈၵၢၼ်ၵူႈလွင်ႈလွင်ႈ ဢၼ်လႆႈၾိုၵ်းသွၼ်ပၼ်မႃးၼႆႉ ယုမ်ႇယမ်ဝႃႈ ၽူႈၶဝ်ႈႁူမ်ႈတင်းမူတ်းၶတ်းၸႂ်ႁဵၼ်းဢဝ်သေ ႁၼ်ဝႆႉ မိူဝ်ႈၼႆႉ တေဢွၵ်ႇမႃးၵူၼ်းၼုမ်ႇ ဢၼ်မီးၼမ်ႉၵတ်ႉယူႇၼႆ  ႁဝ်းၶႃႈယုမ်ႇယမ်ႁၢၼ်ႉၸႂ်ႉယူႇဢေႃႈ။


လွင်ႈယၢပ်ႈၽိုတ်ႇႁဝ်းၶႃႈသမ်ႉ တႃႇတေၸတ်းႁဵတ်းပၢင်သွၼ်ၼိုင်ႈပွၵ်ႈၼႆႉ မၼ်းဢမ်ႇငၢႆႈ ဢၼ်ယၢပ်ႇၽိုတ်ႇတႄႉ ပဵၼ်ငိုၼ်းတွင်း ၵႃႈၸႂ်ႉၸၢႆႇၼၼ်ႉယဝ်ႉ။

ၽူႈမႃးပၼ်ပၢင်သွၼ်ၵမ်းၼႆႉ မီး ၸၢႆးသႅင်မိူင်းၶမ်း၊ ၸၢႆးဝၼ်းလႅင်း၊ ၸၢႆးတီႇတီႇသူင်ႇ၊ ၸၢႆးလၵျေႃႇသေ တႄႇၶၢဝ်းယၢမ်း 08.00 မူင်းၵၢင်ၼႂ် ထိုင် 17.00 မူင်း ၵၢင်ၶမ်ႈ။

မီးၵူၼ်းၼုမ်ႇ ၼႂ်းဝဵင်းမိူင်းယႆ မႃးၶိုၼ်ႈႁဵၼ်း 89 ၵေႃႉ ဢိၵ်ႇပႃး ၵူၼ်းၼုမ်ႇမိူင်းၶိူဝ်း ၼႂ်းမိူင်းသီႇပေႃႉ မႃးၶိုၼ်ႈၸွမ်း 5 ၵေႃႉ၊ ဝၼ်းတီႈ 19 ၼႆႉ ပဵၼ်ဝၼ်းလိုၼ်းသုတ်း ၶွတ်ႇယွတ်ႈပၢင်သွၼ်။


ပူၼ်ႉမႃးမိူဝ်ႈဝၼ်းတီႈ 7-10/06/2015 ၼၼ်ႉၵေႃႈ လႆႈၸတ်းပၢင်သွၼ်ၵူၼ်းၼုမ်ႇမႃးယဝ်ႉၵမ်းၼိုင်ႈ ၵၢပ်းၵၢႆႇလွင်ႈလွၵ်းလၢႆးႁႄႉၵႅတ်ႇမၢၵ်ႇဢၼ်ၾင်လိၼ် ။ သင်ၵူၼ်းၵႂႃႇယဵပ်ႇၺႃးတေလႆႈၵႄႈၶႆၸိူင်ႉႁိုဝ် ပေႃးယဵပ်ႇၺႃးမၢၵ်ႇယဝ်ႉ တေႁဵတ်းႁိုဝ်လုမ်းလႃးဢဝ်ၵႂႃႇႁူင်းယႃ၊ လိူဝ်ၼၼ်ႉ ၾၢႆႇၵၢၼ်ဢွၼ်ႁူဝ်၊ ၾၢႆႇၸတ်းၵၢၼ်ၸဵမ်ၸိူဝ်းၼႆႉ မီးၵူၼ်းၼုမ်ႇမႃးၶိုၼ်ႈႁွတ်ႈ မွၵ်ႈ 40 ၵေႃႉပၢႆ ၼႆယဝ်ႉ။