မၢၼ်ႈၶဝ်ဢွၵ်ႇပွင်ႈၵႂၢမ်း ၸီႉၼႄး သႄႉသွမ်း တိုၵ်းတေႃးဝႃႉ တင်းမူတ်းမီး 5 ၶေႃႈ၊- 1.ဝႃႉၵႃႉယႃႈ။ 2. ဢမ်ႇထွမ်ႇၵႂၢမ်း လူင်ပွင်ၸိုင်ႈမၢၼ်ႈ။ 3.ၸႂ်ႉၵႂၢမ်းၶႄႇ ပဵၼ်တၢင်းၵၢၼ်။ 4.ၶႂ်ႈၽၢတ်ႇဢွၵ်ႇ (ၸိုင်ႈမိူင်းႁူမ်ႈတုမ်)။ 5.ယွၼ်ႉၵႃႉၶၢႆယႃႈမဝ်းၵမ်သေ မီးဢဵၼ်မီးႁႅင်းမႃးယဝ်ႉ ၶႂ်ႈမႃးတႃႉ။

ပၢင်ၵုမ် ဢၼ်ဝႃႉႁပ်ႉပဵၼ်ၸဝ်ႈႁိူၼ်း ၸတ်းမိူဝ်ႈႁူဝ်လိူၼ်မေႊ 2015

ဝၼ်းတီႈ 18/05/2015 မၢၼ်ႈၶဝ်ဢွၵ်ႇပွင်ႈၵႂၢမ်း ဢၼ်ၵေႃႉတႅမ်ႈၸိုဝ်ႈဢွင်ႇၸေႇယ ၼႆသေၸီႉၼႄး သႄႉသွမ်းတိုၵ်းတေႃးဝႃႉ။ ၶေႃႈၵၢဝ်ႇႁႃၼၼ်ႉ တင်းမူတ်းမီး 5 ၶေႃႈ၊ လၢတ်ႈဝႃႈ 1.ဝႃႉၵႃႉယႃႈ။ 2. ဢမ်ႇထွမ်ႇၵႂၢမ်းလူင်ပွင်ၸိုင်ႈမၢၼ်ႈ (မၢၼ်ႈတုၵ်းယွၼ်းဝႃႈ ယႃႇပေႁွင်ႉၸုမ်း 3 ၸုမ်း၊ ၵူဝ်းၵၢင်ႉ MNDAA ၊ တပ်ႉရၶႅင်ႇ AA ၊ တဢၢင်း TNLA ၶဝ်ႈႁူမ်ႈပၢင်ၵုမ် တီႈပၢင်သၢင်း ၼႆၵေႃႈႁွင်ႉၶဝ်ႈႁူမ်ႈ)။ 3. ပဵၼ်မိူင်းဝႃႉ ႁိုဝ် ၼႃႈလိၼ်ၽွင်းငမ်းတူဝ်ၵဝ်ႇဝႃႉ သမ်ႉၸႂ်ႉၵႂၢမ်းၶႄႇပဵၼ်တၢင်းၵၢၼ်။ ၽူႈဢွၼ်ႁူဝ်ဝႃႉၶဝ်ၼႆႉ ပဵၼ်ဝႃႉႁႃႉ ပဵၼ်ၶႄႇႁႃႉ ယင်းဢမ်ႇႁူႉယဝ်ႉ။ 4.ၶႂ်ႈၽၢတ်ႇဢွၵ်ႇ (ၸိုင်ႈမိူင်းႁူမ်ႈတုမ်)။ 5.ယွၼ်ႉၵႃႉၶၢႆယႃႈမဝ်းၵမ်သေ မီးဢဵၼ်မီးႁႅင်းမႃးယဝ်ႉ ၶႂ်ႈမႃးတႃႉ- ၼႆယဝ်ႉ။

ဢၼ်ဝႃႉႁဵတ်းၽိတ်းႁဵတ်းထုၵ်ႇၼႆႉ ႁဝ်းဢမ်ႇဝႃႈ။ ၵူၺ်းၵႃႈ လွင်ႈၼႆႉ မၼ်းၼႄၵၢင်ၸႂ်မၢၼ်ႈဝႃႈ တပ်ႉသိုၵ်းမၢၼ်ႈၼႆႉ ၸဵမ်မိူဝ်ႈမိုၼ်ႉမိူဝ်ႈၵွၼ်ႇ မၼ်းမိူၼ်ၵၼ်၊ ၸႂ်ၶဝ်ၼႆႉ တိုၼ်းဝႃႈဢမ်ႇလႅၵ်ႈလၢႆႈ။ ၵႃႈၵွၼ်ႇပူၼ်ႉမႃး မီးတွၼ်ႈသွၼ်ဝႆႉ 2 တွၼ်ႈ။

1.မိူဝ်ႈၸဝ်ႈၶုၼ်သႃႇ ႁဵတ်းၵႃႇၵွႆႇယေး၊ ဝၢႆးမႃးၶဝ်ႈထိူၼ်ႇၵေႃႈ မၼ်းႁဵတ်းၸွမ်းၵႂၢမ်းမၢၼ်ႈ မိူၼ်ၼင်ႇတိုၵ်းၵၼ်တင်းတပ်ႉသိုၵ်းၸိုင်ႈတႆး၊ ယိုဝ်းတၢႆၽူႈဢွၼ်ႁူဝ်တပ်ႉသိုၵ်းၸိုင်ႈတႆးၸိူဝ်းၼႆႉ။ ပေႃးၸိူင်ႉၼၼ် မၢၼ်ႈၵေႃႈပၼ်တိုဝ်ႉတၢင်းၶုၼ်သႃႇမႃး၊ မၼ်းၶႂ်ႈႁဵတ်းၵၢၼ်သင်ၵေႃႈပၼ်ႁဵတ်း။ ၶႂ်ႈတင်ႈႁူင်းႁုင်တူမ်ႈယႃႈမဝ်းၵမ်၊ ဢဝ်ႁူင်းတူမ်ႈယႃႈမႃးဝႆႉၼႂ်းၼႃႈလိၼ်မၼ်းၵေႃႈ မၢၼ်ႈဢမ်ႇဝႃႈသင်။ ပေႃးပဵၼ်ၸိူင်ႉၼၼ်ၵေႃႈ ၵူၼ်းပေႃႈလဵင်ႉလၢဝ်းပၢၼ်းလူင် ၸိူဝ်းဢၼ်မီးငိုၼ်းမီးတွင်းသေ ၶႂ်ႈတင်ႈႁူင်းယႃႈၶၢဝ်ၸိူဝ်းၼႆႉ ၶဝ်ၵေႃႈလင်ႇလႆၶဝ်ႈမႃး ၼႂ်းၼႃႈလိၼ်ၶုၼ်သႃႇၵုမ်းၵမ်သေ တင်ႈႁူင်းတူမ်ႈယႃႈလႆႈတိၵ်းတိၵ်း။ ၵွပ်ႈဝႃႈၸဝ်ႈငိုၼ်းတိုၼ်းၶဝ်ၼႆႉ ၶဝ်ၵေႃႈႁူႉဝႃႈ ပေႃးႁဝ်းၵႂႃႇယူႇ ၵႂႃႇလူင်းတိုၼ်းၼႂ်းၼႃႈလိၼ်ၶွင်ၶုၼ်သႃႇၼႆ ႁဵတ်းၵၢၼ်သင်ၵေႃႈ ဢမ်ႇလႆႈၵူဝ်မၢၼ်ႈ၊ ဢမ်ႇလႆႈၵူဝ်ၽႂ်။

ၵူႈၸိုင်ႈမိူင်း ၼႂ်းလုမ်ႈၾႃႉၵေႃႈ ပိူၼ်ႈဢွၼ်ၵၼ်ၸီႉၼႄးဝႃႈ ၶုၼ်သႃႇပဵၼ်ၵူၼ်းၵႃႉယႃႈ၊ ၶုၼ်သႃႇပဵၼ် ၶုၼ်ႁေႃၶမ်းယႃႈၾိၼ်ႇၵေႃႈ ၶုၼ်သႃႇၵေႃႈယူႇလႆႈ။ ၽိူဝ်ႇထိုင်မႃးပီ 1985 ၶုၼ်သႃႇဢွၼ်ႁူဝ် တပ်ႉသိုၵ်းတႆးႁူမ်ႈပွင်း (SUA) မႃးႁူမ်ႈႁွမ်းၵၼ်တင်း တပ်ႉသိုၵ်းၽွမ်ႉႁူမ်ႈလုၵ်ႉၽိုၼ်ႉၸိုင်ႈတႆး (SURA) ဢၼ်ၸဝ်ႈၵွၼ်းၸိူင်းဢွၼ်ႁူဝ် တင်း တပ်ႉသိုၵ်းၸိုင်ႈတႆး (SSA) ပွတ်းၸၢၼ်း ဢၼ်ၸဝ်ႈၸၢမ်မႂ်ႇ ဢွၼ်ႁူဝ်သေ မႃးတင်ႈပဵၼ် တပ်ႉသိုၵ်းမိူင်းတႆး (MTA) ။ ပေႃးဝႃႈ MTA ႁိူင်းမႃးယဝ်ႉၵေႃႈ ပီ 1993 ၶုၼ်သႃႇပိုၼ်ၽၢဝ်ႇ မိူင်းတႆးၵွၼ်းၶေႃ။  ပေႃးပိုၼ်ၽၢဝ်ႇၵွၼ်းၶေႃယဝ်ႉၵေႃႈ မီးပၼ်ႁႃၵၼ်တင်းမၢၼ်ႈ မႃးၵမ်းလဵဝ်။

ဢွၼ်တၢင်းၼၼ်ႉ မၢၼ်ႈဢမ်ႇဝႃႈသင်။ ၵူၺ်းၵႃႈ ပေႃးဝႃႈပိုၼ်ၽၢဝ်ႇၵွၼ်းၶေႃယဝ်ႉၵေႃႈ မၢၼ်ႈတိုၼ်းၸီႉၼႄးဝႃႈ ၶုၼ်သႃႇ ပဵၼ်ၵူၼ်းႁၢႆႉ၊ ပဵၼ်ၵူၼ်းၵႃႉယႃႈ၊ ပဵၼ်ၶုၼ်ႁေႃၶမ်းယႃႈၾိၼ်ႇ မႃးၵမ်းလဵဝ်။ မၢၼ်ႈၸွမ်းယႃႉၸွမ်းၵဝ်း ၸွမ်းတိုၵ်းတေႃး ႁၢၼ်ႉတေႃႇၶုၼ်သႃႇပေႃးဢွၼ်ႁူဝ်တပ်ႉသိုၵ်းလူမ်ႉၵွႆ၊ လႆႈၵူမ်ႈၵွမ်းၼွမ်းၸူး ဝၢင်းၶိူင်ႈၵွင်ႈၵၢင်ႇပၼ်တပ်ႉသိုၵ်းမၢၼ်ႈၵႂႃႇ မိူဝ်ႈႁူဝ်ပီ 1996 ။

လွင်ႈၸိူဝ်းၼႆႉ မၼ်းၼႄဝႃႈ မိူဝ်ႈတိုၵ်ႉလီၵၼ်ယူႇၼႆႉ ပိူၼ်ႈၵႃႈၶႂ်ႈဝႃႈၸိူင်ႉႁိုဝ်ၵေႃႈ မၢၼ်ႈတိုၼ်းပၼ်ႁႅင်းဝႆႉ။ ပေႃးဝႃႈမၢၼ်ႈလၢတ်ႈသေဢမ်ႇထွမ်ႇၵႂၢမ်းၶဝ် ဢမ်ႇလီၵၼ်မႃး ၶဝ်ၵေႃႈတၢင်ႇတၢင်းၽိတ်းလၢႆသမ်ႇလၢႆပိူင် ဢဝ်တၢင်းၽိတ်းလူင်ပူဝ်ႉသႂ်ႇႁူဝ် ၾၢႆႇသၢၼ်ၶတ်းၶဝ်တိၵ်းတိၵ်း။

တွၼ်ႈသွၼ်ၵမ်းတီႈ 2 ၼႆႉ မိူၼ်ၼင်ႇ ၽိူင်ၵျႃးသိူင်း ၽူႈဢွၼ်ႁူဝ်ၸုမ်းၵူဝ်းၵၢင်ႉ (MNDAA) ။ ဢွၼ်တၢင်းၼႆႉ တင်းလုမ်ႈၾႃႉပိူၼ်ႈဢွၼ်ၵၼ်ဝႃႈ ၽိူင်ၵျႃးသိူင်းၼႆႉၵႃႉယႃႈ။ ၵူၺ်းၵႃႈ မၢၼ်ႈတႄႉလၢတ်ႈဝႃႈ မၼ်းၸဝ်ႈၼႆႉ ပဵၼ်ၽူႈဢွၼ်ႁူဝ်ၸၢဝ်းၶိူဝ်း ၵူဝ်းၵၢင်ႉ၊ ဢမ်ႇၼႄပဵၼ်ၵူၼ်းၵႃႉယႃႈသေ ၽိူင်ၵျႃးသိူင်းၵေႃႈယူႇမႃးလႆႈ။ ၵူၺ်းၵႃႈ ၽိူဝ်ႇထိုင်မႃးပီ 2009 မၢၼ်ႈသမ်ႉဝႃႈ ႁႂ်ႈလႅၵ်ႈလၢႆႈႁဵတ်း တပ်ႉပႂ်ႉလႅၼ်လိၼ် (BGF) ၊ ၵူဝ်းၵၢင်ႉ ဢမ်ႇယွမ်းႁဵတ်း၊ ပေႃးဢမ်ႇယွမ်းႁဵတ်းၵေႃႈ ၽိူင်ၵျႃးသိူင်းၼႆႉ ပဵၼ်ၵူၼ်းႁၢႆႉ ပဵၼ်ၵူၼ်းၵႃႉယႃႈၵႂႃႇၵမ်းလဵဝ်။ ဝၢႆးၼၼ်ႉၵေႃႈ မၢၼ်ႈႁၢင်ႈသိုၵ်းၶဝ်ႈလေႃႇတိုၵ်းၵူဝ်းၵၢင်ႉ။

မိူဝ်ႈလဵဝ်ၼႆႉ ပေႃးမႃးတူၺ်းပွင်ႈၵႂၢမ်းဢၼ်ဢွၵ်ႇမႃး မိူဝ်ႈဝၼ်းတီႈ 18/05/2015 ၼႆႉ ဝႃႉၵေႃႈ ၶႂ်ႈပဵၼ်မႃးၸိူင်ႉၼၼ်ႁိုဝ် ? ၊ လွင်ႈၼႆႉမၼ်းၵေႃႈမီးၵႂၢမ်းထၢမ်။ လွင်ႈတၢင်းၾၢႆႇပီႈၼွင်ႉဝႃႉၼႆႉ မိူဝ်ႈၶုၼ်သႃႇတိုၵ်ႉႁိူင်းယူႇၼၼ်ႉ ၽႂ်ၵေႃႈဢမ်ႇဝႆႉလွင်ႈၶဝ်ၼၵ်းၼႃ။

မိူဝ်ႈၽွင်းၼၼ်ႉ ပေႃးဝႃႈၶုၼ်သႃႇ ပိုၼ်ၽၢဝ်ႇၵွၼ်းၶေႃၵေႃႈ မၢၼ်ႈၵေႃႈမင်ၶုၼ်သႃႇ။ ပေႃးမၢၼ်ႈတိုၵ်းမင် ၶုၼ်သႃႇယဝ်ႉၼႆၵေႃႈ ၵႃႈပဵၼ်လၢဝ်းပၢၼ်းၶဝ်၊ ၵူၼ်းၶႂ်ႈတင်ႈႁူင်းတူမ်ႈယႃႈၸိူဝ်းၼႆႉၵေႃႈ ဢမ်ႇႁတ်းယူႇၸွမ်း ၶုၼ်သႃႇ၊  ဢမ်ႇႁတ်းၵႂႃႇတင်ႈႁူင်းတူမ်ႈယႃႈ ၼႂ်းၼႃႈလိၼ်ၶုၼ်သႃႇ၊ ၵွပ်ႈဝႃႈမၼ်းဢမ်ႇမီးလွင်ႈႁူမ်ႇလူမ်ႈယဝ်ႉ။

မိူဝ်ႈၼၼ်ႉ ၸုမ်းဢၼ်သၢၼ်ၶတ်းၶုၼ်သႃႇ သမ်ႉပဵၼ်ဝႃႉ၊ ပေႃးၸိူင်ႉၼၼ် မၢၼ်ႈၵေႃႈပၼ်ႁႅင်းဝႃႉ။ ပေႃးမၢၼ်ႈပၼ်ႁႅင်းဝႃႉ၊ ဝႃႉၶႂ်ႈႁဵတ်းသင်ၵေႃႈႁဵတ်းလႆႈၵေႃႈ ၵူၼ်းၵႃႉယႃႈၶဝ်ၸိူဝ်းၼႆႉၵေႃႈ ဢွၼ်ၵၼ်လႅၼ်ႈၶဝ်ႈၸူးဝႃႉ၊ ဢွၼ်ၵၼ်ၵႂႃႇယူႇၼႂ်း ၼႃႈလိၼ်ဝႃႉၵုမ်းၵမ်သေႁဵတ်းဢွၵ်ႇယႃႈ။

လွင်ႈၼႆႉ မၼ်းၼႄဝႃႈ- မိူဝ်ႈဢွၼ်တၢင်းၼႆႉ ပုၼ်ႈတႃႇမၢၼ်ႈၼႆႉ ဝႃႉၼႆႉပဵၼ်ၵူၼ်းလီယဝ်ႉ။ ပီႈၼွင်ႉဝႃႉၶဝ်ၼႆႉ ၵူၼ်းမိူင်းလုမ်ႈၾႃႉၶဝ် ပိူၼ်ႈၵႃႈၶႂ်ႈဝႃႈၸိူင်ႉႁိုဝ်ၵေႃႈယဝ်ႉ မၢၼ်ႈတိုၼ်းဝႃႈဝႃႉတိုၼ်းပဵၼ်ၵူၼ်းလီ၊ ၵွပ်ႈပိူဝ်ႈဝႃႈ 1.ဝႃႉထွမ်ႇဢဝ်ၵႂၢမ်းမၢၼ်ႈမႃး။ 2.ဝႃႉထွမ်ႇၵႂၢမ်းမၢၼ်ႈသေ မၢၼ်ႈလၢတ်ႈဝႃႈ ယႃႇပေၵႂႃႇႁူမ်ႈၵၼ်တင်းၸုမ်းၸၢဝ်းၶိူဝ်းၸုမ်းလႂ်ၼႆၵေႃႈ ဝႃႉတိုၼ်းဝႃႈဢမ်ႇႁူမ်ႈၸုမ်းလႂ်၊ လိူဝ်သေၸုမ်း မိူင်းလႃး တင်းၸုမ်းၵူဝ်းၵၢင်ႉ၊ ၵွပ်ႈဝႃႈၶဝ်ၼႆႉ တိုၼ်းႁူမ်ႈၵၼ်မႃးၸဵမ်ပိုင်း။ 3.တၢင်ႇမူႇတၢင်းၸုမ်း ၵႂႃႇဢႅဝ်ႇယဵမ်ႈၸႂ်းၸုမ်းဝႃႉၵေႃႈ ပဵၼ်ၵၢၼ်လပ်ႉလပ်ႉၵူၺ်း၊ ဢမ်ႇမီးလွင်ႈပိုတ်ႇၽိူၺ်။ 4.လိူဝ်သေၼၼ်ႉ ၸုမ်းဢၼ်ပဵၼ်ၽူႈၶဵၼ်မၢၼ်ႈၸိူဝ်းၼၼ်ႉ ယူႇတီႈဝႃႉၵေႃႈတိုၵ်းတေႃးၸွမ်း၊ ၸွႆႈပဵၼ်ႁူပဵၼ်တႃၸွႆႈမၢၼ်ႈ။ ၵွပ်ႈၼၼ် မိူဝ်ႈဢွၼ်တၢင်းၼႆႉ ဝႃႉၵေႃႈတိုၵ်း ၶုၼ်သႃႇမႃး၊ ၶုၼ်သႃႇဢမ်ႇမီးယဝ်ႉၵေႃႈ သိုပ်ႇတိုၵ်းယွတ်ႈသိုၵ်းမႃး။

ၵူၺ်းၵႃႈ မိူဝ်ႈလဵဝ်ၼႆႉ ဝႃႉဢမ်ႇပေႃးၶႂ်ႈထွမ်ႇၵႂၢမ်းမၢၼ်ႈ၊ မၢၼ်ႈၶႂ်ႈႁႂ်ႈသိုပ်ႇတိုၵ်း တပ်ႉသိုၵ်းၸိုင်ႈတႆး (RCSS/SSA) ၼႆၵေႃႈ ဝႃႉဢမ်ႇယွမ်းတိုၵ်း။ မၢၼ်ႈၽိတ်းၸႂ်ၵမ်းဢွၼ်တၢင်း ပဵၼ်ၼႂ်းပီ 2005 ။ မိူဝ်ႈပီ 2005 ၼၼ်ႉ တပ်ႉသိုၵ်းမၢၼ်ႈ တင်းတပ်ႉသိုၵ်းဝႃႉ ႁူမ်ႈၵၼ်တိုၵ်းယိုဝ်းလွႆတႆးလႅင်း၊ တပ်ႉသိုၵ်းမၢၼ်ႈယူႇ တၢင်းလင်သေ ဢဝ်ၶိူင်ႈၵွင်ႈလူင် 120mm ယိုဝ်း၊ သိုၵ်းဝႃႉသမ်ႉၶိုၼ်ႈလေႃႇ၊ ၾၢႆႇသိုၵ်းဝႃႉလူႉသုမ်း ဝၢတ်ႇတၢႆၼပ်ႉႁူဝ်ပၢၵ်ႇ၊ ၾၢႆႇသိုၵ်းတႆး လွႆတႆးလႅင်း လူႉသုမ်းဝၢတ်ႇတၢႆၼပ်ႉႁူဝ်သိပ်း။ ဢိင်ၼိူဝ်ပေႃႇလသီႇ ငဝ်ႈငုၼ်းပၢင်သၢင်းသေ တႆးတင်းဝႃႉၵေႃႈ ၵိုတ်းတိုၵ်းၵၼ်မႃး၊ လီၵၼ်မႃး။ ဝၢႆးမႃးသွင်ၾၢႆႇမီးပၼ်ႁႃၵၼ်ၵေႃႈ ဢမ်ႇႁၢဝ်ႈႁႅင်း၊ ၵႄႈၵၼ်လႆႈ။

မိူဝ်ႈလဵဝ် ဝႃႉဢမ်ႇယွမ်းယိုဝ်းတၢင်ႇမူႇတၢင်ႇၸုမ်း။ ဢမ်ႇယွမ်းယိုဝ်းၵူၺ်းဢမ်ႇၵႃး ဢၼ်မၢၼ်ႈၽိတ်းၸႂ်ၼႆႉ ယွၼ်ႉဝႃႉႁွင်ႉပၢင်ၵုမ်လူင်ၸၢဝ်းၶိူဝ်း တီႈပၢင်သၢင်း၊ ႁပ်ႉႁဵတ်းၸဝ်ႈႁိူၼ်းသေၸတ်းပၢင်ၵုမ်။ မၢၼ်ႈဝႃႈ ယႃႇပေႁွင်ႉ 3 ၸုမ်း ဢၼ်မၢၼ်ႈဢမ်ႇႁပ်ႉလႆႈၼၼ်ႉ ၶဝ်ႈႁူမ်ႈပၢင်ၵုမၵေႃႈ ဝႃႉႁွင်ႉၶဝ်ႈႁူမ်ႈပႃး။ လိူဝ်သေၼၼ်ႉ ယူႇတီႈဝႃႉၵေႃႈယင်းဝႃႈ ၵဵဝ်ႇၵပ်းလွင်ႈတႃႇတေဢုပ်ႇဢူဝ်းမၢၼ်ႈၼႆႉ ႁဝ်းၶႃႈတေၶဝ်ႈပႃး။ ၶဝ်ႈပႃးၵူၺ်းဢမ်ႇၵႃး ပေႃးထုၵ်ႇလႆႈဢွၼ်ႁူဝ်ၵေႃႈ ႁဝ်းၶႃႈတေဢွၼ်ႁူဝ်- ဝႃႈၼႆ။

ပိူင်ပဵၼ်မၼ်း မႃးထိုင်မွၵ်ႈၼႆႉယဝ်ႉၵေႃႈ တၢင်းမၢၼ်ႈၵေႃႈဢမ်ႇယူႇလႆႈ၊ မၼ်းမိူၼ်တင်းၵႂႃႇယူင်းသႂ်ႇ သူၼ်းၽိုၼ်းသူၼ်းၾႆးသႂ်ႇ ၸႂ်မၢၼ်ႈ၊ ၸႂ်မၢၼ်ႈဢမ်ႇတုင်းႁပ်ႉလႆႈ။ ပေႃးတူၺ်းတွၼ်ႈသွၼ်တီႈ ၶုၼ်သႃႇ လႄႈၽိူင်ၵျႃးသိူင်းၶဝ် ၵႃႈပူၼ်ႉမႃးၼႆႉၸိုင် တႄႇဢဝ်ၼႆႉၵႂႃႇၼႃႈ မၢၼ်ႈၼႆႉ ၶေးတေၸၢင်ႈဢဝ်ဝႃႉ ပဵၼ်ၵူၼ်းႁၢႆႉ၊ တေဢမ်ႇၸႂ်ႈၽူႈဢွၼ်ႁူဝ် ၸၢဝ်းၶိူဝ်းယဝ်ႉ။

ၵူၺ်းၵႃႈ ပေႃးဝႃႈတေၵုမ်ႇၶဵင်ႇမင်ၵၼ်ၸိူင်ႉၼႆ မၼ်းတေတုမ်ႉယွၼ်ႈတီႈ ၶၵ်ႉၵၢၼ်ငမ်းယဵၼ်။  မၼ်းတေတုမ်ႉယွၼ်ႈၵႃႈႁိုဝ်၊ မၢၼ်ႈတေလူတ်းယွၼ်ႇၵႂႃႇၶိုၼ်းၼႄႇ၊ လွင်ႈၼႆႉ တေလႆႈပႂ်ႉတူၺ်း။ ၵူၺ်းၵႃႈ ပေႃးဝႃႈမၢၼ်ႈဢမ်ႇလူတ်းယွၼ်ႇသေ သိုပ်ႇမင်ၵႂႃႇၸိုင် မၼ်းတေယၢပ်ႇပိူဝ်ႈတႃႇ ပဵၼ်မႃးလွင်ႈငမ်းယဵၼ်ၼႂ်း ၸိုင်ႈမိူင်းႁူမ်ႈတုမ်မၢၼ်ႈ။

လၢႆးႁဵတ်းမၢၼ်ႈၼႆႉ လွင်ႈငမ်းယဵၼ်ဢၼ်ဝႃႈၼႆႉ ပေႃးသူၸဝ်ႈဢွၼ်ၵၼ်ထွမ်ႇၵႂၢမ်းၵဝ်ၶႃႈမူတ်း မၼ်းတိုၼ်းလီမူတ်း၊ ပဵၼ်ဝႆႉယူႇၸိူင်ႉၼႆ။ ၸိုင်ႈမိူင်းႁူမ်ႈတုမ်မၢၼ်ႈၼႆႉ  မၢၼ်ႈၶႅၼ်းမီးပုၼ်ႈၽွၼ်းယႂ်ႇ၊ ၵွပ်ႈဝႃႈ မၢၼ်ႈၶဝ်ဝႃႈၶဝ်ပဵၼ်လူင်ပွင်ၸိုင်ႈ။ လူင်ပွင်ၸိုင်ႈၼႆႉ မၼ်းမိူၼ်ပေႃႈမႄႈ၊ ၵွပ်ႈၼၼ် လူင်ပွင်ၸိုင်ႈၼႆႉ ထုၵ်ႇလႆႈဝႆႉၵူၼ်းမိူင်းမိူၼ်ၸိူင်ႉၼင်ႇ လုၵ်ႈလၢင်းဢွၵ်ႇၼႂ်းၵၢင်တွင်ႉႁွင်ႈသႆႈတူဝ်ၵဝ်ႇ၊ ၵူၺ်းၵႃႈ ပေႃးမၢၼ်ႈသမ်ႉ ႁၼ်ၵူၼ်းမိူင်းပဵၼ်ၽူႈၶဵၼ်ၼႆ မၼ်းတိုၼ်းဢမ်ႇလီၵၼ်သေပွၵ်ႈ။ ၸိုင်ႈမိူင်းႁူမ်ႈတုမ်ဢၼ်ဝႃႈၼၼ်ႉၵေႃႈ တေမီးၼႂ်းၸိုဝ်ႈၵူၺ်း။