သင်ၶၸဝ်ႈလႄႈ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းပုင်ႇပႃႇၶႅမ် ဢွၼ်ႁူဝ် တေၸတ်းႁဵတ်း ပွႆးလူင်းပၢင်သွၼ်လိၵ်ႈတႆး ၶၢဝ်းမႆႈ တီႈဝဵင်းပုင်ႇပႃႇၶႅမ် ပွၵ်ႈၵမ်းတီႈ/ၸုပ်ႈ 11 ၊တေမီးၽူႈယႂ်ႇၵူၼ်းလူင် ၼႂ်းဢိူင်ႇ ၼႂ်းပွၵ်ႉတင်း လုၵ်ႈႁဵၼ်းၶဝ်ႈႁူမ်ႈ။

ဝၼ်းတီႈ 25/05/2015 တေထိုင်ၼႆႉ သင်ၶၸဝ်ႈ ဝတ်ႉသုၶဝိႁႃရ ဝဵင်းပုင်ႇပႃႇၶႅမ် ၸိုင်ႈတႆးပွတ်းဢွၵ်ႇ၊ လႄႈ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းပုင်ႇပႃႇၶႅမ် (ၸႄႈဝဵင်းမိူင်းတူၼ်) တေဢွၼ်ႁူဝ်ၸတ်းႁဵတ်း ပၢင်လူင်းၵၢၼ်သွၼ်လိၵ်ႈတႆး ၶၢဝ်းမႆႈ တီႈႁူင်းထမ်းမႂ်ႇ ၶၢဝ်းယၢမ်း 08.30 မူင်းၵၢင်ၼႂ် ပိုတ်ႇပၢင်ၵႅဝ်ႈ ဢိၵ်ႇတင်း လဵင်ႉတၢၼ်းၽဵလ်း (ၵၢပ်ႈသွမ်း)ဝၼ်းလႄႈ လဵင်ႉလူပီႈၼွင်ႉၶႅၵ်ႇၶဝ်ႈႁူမ်ႈပၢင်ပွႆး လႄႈ တေၵၢၼ်တွၼ်ႈရၢင်းဝလ်း (သူး)ပၼ်လုၵ်ႈႁဵၼ်း ၸိူဝ်းၶၢမ်ႈပူၼ်ႉၸၼ်ႉ ဢိၵ်ႇတင်း တၢင်းၵႃႈမူၼ်ႈၸႂ်လုၵ်ႈႁဵၼ်းၶဝ်။

ပၢင်သွၼ်လိၵ်ႈတႆး ၶၢဝ်းမႆႈပီၼႆႉ မီးလုၵ်းႁဵၼ်းတင်းမူတ်း 232 ၵေႃႉ၊ မေႃသွၼ် 14  ၵေႃႉ၊ ၶူးသွၼ်မီး 1 ၵေႃႉ၊ မေႃသွၼ်ၸၢႆး 7 ၵေႃႉ၊ မေႃသွၼ်ယိင်း 7  ၵေႃႉ လႄႈသင်ၶၸဝ်ႈ 1 တူၼ်။

မေႃသွၼ်ၸၢႆးလၢဝ်ၾႃႉ လၢတ်ႈဝႃႈ လုၵ်ႈႁဵၼ်းဢၼ်မႃးတွပ်ႇလိၵ်ႈမီး 142 ၵေႃႉ၊ ဢၼ်ၶၢမ်ႈပူၼ်ႉၸၼ်ႉ 128 ၵေႃႉ၊ ၸၼ်ႉလိၵ်ႈဢၼ်သွၼ် မီးၸၼ်ႉငဝ်ႈ၊ ၸၼ်ႉၼိုင်ႈ လႄႈၸၼ်ႉသွင်၊ ၼိုင်ႈဝၼ်း သွၼ် 2 ႁွပ်ႈ၊ ႁွပ်ႈတီႈၼိုင်ႈ 08.30-15.00 မူင်း၊ ႁွပ်ႈတီႈသွင်သမ်ႉ 18.00-20.00 မူင်း။ ၸၼ်ႉငဝ်ႈၼႆႉ ယႅၵ်ႈဝႆႉထႅင်ႈ 3 ၸၼ်ႉ၊ မိူၼ်ၸၼ်ႉငဝ်ႈ (ၵ)၊ ၸၼ်ႉငဝ်ႈ(ၶ)၊ ၸၼ်ႉငဝ်ႈ(င)။ ပပ်ႉႁဵၼ်းသွၼ်သမ်ႉ ပဵၼ်ပပ်ႉႁဵၼ်းလိၵ်ႈတႆး ၸဵဝ်းမေႃဝႆး၊ (ပပ်ႉႁဵၼ်းႁူဝ်သိူဝ် - ဢၼ်ၸဝ်ႈသၢႆမိူင်း မင်းရၢႆး ၽွင်းလူင်ၾၢႆႇပၺ်ၺႃ ၸိုင်ႈတႆးၶဝ်ႁဵတ်းဢွၵ်ႇ) လႄႈ ပပ်ႉၾိင်ႈသၽႃဝ ၸဵမ်ၸိူဝ်ႉၼႆႉ။

ပၢင်သွၼ်လိၵ်ႈတႆး ၶၢဝ်းမႆႈၼႆႉ တႄႇပိုတ်ႇမႃးမိူဝ်ႈဝၼ်းတီႈ 27/03/2015-12/05/2015 တီႈဝတ်ႉသုၶဝိႁႃရ ဝဵင်းပုင်ႇပႃႇၶႅမ်။
ပၢင်သွၼ်လိၵ်ႈတႆး ၶၢဝ်းမႆႈၼႆႉ ဢၼ်လႆႈသွၼ်မႃးၵူႈပီပီ တေမီးမွၵ်ႈ (20) ပီ။ ဢၼ်လႆႈၸတ်းႁဵတ်း ပွႆးလူင်းပၢင်သွၼ်သမ်ႉ မီး 11 ပီပႃးပီၼႆႉ- ၼႆယဝ်ႉ။