တင်ႈတႄႇ ႁူဝ်လိူၼ် April ၼႆႉမႃး ႁွင်ႈၵၢၼ်ၵူၼ်းၼုမ်ႇ ပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လူင်းပိုၼ်ႉတီႈ ပၼ်တၢင်းႁူႉတၢင်းႁၼ် ႁႂ်ႈၵူၼ်းမိူင်းၵႆ ယၢၼ်ယႃႈမဝ်းၵမ် ၽိူမ်ႉထႅမ်တၢင်းႁူႉ ႁႃပၼ် လွၵ်းၵၢၼ်ၵႃႉၶၢႆမၢၵ်ႇၶဝ်ႈ တဝ်ႈၼမ်ႉ ၽုၵ်ႇတၢင်တႅၼ်း တူၼ်ႈၾိၼ်ႇ။

တင်ႈတႄႇ ဝၼ်းတီႈ 4/3/2015 တေႃႇ ပၢင်ပွႆးသွၼ်းၼမ်ႉ ႁွင်ႈၵၢၼ်ၵူၼ်းၼုမ်ႇ ငဝ်ႈငုၼ်း ပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လူင်းပိုၼ်ႉတီႈ ႁူပ်ႉထူပ်းၵူၼ်းမိူင်း ႁဵင်ပၢႆ ပၼ်တၢင်းႁူႉတၢင်းႁၼ် ၵဵဝ်ႇၵပ်းပၢင်လိူၵ်ႈတင်ႈ၊ ၵဵဝ်ႇၵပ်းၵၢၼ်ႁႄႉၵင်ႈ ၵူၼ်းၵႃႉၵူၼ်း၊ ပိုၼ်ႉႁူႉပၢႆးႁၼ် ၵၢၼ်ၽၢတ်ႇဝၢၼ်ႈယၢၼ်မိူင်း ၵႂႃႇႁႃႁဵတ်းၵၢၼ်မိူင်းႁိမ်းႁွမ်း။ ပိူင်လူင်တႄႉ  ႁႂ်ႈၵူၼ်းမိူင်းၵႆယၢၼ်ယႃႈမဝ်းၵမ်၊ ႁႂ်ႈၽုၵ်ႇမၢၵ်ႇၶဝ်ႈ တဝ်ႈၼမ်ႉ တႅၼ်းတၢင်ယႃႈမဝ်းၵမ်၊ ပၢၵ်ႈၼႄသဵၼ်ႈတၢင်း ႁႂ်ႈမီးလွၵ်းၵၢတ်ႇ ၵႃႉၶၢႆ ၸဵမ်ၸိူဝ်းၼႆႉ။

ၽူႈၶၢၼ်ပၢၵ်ႇ ပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၸဝ်ႈႁၢၼ်ၸၢႆးသူႉ လၢတ်ႈဝႃႈ “ လႆႈလူင်းပိုၼ်ႉတီႈ ၼႂ်းၸႄႈဝဵင်းမိူင်းသူႈ၊ တၢင်ႉယၢၼ်း၊ တင်းမူတ်း 1085 ၵေႃႉ။ ပၼ်တၢင်းႁူႉၵႅမ်တူဝ်ၶဝ်၊ ပေႃးတႅမ်ႇ ၼႃႇၵေႃႈ တေဢမ်ႇမီၽွၼ်းလီသင်၊ ပေႃးသုင်ၼႃႇၵေႃႈ ၶဝ်သမ်ႉတေဢမ်ႇႁပ်ႉလႆႈ။ ႁႂ်ႈၵိုင်ႇငၢမ်ႇ ၵူၼ်းဝၢၼ်ႈ ၵူၼ်းၼႃးၼၼ်ႉၼႃႇ။ ဢိင်ၼိူဝ် ႁူဝ်ပဝ်ႈလူင် ၸီႉၼႄသဵၼ်ႈတၢင်းသေ ႁႂ်ႈၶဝ်ၽုၵ်ႇမၢၵ်ႇလူၺ် တႅၼ်းတၢင်တူၼ်ႈၾိၼ်ႇ၊ ပေႃးယဝ်ႉ ၶိုင်ဝႆႉပၼ်လွၵ်းၵၢတ်ႇ ၵပ်းသိုပ်ႇဝႆႉတၢင်းၶွမ်ႊပၼီႊ ႁပ်ႉသိုဝ်ႉ ၶူဝ်းႁႆႈၶူဝ်းသူၼ် ႁႂ်ႈၸၢင်ႈသူင်ႇၶၢႆတေႃႇ မိူင်းႁိမ်းႁွမ်း၊ ႁဵတ်းပၼ်သဵၼ်ႈတႃႈသၢႆတၢင်း ႁႂ်ႈထိုင်ဝၢၼ်ႈထိုင်သူၼ်ဢေႃႈ” - ဝႃႈၼႆ။

ၸိူဝ်ႉမၢၵ်ႇလူၺ်

ပိုၼ်ႉတီႈ ၵုၼ်ပၢင် ၵုၼ်ၶူင်း ဢၼ်ၵူၼ်းၼုမ်ႇ ပႃႊတီႊမႂ်ႇသုင်ၸိုင်ႈတႆး လူင်းၼၼ်ႉ ၼွၵ်ႈသေပီႈၼွင်ႉတႆး ယင်းမီးၸၢဝ်းၶိူဝ်း လႃးႁူႇ ၊ လီႉသေႃး၊ ဝႃႉ လႄႈပီႈ ၼွင်ႉၸၢဝ်းၶိူဝ်းမႅၼ်းၸိူဝ်းၼႆႉယူႇသဝ်း။ ၵမ်ႈၼမ်ပိုၼ်ႉတီႈ ပဵၼ်ႁၢဝ်းႁူတ်ႈ သၼ်လွႆ ဢမ်ႇမီးၼႃး ႁဵတ်းၵၢၼ်ၽုၵ်ႇယႃႈလဵင်ႉတွင်ႉပိူင်လဵဝ်ၵူၺ်းလႄႈ ပေႃးၵႆႉလူင်းပိုၼ်ႉတီႈ ပၼ်တၢင်းႁူႉ တၢင်းႁၼ်သေ ၶိုင်ပၼ်လႆႈလွၵ်းၵၢတ်ႇတႄႉ ၵူၼ်းမိူင်းတေၵႆယၢၼ်ၵၢၼ်ၽုၵ်ႇၾိၼ်ႇ လႄႈ ယႃႈမဝ်းၵမ်ယူႇ ဝႃႈၼႆ။

ယႃႈၾိၼ်ႇ ဢၼ်ၽုၵ်ႇၼႂ်းလုမ်ႈၾႃႉ တင်းသဵင်ႈၼႆႉ ပေႃးမိူင်းဢႅပ်ႊၾၵၼ်ႊယဝ်ႉ ၸိုင်ႈမိူင်းႁူမ်ႈတုမ်မၢၼ်ႈ ပဵၼ်မိူင်းဢၼ်ၽုၵ်ႇၼမ် တီႈသွင်။ ၼႂ်းမိူင်းႁူမ်ႈတုမ်မၢၼ်ႈပတ်းပိုၼ်ႉၼႆႉ မိူင်းတႆးဢွၵ်ႇယႃႈလမ် 96% ။ လိူဝ်ၼၼ်ႉ ယႃႈမဝ်းၵမ် ဢၼ်ႁဵတ်းႁႂ်ႈၵူၼ်းသူႇၵိၼ်သမ်း ထိုင်ႉထိုဝ် ၼူၵ်ႇတိုဝ်  ယွင်ႇမႃႈ မိူၼ်ၼင်ႇယႃႈဢႆႊသ်၊ ယႃႈၽွင်ၶၢဝ်၊ ယႃႈမႃႉ ၸိူဝ်းၼႆႉၵေႃႈ ႁဵတ်းဢွၵ်ႇၼႂ်းမိူင်းတႆးၵမ်ႈၼမ်။
ပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၼႆႉ ၵိုတ်းတိုၵ်း ၵေႃႈသၢင်ႈလွင်ႈငမ်းယဵၼ် တင်းလူင်ပွင်ၸိုင်ႈမၢၼ်ႈ ၸၼ်ႉမိူင်းႁူမ်ႈတုမ်။ ပိူဝ်ႈတႃႇၵိုတ်းတိုၵ်းတူဝ်ႈမိူင်းၼၼ်ႉၵေႃႈ ၶဝ်ႈပႃးပဵၼ်လုၵ်ႈၸုမ်း ၸုမ်းၵပ်းသၢၼ်ၵိုတ်းတိုၵ်းတူဝ်ႈမိူင်း NCCT ။

ၸဝ်ႈၶိုၼ်းသႂ် ဢၼ်ပဵၼ်ႁူဝ်ၼႃႈၾၢႆႇပၵ်းတႃတူၺ်း ယႃႈမဝ်းၵမ်ၸိုင်ႈတႆး ယၢမ်ႈလၢတ်ႈဝႃႈ- ၵူၼ်းမိူင်းတႆးၼႆႉ ပေႃးႁဵတ်းၵၢၼ်ႁႃၵိၼ်လဵင်ႉတွင်ႉ ဢဝ်သဵမ်ဝဵၵ်ႉလိၼ်မိူင်း 4 ၵမ်းၼႆႉ ၵမ်းၼိုင်ႈတႃႇလူႇတႃႇတၢၼ်း ၵမ်ႉထႅမ်ၵၢၼ်သႃသၼႃ။ ၵမ်းသွင် တႃႇလဵင်ႉလူၸုမ်းယိပ်းၵွင်ႈၵၢင်ႇ။ ၵမ်းသၢမ် ၵမ်ႉထႅမ်ၵၢၼ်ၵိၼ်လူႇ လူႉ တၢႆ ၼႂ်းဝၢၼ်ႈၼႂ်းသူၼ်။ ထႅင်ႈၵမ်းၼိုင်ႈ ၸင်ႇပဵၼ်ဢၼ်လဵင်ႉၼႃႈႁေႃတေႃႁိူၼ်းၸဝ်ႈၵဝ်ႇ။ ၵွပ်ႈၼၼ် ၵူၼ်းမိူင်းၼႆႉ ပေႃးၽုၵ်ႇယႃႈ ၸင်ႇလဵင်ႉလႆႈၼႃႈႁိူၼ်းတူဝ်ၵဝ်ႇလႄႈ ပေႃးတႃႇၵၢၼ်လူႇတၢၼ်း၊ လဵင်ႉသိုၵ်းမၢၼ်ႈ ၸုမ်းယိပ်းၵွင်ႈ တင်း ၸွႆႈထႅမ်ၵၢၼ်ၼႃႈဝၢၼ်ႈတႃသူၼ်- ဝႃႈၼႆ။